Paradeise ya Moya ke Eng?

GUSTAVO o godišeditšwe motseng o monyenyane kua Brazil. * O ile a rutwa go tloga bjaneng gore batho ba ba lokilego ba ya legodimong ka morago ga lehu. O be a sa tsebe selo ka morero wa Modimo wa gore ka letšatši le lengwe batho ba ba botegago ba tla thabela bophelo bjo bo phethagetšego paradeiseng ya lefaseng. (Kutollo 21:​3, 4) Le gona, go be go na le selo se sengwe gape seo a bego a sa se tsebe. O be a sa lemoge gore gaešita le mo nakong ye a ka ba paradeiseng ya moya.

Na o kile wa kwa ka paradeise yeo ya moya? Na o tseba seo e lego sona le seo se nyakegago gore o be karolo ya yona? Motho le ge e le ofe yo a nyakago go thaba e le ka kgonthe o swanetše go tseba ka paradeise yeo.

Go Hwetša Paradeise ya Moya

Go bolela gore gaešita le lehono motho a ka kgona go phela paradeiseng go ka kwagala e le mo go se nago tlhaologanyo. Lefase le ga se paradeise le gatee. Go na le batho ba bantši kudu bao ba welwago ke seo kgoši ya bogologolo ya mo-Hebere e se hlalositšego ge e re: “Ka bôna mexôkxô ya bahlaki, bà se n’e mohomotši. Ka bôna bahlakiši ba bôná bà na le matla, bôná bà se n’e mohomotši.” (Mmoledi 4:⁠1) Ba dimilione tše makgolo ba tlaišega ka tlase ga tshepedišo e gobogilego ya tša dipolitiki, ya bodumedi le ya tša boiphedišo, gomme ga ba na kimollo, ga ba na “mohomotši.” Ba bangwe ba bantši ba katanela go lefa dikoloto tša bona, ba godiša bana ba bona, gomme ba dira dilo tše dingwe tše dintši gore ba tšwele pele ba phela. Ba le bona go bonala ba tla thabela go hwetša mohomotši, motho yo a tlago go hwefola morwalo ganyenyane feela. Go bona ka moka, bophelo le gatee ga se bja paradeise.

Ka gona, paradeise ya moya e gokae? Go ba gona, lentšu la Seisemane bakeng sa “paradeise” le tswalane le mantšu a Segerika, se-Peresia le Sehebere ao ka moka a rwelego mogopolo wa phaka goba serapana, lefelo la khutšo le le le lapološago. Beibele e holofetša gore ka letšatši le lengwe lefase e tla ba paradeise ya kgonthe, legae le le swanago le serapana bakeng sa moloko wa batho o se nago sebe. (Psalme 37:​10, 11) Re sa dutše re nagana ka se, re bona gore paradeise ya moya ke tikologo yeo e kgahlišago mahlo le yeo e lapološago methapo, yeo e dumelelago motho sebaka sa go thabela khutšo le mogagabo gotee le Modimo. Lehono bjalo ka ge Gustavo a hweditše, paradeise e bjalo e gona, gomme e akaretša palo e golago ya batho.

Ge a e-na le nywaga e 12, Gustavo o ile a dira phetho ya gore o nyaka go ba moruti wa Roma Katholika. Ka tumelelo ya batswadi ba gagwe, o ile a ya seminareng ya bodumedi. Moo o ile a tsenela tša mmino, dipontšho le dipolitiki tšeo di bego di kgothaletšwa ke kereke bakeng sa go goketša bafsa. O be a tseba gore moruti o swanetše go ineela bathong le gore a ka se ke a nyala. Lega go le bjalo, ba bangwe ba baruti le bao ba bego ba le gona seminareng bao Gustavo a bego a ba tseba, ba be ba tsenetše mekgwa e gobogilego ya boitshwaro. A le tikologong e bjalo, Gustavo kapejana o ile a thoma go nwa kudu. Go molaleng gore o be a se a hlwa a hwetša paradeise ya moya.

