Bea Monagano Dilong tša Moya Gomme o Phele!
Bea Monagano Dilong tša Moya Gomme o Phele!
“Go bea monagano go tša moya go bolela bophelo.”—BA-ROMA 8:6, NW.
1, 2. Ke phapano efe yeo Beibele e e neago magareng ga “nama” le “moya”?
GA GO bonolo go boloka boemo bjo bo hlwekilego boitshwarong pele ga Modimo magareng ga lekoko le le gobogilego leo le godišago go kgotsofatša dikganyogo tša nama. Lega go le bjalo, Mangwalo a fapanya “nama” le “moya,” a bontšha phapano e lego molaleng magareng ga mafelelo a šoro a go itumelela ga motho a bušwa ke nama ya sebe le mafelelo a thabišago a go ineela tutuetšong ya moya o mokgethwa wa Modimo.
2 Ka mohlala, Jesu Kriste o itše: “Se se phedišaxo ké Môya, nama xa e thuše selô. Mantšu a ke Le botšaxo ôna ké Môya le bophelô.” (Johane 6:63) Moapostola Paulo o ile a ngwalela Bakriste ba Galatia gore: “Tše nama e di dumaxo, di loša Môya; xomme tše Môya o di dumaxo, di loša nama. Dilô tšeo di a xanana.” (Ba-Galatia 5:17) Paulo gape o itše: “E a byalaxo mo nameng ya xaxwe, se a tl’o xo se buna nameng ké thsenyêxô. E a byalaxo Moyeng, se a tl’o xo se buna Moyeng ké bophelô byo bo sa felexo.”—Ba-Galatia 6:8.
3. Go nyakega’ng gore re lokologe dikganyogong le ditshekamelong tšeo di fošagetšego?
3 Moya o mokgethwa wa Jehofa—matla a gagwe a šomago—o ka tloša ka mo go atlegilego “ditumô tša nama” le go bušwa mo go senyago ke nama ya rena ya sebe. (1 Petro 2:11) Gore re lokologe bokgobeng bja ditshekamelo tše di fošagetšego, go bohlokwa gore re hwetše thušo ya moya wa Modimo, ka gobane Paulo o ngwadile gore: “Go bea monagano go tša nama go bolela lehu, eupša go bea monagano go tša moya go bolela bophelo le khutšo.” (Ba-Roma 8:6, NW) Go bolela’ng go bea monagano go tša moya?
“Go Bea Monagano go tša Moya”
4. “Go bea monagano go tša moya” go bolela’ng?
4 Ge Paulo a be a ngwala mabapi le “go bea monagano go tša moya,” o be a diriša lentšu la Segerika leo le bolelago “tsela ya go nagana, (tshekamelo ya) monagano, . . . boikemišetšo, tlhologelo le go katana.” Lediri leo le tswalanago le le le bolela “go nagana le go ba le tshekamelo e itšego ya go nagana.” Ka gona, go bea monagano dilong tša moya go bolela go laolwa, go bušwa le go tutuetšwa ke matla a šomago a Jehofa. Go bolela gore re dira gore ka go rata monagano wa rena, ditshekamelo le ditlhologelo di be ka tlase ga tutuetšo ya moya o mokgethwa wa Modimo ka mo go feletšego.
5. Re swanetše go ikokobeletša tutuetšo ya moya o mokgethwa go fihla bokgoleng bofe?
5 Tekanyo yeo ka yona re swanetšego go ikokobeletša tutuetšo ya moya o mokgethwa e gateletšwe ke Paulo ge a be a bolela ka go ba ‘makgoba ka moya.’ (Ba-Roma 7:6, bapiša le NW.) Motheong wa tumelo ya bona sehlabelong sa Jesu sa topollo, Bakriste ba ile ba hunollwa go bušweng ke sebe gomme ka go rialo ba ‘hwile’ boemong bja bona bja kgale bja go ba makgoba a sona. (Ba-Roma 6:2, 11) Bao ba hwilego ka tsela ya seswantšhetšo ka mokgwa woo ba sa dutše ba phela nameng gomme ga bjale ba lokologile go ka latela Kriste e le “balata ba tokô.”—Ba-Roma 6:18-20.
