Phološo Bakeng sa Bao ba Kgethago Seetša
Phološo Bakeng sa Bao ba Kgethago Seetša
“Morêna ké seetša sa-ka, le xo pholoxa xa-ka. Ke sa boifa mang?”—PSALME 27:1.
1. Ke ditokišetšo dife tšeo di neago bophelo tšeo Jehofa a di dirago?
JEHOFA ke Mothopo wa seetša sa letšatši seo se dirago gore bophelo lefaseng bo kgonege. (Genesi 1:2, 14) Gape e bile ke Mmopi wa seetša sa moya, seo se fedišago lefsifsi leo le bolayago la lefase la Sathane. (Jesaya 60:2; 2 Ba-Korinthe 4:6; Ba-Efeso 5:8-11; 6:12) Bao ba kgethago seetša ba ka bolela ka go dumelelana le mopsalme gore: “Morêna ké seetša sa-ka, le xo pholoxa xa-ka. Ke sa boifa mang?” (Psalme 27:1a) Lega go le bjalo, go etša ge go diragetše mehleng ya Jesu, bao ba ratago lefsifsi ba ka letela feela kahlolo e sa kgahlišego.—Johane 1:9-11; 3:19-21, 36.
2. Mehleng ya bogologolo, ke eng seo se ilego sa diragalela bao ba ilego ba gana seetša sa Jehofa le bao ba ilego ba theetša lentšu la gagwe?
2 Mehleng ya Jesaya, batho ba bantši ba kgwerano ya Jehofa ba ile ba gana seetša. Ka baka la seo, Jesaya o ile a bona go senywa ga mmušo wa ka leboa wa setšhaba sa Isiraele. Le gona, ka 607 B.C.E., Jerusalema le tempele ya yona di ile tša senywa gomme badudi ba Juda ba ile ba išwa bothopša. Lega go le bjalo, bao ba ilego ba theetša lentšu la Jehofa ba ile ba matlafatšwa gore ba ganetše bohlanogi bja mehleng yeo. Mabapi le 607 B.C.E., Jehofa o ile a holofetša gore bao ba ilego ba mo theetša ba be ba tla phologa. (Jeremia 21:8, 9) Lehono, rena bao re ratago seetša re ka ithuta go gontši go seo se diragetšego morago nakong yeo.—Ba-Efeso 5:5.
Lethabo la Bao ba Lego Seetšeng
3. Ke kholofelo efe yeo re ka bago le yona lehono, ke ‘setšhaba sefe se bolo’ seo re se ratago, gomme ke ‘motse ofe o tiilego’ woo “setšhaba” seo se nago le wona?
3 “Re n’e motse wo o tiilexo; merakô le maxôrô di beetšwe xo phološa [ke Modimo]. Bulang dikxôrô xo tsênê sethšaba se boló se-lata-pôtêxô.” (Jesaya 26:1, 2) A ke mantšu a tlhalalo a batho bao ba bego ba botile Jehofa. Ba-Juda bao ba botegago ba mehleng ya Jesaya ba ile ba lebelela go Jehofa, e sego go medimo ya maaka ya magagabo bona, e le Mothopo o nnoši wa kgonthe wa tšhireletšego. Lehono, re na le kholofelo e swanago. Go feta moo, re rata ‘setšhaba sa Jehofa se bolo’—“Ba-Isiraele ba Modimo.” (Ba-Galata 6:16; Mateo 21:43) Jehofa le yena o rata setšhaba se ka baka la boitshwaro bja sona bja potego. Ka tšhegofatšo ya gagwe, Isiraele ya Modimo e na le “motse o tiilexo,” mokgatlo o swanago le motse woo o e thekgago le go e šireletša.
4. Ke boemo bofe bja kgopolo bjo re dirago gabotse ge re bo hlagolela?
4 Bao ba lego ka gare ga “motse” wo ba tseba gabotse gore “dipelo [“tshekamelo,” NW] di thekxilwe, O [Jehofa] theile khutšô, khutšo ka xe xo botilwe wene [Jehofa].” Jehofa o thekga bao menagano ya bona e sekametšego go mmoteng gomme ba itumelelanya le melao ya gagwe ya motheo ya go loka. Ke ka baka leo babotegi kua Juda ba ilego ba kwa keletšo ya Jesaya e rego: “Bôtang Morêna ka mehla le mehla; xobane xe Le na le Yêna, Le na le Morêna Lentswê la mehleng.” (Jesaya 26:3, 4; Psalme 9:10; 37:3; Diema 3:5) Bao ba nago le boemo bjo bo bjalo bja kgopolo ba lebelela “Jah Jehofa,” (NW) e le Lefsika le nnoši la tšhireletšego. Ba thabela ‘khutšo e tšwelago pele’ le yena.—Ba-Filipi 1:2; 4:6, 7.
