Lethabo la Bao ba Sepelago Seetšeng
Lethabo la Bao ba Sepelago Seetšeng
“Tlang re sepeleng seetšeng sa Morêna.”—JESAYA 2:5.
1, 2. (a) Seetša ke sa bohlokwa gakaaka’ng? (b) Ke ka baka la’ng temošo ya gore lefsifsi le tla aparetša lefase e le ya bohlokwa?
JEHOFA ke Mothopo wa seetša. Beibele e mmitša “Mmei wa letšatši ya ba seetša mosexare, Mmei wa melaô e bušaxo kxwedi le dinaledi ya ba dietša tša bošexo.” (Jeremia 31:35; Psalm 8:3) Ke Yena a bopilego letšatši la rena, leo ge e le gabotse e lego sebešo se segolo sa nuclear seo se ntšhetšago bogolo bja matla sebaka-bakeng, a mangwe a le ka sebopego sa seetša le phišo. Diphesente tše dinyenyane kudu tša matla ao, tšeo di re fihlelelago e le seetša sa letšatši di thekga bophelo lefaseng le. Ka ntle ga seetša sa letšatši, re be re ka se be gona. Lefase e be e tla ba polanete e se nago bophelo.
2 Re dutše re nagana ka se, re ka kwešiša seo se bolelwago ke boemo bjo bo hlalositšwego ke moporofeta Jesaya. O itše: “Še-leo lefsifsi le khurumeditše lefase, boso bo thibile dithšabeng.” (Jesaya 60:2) Go ba gona, se ga se bolele lefsifsi le le tlwaelegilego. Jesaya o be a sa bolele gore ka letšatši le lengwe letšatši, kgwedi le dinaledi di tla kgaotša go phadima. (Psalme 89:36, 37; 136:7-9) Go e na le moo, o be a bolela ka lefsifsi la moya. Eupša lefsifsi la moya ke leo le bolayago. Ge e le gabotse, re ka se kgone go phela ka ntle le seetša sa moya go swana le ge re ka se kgone go phela ka ntle le seetša sa kgonthe.—Luka 1:79.
3. Ka baka la mantšu a Jesaya, ke eng seo Bakriste ba swanetšego go se dira?
3 Ka baka la se, ke gabohlokwa go lemoga gore mantšu a Jesaya, gaešita le ge a phethagetše go Juda ya bogologolo, a phethagala kudu lehono. Ee, mehleng ya rena lefase le apareditšwe ke lefsifsi la moya. Boemong bjo bo bjalo bjo kotsi, seetša sa moya ke sa bohlokwa kudu. Ke ka baka leo Bakriste ba dirago gabotse go kwa keletšo ya Jesu e rego: “Seetša [sa lena] a se bônêxêlê batho.” (Mateo 5:16) Bakriste ba botegago ba ka bonegela ba ikokobeditšego ba lego lefsifsing, gomme ka go rialo ba ba nea sebaka sa go hwetša bophelo.—Johane 8:12.
Mehla ya Lefsifsi Isiraeleng
4. Mantšu a Jesaya a boporofeta a ile a phethagala neng la mathomo, eupša ke boemo bofe bjoo bo bego bo šetše bo le gona mehleng ya gagwe ka noši?
4 Mantšu a Jesaya ao a lego mabapi le lefsifsi leo le apareditšego lefase a ile a phethagatšwa la mathomo ge Juda e be e le lešope gomme batho ba yona ba išitšwe bothopša Babele. Lega go le bjalo, gaešita le pele ga moo, mehleng ya Jesaya ka noši ditšhaba tše dintši di be di šetše di apareditšwe ke lefsifsi la moya, e lego therešo yeo e ilego ya mo tutueletša go eletša magagabo ka gore: “Hee lena ba sethšaba sa Jakobo, tlang re sepeleng seetšeng sa Morêna”!—Jesaya 2:5; 5:20.
5, 6. Ke dilo dife tšeo di tlaleleditšego lefsifsing la mehleng ya Jesaya?
