Bokriste bja Therešo bo a Fenya!
Bokriste bja Therešo bo a Fenya!
“Lentšu la Morena la na la gola ka matla a makao, gomme la fenya.”—DITIRO 19:20, PK.
1. Hlalosa kgolo ya Bokriste lekgolong la pele la nywaga.
BAKRISTE ba pele ba be ba tsebatša lentšu la Modimo ka phišego yeo e bego e ka se fokodišwe, e le ge ba tutuetšwa ke matla a moya o mokgethwa. Radihistori yo mongwe o ngwadile gore: “Bokriste bo be bo phatlaletše ka lebelo le legolo lefaseng la Roma. Ka ngwaga wa 100, go ka direga gore profense e nngwe le e nngwe yeo e bego e dikologile Mediterranean e be e na le sehlopha sa Bokriste ka gare ga yona.”
2. Sathane o ile a leka bjang go ganetša ditaba tše dibotse, gomme se se be se boletšwe bjang e sa le pele?
2 Sathane Diabolo ga se a ka a kgona go thiba Bakriste ba pele molomo. Go e na le moo, o ile a ganetša tutuetšo ya ditaba tše dibotse ka mokgwa o mongwe—bohlanogi. Jesu o be a boletše e sa le pele ka se seswantšhong sa gagwe sa mabele le mefoka. (Mateo 13:24-30, 36-43) Moapostola Petro le yena o be a lemošitše gore barutiši ba maaka ba be ba tla tšwelela ka phuthegong, ba tšweletša dihlotswana tše di senyago. (2 Petro 2:1-3) Ka mo go swanago, moapostola Paulo o be a lemošitše ka go lebanya gore bohlanogi bo be bo tla tla pele ga letšatši la Jehofa.—2 Ba-Thesalonika 2:1-3.
3. Ke eng seo se diragetšego ka morago ga lehu la baapostola?
3 Ka morago ga lehu la baapostola, ditaba tše dibotse di ile tša khupetšwa ke dithuto tša boheitene le difilosofi. Bjalo ka ge go ile gwa bolelwa e sa le pele, barutiši ba maaka ba ile ba kgopamiša le go senya molaetša o sekilego wa therešo. Ganyenyane-ganyenyane, Bokriste bja therešo bo ile bja khupetšwa ke bofora bjo bo bitšwago Bojakane. Sehlopha sa baruti se ile sa tšwelela seo se ilego sa leka go dira gore Beibele e se ke ya hwetšagala bakeng sa batho ba tlwaelegilego. Gaešita le ge dipalo tša bao ba ipitšago Bakriste di ile tša oketšega, borapedi bja bona e be e se bjo bo sekilego. Bojakane bo ile bja gola ka dinaga gomme ya ba mokgatlo o matla le tutuetšo e matla setšong sa ka Bodikela, eupša bo be bo se na tšhegofatšo ya Modimo gaešita le moya wa gagwe.
4. Ke ka baka la’ng maano a Sathane a go thibela morero wa Modimo a se a ka a atlega?
4 Lega go le bjalo, maano a Sathane a go thibela morero wa Jehofa a be a tlo palelwa. Gaešita le matšatšing a kgampi ya lefsifsi a bohlanogi, Bokriste bja therešo bo be bo sa dutše bo phela gare ga ba bangwe. Banna bao ba ilego ba ngwalolla Beibele ba ile ba dira maiteko a go dira bjalo ka mo go nepagetšego. Ka gona, Beibele ka noši e ile ya dula e šireletšegilego, gaešita le ge molaetša wa yona o be o kgopamišwa ke ba bantši bao ba bego ba ipolela gore ba na le matla a go e ruta. Go theoša le nywaga-kgolo diithuti tše bjalo ka Jerome le Tyndale, ka sebete di ile tša fetolela le go aba Lentšu la Modimo. Dimilione tša batho di ile tša tlwaelanywa le Beibele le sebopego se itšego sa Bokriste, gaešita le ge e be e le bja mankekišane.
