Na wo e ka ba Modiro wa Gago wo o e Phalago Yohle wa Bophelo?

GE E ba o le Mokriste yo a kolobeditšwego, ga go pelaelo gore lerato la go rata Modimo le go tutueletša go dira thato ya gagwe. Go feta moo, bodiredi ka ntle le pelaelo e swanetše go ba modiro wa gago o mogolo. Go ba gona, Jesu Kriste o laetše balatedi ba gagwe ka moka gore ba dire barutiwa. (Mateo 28:​19, 20) Ee, gona bjale o ka ba o šoma modiro wa boiphedišo bakeng sa go itlhokomela. Eupša bjalo ka molatedi wa Jesu le bjalo ka yo mongwe wa Dihlatse tša Jehofa, sa bohlokwa kudu ke gore o modiredi wa Mokriste​—⁠yoo modiro wa boboledi bja Mmušo e lego selo seo se tlago pele bophelong bja gagwe.​—⁠Mateo 24:⁠14.

Mohlomongwe o nywageng ya mafelelo ya nywaga ya gago ya mahlalagadi goba mathomong a nywaga ya gago ya bo-20. Mohlomongwe o šetše o naganišišitše kudu mabapi le tsela yeo o tlago go e latela bophelong. Ge o hlahloba dikgetho tšeo o nago le tšona, go ka direga gore kgotsofalo ya motho ka noši e be selo sa bohlokwa.

Ka gona, ela hloko seo Jørgen wa Denmark a se bolelago ka kgetho yeo a e dirilego. Jørgen o e hlalosa e le “tsela e botse ya bophelo yeo ka yona o ka lebišago tlhokomelo modirong wa bohlokwa kudu wo o lego gona.” Eva yo e lego mosadi wa nywaga e 31 wa kua Gerika, o re: “Ge ke bapetša bophelo bja-ka le bja dithaka tša-ka, ka mehla ke phetha ka gore ke bjo bo nago le morero, bjo bo kgotsofatšago kudu le bjo bo thabišago kudu.” Ke modiro ofe wa bophelo wo o ka neago kgotsofalo e bjalo? Ke bjang o ka latelago tsela e bjalo ya bophelo?

Na Modimo o a go Hlahla?

Go kgetha modiro wa bophelo go ka ba thata kudu. Ge e le gabotse, ba bangwe ba ka duma gore eka Modimo a ka ba bontšha seo ge e le gabotse a nyakago gore ba se dire.

Ge Moše a be a le Midiane, Jehofa o ile a mo laela gore a boele Egipita gomme a etelele ba-Isiraele pele go ba ntšha bokgobeng. (Ekisodo 3:​1-10) Morongwa wa Modimo o ile a iponagatša go Gideoni, yo a ilego a kgethwa gore a phološe Isiraele kgatelelong. (Baahlodi 6:​11-14) Dafida o be a hlokometše dinku ge Modimo a be a botša Samuele gore a mo tlotše e le kgoši e latelago ya Isiraele. (1 Samuele 16:​1-13) Lehono ga re hlahlwe ka ditsela tše bjalo. Go e na le moo, go nyakega gore re hlahlobe ditaba gomme re dire phetho ya kamoo re ka dirišago bokgoni bja rena bjo re bo neilwego ke Modimo ka gona.

Jehofa o buletše bafsa ba Bakriste lehono ‘mojako o mogolo o išago modirong.’ (1 Ba-Korinthe 16:⁠9, NW) Seo se bjalo bjang? Ngwaga-someng o fetilego, palo ya bagoeledi ba Mmušo e ile ya oketšega ka ba fetago 2 125 000 go ya go ba fetago 6 000 000 lefaseng ka bophara. Ke bomang bao ba thušago go aba Dibeibele, dipuku, diporoutšha, dimakasine le dipampišana tše dimilione tšeo di nyakegago bakeng sa phepo ya moya le bakeng sa modiro wa lefase ka bophara wa go bolela ditaba tše dibotse? Tokelo ye e šegofaditšwego e thabelwa ke ditho tša lapa la Bethele lefaseng ka bophara.

Bophelo bjo bo Putsago

Bethele e bolela “Ngwakô wa Modimo,” le gona magae a Bethele ke mafelo a bodulo a baithapi ba Bakriste bao ba hlankelago ntlong-kgolo le makaleng a diofisi a Mokgatlo wa Watch Tower. (Genesi 28:​19, mongwalo wa tlase wa NW) Malapa a Bethele a mehleng yeno a ka swantšhwa le ‘malapa a a agilwego ka bohlale’ a a rulagantšwego gabotse gomme a theilwe leratong la go rata Jehofa.​—⁠Diema 24:⁠3, bapiša le NW.