Go Kokobetšwa ga Manaba a Modimo
5, 6. (a) Babele ya bogologolo e ile ya kokobetšwa bjang? (b) Ke ka ditsela dife “Babele o moxolo” e ilego ya kokobetšwa?
5 Go thwe’ng ge e ba bao ba botago Jehofa ba tlaišega? Ga se ba swanela go boifa. Jehofa o dumelela dilo tše bjalo ka nakwana, eupša mafelelong o tliša kimollo, gomme bao ba bakago tlaišego ba lebane le kahlolo ya gagwe. (2 Ba-Thesalonika 1:4-7; 2 Timotheo 1:8-10) Ela hloko taba ya “motse-mophaxami” o itšego. Jesaya o re: “[Jehofa] o uša ba-dula-tletlolo, motse-mophaxami; ó o kokobetša fase-fase; ó o dixêla leroleng. O xatakêlwa ka maoto, maoto a bahlaki, dinaô tša babôtla.” (Jesaya 26:5, 6) Motse-mophagami wo go bolelwago ka wona mo e ka ba Babele. Motse wo o ile wa hlasela batho ba Modimo e le ka kgonthe. Eupša ke eng seo se ilego sa direga ka Babele? Ka 539 B.C.E., e ile ya thopša ke ba-Meda le ba-Peresia. A go kokobetšwa mo gogolo gakaakaang!
6 Mehleng ya rena mantšu a Jesaya a boporofeta a hlalosa gabotse seo se ilego sa diragalela “Babele o moxolo” ga e sa le go tloga ka 1919. Motse-mophagami woo o ile wa wa ka mo go hlabišago dihlong ngwageng woo ge o be o gapeletšega go lokolla batho ba Jehofa bothopšeng bja moya. (Kutollo 14:8) Seo se ilego sa direga ka morago e be e le se se kokobetšago le go feta. Sehlopha seo se senyenyane sa Bakriste se ile sa retologela go ‘gatakeleng’ yo e kilego ya ba mothopi wa sona. Ka 1922 se ile sa thoma go tsebatša go tla ga bofelo bja Bojakane, sa tsebatša go letšwa ga diphalafala tše nne tša barongwa tša Kutollo 8:7-12 le bo-joo ba bararo bao ba boletšwego e sa le pele go Kutollo 9:1–11:5.
“Tsela ya yo Boló e Moláleng”
7. Ke tlhahlo efe yeo bao ba retologelago seetšeng sa Jehofa ba e amogelago, ba holofela mang, gomme ke eng seo ba se tšeelago godimo?
7 Jehofa o nea phološo go bao ba retologelago seetšeng sa gagwe, gomme o ba hlahla tseleng ya bona, go etša ge Jesaya a bontšha ka gore: “Tsela ya yo boló e moláleng; xo loka mmila wa yo boló xe o lekêlanywa ke Wêna. Morêna, re lebeletše Wêna, le tsela ya moahlolêlô w’axo; dipelo di hloloxetšwe ’ina la xaxo, le dirêto [“dikgopotšo,” PK] tš’axo.” (Jesaya 26:7, 8) Jehofa ke Modimo wa toko, gomme bao ba mo rapelago ba swanetše go ela hloko ditekanyetšo tša gagwe. Ge ba dira bjalo, Jehofa o a ba hlahla, gomme o lekelelanya tsela ya bona. Ka go latela tlhahlo ya gagwe, ba ba ikokobeditšego ba bontšha gore ba holofela Jehofa gomme ba tšeela leina la gagwe godimo ka pelo ka moka—e lego “segopotšo” sa gagwe.—Ekisodo 3:15, NW.