5. Moporofeta Daniele o ile a bolela eng e sa le pele mabapi le ‘tsebo’?
5 Mafelelong, bjalo ka ge go boletšwe e sa le pele ka pukung ya Daniele, ‘tsebo e ile ya ata.’ Se se diragetše ‘lebakeng la bofelo’—e lego lebaka leo re phelago go lona gona bjale. (Daniele 12:4) Moya o mokgethwa o lebišitše barati ba therešo lefaseng ka bophara tsebong e nepagetšego ya go tseba Modimo wa therešo le morero wa gagwe. Gaešita le ka morago ga nywaga-kgolo ya thuto ya bohlanogi, lentšu la Modimo le a fenya! Lehono, ditaba tše dibotse di tsebatšwa kae le kae, di šupa batho kholofelong ya lefase le lefsa leo le thabišago. (Psalme 37:11) Ga bjale anke re hlahlobeng go gola ga lentšu la Modimo ga mehleng yeno.
Go Gola ga Lentšu Lehono
6. Ke ditherešo dife tšeo Barutwana ba Beibele ba ilego ba di kwešiša ka ngwaga wa 1914?
6 Mafelelong a ngwaga-kgolo wa bo-19, therešo ya Beibele e ile ya tutuetša sehlopha se senyenyane sa Barutwana ba Beibele, bao lehono ba tsebjago e le Dihlatse tša Jehofa. Ka 1914, Beibele e ile ya ba e phelago go bona. Ba ile ba kwešiša ditherešo tše di kgahlišago mabapi le morero wa Modimo. Ba be ba kgomilwe kudu ke lerato la Jehofa ka go romela Morwa wa gagwe lefaseng, ka go rialo a bula tsela e išago bophelong bjo bo sa felego. Gape ba ile ba tseba le go thabela leina la Modimo le semelo sa gagwe. Go oketša moo, ba ile ba lemoga gore “mabaka a ba-ntlê” a be a šetše a fedile, e lego seo se bego se bontšha gore nako ya gore Mmušo wa Modimo o tlišetše batho ditšhegofatšo e be e le kgaufsi. (Luka 21:24) A ditaba tše dibotse tše di thabišago gakaakang! Ditherešo tše tše matla di be di swanetše go abelanwa le mang le mang, kae le kae. Maphelo a be a le kotsing!
7. Therešo ya Beibele e fentše bjang mehleng yeno?
7 Jehofa o ile a šegofatša palo yeo e nyenyane ya Bakriste ba tloditšwego ka moya. Lehono, palo ya bao ba amogetšego Bokriste bja therešo e fetile dimilione tše tshela. Lentšu la Modimo gape le phatlaletše dinageng, gobane Dihlatse tša Jehofa di hwetšwa dinageng tše 235. Go feta moo, therešo ya Beibele e bile le matla, ya fenya maphekong ka moka a bodumedi le a mangwe. Modiro wo wa lefaseng ka bophara wa go ruta o tlaleletša go bohlatse bjo bo sa ganetšegego bja gore Jesu o gona matleng a Mmušo.—Mateo 24:3, 14.
8. Ke eng seo ba bangwe ba se boletšego mabapi le kgolo ya Dihlatse tša Jehofa?
8 Go fo etša ge bo-radihistori ba ile ba bolela ka go gola mo gogolo ga Bokriste lekgolong la pele la nywaga, diithuti tše dintši di ile tša bolela ka koketšego ya batho ba Jehofa mehleng yeno. Kua United States, diithuti tše pedi di ngwadile gotee gore: “Nywageng e 75 e fetilego, Dihlatse tša Jehofa di ile tša fihlelela tekanyo e kgolo kudu ya kgolo . . . gomme di dirile bjalo lefaseng ka bophara.” Makasine wa ka Bohlabela bja Afrika o bolela ka Dihlatse e le “bjo bongwe bja madumedi a lefase bjo bo golago ka lebelo kudu le bjo bo hlompšhago kudu, bjo bo tsebjago lefaseng ka bophara ka go kgomarela ka mo go feletšego dithuto tša Beibele.” Makasine o kgomaretšego dikgopolo tše di tlwaelegilego wa Katholika wo o gatišwago Yuropa o bolela ka “koketšego e kgolo kudu ya Dihlatse tša Jehofa.” Ke eng seo se tlaleleditšego kgolong ye?
