Tsogo ya Jesu e a Hlohlwa

“Nka go botša e le ka kgonthe gore le ge re ka kgodišega ka mo go feletšego gore Jesu o kile a phela . . . , fela re ka se bolele ka kgodišego e swanago gore re tseba gore O tsošitšwe ke Modimo bahung.” Ke kamoo Mopišopo-mogolo wa Kereke ya Engelane wa maemong a godimo wa Canterbury a boletšego ka gona.

MOAPOSTOLA wa Mokriste Paulo o be a se na kgonono e bjalo. Go kgaolo 15 ya lengwalo la gagwe la mathomo le le buduletšwego leo a le ngwaletšego Bakriste-gotee le yena ba Korinthe ya bogologolo, Paulo o ngwadile gore: “Xobane taba-kxolo ye ke Le neilexo yôna, ye le nna ke e neilwexo, ké yé: Kriste ó hwile ka ’baka la dibe tša rena ka mo mangwalô a bolêlaxo. O fihlilwe, a tsoxa ka letšatši la boraro ka mo mangwalô a bolêlaxo.”​—⁠1 Ba-Korinthe 15:​3, 4.

Ke go ba le tumelo tsogong ya Jesu Kriste moo go ilego gwa tutueletša barutiwa ba gagwe go ruta ebangedi lefaseng ka moka la Gerika le la Roma​—⁠“[go] babopya bohle ba tlase xa lexodimo.” (Ba-Kolose 1:​23) Ge e le gabotse, tsogo ya Jesu ke motheo o mogolo wa tumelo ya Bokriste.

Lega go le bjalo, go tloga mathomong-thomong, tsogo ya Jesu e ile ya belaelwa le go se dumelwe. Go ba-Juda ka kakaretšo, e be e le thogako bakeng sa balatedi ba Jesu go bolela gore monna yo yoo a kokotetšwego e be e le Mesia. Le gona, go ba-Gerika ba bantši bao ba rutegilego, ka go dumela ga bona go go se hwe ga moya, kgopolo ya tsogo ka boyona e be e le yeo e sa rategego le gatee.​—⁠Ditiro 17:​32-⁠34.

Babelaedi ba Mehleng Yeno

Nywageng ya morago bjale, diithuti tše dingwe tšeo di ipolelago gore ke Bakriste di ile tša gatiša dipuku le dihlogo tšeo di belaelago tsogo ya Jesu gomme tša tsoša ngangišano e šoro tabeng ye. Lesolong la tšona la go tsoma “Jesu wa histori,” diithuti tše di fapa-fapanego di ile tša ganetša ka gore dipego tša Diebangedi tša lebitla le le se nago selo le go bonagala ga Jesu ka morago ga tsogo ke nonwane ya kgonthe, yeo e hlamilwego nako e telele ka morago ga lehu la gagwe e le gore go thekgwe boipolelo bja gagwe bja gore o neilwe matla legodimong.

Ka mohlala, nagana ka dipono tša seithuti sa Mojeremane Gerd Lüdemann, moprofesara wa Testamente e Mpsha le mongwadi wa puku ya What Really Happened to Jesus​—⁠A Historical Approach to the Resurrection. O phega ka gore tsogo ya Jesu ke “polelo e se nago motheo” yeo e swanetšego go ganwa ke yo mongwe le yo mongwe yo a kgomaretšego “pono ya tša thutamahlale ya lefase.”

Moprofesara Lüdemann o bolela gore Kriste yo a tsošitšwego yo a bonagetšego go moapostola Petro e be e le pono ye e bakilwego ke manyami a magolo a Petro le go ipona ga gagwe molato ge a latotše Jesu. Le gona go ya ka Lüdemann, go iponagatša ga Jesu go badumedi ba fetago 500 lebakeng le lengwe e be e le taba ya “tlhalalo ya lešaba.” (1 Ba-Korinthe 15:​5, 6) Ka bokopana, diithuti tše dintši di dira gore dipego tša Beibele mabapi le Jesu yo a tsošitšwego e be lelokelelo la diphihlelo tša boikgopolelo tšeo di baketšego barutiwa maikwelo a mpshafaditšwego a go ikholofela moyeng le go ba le phišego ya boromiwa.

Ee, ba bantši ga ba bontšhe kgahlego dingangišanong tša tša thuto. Lega go le bjalo, poledišano ka tsogo ya Jesu e swanetše go ba yeo e kgahlišago go rena ka moka. Ka baka la’ng? Ka gobane ge e ba a se a tsošwa, Bokriste bo theilwe motheong wa maaka. Ka lehlakoreng le lengwe, ge e ba tsogo ya Jesu ruri e le taba ya kgonthe ya histori, gona Bokriste bo theilwe therešong. Ka tlase ga maemo ao, ga se feela boipolelo bja Kriste bjo bo kgonthišetšwago, eupša go ba bjalo le ka dikholofetšo tša gagwe. Go oketša moo, ge e ba go na le tsogo, lehu ga se mofenyi yo mogolo eupša ke lenaba leo le kago fenywa.​—⁠1 Ba-Korinthe 15:⁠55.

[Mothopo wa Seswantšho go letlakala 3]

From the Self-Pronouncing Edition of the Holy Bible, containing the King James and the Revised versions