5 Jesaya o porofetile Juda “mehleng ya Usia le Jothama le Ahasi le Hiskia dikxoši tša Juda.” (Jesaya 1:1) E be e le nako ya khuduego ya tša dipolitiki, boikaketši bja bodumedi, kgobogo ya tša boahlodi le go gatelelwa ga badiidi. Gaešita le nakong ya dipušo tša dikgoši tše di botegago, tše bjalo ka Jothama, dialetara tša medimo ya maaka di be di ka bonwa ditlhoreng tša meboto e mentši. Boemo e be e le bjo šoro kudu ka tlase ga dikgoši tšeo di sa botegego. Ka mohlala, Kgoši Ahasi yo kgopo o ile a ba a fihla bokgoleng bja go direla modimo Moloko sehlabelo ka bana ba gagwe tirelong ya tša dihlabelo. Leo e be e le lefsifsi e le ka kgonthe!—2 Dikxoši 15:32-34; 16:2-4.
6 Boemo bja ditšhaba-tšhaba le bjona e be e le bjo bo fsifetšego. Moaba, Edomo le Filisita di be di tšhošetša go ka hlasela di le mellwaneng ya Juda. Mmušo wa ka leboa wa Isiraele, gaešita le ge o be o tswalana ka madi, e be e le lenaba la kgonthe. Ka leboa-boa, Siria e be e tšhošetša khutšo ya Juda. Sa kotsi le go feta e be e le Asiria e sehlogo, e be e le šoro kudu, yeo e bego e phela e tsoma dibaka tša go katološa matla a yona. Nakong ya go porofeta ga Jesaya, Asiria e ile ya fenya setšhaba sa Isiraele ka mo go feletšego gomme ya nyaka e fediša Juda. Ka nako e nngwe metse yohle yeo e šireleditšwego kua Juda e be e le ka diatleng tša Asiria, ka ntle le Jerusalema.—Jesaya 1:7, 8; 36:1.
7. Isiraele le Juda di ile tša kgetha tsela efe, gomme Jehofa o ile a arabela bjang?
7 Batho ba Modimo ba kgwerano ba ile ba welwa ke dikotsi tše bjalo ka gobane Isiraele le Juda di be di sa mmotegele. Go etša bao go bolelwago ka bona pukung ya Diema, ba be ‘ba tlogetše mmila wa go loka, ba yo swara ditsela tša lefsifsi.’ (Diema 2:13) Lega go le bjalo, le ge Jehofa a be a befeletšwe batho ba gagwe, ga se a ba lahla ka mo go feletšego. Go e na le moo, o ile a tšweletša Jesaya le baporofeta ba bangwe gore ba nee seetša sa moya bakeng sa motho le ge e le ofe setšhabeng yo a bego a sa dutše a tsoma go hlankela Jehofa ka potego. Seetša seo se ilego sa newa ka baporofeta ba e be e le sa bohlokwa e le ka kgonthe. Se be se nea bophelo.
Mehla ya Lefsifsi Lehono
8, 9. Ke dilo dife tšeo di tlaleletšago lefsifsing la lefase lehono?
8 Boemo bja mehleng ya Jesaya bo be bo swana kudu le maemo a lehono. Mehleng ya rena, baetapele ba batho ba furaletše Jehofa le Kgoši ya gagwe yeo e beilwego sedulong sa bogoši e lego Jesu Kriste. (Psalme 2:2, 3) Baetapele ba bodumedi ba Bojakane ba forile mehlape ya bona. Baetapele ba bjalo ba ipolela gore ba hlankela Modimo, eupša ge e le gabotse ba bantši ba bona ba godiša medimo ya lefase le—botšhaba, tša bohlabani, lehumo le batho ba ba tumilego—go se sa bolelwa ka go ruta dithuto tša boheitene.
9 Mafelong ka go latelelana ga ona, madumedi a Bojakane a ile a akaretšwa dintweng le thulanong ya selegae yeo e bontšhago go fsielelwa ga moloko ruri le ditiro tše dingwe tša bošoro. Go feta moo, go e na le gore a emele ka go tia boitshwaro bjo bo theilwego Beibeleng, madumedi a mantši a a bo hlokomologa goba a thekga kudu mekgwa e gobogilego e swanago le bootswa le bosodoma. Ka baka la go gana ditekanyetšo tša Beibele mo go bjalo, mehlape ya Bojakane e swana le batho bao mopsalme wa bogologolo a bolelago ka bona ge a re: “Fêla, xa ba lemoxe, xa ba eletšêxe; ba swere tsela ya lefsifsi.” (Psalme 82:5) Ka kgonthe, Bojakane, go swana le Juda ya bogologolo, bo lefsifsing le legolo-golo.—Kutollo 8:12.