Moya o Mokgethwa o a Šoma Lehono
9. (a) Lebaka le legolo la go fenya ga lentšu la Modimo lehono ke lefe? (b) Jehofa o gogela batho go yena bjang?
9 Lebaka le legolo la go fenya ga lentšu la Modimo lehono ke la gore moya wa Jehofa o šoma ka matla, bjalo ka ge go be go le bjalo lekgolong la pele la nywaga. Jesu o itše: “Xa xo motho e a kxonaxo xo tla xo Nna, xe a sa xôxwe ke Tate e a nthomilexo.” (Johane 6:44) Mantšu a a šišinya gore Modimo o goga ka boleta bao ba sekametšego bophelong, e le yo a ipiletšago dipelong tša bona. Ka modiro wa boboledi wa Dihlatse tša gagwe, Jehofa o gogela tirelong ya gagwe “matsaka a dithšaba ka moka”—e lego batho ba lefase ba boleta le ba bjalo ka dinku.—Hagai 2:6, 7.
10. Ke mehuta efe ya batho yeo e arabetšego lentšung la Modimo?
10 Ga se feela gore moya o mokgethwa o matlafaleditše batho ba Modimo go iša lentšu la Modimo go fihla magomong a lefase; o bile o tutueditše batho ba mehuta ka moka go arabela ditabeng tše dibotse. Ka kgonthe, bao ba amogetšego lentšu la Modimo ba tšwa “xo ba meloko yohle le maleme ohle le dithšaba tšohle.” (Kutollo 5:9; 7:9, 10) Ba hwetšwa gare ga bahumi le badiidi, bao ba rutegilego kudu le bao ba sego ba rutega. Ba bangwe ba amogetše lentšu ka tlase ga maemo a ntwa le tlaišo e šoro, mola ba bangwe ba dirile bjalo dinakong tša khutšo le katlego. Ka tlase ga mohuta o mongwe le o mongwe wa mmušo, ditšong ka moka, go tloga go dikampa tša tlaišo go ya go mešate, banna le basadi ba arabetše gabotse ditabeng tše dibotse.
11. Moya o mokgethwa o šoma bjang maphelong a batho ba Modimo, gomme ke phapano efe yeo e bonagalago?
11 Go sa šetšwe go fapana mo go makatšago ga batho ba Modimo, ba dudišana ka kwano. (Psalme 133:1-3) Se se tlaleletša bohlatseng bja gore moya o mokgethwa o a šoma maphelong a bao ba hlankelago Modimo. Moya wa gagwe ke matla a magolo bakeng sa go dira botse ao a dirago gore bahlanka ba gagwe ba kgone go bontšha lerato, lethabo, khutšo, botho le dika tše dingwe tše di kgahlišago. (Ba-Galatia 5:22, 23) Lehono, re kwešiša gabotse seo moporofeta Maleaki a ilego a se bolela nako e telele e sa le pele: “Le tlo buša Le hlatha moloki le e a sa lokaxo, Le hlaoloxanya mo-dirêla-Morêna le e a sa Mo direlexo.”—Maleaki 3:18.
Lentšu la Modimo le a Fenya go Bašomi ba Fišegago
12. Dihlatse tša Jehofa di ikwa bjang mabapi le modiro wa boebangedi, gomme ke karabelo efe yeo ba e letetšego modirong wa bona wa go ruta?
