Ditaba tše Dibotse tša Mmušo​—Ke Eng?

Ngwagola dinageng tše 235 go dikologa lefase, batho ba 6 035 564, ba banyenyane le ba bagolo, ba dirišitše diiri tše 1 171 270 425 ba boledišana le ba bangwe ka tšona. Go tlaleletša go di boleleng ka molomo, ba tlogetše ka diatleng tša batho dikopi tše dimilione tše fetago 700 tša tsebišo e gatišitšwego bakeng sa go di tsebatša le go di hlalosa. Gape ba abile dikete tša dikhasete le tša bidio bakeng sa go di kwalakwatša. Ke eng tšeo go bolelwago ka tšona?

KE DITABA tše dibotse tša Mmušo wa Modimo. Ka kgonthe, ga go le ka mohla historing ya motho moo “ditaba tše tše dibotse tša Mmušo” di ilego tša bolelwa ka tekanyo yeo re e bonago lehono.​—⁠Mateo 24:​14, NW.

Bao ba dirago modiro wo wa lefase ka moka wa boboledi le wa go ruta, ka moka ke baithapi. Go ya ka pono ya lefase, ba ka bonagala e le ba sa swanelegelego modiro. Ka gona, ke eng seo se dirago gore ba be le sebete le katlego? Matla a ditaba tše dibotse tša Mmušo ke lebaka le legolo, ka gobane ke ditaba tša mabapi le ditšhegofatšo tšeo di tlago go tlela batho. Tše ke ditšhegofatšo tšeo batho ka moka ba di hlologetšego​—⁠lethabo, go lokologa mathateng a tša boiphedišo, mmušo o mobotse, khutšo le polokego le selo se sengwe seo ba bantši ba sa itshwenyego gaešita le go nagana ka sona​—⁠bophelo bjo bo sa felego! Tše ka kgonthe ke ditaba tše dibotse go batho bao ba tsomago morero wa bophelo. Ee, ditšhegofatšo tše ka moka gotee le tše dingwe, e ka ba tša gago ge e ba o arabela le go gata mogato ka mo go amogelegago go tsebatšeng ditaba tše dibotse tša Mmušo.

Mmušo ke Eng?

Lega go le bjalo, Mmušo wo o bolelwago e le wona ditaba tše dibotse ke ofe? Ke Mmušo woo ba dimilione ba rutilwego go o rapelela ka mantšu a ao a tlwaelegilego: “Tata-wešo wa maxodimong! Leina la xaxo a le kxêthwê; Mmušô wa xaxo a o tlê; thatô ya a xaxo a e dirwê mono lefaseng byalo ka xe e dirwa lexodimong.”​—⁠Mateo 6:​9, 10.

Ke Mmušo wo o boletšwego ke moporofeta wa mo-Hebere Daniele nywaga-kgolo e 25 e fetilego ge a be a ngwala gore: “Modimo [o tlo] tsoša mmušô wo o ka se kexo wa šwalalanywa neng le neng, wo o ka se kexo wa selêla xo sethšaba se sengwê. O tlo phšatla mebušô e mengwê ka moka wa e fediša xe e le wôna, o tlo êma xo ya xo ile.”​—⁠Daniele 2:⁠44.

Ka gona, ditaba tše dibotse di mabapi le Mmušo goba pušo ka Modimo yeo e tlago go tloša bokgopo ka moka gomme e buše lefaseng ka moka ka khutšo. O tla phethagatša morero wa mathomo wa Mmopi bakeng sa batho le lefase.​—⁠Genesi 1:⁠28.

 “Mmušô wa Maxodimo o Batametše”

Mo e ka bago nywaga e 2 000 e fetilego, ditaba tše dibotse tša Mmušo di ile tša tsebatšwa phatlalatša la mathomo ke monna yo a ineetšego yo ponagalo ya gagwe le mokgwa wa gagwe di bego di goga tlhokomelo e kgolo. Monna yo e be e le Johane Mokolobetši, morwa wa moperisita wa mo-Juda Sakaria le mosadi wa gagwe Elisabetha. Johane o be a apara kobo ya boya bja kamela, a itlema matheka ka lerala, ka mokgwa wa moporofeta Eliya, yo a ilego a mo swantšhetša. Eupša e be e le molaetša wa gagwe wo o ilego wa tanya tlhokomelo ya ba bantši. O ile a goeletša ka gore, “sokoloxang, xobane mmušô wa maxodimo o batametše.”​—⁠Mateo 3:​1-⁠6.

Batheetši ba Johane e be e le ba-Juda bao ba bego ba itšea e le barapedi ba Modimo wa therešo Jehofa. E le setšhaba, ba ile ba amogela kgwerano ya Molao ka Moše nywaga e ka bago e 1 500 pejana. Tempele e botse e be e sa dutše e eme Jerusalema, moo dihlabelo di bego di neelwa ka go dumelelana le Molao. Ba-Juda ba be ba ikwa ba kgodišegile gore borapedi bja bona bo lokile mahlong a Modimo.