10. Ke bjang seetša se bonegago lefsifsing lehono, gomme ba boleta ba holega bjang?
10 Gare ga lefsifsi le le bjalo, Jehofa o dira gore seetša se bonege bakeng sa ba boleta. Bakeng sa go dira se, o diriša bahlanka ba gagwe ba tloditšwego ba mo lefaseng, “molaki e a bôtêxaxo yo bohlale,” gomme ba ba “bônêxa byalo ka dietša lefaseng.” (Mateo 24:45; Ba-Filipi 2:15) Sehlopha seo sa molaki, se thekgwa ke bagwera ba sona ba “dinku tše dingwê” ba dimilione, se bonagatša seetša sa moya seo se theilwego Lentšung la Modimo, Beibele. (Johane 10:16) Lefaseng le leo le fsifetšego, seetša se se bjalo se nea ba boleta kholofelo, se ba thuša gore ba be le tswalano le Modimo, gomme sa ba thuša gore ba pheme dikotsi tša moya. Ke sa bohlokwa, se nea bophelo.
“Ke Rêta Leina la Xaxo”
11. Ke tsebišo efe yeo Jehofa a ilego a dira gore e hwetšagale mehleng ya Jesaya?
11 Mehleng ya lefsifsi yeo Jesaya a phetšego go yona gaešita le mehleng ya lefsifsi le legolo ya ka morago ga moo ge ba-Babele ba be ba išitše setšhaba sa Jehofa bothopša, ke tlhahlo ya mohuta ofe yeo Jehofa a ilego a e nea? Ka ntle le go nea tlhahlo ya boitshwaro, o ile a bolela e sa le pele ka mo go kwagalago kamoo a bego a tla phetha merero ya gagwe ka gona mabapi le batho ba gagwe. Ka mohlala, ela hloko diporofeto tšeo di kgahlišago tšeo di lego go Jesaya dikgaolo 25 go ya go 27. Mantšu ao a lego dikgaolong tše a bontšha kamoo Jehofa a ilego a šomana le ditaba ka gona morago nakong yeo le kamoo a šomanago le tšona ka gona lehono.
12. Ke polelo efe e tšwago pelong yeo Jesaya a e bolelago?
12 Sa pele, Jesaya o tsebatša gore: “Morêna, O Modimo wa-ka! Ke a Xo xodiša. Ke rêta leina la xaxo.” A polelo e tšwago pelong gakaakang ya tumišo! Eupša ke eng seo se ilego sa tutueletša moporofeta gore a rapele thapelo e bjalo? Lebaka le legolo le utollwa karolong ya bobedi ya temana, moo re balago gore: “Xobane ó [Jehofa] dira mehlôlô, tše O di rerilexo kxalê ké therešô, di tiile.”—Jesaya 25:1.
13. (a) Ke tsebo efe yeo e ilego ya matlafatša tebogo ya Jesaya go Jehofa? (b) Ke bjang re ka ithutago go tšwa mohlaleng wa Jesaya?
13 Mehleng ya Jesaya, Jehofa o ile a direla Isiraele dilo tše dintši tše di kgahlišago, gomme tše di ile tša begwa ka go ngwalwa. Go bonagala Jesaya a be a tlwaelane kudu le mengwalo ye. Ka mohlala, o be a tseba gore Jehofa o ile a ntšha batho ba gagwe bohlankeng Egipita gomme a ba phološa bogaleng bja madira a Farao Lewatleng le Lehwibidu. O be a tseba gore Jehofa o ile a etelela batho ba gagwe pele lešokeng gomme a ba tliša Nageng ya Kholofetšo. (Psalme 136:1, 10-26) Dipego tše bjalo tša histori di bontšhitše gore Jehofa Modimo ke yo a botegago le yo a ka botwago. ‘Merero’ ya gagwe—dilo ka moka tšeo a di rerilego—e a phethagala. Tsebo e nepagetšego yeo Modimo a ilego a e nea e ile ya matlafatša Jesaya gore a tšwele pele a sepela seetšeng. Ka go rialo, Jesaya e bile mohlala o mobotse go rena. Ge e ba re ithuta ka kelohloko Lentšu la Modimo leo le ngwadilwego gomme re le diriša maphelong a rena, le rena re tla dula re le seetšeng.—Psalme 119:105; 2 Ba-Korinthe 4:6.