12 Dihlatse tša Jehofa lehono ga se tšeo di fogo go ya kerekeng gomme tša phutha matsogo. Di kgatha tema e mafolofolo modirong wa boebangedi. Bjalo ka Bakriste ba pele, di ineela ka go rata go dira thato ya Modimo, di tsoma go thuša ba bangwe go ithuta ka dikholofetšo tša Mmušo wa Jehofa. Ke badirišani le Modimo bao ka go dumelelana le moya wa gagwe o mokgethwa ba kgobokeletšago ba bangwe tirelong ya Jehofa. Ka go dira bjalo, ba ekiša kgaugelo ya Jehofa le lerato la gagwe go batho bao ba sa dumelego. Le gona ba dira bjalo go sa šetšwe go lebana ga bona le go hlokomologwa, go kwerwa le tlaišo. Jesu o ile a hlamela barutiwa ba gagwe bakeng sa dikarabelo tše di fapanego go ditaba tše dibotse. O itše: “Mohlanka xa a fete mong wa xaxwe. Xe Nna ba nthlomere, le lena ba tlo Le hlômara. Xe la-ka Lentšu ba le lototše, le la lena ba tlo le lôtôla.”—Johane 15:20.
13. Ke dika dife tšeo Bojakane bo di hlokago tšeo di tletšego gare ga Dihlatse tša Jehofa?
13 Ruri re kgahlišwa ke go swana magareng ga Dihlatse tša Jehofa lehono le bao ba ilego ba amogela Bokriste bja therešo lekgolong la pele la nywaga. Seo se kgahlišago ka mo go swanago ke phapano magareng ga Dihlatse tša Jehofa le Bojakane lehono. Ka morago ga go ngwala ka phišego ya boebangedi ya Bakriste ba pele, seithuti se sengwe se lla ka gore: “Ka ntle le ge e ba bophelo bja mehleng yeno bja kereke bo ka fetoga mo e lego gore mošomo wa boebangedi o tla lebelelwa gape e le selo se Mokriste yo mongwe le yo mongwe yo a kolobeditšwego a tlamegilego go se dira, gomme seo sa thekgwa ke mokgwa wa go phela wo o phalago wa motho yo a sa dumelego, ga go bonagale re ka tšwela pele.” Tšona dika tšeo Bojakane bo di hlokago di atile gare ga Dihlatse tša Jehofa! Tumelo ya bona ke tumelo e phelago, tumelo ya kgonthe le tumelo yeo e theilwego therešong ya Beibele yeo ba ikwago ba gapeletšega go e abelana le bohle bao ba tlago go theetša.—1 Timotheo 2:3, 4.
14. Jesu o be a lebelela bjang bodiredi bja gagwe, gomme ke boemo bofe bja kgopolo bjoo barutiwa ba gagwe ba bo bontšhago lehono?
14 Jesu o be a tšeela bodiredi bja gagwe godimo kudu, a bo dira selo seo a tshwenyegilego kudu ka sona. O itše go Pilato: “Ké se ke se tswáletšwexo; ke tletše sôna lefaseng xore ke bê hlatse ya therešô.” (Johane 18:37) Batho ba Modimo ba ikwa bjalo ka Jesu. Therešo ya Beibele e le dipelong tša bona, ba katanela go hwetša ditsela tša go e abelana le ba bantši ka mo go kgonegago. Tše dingwe tša ditsela tše di bontšha bokgoni bjo bo makatšago.
15. Ke bjang ba bangwe ba ilego ba bontšha bokgoni go boleleng ditaba tše dibotse?
15 Nageng e nngwe ya ka Borwa bja Amerika, Dihlatse di be di theoga moeding wa Noka ya Amazon go fihlelela batho ka therešo. Lega go le bjalo, ge thulano ya selegae e be e phulega ka 1995, dikoloi tšeo e sego tša bohlabani di be di ileditšwe go sepela go bapa le noka. Di ikemišeditše go tšwela pele di nea batho bao ba thabelago dipuku tša Beibele, Dihlatse di ile tša phetha ka gore di tla romela molaetša go theoga le noka. Di ile tša ngwala mangwalo gomme tša a tsenya le dikopi tša dimakasine tša Morokami le Phafoga! ka gare ga mapotlelo a polasetiki ao a se nago selo. Ke moka tša lahlela mapotlelo ka nokeng. Se se ile sa tšwela pele ka lebaka la nywaga e mene le seripa go fihla ge tsela ya go bapa le noka e be e bulelwa batho bohle gape. Go theoša le noka ka moka, batho ba ile ba leboga Dihlatse bakeng sa dipuku. Mosadi yo mongwe yo e bego e le morutwana wa Beibele o ile a ba amogela a sekišitše megokgo ka mahlong gomme a re: “Ke be ke nagana gore nka se tsoge ke le bone gape. Lega go le bjalo, ge ke be ke thoma go amogela dipuku ka mapotlelo, ke ile ka tseba gore ga se la ntebala!” Ba bangwe bao ba bego ba dula kgaufsi le noka ba itše ba ile ba bala dimakasine leboelela. Mafelo a mantši a bodulo a be a e-na le “poso”—sekhutlwana seo dilo tše di phaphametšego meetseng di bego di ema ka lebakanyana go sona. E be e le fao moo batho bao ba thabelago ba bego ba lebelela leboelela “poso” le ge e le efe e tšwago tletlolo.