Ka letšatši le lengwe Gustavo o ile a bala pampišana ya Beibele yeo e bego e bolela ka paradeise ya lefaseng. E ile ya mo dira gore a naganišiše ka morero wa bophelo. O re: “Ke ile ka  thoma go bala Beibele leboelela, eupša ke be ke sa e kwešiše. Ga se ka bona gaešita le gore Modimo o na le leina.” O ile a tlogela seminare gomme a ya go Dihlatse tša Jehofa go yo tsoma thušo bakeng sa go kwešiša Beibele. Ka morago ga moo, o ile a dira tšwelopele ya kapejana gomme go se go ye kae a neela bophelo bja gagwe go Modimo. Gustavo o be a ithuta ka paradeise ya moya.

Batho ba Leina la Modimo

Gustavo o ile a ithuta gore leina la Modimo la Jehofa, ga e fo ba feela ntlha e thabišago bakeng sa morutwana wa Beibele. (Ekisodo 6:⁠3) Ke karolo e bohlokwa ya borapedi bja therešo. Jesu o rutile balatedi ba gagwe go rapela gore: “Tata-wešo wa maxodimong! Leina la xaxo a le kxêthwê.” (Mateo 6:⁠9) Ge a bolela ka ba-Ntle bao ba bilego Bakriste, morutiwa Jakobo o itše: ‘Modimo o etetše batho ba ba-ntle . . . a ba amogela, ya ba ba leina la gagwe.’ (Ditiro 15:​14) Lekgolong la pele la nywaga, ‘batho ba leina la gagwe’ e be e le phuthego ya Bokriste. Na go na le batho ba leina la Modimo lehono? Ee, gomme Gustavo o ile a thoma go lemoga gore Dihlatse tša Jehofa ke bona batho bao.

Dihlatse tša Jehofa di mafolofolo dinageng tše 235 le mašemong. Di dira palo ya badiredi ba dimilione tše fetago tše tshela gomme ba bangwe bao ba thabelago ba dimilione tše seswai ba bile gona dibokeng tša tšona. Di tsebja ka bophara ka bodiredi bja tšona bja phatlalatša, di phethagatša mantšu a Jesu a rego: “Gomme ditaba tše tše dibotse tša mmušo di tla bolelwa lefaseng ka moka leo go agilwego go lona gore e be bohlatse go ditšhaba ka moka.” (Mateo 24:​14, NW) Ka gona, ke ka baka la’ng Gustavo a ile a ikwa gore o hweditše paradeise ya moya ka go kopanela le Dihlatse tša Jehofa? O re: “Ke ile ka bapiša seo ke se bonego lefaseng le, e bile kudu-kudu seminareng, le seo ke se hweditšego gare ga Dihlatse tša Jehofa. Phapano e kgolo ke lerato leo le hwetšwago gare ga Dihlatse.”

Ba bangwe ba boletše ditlhaloso tše di swanago ka Dihlatse tša Jehofa. Miriam, kgarebe ya mo-Brazil, o itše: “Ke be ke sa tsebe kamoo nka bago yo a thabilego, gaešita le ka lapeng la-ka. Lekga la pele leo ke bonego lerato le šoma e bile gare ga Dihlatse tša Jehofa.” Monna yo a bitšwago Christian o itše: “Ka dinako tše dingwe ke be ke nwelela go dirišaneng le meoya, eupša bodumedi bo be bo se bohlokwa go nna. Ke be ke lebelela boemo bja-ka bo le bohlokwa kudu gotee le mošomo wa-ka ke le moentšineare. Lega go le bjalo, ge mosadi wa-ka a be a thoma go ithuta Beibele le Dihlatse tša Jehofa, ke ile ka bona phetogo e kgolo go yena. Le gona ke ile ka makatšwa ke lethabo le phišego tša basadi ba Bakriste bao ba bego ba mo etela.” Ke ka baka la’ng batho ba bolela dilo tše bjalo ka Dihlatse tša Jehofa?

Paradeise ya Moya ke Eng?