Phetogo e Kgolo
6. Ke phetogo efe yeo e diragalelago bao ba fetogago “balata ba tokô”?
6 Phetogo ya go tloga go beng ‘balata ba sebe’ go ya go hlankeleng Modimo re le “balata ba tokô” ke e kgolo e le ruri. Mabapi le ba bangwe bao ba ilego ba dira phetogo e bjalo, Paulo o ngwadile gore: “Le hlatswitšwe, Le kxethexile, Le lokafaditšwe ka Leina la Morêna Jesu le ka Môya wa Modimo wa rena.”—Ba-Roma 6:17, 18; 1 Ba-Korinthe 6:11.
7. Ke ka baka la’ng go le bohlokwa go ba le pono ya Jehofa ka ditaba?
7 E le gore re fetoge ka tsela e bjalo e lemogegago, sa pele re swanetše go ithuta ka pono ya Jehofa ka ditaba. Nywaga-kgolong e fetilego, mopsalme Dafida o ile a kgopela Modimo ka go tšwa pelong ka gore: “Morêna, ntsebišê ditsela tša xaxo, . . . O nketetšê ka therešô ya xaxo, ’me O nthutê.” (Psalme 25:4, 5) Jehofa o ile a theetša Dafida, gomme A ka araba thapelo e bjalo le bakeng sa bahlanka ba gagwe ba mehleng yeno. Ka ge ditsela tša Modimo le therešo ya gagwe e le tšeo di hlwekilego le tše kgethwa, go naganišiša ka tšona e tla ba mo go thušago ge e ba re lekega gore re kgotsofatše dikganyogo tša nama tšeo di sa hlwekago.
Karolo e Bohlokwa ya Lentšu la Modimo
8. Ke ka baka la’ng go le bohlokwa gore re ithute Beibele?
8 Lentšu la Modimo Beibele, ke setšweletšwa sa moya wa gagwe. Ka gona, tsela e nngwe e bohlokwa ya go dira gore moya woo o šome go rena ke ka go bala le go ithuta Beibele—letšatši le letšatši ge e ba go kgonega. (1 Ba-Korinthe 2:10, 11; Ba-Efeso 5:18) Go tlatša monagano wa rena le pelo ka ditherešo tša Beibele le melao ya motheo go tla re thuša go emelana le ditlhaselo tše di hlaselago boemo bja rena bja moya. Ee, ge meleko ya boitshwaro bjo bo gobogilego e rotoga, moya wa Modimo o ka dira gore re gopole dikgopotšo tša Mangwalo gotee le melao ya motheo ya tlhahlo, tšeo di ka tiišago boikemišetšo bja rena bja go dira ka go dumelelana le thato ya Modimo. (Psalme 119:1, 2, 99; Johane 14:26) Ka baka leo, ga re fora-foretšwe gore re latele tsela e fošagetšego.—2 Ba-Korinthe 11:3.
9. Thuto ya Beibele e matlafatša bjang boikemišetšo bja rena bja go boloka tswalano ya rena le Jehofa?
9 Ge re tšwela pele ka thuto ya rena ye e dirwago ka potego le ka mafolofolo ya Mangwalo ka thušo ya dipuku tšeo di theilwego Beibeleng, moya wa Modimo o tutuetša monagano wa rena le pelo ya rena, wa dira gore go hlompha ga rena ditekanyetšo tša Jehofa e be mo go tseneletšego. Tswalano ya rena le Modimo e ba selo se bohlokwa go feta tšohle bophelong bja rena. Ge re lebeletšane le moleko, ga re boloke menagano ya rena e akanya mabapi le kamoo e ka bago mo go thabišago ka gona go kopanela bobeng. Go e na le moo, selo seo re kgomegilego ka sona gona bjale ke go kgomarela potego ya rena ya go botegela Jehofa. Tebogo e tseneletšego ya go leboga tswalano ya rena le yena e re tutueletša go lwa le tshekamelo le ge e le efe yeo e ka senyago tswalano yeo goba ya e fediša.