16. Ke bjang go itira bao ba hwetšagalago ka dinako tše dingwe go bulago tsela ya go dira barutiwa?
16 Boboledi bja ditaba tše dibotse bo hlahlwa le go thekgwa ke Jehofa Modimo le barongwa ba gagwe ba matla. (Kutollo 14:6) Ka go fo itira bao ba hwetšagalago, dibaka tše di sa letelwago tša go dira barutiwa ka dinako tše dingwe di a tšwelela. Kua Nairobi, Kenya, basadi ba babedi ba Bakriste bao ba bego ba le tirelong ya tšhemo ba be ba feditše go šoma dintlo tšeo ba bego ba di abetšwe. Kapejana kgarebjana e ile ya tla e ba lebile gomme ya bolela ka lethabo gore: “Ke be ke dutše ke rapelela go kopana le batho ba swanago le lena.” O ile a kgopela Dihlatse ka matla go tla legaeng la gagwe kapejana bakeng sa poledišano, gomme thuto ya Beibele e ile ya thongwa le yena ka lona letšatši leo. Ke ka baka la’ng mosadi a ile a ya go Bakriste ba babedi ka go akgofa gakaakaa? Mo e ka bago dibeke tše pedi pejana, o ile a hwelwa ke ngwana wa gagwe. Ka gona ge a be a bona mofsa yo mongwe a swere pampišana ya “Kholofelo ke Efe ka Baratiwa Bao ba Hwilego?” o ile a e nyaka kudu gomme a kgopela mošemane gore a mo nee yona. Mošemane o ile a gana eupša a mo šupetša Dihlatse tšeo di mo neilego pampišana. Go se go ye kae, mosadi o be a dira tšwelopele e botse ya moya gomme o be a kgona go lebeletšana kaone le go hwelwa ke ngwana wa gagwe.
Lerato la Modimo le Swanetše go Fenya
17-19. Ke lerato lefe leo Jehofa a le bontšhitšego batho ka topollo?
17 Go gola ga lentšu la Modimo lefaseng ka moka go tswalana kgaufsi le sehlabelo sa topollo sa Kriste Jesu. Go swana le topollo, modiro wa boboledi ke pontšho ya lerato la Jehofa go batho kae le kae. Moapostola Johane o ile a budulelwa go ngwala gore: “Modimo ó ratile lefase xakaakaa, a bá a le nea Morwa wa xaxwe e a tswetšwexo à nnoši, xore mang le mang e a mo dumetšexo a se kê a lahlêxa, a bê le bophelô byo bo sa felexo.”—Johane 3:16.
18 Nagana ka lerato leo Jehofa a le bontšhitšego ka go nea topollo. Ka nywaga e mentši kudu, Modimo o thabetše tswalano ya kgaufsi le Morwa wa gagwe yo a rategago, yo a tswetšwego a nnoši “Yêna Mo-thôma-hlôlô-ya-Modimo.” (Kutollo 3:14) Jesu o rata Tatagwe ka mo go tseneletšego, gomme Jehofa o ratile Morwa wa gagwe “lefase lè sešo la thêwa.” (Johane 14:31; 17:24) Jehofa o dumeletše Morwa yo yo a rategago go hwa e le gore batho ba ka amogela bophelo bjo bo sa felego. A pontšho e kgotsišago gakaakang ya lerato bakeng sa batho!