8. Ke boemo bofe bja kgopolo bjo bo beago mohlala bjoo Jesaya a bo bontšhitšego?
8 Jesaya o ile a tšeela leina la Jehofa godimo. Seo se bonagala mantšung a gagwe a latelago a rego: “Pelo ya-ka e lala è Xo hloloxetšwe; le môya wa-ka o Xo phafoxêla ka teng xa-ka è sa le ka mesô; xobane xe lefase le ka ba le moahlolêlô w’axo, ba ba axilexo mo xo lôna ba ka rutwa tokô.” (Jesaya 26:9) Jesaya o be a hlologela Jehofa ‘ka moya wa gagwe’ le ka boyena bja gagwe bjohle. Bona moporofeta ka leihlo la kgopolo a diriša dinako tše bjalo tša go homola tša bošego bakeng sa go rapela Jehofa, a bolela dikgopolo tša gagwe tše di tseneletšego gomme a tsoma ka phišego thekgo le tlhahlo ya Jehofa. A mohlala o mobotse gakaakang! Go feta moo, Jesaya o ile a ithuta toko go tšwa dikahlolong tša Jehofa. Tabeng ye, o re gopotša ka go nyakega ga gore re be ba mafolofolo ka dinako tšohle, re dule re phakgame bakeng sa go lemoga thato ya Jehofa.
Ba Bangwe ba Kgetha Lefsifsi
9, 10. Ke ditiro dife tše botho tšeo Jehofa a ilego a di direla setšhaba sa gagwe se se sa botegego, eupša se ile sa arabela bjang?
9 Jehofa o ile a bontšha Juda botho bjo lerato ka tekanyo e kgolo, eupša ka mo go sa thabišego ga se bohle bao ba ilego ba arabela. Ka dinako tše dintši, ba bantši ba ile ba kgetha borabele le bohlanogi go e na le go kgetha seetša sa therešo ya Jehofa. Jesaya o itše: “Yo mobe—le xo setšwa—xa a ithute tokô; le mo naxeng ya mekxwa e mebotse ó fo senya; boxolo bya Morêna xa’ bo bône.”—Jesaya 26:10.
10 Mehleng ya Jesaya, ge letsogo la Jehofa le be le šireletša Juda malebana le manaba a yona, ba bantši ba ile ba gana go lemoga se. Ge a be a ba šegofatša ka khutšo ya gagwe, setšhaba ga se sa bontšha tebogo. Ka go rialo, Jehofa o ile a ba tlogelela gore ba hlankele ‘marena a mangwe,’ mafelelong a dumelela gore ba-Juda ba išwe bothopša Babele ka 607 B.C.E. (Jesaya 26:11-13) Lega go le bjalo, mafelelong mašaledi a setšhaba a ile a boela nageng ya gabo wona a hlwekišitšwe.
11, 12. (a) Ke bokamoso bofe bjoo bathopi ba ba-Juda ba bilego le bjona? (b) Ka 1919, ke bokamoso bofe bjoo yo e bego e le mothopi wa bahlanka ba tloditšwego ba Jehofa a bilego le bjona?
11 Go thwe’ng ka bathopi ba Juda? Jesaya o araba ka tsela ya boporofeta ka gore: “Ba ba hwilexo ba ka se kê ba phela; diriti di ka se hlwê di tsoxa, xobane O ba hlotše wa ba fetša; maina a bôná ka moka O a phomotše.” (Jesaya 26:14) Ee, ka morago ga go wa ga yona ka 539 B.C.E., Babele e be e se na bokamoso. Mafelelong, motse o be o ka se sa ba gona. O be o ‘ka se sa hlwa o tsoga,’ gomme mmušo wa wona o mogolo o be o tla hwelela e be histori feela. A temošo e matla gakaakang go bao ba botilego batho ba matla ba lefase le!
12 Dibopego tša boporofeta bjo di phethagetše ge Modimo a be a dumelela bahlanka ba gagwe bao ba tloditšwego gore ba ye bothopšeng bja moya ka 1918 ke moka a ba lokolla ka morago ka 1919. Go tloga ka nako yeo go ya pele, bokamoso bja yo e bego e le mothopi wa bona, kudu-kudu Bojakane, bo ile bja fsifala. Eupša ditšhegofatšo tšeo di bego di boloketšwe batho ba Jehofa e be e le tše humilego e le ka kgonthe.