“Melaô ya Xaxo ke e Rata Xakaka’ng!”
10. Ke ka baka la’ng go kwa molao wa Jehofa go nyakega e le gore re bee monagano dilong tša moya?
10 Ge e ba re tla bea monagano go tša moya, ga se mo go lekanego go ba le tsebo ya Lentšu la Modimo. Kgoši Salomo o be a kwešiša ditekanyetšo tša Jehofa gabotse kudu, eupša o ile a palelwa ke go phela ka tšona go yela mafelelong a bophelo bja gagwe. (1 Dikxoši 4:29, 30; 11:1-6) Ge e ba re e-na le kgopolo ya moya, re ka se bone feela go nyakega ga go tseba seo Beibele e se bolelago eupša gape re tla bona le go nyakega ga go theetša molao wa Modimo ka pelo ka moka. Se se bolela go hlahlobišiša ditekanyetšo tša Jehofa le go katanela go di latela ka kelohloko. Mopsalme o be a e-na le boemo bjo bo bjalo bja kgopolo. O opetše ka gore: “Melaô ya xaxo ke e rata xakaka’ng! Ke eleletša yôna mehla yohle.” (Psalme 119:97) Ge re tshwenyegile e le ka kgonthe mabapi le go latela molao wa Modimo, re thoma go bontšha dika tša go boifa Modimo. (Ba-Efeso 5:1, 2) Go e na le go gokwa ke sebe wa go se kgone go iphemela, re bontšha dienywa tša moya, gomme kganyogo ya go thabiša Jehofa e re dira gore re furalele “medirô ya nama.”—Ba-Galatia 5:16, 19-23; Psalme 15:1, 2.
11. O ka hlalosa bjang gore molao wa Jehofa wo o iletšago bootswa ke tšhireletšo go rena?
11 Re ka hlagolela bjang tlhompho e tseneletšego le lerato la go rata molao wa Jehofa? Tsela e nngwe ke ka go hlahlobišiša mohola wa wona. Akanya ka molao wa Modimo woo o lekanyetšago ditswalano tša kopano ya botona le botshadi lenyalong le go thibela bootswa le bohlotlolo. (Ba-Hebere 13:4) Na go kwa molao wo go re thibela go hwetša selo le ge e le sefe se sebotse? Na Tatago rena yo lerato wa legodimong a ka dira molao wo o re thibelago go hwetša selo seo se holago? Le gatee-tee! Bona gore ke eng seo se diregago maphelong a ba bantši bao ba sa phelego ka go dumelelana le ditekanyetšo tša Jehofa tša boitshwaro. Boimana bjo bo sa nyakegego gantši bo ba lebiša go ntšheng dimpa goba mohlomongwe manyalong a pele ga nako le a se nago lethabo. Ba bantši ba swanelwa ke go godiša ngwana ka ntle le monna goba mosadi. Go oketša moo, bao ba dirago bootswa ba ipea boemong bja go tsenwa ke malwetši ao a fetelago ka kopano ya botona le botshadi. (1 Ba-Korinthe 6:18) Le gona, ge e ba mohlanka wa Jehofa a dira bootswa, se se ka ba le mafelelo a senyago maikwelong. Go leka go gatelela letswalo le molato go ka baka go hlorega boroko le go tlaišega monaganong. (Psalme 32:3, 4; 51:3) Ka gona, na ga go molaleng gore molao wa Jehofa wo o thibelago bootswa o diretšwe go re šireletša? Ee, go na le mohola o mogolo ka go dula re hlwekile boitshwarong!
Rapelela Thušo ya Jehofa
12, 13. Ke ka baka la’ng e le mo go swanetšego go rapela ge re hlasetšwe ke dikganyogo tša sebe?