19 Johane 3:17 e re: “Modimo, Morwa wa xaxwe xa a ka a mo romêla lefaseng xore a le ahlolê; ó mo romile xore lefase le phološwê ke Yêna.” Ka gona, Jehofa o romile Morwa wa gagwe ka thomo e lerato ya phološo, e sego ya kahlolo goba ya go bona batho molato. Se se dumelelana le mantšu a Petro a rego: “[Jehofa] xa a rate xe xo na le ba ba lahlêxaxo; ó rata xe bohle ba ka fihlêla thsokoloxô.”—2 Petro 3:9.
20. Phološo e tswalana bjang le go bolelwa ga ditaba tše dibotse?
20 Ka ge a neile motheo wa molao bakeng sa phološo ka go gafa mo gontši kudu, Jehofa o nyaka gore ba bantši ka mo go ka kgonegago ka gona ba o diriše ka mo go holago. Moapostola Paulo o ngwadile gore: “Ba xo tlo phološwa ké ba ba bitšaxo ’ina la Morêna. Xomme byale ba tlo bitša bya’ng xe ba sešo ba Mo dumêla? Ba tlo dumêla bya’ng xe ba sešo ba Mo kwa? Ba tlo kwa bya’ng, xe xo se sexoeledi?”—Ba-Roma 10:13, 14.
21. Re swanetše go ikwa bjang ka sebaka sa go nea bohlatse modirong wa boboledi?
21 Ke tokelo e thabišago gakaakang go ba le karolo modirong wo wa go ruta wa lefase ka bophara! Ga se mošomo o bonolo, eupša Jehofa o thaba gakaakang ge a bona batho ba gagwe ka potego ba phela ka therešo le go ba le karolo go abelaneng ditaba tše dibotse le ba bangwe! Ka gona go sa šetšwe gore maemo a gago ke afe, dumelela moya wa Modimo le lerato leo le lego pelong ya gago di go tutueletša go ba le karolo modirong wo. Le gona o gopole le gore seo re se bonago se fihlelelwa lefaseng ka bophara se nea bohlatse bjo bo kgodišago bja gore kgaufsinyane Jehofa Modimo o tla phethagatša kholofedišo ya gagwe ya go tšweletša “maxodimo a mafsa le lefase le lefsa” tša letago tšeo go tšona “xo axilexo tokô.”—2 Petro 3:13.
Na o a Gopola?
• Ke ka baka la’ng bohlanogi bo se bja ka bja thiba baboledi ba ditaba tše dibotse molomo?
• Lentšu la Modimo le fentše bjang mehleng ya rena?
• Moya wa Modimo o šoma bjang lehono?
• Topollo e tswalana bjang le go bolelwa ga ditaba tše dibotse?
[Dipotšišo tša Thuto]
[Kerafo/Seswantšho go letlakala 16]
(Bakeng sa mongwalo o beakantšwego ka mokgwa wa kgatišo, bona kgatišo ka boyona)
Koketšego palong ya bagoeledi ba Mmušo lekgolong la bo-20 la nywaga
Palogare ya Bagoeledi (ka dimilione)
6,0
5,5
5,0
4,5
4,0
3,5
3,0
2,5
2,0
1,5
1,0
0,5
1900 1910 1920 1930 1940 1950 1960 1970 1980 1990 2000
[Diswantšho go letlakala 15]
JEROME
TYNDALE
GUTENBERG
HUS
[Mothopo]
Gutenberg and Hus: From the book The Story of Liberty, 1878
[Seswantšho go letlakala 15]
Barutwana ba Beibele ba tsebatša ditaba tše dibotse ka bo-1920
[Diswantšho go letlakala 16, 17]
Lefaseng ka bophara batho ba arabela ditabeng tše dibotse
[Seswantšho go letlakala 18]
Ka go swana le sehlabelo sa topollo sa Jesu Kriste, modiro wa boboledi o godiša lerato la Modimo