“O Kile wa Atiša ’Thšaba sé”
13, 14. Ke ditšhegofatšo dife tše di humilego tšeo bahlanka ba Jehofa ba tloditšwego ba ilego ba di thabela ga e sa le go tloga ka 1919?
13 Modimo o ile a šegofatša moya wa go itshola wa bahlanka ba gagwe ba tloditšwego ka 1919 gomme a ba atiša. Sa pele, tlhokomelo e ile ya lebišwa go go kgoboketšeng ditho tša mafelelo tša Isiraele ya Modimo, gomme ka morago gwa thongwa go kgoboketšwa “lešaba le lexolo” la “dinku tše dingwê.” (Kutollo 7:9; Johane 10:16) Ditšhegofatšo di be di boletšwe e sa le pele boporofeteng bja Jesaya: “Morêna, O kile wa atiša ’thšaba sé, wa rêtwa Ò se atišitše, Ò katološitše mellwanê ya naxa yohle. Morêna, ba tlile ba Xo nyaka bà tlaletšwe, ba thšolla dithapêlô mohla Ò ba sôla.”—Jesaya 26:15, 16.
14 Lehono, mellwane ya Isiraele ya Modimo e phatlaletše lefaseng ka moka, gomme lešaba le legolo leo le atišitšwego gona bjale le na le ba-tšea-karolo ba mafolofolo ba balelwago go dimilione tše ka bago tše tshelelago modirong wa go bolela ditaba tše dibotse. (Mateo 24:14) A tšhegofatšo e kgolo gakaakang yeo e tšwago go Jehofa! Le gona se se tliša letago le legolo gakaakang leineng la gagwe! Leina leo lehono le kwewa dinageng tše 235—e lego phethagalo e kgahlišago ya kholofetšo ya gagwe.
15. Ke tsogo efe ya seswantšhetšo yeo e diregilego ka 1919?
15 Juda e be e nyaka thušo ya Jehofa gore e tšwe bothopša kua Babele. Ba be ba ka se iphološe ka noši. (Jesaya 26:17, 18) Ka mo go swanago, go lokollwa ga Isiraele ya Modimo ka 1919 e be e le bohlatse bja thekgo ya Jehofa. Go be go ka se direge ka ntle ga gagwe. Le gona se se makatšago e bile phetogo boemong bja bona bjo Jesaya a bo swantšhago le tsogo ka gore: “Bahu ba xaxo ba tlo phela, le wa-ka mmele. Ba tlo tsoxa. Phafoxang! Hlalalang! Ba Le robetšexo leroleng; xobane phoka ya xaxo ké phoka ya seetša; ’me lefase le tlo nthša ba hwilexo [“bao ba se nago matla lehung,” NW].” (Jesaya 26:19; Kutollo 11:7-11) Ee, bao ba se nago matla lehung, ba be ba tla ba bjalo ka ge eka ba tswalwa gape bakeng sa modiro o tsošološitšwego!
Tšhireletšo Mehleng e Kotsi
16, 17. (a) Ka 539 B.C.E., ke eng seo ba-Juda ba bego ba swanetše go se dira e le gore ba phologe go senyweng ga Babele? (b) Go bonala ‘diphapoši’ e ka ba e le eng lehono, gomme di re hola bjang?
16 Ka mehla bahlanka ba Jehofa ba nyaka tšhireletšo ya gagwe. Lega go le bjalo, kgaufsinyane o tla akga letsogo la gagwe la mafelelo malebana le lefase la Sathane, gomme barapedi ba gagwe ba tla nyaka thušo ya gagwe go feta le ge e le neng pele. (1 Johane 5:19) Mabapi le mehla yeo e kotsi, Jehofa o re lemoša ka gore: “Wene Sethšaba sa-ka! Sepela O y’o tsêna phapošing ya xaxo, O itswalêlêlê O iphihlê xo se xokaenyana, xo bê xo fetê dikôtlô. Xobane Morêna šoo-lee! O tšwêlêla felô xa xaxwe; ó tla xo latiša molato wa ba dutšexo lefaseng; naxa e tlo bipolla madi a a lexo mo xo yôna, e ka se fêle e bipile ba xo bolaêlwa mo xo yôna.” (Jesaya 26:20, 21; Tsefanya 1:14) Temošo ye e ile ya bontšha ba-Juda kamoo ba bego ba ka phologa ka gona go senywa ga Babele ka 539 B.C.E. Bao ba ilego ba kwa temošo ba swanetše go ba ba ile ba dula ka nywakong ya bona, ba šireletšegile madireng ao a thopago ao a bego a le ditarateng.