Selo se sengwe seo se dirago Dihlatse tša Jehofa gore di tšwelele e le tše arogilego ke tebogo ya tšona bakeng sa tsebo ya Beibele. Di dumela gore Beibele ke ya therešo le gore ke Lentšu la Modimo. Lega go le bjalo, ga di kgotsofatšwe ke feela go tseba dithuto tša motheo tša bodumedi bja tšona. Di na le lenaneo le le tšwelago pele la thuto ya motho ka noši le mmalo wa Beibele. Ge motho a kopanela le Dihlatse tša Jehofa ka nako e telele, ke moo a ithutago ka Modimo le ka thato ya Gagwe bjalo ka ge di utollwa ka Beibeleng.

Tsebo e bjalo e lokolla Dihlatse tša Jehofa dilong tšeo di amogago batho lethabo, tše bjalo ka ditumela-khwele le dikgopolo tše di gobatšago. Jesu o itše: “Therešô [e] tlo Le lokolla,” gomme Dihlatse tša Jehofa di hwetša se se le bjalo. (Johane 8:​32) Fernando yo a kilego a dirišana le meoya o re: “Go ithuta ka bophelo bjo bo sa felego e bile kimollo e kgolo. Ke be ke boifa gore nna goba batswadi ba-ka re tla hwa.” Therešo e lokolotše Fernando poifong ya gagwe ka lefase la meoya le seo se bitšwago bophelo ka morago ga lehu.

Ka Beibeleng, tsebo ya Modimo e tswalanywa kgaufsi le paradeise. Moporofeta Jesaya o itše:  “Xo ka se hlwê xo dirwa dibe, xo ka se hlwê xo senywa mo xo fêla dithabeng tše kxêthwa tša-ka, xobane xo tseba Morêna xo tlo tlala ’fase lohle bo-ka meetse xe a nabile lewatleng.”​—⁠Jesaya 11:⁠9.

Go ba gona, tsebo ka boyona ga se ya lekana bakeng sa go tliša khutšo yeo e boletšwego e sa le pele ke Jesaya. Motho o swanetše go dira ka go dumelelana le seo a ithutago sona. Fernando o boletše tlhaloso ye: “Ge motho a hlagolela dienywa tša moya, o tlaleletša paradeiseng ya moya.” Fernando o be a šupa mantšung a moapostola Paulo, yo a biditšego dika tše dibotse tšeo Mokriste a swanetšego go di hlagolela “dienywa tša môya.” O di lokeleditše e le “leratô, le lethabô, le moláô; ké xo se fêle pelo, le botho, le bonôlô, le pôtêxô le bolêta, le boithswarô.”​—⁠Ba-Galatia 5:​22, 23.

Na o ka bona lebaka leo ka lona go kopanela le sehlopha sa batho seo se katanelago go hlagolela dika tše bjalo go tlago go ba bjalo ka go ba paradeiseng e le ka kgonthe? Paradeise ya moya yeo e boletšwego e sa le pele ke moporofeta Tsefanya e tla ba gona gare ga batho ba bjalo. O itše: “[Ba] ka se hlwê [ba] dira bobe; [ba] ka se hlwê [ba] bua maaká, mo xanong xa bôná xo tlo hlôkwa ’leme la xo fora; ka xobane ba tlo ba mohlape wa xo fula wa hutama, xò se se se o thšošaxo.”​—⁠Tsefanya 3:⁠13.

Karolo e Bohlokwa ya Lerato

O ka ba o lemogile gore seenywa sa pele sa dienywa tša moya tšeo di boletšwego ke Paulo ke lerato. Se ke seka seo Beibele e bolelago go gontši ka sona. Jesu o itše: “Seo bohle ba tl’o xo tseba ka sôna xe Le le barutiwa ba-ka, ké xe Le na le leratanô.” (Johane 13:​35) Ke therešo gore Dihlatse tša Jehofa ga se tša phethagala. Ka dinako tše dingwe di ba le mathata a motho ka noši gare ga tšona go fo etša ge baapostola ba Jesu ba be ba e-⁠ba le wona. Eupša di ratana e le ka kgonthe, gomme di rapelela thekgo ya moya o mokgethwa ge di dutše di hlagolela seka se.

