Go Bua ka Ntle le Madi​—“Phetogo e Kgolo go tša Kalafo”

KA TLASE ga sehlogo se se rego “Go Bua ‘ka Ntle le Madi,’” makasine wa Maclean’s o begile gore dingaka Canada ka moka di “thomile mekgwa e mefsa yeo ka mo e ka bago lebaka la ka godimo ga nywaga e mehlano e fetilego, e fetošitšego seo se bitšwago go bua ka ntle le madi phetogo e kgolo go tša kalafo.” Brian Muirhead, ngaka e alafago ka go hwiša bogogoma kua Winnipeg’s Health Sciences Centre, ke yo mongwe wa dingaka tšeo. Ke eng seo se hlohleleditšego go tsoma ga gagwe dikalafo tše dingwe tše di sa dirišego madi?

Ka 1986, Dr. Muirhead o ile a lebana le tlhohlo ya go bua mokgalabje wa nywaga e 70 yo a bego a e-⁠na le dišo tša ka teng tšeo di tšwago madi, yoo ka baka la ditumelo tša gagwe tše di theilwego Beibeleng bjalo ka yo mongwe wa Dihlatse tša Jehofa, a ilego a kgopela kalafo yeo e sa nyakego tšhelo ya madi. (Ditiro 15:​28, 29) Maclean’s e bega gore Dr. Muirhead “o ile a retologela go dirišeng mokgwa wo o šomišwago ganyenyane wa go tšhela motswako wa saline molwetšing bakeng sa go boloka kgateletšo ya gagwe ya madi e le godimo. Mogato wo o ile wa atlega gomme o ile wa tiiša tumelo e dutšego e gola ya Muirhead ya gore ‘re be re dutše re nea ditšhelo tše dintši kudu tša madi. Ke ile ka nagana gore e be e le nako ya go hlahloba mekgwa e mengwe.’”

Go tsoma go bua mo go sa dirišego madi go ile gwa “tutuetšwa bobedi ke go tshwenyega ka kabo ya nakong e tlago ya madi a neelwago​—⁠le ke dipoifo tša balwetši ba bantši tša go hwetša twatši ya bolwetši tšhelong.” Ka thušo ya nyakišišo ya dingaka tše di nago le bokgoni, ga se feela Dihlatse tša Jehofa tše di ilego tša holega eupša le ba bangwe ba bantši. Maclean’s e re: “Ka ntle le go tloša go nyakega ga ditšhelo maemong a mantši, go bua ka ntle le madi go fokotša kotsi​—⁠go sa šetšwe gore e ka ba e le e nyenyane gakaakang⁠—​ya go fetelwa go tšwa mading a šilafetšego.” Eupša gaešita le madi a “hlwekilego” a ka tliša kotsi ya go fetelwa ka go gateletša ka lebakanyana tshepedišo ya molwetši ya go lwantšha malwetši.

Ke eng seo se thekgago tumelo e tiilego ya Dihlatse tša Jehofa mabapi le dikalafo tše dingwe tša go se diriše madi? Mo gongwe o ka thabela go bala poroutšha ya Madi a ka Phološa Bjang Bophelo bja Gago? Dihlatse tša Jehofa di tla thabela go e abelana le wena.