17 Lehono, ‘diphapoši’ tša boporofeta bjo di ka ba di šupa diphuthego tše masome a dikete tša batho ba Jehofa go dikologa lefase. Diphuthego tše bjalo e sa dutše e le tšhireletšo le gona bjale, lefelo leo Bakriste ba ka hwetšago polokego gare ga banababo bona, ka tlase ga tlhokomelo e lerato ya bagolo. (Jesaya 32:1, 2; Ba-Hebere 10:24, 25) Se ke sa therešo e le ka kgonthe ka baka la go batamela ga bofelo bja tshepedišo ye ya dilo moo phologo e tlago go ithekga ka go kwa.—Tsefanya 2:3.
18. Ke bjang Jehofa a tlago go “bolaya mamokêbê wa lewatlê” kgaufsinyane?
18 Mabapi le nako yeo, Jesaya o porofeta ka gore: “Mohla woo Morêna ó tlo ôtla kwêna-kxolo, nôxa ya lebelô, le kwêna-kxolo nôxa ya xo menaxana; ó tlo bolaya mamokêbê wa lewatlê, ka lerumô l’axwe le le tiilexo, le lexolo, le le matla.” (Jesaya 27:1) “Kwêna-kxolo” ya mehleng yeno ke mang? Go bonagala e le “nôxa e kxolo,” Sathane ka boyena, gotee le tshepedišo ya gagwe e kgopo ya dilo, yeo e lego sedirišwa sa gagwe seo a se dirišago go lwantšha Isiraele ya Modimo. (Kutollo 12:9, 10, 17; 13:14, 16, 17) Kwena-kgolo e lahlegetšwe ke taolo ya yona godimo ga batho ba Modimo ka 1919. Mafelelong, e tla hwelela sa ruri. (Kutollo 19:19-21; 20:1-3, 10) Ka go rialo, Jehofa “ó tlo bolaya mamokêbê wa lewatlê.” Mo nakong ye, ga go na seo “kwêna-kxolo” e ka lekago go se dira malebana le batho ba Jehofa seo se tlago go atlega ka mo go swarelelago. (Jesaya 54:17) Ke mo go homotšago gakaakang go kgonthišetšwa ka seo!
“Serapa sa Merara ye e Ratêxaxo”
19. Boemo bja mašaledi ke bofe lehono?
19 Ka baka la seetša se ka moka seo se tšwago go Jehofa, na ga re na mabaka ohle a go thaba? Ruri, re na le ona! Jesaya o hlalosa gabotse lethabo la batho ba Jehofa ge a ngwala gore: “Mohla woo ba tlo hlaba ’fela sa serapa sa merara ye e ratêxaxo. Nna Morêna, ke Nna moloti wa sôna; ke fêla ke se nošetša; ke se leta bošexo le mosexare, xore se se senywê.” (Jesaya 27:2, 3) Jehofa o ile a lota ‘serapa sa gagwe sa morara,’ mašaledi a Isiraele ya Modimo, le go lota bagwera ba bona bao ba šomago ka thata. (Johane 15:1-8) Mafelelo e bile dienywa tšeo di tlišago letago leineng la gagwe gomme tša baka lethabo le legolo gare ga bahlanka ba gagwe lefaseng.
20. Jehofa o šireletša bjang phuthego ya Bokriste?
20 Re ka thabišwa ke gore bogale bja Jehofa bja pejana malebana le bahlanka ba gagwe ba tloditšwego—bjoo ka baka la bjona a ilego a dumelela gore ba ye bothopšeng bja moya ka 1918—bo kgaoditše. Jehofa ka noši o re: “Kgalefo ga ke nayo; fela ge nka hwetša metlwa le ditshehlo, ke tlo di wela ka godimo ke lwe le tšona, ke di fiše gotee. Ge e se ge ba ka itiiša ka matla a-ka, ba dire khutšo le nna, ba dire khutšo le nna.” (Jesaya 27:4, 5, PK) Go kgonthišetša gore merara ya gagwe e tšwela pele e tšweletša “merara ye e ratêxaxo” ka boati, Jehofa o šilakanya le go fediša tutuetšo le ge e le efe e swanago le mofoka yeo e ka senyago merara ya gagwe. Ka gona, anke go se be le yo a beago boiketlo bja phuthego ya Bokriste kotsing! Anke bohle re ‘tiiše matleng a Jehofa,’ re nyake kamogelo le tšhireletšo tša gagwe. Ka go dira bjalo, re dira khutšo le Modimo—e lego selo sa bohlokwa kudu moo Jesaya a se bolelago gabedi.—Psalme 85:1, 2, 8; Ba-Roma 5:1.