Motse o Sentšwe
14. Ke eng seo se ilego sa porofetwa ka motse, gomme go bonagala e be e le motse ofe?
14 Mohlala wa morero wa Modimo o hwetšwa go Jesaya 25:2, moo re balago gore: “Xobane motse wó O o dirile lešope, meaxô ya dibô O e dirile marakô; mešatê ya ba-ntlê xa e sa le metse, e ka se hlwê e axwa neng le neng.” Motse wo ke eng? Jesaya a ka ba a be a bolela ka tsela ya boporofeta ka Babele. Ka kgonthe, nako yeo Babele e ilego ya fetoga mokgobo feela wa mafsika e ile ya fihla.
15. Ke ‘motse ofe o mogolo’ wo o lego gona lehono, gomme ke eng seo se tlago go direga ka wona?
15 Na motse wo o boletšwego ke Jesaya go na le wo o swanago le wona lehono? Ee. Puku ya Kutollo e bolela ka “motse o moxolo woo o naxo le boxoši bya xo buša dikxoši tša lefase.” (Kutollo 17:18) Motse woo o mogolo ke “Babele o moxolo,” mmušo wa lefase ka bophara wa bodumedi bja maaka. (Kutollo 17:5) Lehono, karolo e kgolo ya Babele o Mogolo ke Bojakane, bjoo baruti ba bjona ba etelelago pele go ganetšeng modiro wa go bolela ka Mmušo wa batho ba Jehofa. (Mateo 24:14) Lega go le bjalo, go swana le Babele ya bogologolo, Babele o Mogolo kgaufsinyane e tla fedišwa, e ka se sa hlwa e tsoga le ka mohla.
16, 17. Manaba a Jehofa a ile a mo tumiša bjang mehleng ya bogologolo le mehleng yeno?
16 Ke eng se sengwe seo Jesaya a se porofetago mabapi le “meaxô ya dibô”? Ge a bolela le Jehofa, Jesaya o re: “Ke tšôna tše batho ba matla ba Xo rêtaxo ka tšôna; metse ya ’thšaba tše matla e Xo boifa ka ’baka leo.” (Jesaya 25:3) Ke bjang motse wo wa bonaba, e lego ‘motse wa ditšhaba tše matla,’ o tumišago Jehofa? Go ba gona, gopola seo se ilego sa direga ka kgoši e matla go di feta tšohle ya Babele, Nebukadinetsara. Ka morago ga phihlelo e šišinyago mogopolo yeo e bontšhago bofokodi bja gagwe, o ile a gapeletšega go bolela bogolo bja Jehofa le matla a Gagwe. (Daniele 4:34, 35) Ge Jehofa a bontšha matla a gagwe, gaešita le manaba a gagwe a gapeletšega go dumela mediro ya gagwe e matla, le ge e le ka go se rate.
17 Na Babele o Mogolo e kile ya gapeletšega go dumela mediro e matla ya Jehofa? Ee. Ntweng ya pele ya lefase, bahlanka ba Jehofa ba tloditšwego ba ile ba dira boboledi ka tlase ga tlaišo. Ka 1918 ba ile ba ya bothopšeng bya moya ge bahlankedi ba etelelago pele ba Mokgatlo wa Watch Tower ba be ba golegilwe. Modiro wa boboledi o rulagantšwego o ile wa nyaka o kgaotša ka mo go feletšego. Ke moka ka 1919, Jehofa o ile a ba tsošološa gomme a ba matlafatša gape ka moya wa gagwe, mo e lego gore ba ile ba thoma go phethagatša thomo ya go bolela ditaba tše dibotse lefaseng ka moka leo go agilwego go lona. (Mareka 13:10) Tše ka moka di be di porofetilwe pukung ya Kutollo, go akaretša le diphelelo tša gona go baganetši ba bona. Ba ba ile ba “swarwa ke xo thšoxa ba lothša Modimo wa lexodimo.” (Kutollo 11:3, 7, 11-13) Ga se gore ba ile ba sokologa ka moka, eupša ba be ba gapeletšega go lemoga modiro o matla wa Jehofa mo nakong ye, go etša ge Jesaya a be a ile a bolela e sa le pele.