Lega go le bjalo, ka go theetša Johane, batho ba bangwe ba ile ba thoma go lemoga gore bodumedi bja bona ga se seo ba bego ba nagana gore ke sona. Setšo le difilosofi tša Segerika di be di tseneletše dithutong tša bodumedi bja ba-Juda. Molao woo o bego o amogetšwe go tšwa go Modimo ka Moše, mo nakong ye o be o tswakilwe gaešita le go senywa ke ditumelo tša batho le metlwae. (Mateo 15:⁠6) Ba forilwe ke baetapele ba bona ba bodumedi ba dipelo tše thata le bao ba se nago kgaugelo, ba bantši ba be ba se sa hlwa ba rapela Modimo ka mo go amogelegago. (Jakobo 1:​27) Ba be ba swanetše gore ba itshole dibeng tša bona tša malebana le Modimo le tša malebana le kgwerano ya Molao.

Ka nako yeo, ba-Juda ba bantši ba be ba lebeletše go tšwelela ga Mesia yo a holofeditšwego goba Kriste, gomme ba bangwe ba be ba ipotšiša mabapi le Johane gore: “E se be mohlomongwe e le yena Kriste.” Lega go le bjalo, Johane o ile a ganetša gore e be e se yena gomme go e na le moo a ba lebiša mothong yo mongwe, yo a boletšego ka yena gore: “[Ke] yo ke sa swanelago go hunolla leralana la dieta tša gagwe.” (Luka 3:​15, 16, PK) Ge a rola Jesu go barutiwa ba gagwe, Johane o boletše gore: “Bônang Kwana ya Modimo e rwelexo sebe sa lefase.”​—⁠Johane 1:⁠29.

Tšeo e be e le ditaba tše dibotse e le ka kgonthe ka gobane Johane ge e le gabotse o be a šupetša batho ka moka tsela e išago bophelong le lethabong​—⁠Jesu yena yo a “rwelexo sebe sa lefase.” Bjalo ka ditlogolo tša Adama le Efa, batho ka moka ba belegwe ka tlase ga taolo e šoro ya sebe le lehu. Ba-Roma 5:​19 e hlalosa gore: “Xe ba bantši ba tlile ba ba badira-dibe ka xo se kwe xa motho o tee [Adama], byalo xo kwa xa Yêna o tee [Jesu] xo dira ba bantši baloki.” Jesu bjalo ka kwana ya sehlabelo, o be a tla ‘tloša sebe’ le go tliša phetogo boemong bjo bo nyamišago bja ditaba tša batho. Beibele e hlalosa gore, “moputsô wa sebe ké lehu; ’me neô ya kxauxêlô ya Modimo ké bophelô byo bo sa felexo ka Jesu Kriste Mong ’a rena.”​—⁠Ba-Roma 6:⁠23.

Bjalo ka motho yo a phethagetšego​—⁠ge e le gabotse, motho yo a phagamego kudu yo a kilego  a phela​—⁠Jesu o ile a dira modiro wa go bolela ditaba tše dibotse. Pego ya Beibele go Mareka 1:​14, 15 e re botša gore: “Mola Johane à xolexilwe, Jesu ó ile Galilea, a xoêlêla Ebangedi ya mmušô wa Modimo. A re: Lebaka le tlile; mmušô wa Modimo o batametše: sokoloxang Le dumêlê Ebangedi [“ditaba tše dibotse,” NW].”

Bao ba ilego ba arabela molaetšeng wa Jesu le go bontšha tumelo ditabeng tše dibotse ba ile ba šegofatšwa kudu. Johane 1:​12 e bolela gore: “Bohle ba ba mo amoxetšexo [Jesu] ó ba neile matla a xo ba bana ba Modimo. Ké bao ba xo dumêla Leina la xaxwe.” Ka go ba bana goba barwa ba Modimo, ba ile ba ba boemong bja go amogela moputso wa bophelo bjo bo sa felego.​—⁠1 Johane 2:⁠25.

Eupša tokelo ya go amogela ditšhegofatšo tša Mmušo e be e se ya lekanyetšwa go batho ba lekgolong la pele la nywaga. Bjalo ka ge go boletšwe pejana, ditaba tše dibotse tša Mmušo wa Modimo di goeletšwa le go rutwa go baagi ka moka ba lefase lehono. Ka gona, ditšhegofatšo tša Mmušo di sa dutše di hwetšagala. Ke eng seo o swanetše go se dira gore o amogele ditšhegofatšo tše bjalo? Sehlogo se se latelago se tla hlalosa.