Go kwa​—Na ke Thuto e Bohlokwa ya Bjaneng?

“BATSWADI ba Nyaka Batho ba ba Ikemetšego, e Sego Bana Feela ba ba Kwago.” Ke kamoo sehlogo sa kuranta se bego se balega ka gona. Pego ye ya seripana e be e theilwe dipoelong tša nyakišišo yeo e dirilwego kua New Zealand, tšeo di utolotšego gore ke feela “22 lekgolong ya bao ba arabetšego ba ba bego ba nagana gore bana ba swanetše go rutwa go kwa ka gae.” Nyakišišo gape e hweditše gore batswadi lehono ba dumela gore ke gabohlokwa kudu go ruta bana ditaba tše bjalo ka mekgwa e mebotse, go ikemela le boikarabelo.

Mehleng ye ya go godiša dikgahlego tša motho ka noši le ya boithati, ga se mo go makatšago gore batho ba bantši ba lebelela taba ya go kwa le ya go go ruta bana ka go hloka kholofelo mo gogolo. Eupša, na go kwa nakong ya bjana go swanetše go fo phaelwa ka thoko e le selo seo se šiilwego ke nako? Goba na go gare ga dithuto tše bohlokwa tšeo bana ba ka ithutago tšona le go holwa ke tšona? Se bohlokwa kudu, Jehofa Modimo, e lego Mothomi wa thulaganyo ya lapa, o lebelela bjang go kwa batswadi, gomme ke mehola efe e mengwe yeo e ka hwetšwago go tšwa go kweng mo go bjalo?​—⁠Ditiro 17:​28; Ba-Efeso 3:​14, 15.

“Ké Xôna xo Loka”

Moapostola Paulo o ile a ngwalela phuthego ya Bokriste ya lekgolong la pele la nywaga kua Efeso gore: “Lena Bana! Kwang batswadi ba lena Moreneng, xobane ké xôna xo loka.” (Ba-Efeso 6:⁠1) Ka gona, lebaka la motheo bakeng sa go kwa mo go bjalo ke gore go dumelelana le tekanyetšo ya Modimo ya seo se lokilego. Go etša ge Paulo a boletše, “ké xôna xo loka.”

Ka go dumelelana le se, re lemoga gore Lentšu la Modimo le hlalosa tayo ya botswadi ya go laya ka lerato e le selo se sebotse, “seala se se ratêxaxo mo hloxong ya xaxo, le pheta molaleng wa xaxo,” gape e le selo seo “se kxahlaxo Morêna.” (Diema 1:​8, 9; Ba-Kolose 3:​20) Ka mo go fapanego kudu, go se kwe batswadi go baka go se amogelwe ke Modimo.​—⁠Ba-Roma 1:​30, 32.

“O tlê O bê le Mahlatse”

Paulo o ile a šupa mohola o mongwe wa go kwa ge a be a ngwala gore: “Xodiša tat’axo le mm’axo, ké wôna molaô wa pele o naxo le kholofedišô ya xo re: O tlê O bê le mahlatse, O phele xalelele lefaseng.” (Ba-Efeso 6:​2, 3; Ekisodo 20:​12) Ke ka ditsela dife moo go kwa batswadi go ka feleletšago ka gore motho a phele gabotse? 

Sa pele, na ga se therešo gore batswadi ba thušwa ke gore ba na le nywaga e mentši le phihlelo? Gaešita le ge go ka bonala ba sa tsebe mo gontši ka di-computer goba dithuto tše dingwe tšeo di rutwago sekolong, go tseba go gontši ka go phela le go lebeletšana le mathata a bophelo gona ba a tseba. Ka lehlakoreng le lengwe, bafsa ba hlaelelwa ke kgopolo e leka-lekanego yeo e tlago le go gola. Ka go rialo, ba a akgofa ge ba dira diphetho, gantši ba ineela kgateletšong e sa lokago ya dithaka, gomme gantši seo se bakela bona ka noši kotsi. Beibele e bolela therešo ka gore: “Bošilo bo tlemeletšwe pelong ya mošimanyana.” Sehlare ke eng? “Kgati ya tsholo e  tlo bo ntšha, e bo lahla kgole le yena.”​—⁠Diema 22:​15, PK.