12 Go bea monagano dilong tša moya ka kgonthe go nyaka thapelo e tšwago pelong. Ke mo go swanetšego go kgopela thušo ya moya wa Modimo, ka gobane Jesu o itše: “Xe ešita lena . . . Lè tseba xo nea bana ba lena dineô tše botse, a Tata-weno wa maxodimong xa a Le fetiše kxolê? Ba ba Mo kxopêlaxo ó ba nea Môya o mokxêthwa.” (Luka 11:13) Thapelong, re ka bontšha go ithekga ga rena ka moya bakeng sa thušo mabapi le mafokodi a rena. (Ba-Roma 8:26, 27) Ge e ba re lemoga gore dikganyogo goba boemo bja kgopolo bja sebe bo a re kgoma, goba ge e ba modumedi-gotee le rena a re lemoša ka se, e tla ba gabohlale go hlalosa bothata ka go lebanya dithapelong tša rena gomme re kgopele thušo ya Modimo bakeng sa go fenya ditshekamelo tše.
13 Jehofa a ka re thuša go lebiša tlhokomelo dilong tšeo di lokilego, tše di hlwekilego, tša bokwala le tšeo di tumišegago. Le gona ke mo go swanetšego gakaakang go mo lopa ka mo go tseneletšego e le gore “khutšô ya Modimo” e tle e boloke dipelo tša rena le matla a rena a monagano! (Ba-Filipi 4:6-8) Ka baka leo, anke re rapeleleng thušo ya Jehofa bakeng sa go “[phegelela] tokô, le borapedi, le tumêlô le leratô, le kxôtlêlêlô, le bonôlô.” (1 Timotheo 6:11-14) Ka thušo ya Tatago rena wa legodimong, dipelaelo le meleko di ka se gole go fihla boemong bja go se laolege. Go e na le moo, maphelo a rena a tla hlaolwa ka khutšo yeo e newago ke Modimo.
O se ke wa Nyamiša Moya
14. Ke ka baka la’ng moya wa Modimo e le matla a bohlweki?
14 Bahlanka bao ba godilego tsebong ba Jehofa ba diriša go bona ka noši keletšo ya Paulo e rego: “Le se kê la tima mollô wa Môya.” (1 Ba-Thesalonika 5:19) Ka ge moya wa Modimo e le “môya wa bokxêthwa,” o hlwekile, o sekile e bile ke o mokgethwa. (Ba-Roma 1:4) Ge o šoma go rena, moya woo ke matla a bokgethwa goba a bohlweki. O re thuša go dula re le tseleng e hlwekilego yeo e hlaolwago ka go kwa Modimo. (1 Petro 1:2) Mokgwa le ge e le ofe o sa hlwekago o bopa go se hlomphe moya woo, gomme seo se ka ba le mafelelo a šoro. Bjang?
15, 16. (a) Re ka nyamiša bjang moya wa Modimo? (b) Re ka phema bjang go nyamiša moya wa Jehofa?
15 Ee, Paulo o ngwadile gore: “Le se kê la nyamiša Môya o mokxêthwa wa Modimo, wo le swailwexo ka wôna, la swaêlwa ’tšatši la topollô.” (Ba-Efeso 4:30) Mangwalo a hlaola moya wa Jehofa e le sešupo goba ‘seka sa seo se bego se tla tla,’ bakeng sa Bakriste ba tloditšwego bao ba botegago. Le gona seo ke bophelo bja go se hwe legodimong. (2 Ba-Korinthe 1:22, bapiša le NW; 1 Ba-Korinthe 15:50-57; Kutollo 2:10.) Moya wa Modimo o ka hlahla batlotšwa le bagwera ba bona bao ba nago le kholofelo ya lefaseng gore ba phele bophelo bja go botega gomme o ka ba thuša go phema mediro ya sebe.