Ka baka leo, bogwera bja tšona ke bja moswana-noši. Ga go na le kgethollo ya meloko goba botšhaba bjo bo aroganyago gare ga tšona. Ge e le gabotse, Dihlatse tše dintši tšeo di ilego tša ikhwetša di kgakgetšwe ka gare ga boemo bja go fsielelwa ga morafo le polao ya semorafo ya molokwana-rite nywageng ya mafelelo ya lekgolo la bo-20 la nywaga, di ile tša šireletšana gaešita le ka go bea maphelo a tšona ka noši kotsing. Gaešita le ge di e-⁠tšwa ‘dithšabeng ka moka, le melokong ka moka, le merafong ka moka, le malemeng ka moka,’ di thabela botee bjoo go lego thata go bo kwešiša go fihlela o iponela bjona.​—⁠Kutollo 7:⁠9.

Paradeise Gare ga Bao ba Dirago Thato ya Modimo

Ga go na sebaka bakeng sa megabaru, boitshwaro bjo bo gobogilego le boithati paradeiseng ya moya. Bakriste ba botšwa gore: “Le se kê la ipapetša le ba mehla yeno; šatoxang ka xo mphsafala kxopolô, xore Le tlê Le hlaoloxanyê se e lexo thatô ya Modimo, e lexo se botse le se se kxahlišaxo, se e lexo sa botlalô.” (Ba-Roma 12:⁠2) Ge re phela maphelo a hlwekilego, a boitshwaro gomme re dira thato ya Modimo ka ditsela tše dingwe, re thuša go aga paradeise ya moya e bile re tlaleletša lethabong la rena. Carla o hweditše se e le sa therešo. O re: “Tate o nthutile go šoma ka thata gore ke be yo a ikemetšego ka tša ditšhelete. Eupša gaešita le ge dithuto tša yunibesithi di nneile maikwelo a polokego, ke be ke sa hwetše  botee bja lapa le polokego yeo e lego feela tsebo e tšwago Lentšung la Modimo e ka re neago yona.”

Ke therešo gore go thabela paradeise ya moya ga go tloše mathata a bophelo a mmele. Bakriste ba sa dutše ba babja. Ditšhaba tšeo ba dulago go tšona di ka ferekanywa ke dintwa tša semorafo. Ba bantši ba kgotleletše bodiidi. Lega go le bjalo, go ba le tswalano ya kgaufsi le Jehofa Modimo​—⁠e lego karolo ya bohlokwa kudu ya paradeise ya moya​—⁠go bolela gore re ka lebelela go yena bakeng sa thekgo. Gabotse-botse o re laletša gore re ‘lahlele merwalo ya rena go yena,’ gomme ba bantši ba ka hlatsela tsela e kgahlišago yeo a ba thekgilego ka yona maemong a thata kudu. (Psalme 55:​22; 86:​16, 17) Modimo o holofetša gore o tla ba le barapedi ba gagwe gaešita le “molapong wa moriti wa lehu.” (Psalme 23:⁠4) Go holofela tabeng ya go dula ga Modimo a itokišeditše go re thekga, go re thuša go boloka “khutšô ya Modimo, ye e fetaxo thlaoloxanyô yohle,” yeo e lego senotlelo se se išago paradeiseng ya moya.​—⁠Ba-Filipi 4:⁠7.

Go Tlaleletša Paradeiseng ya Moya

Batho ba bantši ba thabela go etela phakeng goba serapaneng. Ba rata go sepela-sepela go yona goba mohlomongwe go dula pankeng le go thabela tikologo. Ka tsela e swanago, ba bantši ba thabela go kopanela le Dihlatse tša Jehofa. Ba hwetša bogwera e le bjo bo lapološago, bja khutšo le bja go matlafatša. Lega go le bjalo, serapana se sebotse se nyaka go swarwa ka tlhokomelo ge e ba se tla dula e le paradeise. Ka mo go swanago, paradeise ya moya e gona lefaseng le leo le tlogago e se la paradeise, feela ka gobane Dihlatse tša Jehofa di e hlagolela gomme Modimo o šegofatša maiteko a tšona. Ka gona, ke bjang motho a ka tlaleletšago ka tsela e holago paradeiseng yeo?