“ ’Thšabêlô sa Babôtla”
18, 19. (a) Ke ka baka la’ng baganetši ba ile ba palelwa ke go roba potego ya batho ba Jehofa? (b) ‘Megobo ya ba sehlogo’ e tla kokobetšwa bjang?
18 Ga bjale ge a retologela ditirišanong tše botho tša Jehofa le bao ba sepelago seetšeng, Jesaya o re go Jehofa: “Xobane O ’thšabêlô sa babôtla, O ’thšabêlô sa badiidi xe ba hlaka, O bokhutô ditimong, O moriti xe xo fiša, xe sehloxo sa baxale sè ka pula ya lefoká è khutilwe ka morakô [“bjalo ka lefula ge le tia morako,” PK]. Mašata a ba-ntlê ma-etša-phišô lešokeng, O a kokobeditše. Phišô ya fêla ka thiti ya leru; dikati [“megobo,” PK] tša ba sehloxo di kokobetše.”—Jesaya 25:4, 5.
19 Ga e sa le go tloga ka 1919, bagateledi ba ile ba leka selo se sengwe le se sengwe gore ba robe potego ya barapedi ba therešo, eupša ba paletšwe. Ka baka la’ng? Ka gobane Jehofa ke sebo le setšhabelo sa batho ba gagwe. O nea tšhireletšo e fodilego phišong e tukago ya tlaišo gomme o eme bjalo ka morako o tiilego malebana le mafula a kganetšo. Rena bao re sepelago seetšeng sa Modimo re lebeletše pele ka kgodišego nakong ya ge ‘megobo ya ba sehlogo e tla be e kokobeditšwe.’ Ee, re letetše ka tlhologelo letšatši la ge manaba a Jehofa a tla be a fedišitšwe.
20, 21. Ke monyanya ofe wo Jehofa a ilego a o dira, gomme monyanya woo o tla akaretša eng lefaseng le lefsa?
20 Jehofa o dira se se fetago go fo šireletša bahlanka ba gagwe. O a ba hlokomela bjalo ka Tate wa bona yo lerato. Ka morago ga go lokolla batho ba gagwe go Babele o Mogolo ka 1919, o ile a ba direla monyanya wa phenyo, motlalo wa dijo tša moya. Se se ile sa bolelwa e sa le pele go Jesaya 25:6, moo re balago gore: “Morêna wa mašaba ó dirêla dithšaba ka moka monyanya thabeng yé, monyanya wa makhura, wa dinwewa tše monate, wa dinwewa tše di hlotlilwexo.” Re šegofaditšwe gakaakang ka go kopanela monyanyeng woo! (Mateo 4:4) “Tafola ya Jehofa” ka kgonthe e tletše ka dilo tše dibotse tša go lewa. (1 Ba-Korinthe 10:21, NW) Ka “molaki e a botexaxo le yo bohlale,” re newa selo le ge e le sefe seo re ka se nyakago ka kwešišo ya moya.
21 Le gona go sa na le mo gontši monyanyeng wo o dirilwego ke Modimo. Monyanya wa moya wo re o thabelago mo nakong ye o re gopotša ka motlalo wa dijo tša kgonthe tšeo di tlago go ba gona lefaseng le lefsa leo Modimo a le holofeditšego. Ke moka, “monyanya wa makhura” o tla akaretša motlalo wa dijo tša kgonthe. Ga go yo a tlago go swarwa ke tlala ka kwešišo ya nama le ya moya. Yeo e tla ba kimollo e kgolo gakaakang bakeng sa babotegi bao ba rategago bao mo nakong ye ba tlaišegago ka baka la “ditlala” tšeo di boletšwego e sa le pele tšeo e lego karolo ya “pontšho” ya go ba gona ga Jesu! (Mateo 24:3, 7, NW) Mantšu a mopsalme ke ao a homotšago e le ka kgonthe go bona. O itše: “Xo tlo ba le mohora wa mabêlê mo naxeng; ’phoxong tša thaba meré ya dienywa e tlo xwaša.”—Psalme 72:16.