Ke eng seo se ka bolelwago ka tikologo e swanago le ya lapa kua Bethele? Setho sa nywaga e 25 sa lapa la Bethele kua Estonia se bolela gore:  “Ke thabela maikwelo a go ba gare ga bagwera ba Jehofa ka dinako ka moka. Se se tšwela pele e le selo sa bohlokwa kudu go nna mo Bethele.”​—⁠Psalme 15:​1, 2.

Lefaseng ka bophara, mo e ka bago batho ba 19 500 ga bjale ba thabela tokelo ya tirelo ya Bethele. (Psalme 110:⁠3) Kua United States, 46 lekgolong ya bao ba lego Bethele ba magareng ga nywaga e 19 le 29. Go etša Jesaya, ba itše: “Ké nna é, nthomê!” (Jesaya 6:⁠8) Jesaya​—⁠yo a bego a šetše a ineetše go Jehofa​—⁠o be a ithapela tokelo e oketšegilego ya tirelo. Se go bonagala se ile sa bolela go gafa dilo tše itšego tša mohola wa motho ka noši. Bao ba lego tirelong ya Bethele ba tlogela magae a bona le ditikologo tše ba di tlwaetšego, gotee le bo-mma, bo-tate, barwarre, dikgaetšedi le bagwera. Boikgafo bjo bo dirwa ka go ithatela “ka ’baka la Ebangedi.”​—⁠Mareka 10:​29, 30.

Gape, go na le ditšhegofatšo tše dintši gakaakang tša moya Bethele! Mofsa yo e lego setho sa lapa la Bethele kua Russia o hlalosa gore: “Ka go ba bao ba ikgafago, re kgona go ithuta mo gontši mo go tla re thušago go phela lefaseng le lefsa. Nka bolela gore tabeng ya-ka ditšhegofatšo tša Jehofa ke tše dikgolo kudu go feta boikgafo bja-ka.”​—⁠Maleaki 3:⁠10.

Bophelo Bethele

Bophelo bja Bethele bo bjang? Ditho tša lapa la Bethele di dumela gore ke bjo bo agago le bjo bo kgotsofatšago gaešita le go ba bjo bo thabišago. Jens wa nywaga e 43 o thabela tirelo ya Bethele. Ka baka la’ng? O re: “Ka baka la maikwelo a gore re karolo ya boiteko bjo bogolo bjo bo dirwago bakeng sa go phetha modiro wa bohlokwa. Ke kgona go lemoga bogolo le bohlokwa bja modiro wa Jehofa.”

Go tloga ka Mošupologo go fihla ka Mokibelo, letšatši Bethele le thoma ka borapedi bja mesong. Ye ke poledišano ya Beibele, yeo e okamelwago ke mogolo yo a nago le phihlelo. Mantšiboeng a Mošupologo iri e dirišetšwa go swara thuto ya lapa ya Beibele ka thušo ya Morokami, yeo ka dinako tše dingwe e latelwago ke polelo e theilwego sehlogong sa Mangwalo yeo e lokišeleditšwego ka mo go kgethegilego lapa la Bethele.

Go direga’ng ge motho a thoma go fihla Bethele? Go tlwaelanya ditho tše difsa le bophelo bja Bethele, banababo rena bao ba godilego ka tsebo ba lapa ba nea dipolelo tšeo di bolelago ka dibopego tše di fapa-fapanego tša tirelo ya Bethele. Ka dibeke tše dintšinyana ngwageng wa pele, setho se sefsa sa lapa la Bethele se tsena sekolo sa beke le beke seo se reretšwego go katološa kwešišo ya sona ya Mangwalo. Bao ba sa tšwago go fihla ba bile ba thabela lenaneo le le kgethegilego la go bala Beibele. Ngwageng wa tšona wa pele wa tirelo ya Bethele, ditho tše difsa tša lapa di bala Beibele ka moka ga yona.