Sa pele, o swanetše go kopanela le phuthego ya Dihlatse tša Jehofa, o ithute Beibele le tšona gomme o hwetše tsebo ya Beibele yeo e lego motheo wa paradeise ya moya. Carla o boletše gore: “Go ka se be le paradeise ya moya ka ntle le dijo tša moya.” Se se akaretša go bala Lentšu la Modimo ka mehla le go naganišiša ka seo o se balago. Tsebo yeo e hwetšwago e tla go batametša kgaufsi le Jehofa Modimo, gomme o tla thoma go mo rata. Le gona o tla ithuta go boledišana le yena ka thapelo le go mo kgopela tlhahlo le moya wa gagwe bakeng sa go go thekga ge o dutše o dira thato ya gagwe. Jesu o re boditše gore re phegelele thapelong. (Luka 11:​9-13) Moapostola Paulo o itše: “Le se kxaotše xo rapêla.” (1 Ba-Thesalonika 5:​17) Tokelo ya go boledišana le Modimo ka thapelo ka kgodišego e feletšego ya gore o a go kwa, ke karolo e bohlokwa ya paradeise ya moya.

Ge nako e dutše e e-⁠ya, bophelo bja gago bo tla kaonefatšwa ke seo o ithutago sona gomme mafelelong o tla rata go boledišana le ba bangwe ka sona. Ka gona, o tla kgona go kwa taelo ya Jesu e rego: “Seetša [sa lena] a se bônêxêlê batho ka mokxwa woo, xore ba bônê medirô e mebotse ya lena, ba tumišê Tata weno wa maxodimong.” (Mateo 5:​16) Go abelana le ba bangwe tsebo ya Jehofa Modimo le Jesu Kriste le go godiša lerato le legolo leo ba ba le bontšhitšego bathong go tliša lethabo le legolo.

Nako e a tla yeo ka yona lefase ka moka e tlago go ba paradeise ya kgonthe​—⁠lefelo le swanago le serapana leo le se nago tšhilafatšo le leo e lego legae le le swanetšego bakeng sa batho bao ba botegago. Go ba gona ga paradeise ya moya mo ‘dinakong tše hlobaetšago tšeo go lego thata go lebeletšana le tšona,’ ke bohlatse bja matla a Modimo le mohlala wa seo a ka kgonago go se phethagatša le seo a tlago se phethagatša nakong e tlago.​—⁠2 Timotheo 3:⁠1, NW.

Gaešita le mo nakong ye, bao ba thabelago paradeise ya moya ba bona phethagatšo ya Jesaya 49:​10 e rego: “Ba ka se hlwê ba e-⁠kwa tlala, ba ka se hlwê ba nyôrwa; ba ka se kê ba hlohlwa ke ditimo le letšatši; xobane Moxauxedi wa bôná ó tlo ba hlahla a ba iša didibeng tša meetse.” José o tla hlatsela go rereša ga seo. O ile a duma go ba seopedi sa go tuma, eupša o hweditše kgotsofalo e kgolo go hlankeleng Modimo le phuthego ya Bokriste. O re: “Ga bjale ke thabela bophelo bjo bo nago le morero. Ke ikwa ke šireletšegile ka gare ga borwarre bja Bokriste, gomme ke tseba Jehofa e le Tate yo lerato yo re ka mmotago.” Lethabo la José​—⁠le la ba bangwe ba dimilione go swana le yena​—⁠le hlalositšwe gabotse go Psalme 64:​10 e rego: “Moloki ó tlo ithabêla Moreneng, a khuta ka Yêna.” A tlhaloso e botse gakaakang ya paradeise ya moya!

[Mengwalo ya ka tlase]

[Seswantšho go letlakala 10]

Ge re dutše re thabela paradeise ya moya, re swanetše go thuša go e katološa!