Mehola ya go kwa ga e tswalanong ya motswadi le ngwana feela. Gore lekoko la batho le šome ka thelelo le ka mo go nago le tšweletšo, go swanetše go ba le tirišano yeo le yona e nyakago tekanyo e itšego ya go kwa. Ka mohlala, lenyalong, go ikemišetša go ikokobetša, go e na le go ba yo a nyakago dilo ka šiši le go se kgomege ka ditshwanelo le maikwelo a ba bangwe, ke gona go feleletšago ka khutšo, kwano le lethabo. Go ikokobetša ga mothwalwa lefelong la mošomo ke selo se se nyakegago bakeng sa gore kgwebo goba maiteko le ge e le afe a atlege. Ge e le mabapi le melao le ditekanyetšo tša mmušo, go kwa ga go efoše motho kotlo feela, eupša go tliša tekanyo ya polokego le tšhireletšego.​—⁠Ba-Roma 13:​1-⁠7; Ba-Efeso 5:​21-25; 6:​5-⁠8.

Bafsa bao ba sa kwego molao gantši e ba diphure setšhabeng. Ka mo go fapanego, thuto ya go kwa yeo e ithutwago bjaneng e ka ba e putsago bophelong ka moka bja motho. Ke mo go holago gakaakang go ithuta se bjaneng!

Moputso o Mogolo wa go kwa

Go kwa ga go tliše feela ditswalano tše di thabišago tša lapa le mehola e mengwe bophelong, eupša gape go nea motheo woo go wona go ka agwago tswalano e bohlokwa kudu go di feta ka moka​—⁠e lego tswalano magareng ga motho le Mmopi wa gagwe. Bjalo ka “Mmopi yo Mogolo,” yo go yena go lego “mothôpô wa bophelô,” Jehofa Modimo o swanelwa ka mo go loketšego ke gore re mo kwe ka mo go feletšego.​—⁠Mmoledi 12:⁠1, NW; Psalme 36:⁠9.

Lentšu “go kwa” ka dibopego tša lona tše di fapa-fapanego le tšwelela ka makga a 160 ka Beibeleng. Go oketša moo, go bolelwa gantši ka melao ya Modimo, ditaelo, melao le dikahlolo tšeo ka moka di nyakago boikokobetšo. Ga go pelaelo gore Modimo o lebelela go kwa e le senyakwa bakeng sa go thabela go amogelwa ke yena. Ee, go kwa ke senyakwa se bohlokwa bakeng sa go aga tswalano le Jehofa. (1 Samuele 15:​22) Ka manyami, tshekamelo ya tlhago ya motho ga se go kwa eupša ke go se kwe. Beibele e re: “Diakanyô tša pelo ya motho [ke] tše mpe xo tloxa byaneng bya xaxwe.” (Genesi 8:​21) Ka gona, thuto ya go kwa e swanetše go ithutwa e sego feela bjaneng eupša bophelong ka moka. Go dira bjalo go tliša moputso o mogolo.

Gopola gore go etša ge moapostola Paulo a boletše, molao wa go kwa batswadi o na le kholofetšo e lego gabedi, e lego ya gore ‘o tle o be le mahlatse le gore o phele galelele lefaseng.’ Kgonthišetšo ya kholofetšo ye e hwetšwa go Diema 3:​1, 2 yeo e rego: “Ngwan’a-ka! Se lebalê thutô ya-ka. Pelo ya xaxo a e lôtê ditaêlô tša-ka. Xobane di tlo Xo tlišetša bontši bya matšatši, le nywaxa ya bophelô, le têtlêxô.” Moputso o mogolo go bao ba kwago ke tswalano le Jehofa mo nakong ye le bophelo bjo bo sa felego lefaseng le lefsa la khutšo.​—⁠Kutollo 21:​3, 4.

[Diswantšho go letlakala 30, 31]

Go kwa go tliša tswalano e thabišago ka lapeng, mošomong gape go tliša tswalano e thabišago le Jehofa