16 Moapostola o ile a lemoša ka ditshekamelo tšeo di lebišago maakeng, go utsweng, boitshwarong bjo bo lešago dihlong le tše dingwe. Ge e ba re ile ra itumelela re gogelwa dilong tše bjalo, re tla be re thulana le keletšo e buduletšwego ka moya ya Lentšu la Modimo. (Ba-Efeso 4:17-29; 5:1-5) Ka tekanyo e itšego re tla be re nyamiša moya wa Modimo, gomme ruri seo ke selo seo re nyakago go se phema. Ka baka la seo, ge e ba le ge e le mang wa rena a thoma go hlokomologa keletšo ya Lentšu la Jehofa, a ka thoma go ba le ditshekamelo goba mekgwa tšeo di ka feleletšago ka sebe sa ka boomo le go lahlegelwa ka mo go feletšego ke kamogelo ya Modimo. (Ba-Hebere 6:4-6) Gaešita le ge re ka ba re sa dire sebe mokgwa gona bjale, re ka ba re lebile lehlakoreng leo. Ka go dira ka mo go fapanego le tlhahlo ya moya, re tla be re nyamiša moya. Gape re tla be re ganetša le go nyamiša Jehofa, mothopo wa moya o mokgethwa. Ka ge re rata Modimo, le ka mohla ga re nyake go dira bjalo. Go e na le moo, re ka rapelela thušo ya Jehofa bakeng sa gore re se ke ra nyamiša moya wa gagwe eupša re kgone go godiša leina la gagwe le lekgethwa ka go tšwela pele re nagana ka tša moya.
Tšwelang Pele le Bea Monagano go tša Moya
17. Tše dingwe tša dipakane tša moya tšeo re ka ipeelago tšona ke dife, gomme ke ka baka la’ng go dira se e le gabohlale?
17 Tsela e lemogegago bakeng sa gore re tšwele pele re bea monagano go tša moya ke go ipeela dipakane tša moya le go katanela go di fihlelela. Go ithekgile ka dinyakwa tša rena ka noši le maemo, dipakane tša rena di ka akaretša go kaonefatša mekgwa ya rena ya go ithuta, go oketša go ba le karolo ga rena bodireding goba go katanela go fihlelela ditokelo tše itšego tša tirelo, tše bjalo ka bodiredi bja bobulamadibogo bja nako e tletšego, tirelo ya Bethele goba modiro wa boromiwa. Se se tla dira gore monagano wa rena o dule o swaregile ka dikgahlego tša moya gomme se tla re thuša go lwa le go ineela bofokoding bjo re nago le bjona bjalo ka batho goba go laolwa ke dipakane tša dilo tše di bonagalago le dikganyogo tšeo e sego tša Mangwalo tšeo di tlwaelegilego tshepedišong ye ya dilo. Ye ruri ke tsela e bohlale, ka gobane Jesu o opeleditše ka gore: “Le se kê la ikxobêlêla mahumô lefaseng, mo xo senyaxo thswêlê le diji, mo xo phulaxo mahodu a utswa. Mahumô ikxobeleng lexodimong, mo xo sa senyexo thswêlê le diji, mo xo sa phulexo mahodu a utswa. Xobane mo xo lexo lehumô la xaxo, ké mo xo lexo pelo ya xaxo.”—Mateo 6:19-21.
18. Ke ka baka la’ng go le bohlokwa gakaakaa go tšwela pele re bea monagano dilong tša moya mehleng ye ya bofelo?
18 Go bea monagano go tša moya le go fenya dikganyogo tša lefase ruri ke tsela e bohlale ‘mehleng ye ya bofelo.’ (2 Timotheo 3:1-5) Go feta moo, “lefase le a feta, le yôna kxanyoxô ya lôna. E a tl’o xo dula à le xôna xo ya xo ile, ké eo a diraxo tše Modimo a di rataxo.” (1 Johane 2:15-17) Ka mohlala, ge e ba Mokriste wa mofsa a phegelela pakane ya bodiredi bja nako e tletšego, se se ka dira e le tlhahlo nakong ya nywaga e hlohlago ya go tsena mahlalagading goba ya go golela bonneng goba bosading. Ge a gatelelwa gore a kwanantšhe, motho yo bjalo o tla ba le pono e botse ya seo a nyakago go se phetha tirelong ya Jehofa. Motho yo bjalo wa moya o tla bona e se bohlale, e bile e le bošilo go tlogela go katanela dipakane tša moya ka baka la go phegelela dilo tše di bonagalago goba boipshino le ge e le bofe bjo sebe se holofetšago go bo nea. Gopola gore Moše yo a bego a sekametše go tša moya o ile a “ikxêthêla xo thatafalêlwa le sethšaba sa Modimo, a nyatša maiphsinô a lebaka leno.” (Ba-Hebere 11:24, 25) Go sa šetšwe gore re ba banyenyane goba ba bagolo, re dira kgetho e swanago ge re tšwela pele re bea monagano go tša moya go e na le nameng ya sebe.