21. Ke ka tsela efe naga yeo e enywago dienywa e ilego ya tlatšwa ka “dienywa”?
21 Ditšhegofatšo di tšwela pele: “Mehleng e tlaxo Jakobo ó tlo nama medu, Isiraele a khukhušê a hloxê, a tlatšê lefase dienywa.” (Jesaya 27:6) Temana ye e ile ya phethagala ga e sa le go tloga ka 1919, ya nea pontšho e kgahlišago ya matla a Jehofa. Bakriste ba tloditšwego ba tladitše lefase ka “dienywa,” e lego dijo tše di nago le phepo tša moya. Ba kgomarela ka lethabo ditekanyetšo tša Modimo tše phagamego ba le gare ga lefase le le gobogilego. Le gona Jehofa o tšwela pele go ba šegofatša ka koketšego. Ka baka leo, bagwera ba bona ba dimilione, e lego dinku tše dingwe, ‘ba hlankela [Modimo] mosegare le bošego.’ (Kutollo 7:15) Anke le ka mohla re se ke ra lahlegelwa ke pono ya tokelo e kgolo ya go ja “dienywa” le go di abelana le ba bangwe!
22. Ke ditšhegofatšo dife tšeo di tlelago bao ba amogelago seetša?
22 Mehleng ye e hlobaetšago, ge lefsifsi le aparetša lefase le kgampi ya lefsifsi e aparetša ditšhaba, na ga re leboge gore Jehofa o boneša seetša sa moya bathong ba gagwe? (Jesaya 60:2; Ba-Roma 2:19; 13:12) Bakeng sa bohle bao ba se amogelago, seetša se se bjalo se bolela khutšo ya monagano le lethabo gona bjale gaešita le bophelo bjo bo sa felego nakong e tlago. Ka gona, ka lebaka le kwagalago rena bao re ratago seetša re reta Jehofa ka go tšwa pelong gomme re bolela ka go dumelelana le mopsalme gore: “Morêna ké Yêna sebô sa bophelô bya-ka. Ke sa tlo thšoxa mang? Letêla Morêna, O tiê matla, O tlêmê pelo. Letêla Morêna.”—Psalme 27:1b, 14.
Na o sa Gopola?
• Ke bokamoso bofe bjo bo lego gona bakeng sa bao ba gatelelago batho ba Jehofa?
• Ke koketšego efe yeo e porofetilwego go Jesaya?
• Re swanetše go dula re le ‘diphapošing’ dife, gomme ka baka la’ng?
• Ke ka baka la’ng boemo bja batho ba Jehofa bo tliša theto go yena?
[Dipotšišo tša Thuto]
[Lepokisi go letlakala 22]
KGATIŠO E MPSHA
Tsebišo e ntši yeo e ahla-ahlilwego dihlogong tše tše pedi tšeo di ithutwago e ile ya newa e le polelo lenaneong la kopano ya selete la 2000/2001. Mafelelong a polelo, kgatišo e mpsha e nago le sehlogo se se rego, Boporofeta bja Jesaya—Seetša Bakeng sa Batho ka Moka I, e ile ya lokollwa. Puku ye ya matlakala a 416 e na le tlhahlobo ya temana ka temana ya dikgaolo tša pele tše 40 tša puku ya Jesaya.
[Seswantšho go letlakala 18]
Ke ba lokilego feela bao ba dumelelwago go tsena ‘motseng o tiilego’ wa Jehofa, e lego mokgatlo wa gagwe
[Seswantšho go letlakala 19]
Jesaya o ile a tsoma Jehofa ‘bošego’
[Seswantšho go letlakala 21]
Jehofa o šireletša ‘serapa sa gagwe sa merara’ gomme o dira gore se enywe dienywa