Mafelelo a tlwaetšo ye ka moka ke afe? Joshua, setho sa lapa la Bethele sa nywaga e 33 kua Hong Kong, o a araba: “Ka kgonthe Bethele e godišitše tebogo ya-ka bakeng sa Jehofa. Ke kgona go gwerana le banababo rena ba bantši bao ba nago le phihlelo bao ba dirišitšego karolo e kgolo ya maphelo a bona ba hlankela Jehofa. Ka mo go kgethegilego ke thabela mananeo a moya, a bjalo ka borapedi bja mesong le Thuto ya lapa ya Morokami. Go feta moo, ke rata tsela e nago le thulaganyo le e bonolo ya go phela. Se se ntokolla pelaelong e sa nyakegego. E bile ke ithuta kamoo nka swaraganago le dilo ka mokgwa wa Bokriste, gomme se ka mehla se ile sa itlhatsela e le se se holago.”

Ditho tša lapa la Bethele di diriša nako ya tšona e ntši le matla a tšona di dira seo di ithapetšego go se dira. Ke gore, go diriša matla a bona a mmele le a monagano kudu-kudu bakeng sa go hlokomela kabelo yeo di e neilwego Bethele. Go na le dilo tše dintši tšeo di swanetšego go dirwa. Ba bangwe ba diriša metšhene ya go gatiša goba ba šoma lefelong la go tlema dipuku, ba dira dipuku tšeo di romelwago diphuthegong tše dintši. Ba bangwe ba šoma ka khitšhing, phapošing ya bojelo goba bohlatswetšong. Dikabelo di akaretša go hlwekiša, go lema, modiro wa go aga le tše dingwe. Ba bangwe ba na le boikarabelo bja go hlokomela didirišwa mafapheng a. Ba bangwe ba nea tlhokomelo ya tša maphelo goba ba šoma diofising. Dikabelo ka moka tša modiro wa Bethele di akaretša ditlhohlo tšeo di thabišago gomme ke tše di putsago ka mo go kgahlišago. Modiro wo o dirwago Bethele ke o kgotsofatšago kudu-kudu ka gobane o tšwetša dikgahlego tša Mmušo pele gomme o dirwa ka lerato la go rata Modimo.

 Ditho tša lapa la Bethele di abelwa diphuthegong, moo di iponelago ka noši mehola ya modiro wa tšona. Di thabela go ba gona dibokeng tša phuthego le go tšea karolo modirong wa boboledi. Ka baka la seo, ditho tša lapa la Bethele di hlagoletše ditlemo tše tiilego le banababo tšona le dikgaetšedi diphuthegong tšeo di kopanelago go tšona.​—⁠Mareka 10:​29, 30.

Rita, setho sa lapa la Bethele kua Brithania, o re: “Ke thabela phuthego kudu! Ge ke le dibokeng le bodireding, go bona banabešo, dikgaetšedi, bana le ba ba godilego bao ke ba ratago ba le gona, go matlafatša tumelo ya-ka kudu! Go sa šetšwe seo se diregago, ba ba gona. Seo se nthuša gore ke be mafolofolo kudu tirelong ya-ka ya Bethele.”

Bophelo bja Bethele ga se go fo šoma, diboka, tirelo ya tšhemo le go ithuta. Lapa le thabela le dinako tša go iketla. Nako le nako, go ba le “Maitišo a Lapa” ao a thabišago le ao a putsago moyeng, ao a neago dibaka tša go thabela bokgoni bja ba bantši le go ithuta dilo tše di kgothatšago ka maphelo a ba bangwe bao ba hlankelago Bethele. Se sengwe gape seo se thabišago ke go etelana mo go agago ga bogwera le ba bangwe. Mafelo a mangwe a boitapološo a ka dirwa gore a be gona, gaešita le makgobapuku bakeng sa go ipalela le go itirela nyakišišo. Re sa lebale dipoledišano tše kgahlišago ditafoleng dinakong tša dijo lefelong la go jela.

Tom, setho sa lapa la Bethele kua Estonia, o re: “Kgaufsi le Bethele go na le lewatle, gomme kgaufsi le lona go na le sethokgwa se sebotse moo nna le mosadi wa-ka re thabelago go sepela-sepela gona. Le gona nako le nako ke bapala kolofo, hockey le thenise le bagwera phuthegong le Bethele. Le gona ge boemo bja leratadima bo dumela, re sepela ka dipaesekele.”

Ke Eng Seo o ka se Dirago Gore o Swanelege?