22, 23. (a) Ke ‘lešela’ goba ‘lešira lefe leo le širilego,’ leo le tla tlošwago, gona bjang? (b) ‘Kgobogo ya batho ba Jehofa’ e tla tlošwa bjang?
22 Bjale theetšang kholofetšo e botse le go feta. Ge a bapetša sebe le lehu le ‘lešela’ goba “ ’šira le le širilexo,” Jesaya o re: “Thabeng yé Morêna ó tlo tloša ’šira le le širilexo ’thšaba tšohle, ’šêla le le bipilexo ba-ntlê bohle.” (Jesaya 25:7) Anke o nagane! Sebe le lehu, tšeo di ilego tša imela batho bjalo ka kobo yeo e hupetšago, di ka se sa hlwa di e-ba gona. Re hlologetšwe gakaakang letšatši la ge mehola ya sehlabelo sa Jesu sa topollo e tla be e dirišwa ka botlalo go batho ba kwago le bao ba botegago!—Kutollo 21:3, 4.
23 Ge a bolela ka nako yeo e kgahlišago, moporofeta yo a buduletšwego o re kgonthišetša ka gore: “Lehu ó [Modimo] tlo le tloša ka xo sa felexo; Mong ’a bohle Morêna ó tlo phomola mexôkxô mahlong ohle; ’me kxoboxô ya sethšaba s’axwe ó tlo e široša dinaxeng ka moka; xobane Morêna ó r’yalo.” (Jesaya 25:8) Ga go na motho yo a tlago go hwa lehu la tlhago goba a lla ka baka la go lahlegelwa ke moratiwa wa gagwe. A phetogo e šegofaditšwego gakaakang! Go feta moo, lefaseng ga go na moo go tla kwewago kgobogo le phatlalatšo ya maaka tšeo Modimo le bahlanka ba gagwe ba di kgotleletšego ka nako e telele gakaakaa. Ke ka baka la’ng di ka se sa kwewa? Ka gobane Jehofa o tla tloša mothopo wa tšona—tatago maaka, Sathane Diabolo, gotee le peu ya Sathane ka moka.—Johane 8:44.
24. Bao ba sepelago seetšeng ba arabela bjang medirong e matla ya Jehofa yeo a ba direlago yona?
24 Ge ba dutše ba naganišiša ka diponagatšo tše bjalo tša matla a Jehofa, bao ba sepelago seetšeng ba tutueletšega go goeletša ka gore: “Bônang, Modimo wa rena šó, yo re mmotilexo ’me a re phološa; ké Yêna Morêna yo re mmotilexo; a re hlalaleng re thabêlê phološô ya xaxwe.” (Jesaya 25:9) Kgaufsinyane, batho ba lokilego ba tla ba le mabaka ohle a go thaba. Lefsifsi le tla be le tlošitšwe ka mo go feletšego, gomme batho ba botegago ba tla apešwa ke seetša sa Jehofa ka mo go sa felego. Na go na le kholofelo le ge e le efe yeo e ka bago e kgahlišago go feta ye? Ga e gona le gatee!
Na o ka Hlalosa?
• Ke ka baka la’ng lehono go le bohlokwa go sepela seetšeng?
• Ke ka baka la’ng Jesaya a ile a reta leina la Jehofa?
• Ke ka baka la’ng manaba le ka mohla a ka se ke a roba potego ya batho ba Modimo?
• Ke ditšhegofatšo dife tše di humilego tšeo di letetšego bao ba sepelago seetšeng?
[Dipotšišo tša Thuto]
[Seswantšho go letlakala 13]
Badudi ba Juda ba ile ba direla Moloko dihlabelo ka bana ba bona
[Diswantšho go letlakala 15]
Tsebo ya go tseba ditiro tše matla tša Jehofa e ile ya tutuetša Jesaya gore a rete leina la Jehofa
[Seswantšho go letlakala 16]
Baloki ba tla apešwa ke seetša sa Jehofa ka mo go sa felego