19. Ke mehola efe yeo re tlago go e thabela ge e ba re tšwela pele re bea monagano dilong tša moya?
19 “Go bea monagano go tša nama ke bonaba go Modimo,” eupša “go bea monagano go tša moya go bolela bophelo le khutšo.” (Ba-Roma 8:6, 7, NW) Ge e ba re tšwela pele re bea monagano go tša moya, re tla ba le khutšo e bohlokwa. Dipelo tša rena le matla a rena a monagano a tla šireletšwa ka mo go tletšego kudu tutuetšong ya boemo bja rena bja sebe. Re tla kgona gakaone go lwa le meleko ya go dira bobe. Le gona re tla hwetša thušo ya Modimo bakeng sa go lebeletšana le ntwa e tšwelago pele magareng ga nama le moya.
20. Ke ka baka la’ng re ka kgonthišega gore go a kgonega go fenya ntweng ya magareng ga nama le moya?
20 Ka go tšwela pele re bea monagano go tša moya, re boloka tlamo e bohlokwa le Jehofa, mothopo wa bophelo gotee le moya o mokgethwa. (Psalme 36:9; 51:11) Sathane Diabolo le baemedi ba gagwe ba dira sohle seo ba ka se kgonago go senya tswalano ya rena le Jehofa Modimo. Ba leka go laola menagano ya rena, ba tseba gore ge e ba re ka ineela, se mafelelong se tla lebiša go beng le bonaba le Modimo le lehung. Eupša re ka fenya ntweng ye yeo e lego magareng ga nama le moya. Go bile bjalo ka Paulo, ka gobane ge a be a ngwala ka ntwa ya gagwe ka noši, sa pele o ile a botšiša gore: “Ké mang a tl’o xo nkhunolla ka tloxa mmele wó wa lehu?” Ke moka ge a bontšha gore tlhakodišo e be e le gona, o itše: “Ke leboxa Modimo ka Jesu Kriste Mong ’a rena.” (Ba-Roma 7:21-25) Le rena re ka leboga Modimo ka Kriste bakeng sa go lokišeletša mekgwa ya go lebeletšana le mafokodi ao batho ba nago le ona le go tšwela pele re bea monagano dilong tša moya re e-na le kholofelo e kgahlišago ya bophelo bjo bo sa felego.—Ba-Roma 6:23.
Na o a Gopola?
• Go bea monagano go tša moya go bolela’ng?
• Re ka dumelela bjang moya wa Jehofa gore o šome ka go rena?
• Hlalosa lebaka leo ka lona ntweng ya rena ya go lwa le sebe, go lego bohlokwa go ithuta Beibele, go kwa molao wa Jehofa le go mo rapela.
• Ke bjang go bea dipakane tša moya go ka re bolokago re le tseleng ya bophelo?
[Dipotšišo tša Thuto]
[Seswantšho go letlakala 16]
Thuto ya Beibele e re thuša go lebeletšana le ditlhaselo tša boemo bja rena bja moya
[Seswantšho go letlakala 17]
Ke mo go swanetšego go rapelela thušo ya Jehofa bakeng sa go fenya dikganyogo tša sebe
[Diswantšho go letlakala 18]
Dipakane tša moya di ka re thuša go tšwela pele re bea monagano dilong tša moya