Ge e le gabotse, Bethele ke lefelo la bohlokwa leo go lona Bakriste ba ba godilego ka tsebo ba direlago Jehofa tirelo e kgethwa gomme ba šomela badumedi-gotee le bona lefaseng ka moka. Bao e bago ditho tša lapa la Bethele ba swanetše go  fihlelela ditshwanelego tše itšego. Ke eng seo o ka se dirago gore o swanelegele tirelo ya Bethele?

Go etša Timotheo, yo a ilego a hlankela le Paulo, bao ba amogelwago tirelong ya Bethele ba swanetše go ba le boemo bjo bobotse ka phuthegong. (1 Timotheo 1:⁠1) Timotheo o be a “hlatsêlwa ke bana babô ba tumêlo ba Lisitara le ba Ikonio.” (Ditiro 16:⁠2) Gaešita le ge e be e le yo monyenyane, Timotheo o be a tseba Mangwalo gabotse gomme o be a tsemile ka medu therešong. (2 Timotheo 3:​14, 15) Ka mo go swanago, go letetšwe gore bao ba amogelwago tirelong ya Bethele ba swanetše go tseba Beibele.

Go nyakega gore ditho tša lapa la Bethele di be le moya wa boikgafo. Moya wa Timotheo wa boikgafo gotee le go rata ga gagwe go etiša dikgahlego tša Mmušo pele ga tša gagwe o be o bonala kudu moo e lego gore Paulo o be a ka bolela ka yena a re: “Xobane xa ke na yo mongwê yo pelo ya xaxwe e kwanaxo le ya-ka, e a kaxo etša  yêna Timotheo ka xo hlôkômêla ditaba tša lena ka pelo. Xobane batho ka moka ba inyakêla tša bôná; xa ba nyake tša Kriste Jesu. Xe e le yêna Timotheo ke mo tseba xo bôtêxa, xobane mola rè le modirong wa Ebangedi, ó be a etša ngwana xe a dirišana le tat’axwe.”​—⁠Ba-Filipi 2:​20-⁠22.

Tirelo ya Bethele e nyaka banna le basadi ba moya. Dithulaganyo tšeo di dirilwego bakeng sa ditho tša lapa la Bethele di dira gore di kgone go gola moyeng ka thuto ya Beibele, ka go ba gona ka mehla dibokeng tša Bokriste le bodireding bja tšhemo, le go gwerana le Bakriste ba ba godilego ka tsebo. Ka go rialo, bao ba lego Bethele ba thušwa gore ba latele keletšo ya Paulo e rego: “Swarang tsela Lè le ba [Kriste Jesu], Le bê ba ba tsemilexo medu, ba ba axilwexo xodimo xa xaxwe, ba ba tiilexo tumelong ka mo Le rutilwexo ka xôna, Le bê ba xo mo leboxa ka botlalô.”​—⁠Ba-Kolose 2:​6, 7.

Ka baka la mohuta wa modiro wo o dirwago Bethele, bao ba amogelwago bakeng sa tokelo ye ya tirelo e swanetše go ba ba tiilego mmeleng le ba phetšego gabotse. Ge e ba o fihlelela ditshwanelego tšeo re di boletšego, o e-⁠na le nywaga e 19 goba go feta moo, gomme o kolobeditšwe bonyenyane lebaka la ngwaga, re go kgothaletša gore o naganišiše ka tirelo ya Bethele.

Ka Moka re na le Karolo

Bjalo ka Bakriste, ka kgonthe ka moka ga rena re kganyoga go etiša dikgahlego tša Mmušo pele bophelong le go ba ka moya ka moka tirelong ya rena go Jehofa. (Mateo 6:​33; Ba-Kolose 3:​23) Le gona re ka kgothaletša bao ba hlankelago Bethele gore ba tšwele pele ba dira tirelo e kgethwa moo. Le gona, ka mo go kgethegilego banababo rena bao e sa lego ba bafsa bao ba swanelegelago tirelo ya Bethele ba swanetše go kgothaletšwa gore ba katanele tirelo ye yeo e šegofaditšwego.

Tirelo ya Bethele ke tsela e kgotsofatšago moyeng ya bophelo​—⁠yeo ka kgonthe e ka bago modiro wa gago wo o e phalago yohle wa bophelo. Ke modiro wa Nick, yo a thomilego go hlankela Bethele a e-⁠na le nywaga e 20. Ka morago ga nywaga e lesome a le tirelong ya Bethele, o re: “Ka mehla ke rapela Jehofa ke mo leboga ka baka la botho bja gagwe bjo bo sa swanelago. Ke eng se sengwe gape seo nka se kgopelago? Mo, re dikologilwe ke Bakriste ba botegago bao ba dirago sohle seo ba ka se kgonago go hlankela Jehofa.”

[Lepokisi/Seswantšho go letlakala 22]

EE ENG SEO BAGOLO LE BATSWADI BA KA SE DIRAGO?

Bagolo le balebeledi ba basepedi ba swanetše ka mo go kgethegilego ba kgothaletše bafsa gore ba dire kgopelo ya go hlankela Bethele. Moragonyana bjale, nyakišišo yeo e sa rulaganyetšwago yeo e dirilwego gare ga ditho tšeo e sa lego tše difsa ka nywaga tša lapa la Bethele e bontšhitše gore 34 lekgolong ya tšona di ile tša kgothaletšwa kudu ke balebeledi ba Bakriste gore di dire tirelo ya Bethele pakane ya tšona. Ee, diphuthego tša gabo bona di ka kwa di lahlegelwa. Eupša ke mo gobotse go gopola gore le ge ka ntle le pelaelo Timotheo a be a e-⁠na le tutuetšo e botse go bafsa ba bangwe kua Lisitara le Ikonio, bagolo ba moo ga se ba mo thibela go hlankeleng le Paulo. Ga se ba phetha ka gore ge ba tlogela Timotheo a sepela le moapostola go tla feleletša ka go lahlegelwa mo gogolo phuthegong ya gabo bona.​—⁠1 Timotheo 4:⁠14.

Batswadi ba Bakriste ka mo go kgethegilego ba swanetše go ba le tutuetšo e botse baneng ba bona tabeng ye. Nyakišišong yeo go sa tšwago go bolelwa ka yona, 40 lekgolong ya bao ba ilego ba botšišwa ba ile ba šupa batswadi ba bona e le bona mothopo o mogolo wa kgothatšo bakeng sa go tsenela tirelo ya Bethele. Kgaetšedi yo mongwe yo a hlanketšego Bethele nywaga e sego kae o boletše gore: “Bophelo bja batswadi ba-ka tirelong ya Jehofa e bile tutuetšo e matla go nna gore ke tsenele tirelo ya Bethele. Ka go bona mohlala wa bona bodireding bja nako e tletšego, ke ile ka tloga ke tseba gore ye e be e tla ba tsela e phalago tšohle le e kgotsofatšago kudu ya bophelo yeo nka e kgethago.”

[Lepokisi go letlakala 24]

BA THABELA TIRELO YA BETHELE

“Ke tšeela tirelo ya-ka ya Bethele godimo. Ke mo go kgotsofatšago go tseba gore ke hlanketše Jehofa letšatši ka moka le gore ke tla dira se swanago gosasa, go hlwa gosasa le matšatšing a mangwe a latelago. Se se nnea letswalo le lebotse gomme sa tlatša monagano wa-ka ka dikgopolo tše di thabišago.”

“Bethele ke lefelo leo go lona o ka gafelago nako ya gago ka moka le matla a gago ka moka tirelong ya Jehofa ka ntle le tšhitišo. Se se tliša lethabo la ka gare. Eupša gape o ka bona mokgatlo wa Jehofa ka kgopolo e fapanego. O ikwa o le kgaufsi kudu le lefelo la motheo la modiro la mokgatlo woo, gomme se se dira gore o thabe kudu.”

“Go tla Bethele ke selo se kaone kudu seo se kilego sa ntiragalela. Mo thuto ga e kgaotše le ka mohla. Le gona mo thuto ga se ya bakeng sa go itirela dilo tše itšego tša motho ka noši, eupša ke bakeng sa go direla Jehofa. Mo modiro wa-ka o ka se tsoge e bile wa lefeela.”

“Go diriša bokgoni bja-ka Bethele go ntira gore ke ikwe ke kgotsofetše gomme ke e-⁠na le khutšo ka gobane ke bo dirišetša Jehofa le banabešo.”

“Ke be ke sa hwetše kgotsofalo ya kgonthe le lethabo mošomong wa-ka wa nakong e fetilego. Ke be ke feditše nywaga e mentši ke akanya ka go šoma gotee le banabešo le dikgaetšedi le go ba hlankela. Ke ka baka leo ke tlilego Bethele. Ke hwetša kgotsofalo ya kgonthe ka go tseba gore maiteko a-⁠ka ka moka a tla hola ba bangwe moyeng gomme a tla tlišetša Jehofa theto.”