Na o Nagana Gore ga o Kwešišwe?

ANTONIO o ile a ikwa a tshwenyegile. Kapejana le ka mo go sa hlalosegego, mogwera wa gagwe wa pelo-bohloko Leonardo o ile a thoma go se sa bontšha bogwera go yena. * Mabakeng a fapanego ditumedišo tša Antonio di be di sa arabje ge a dumediša, gomme ge ba le gotee, go be go bonagala bjale go e-⁠na le lepheko magareng ga bona. Antonio o ile a thoma go boifa gore o swanetše go ba a dirile goba a boletše selo se itšego seo mogwera wa gagwe a ilego a se kwela thoko. Eupša ke sefe?

Go se kwešišane ke mo go tlwaelegilego. Mo gongwe ke mo gonyenyane gomme go bonolo go go lokiša. Mo gongwe e ka ba moo go tlaletšago kudu, kudu-kudu ge maikwelo a fošagetšego a phegelela go sa šetšwe maiteko ka moka a go a fediša. Ke ka baka la’ng go se kwešišane go e-⁠ba gona? Go kgoma bjang batho bao ba akaretšwago? O ka dira eng ge e ba ba bangwe ba sa kwešiše selo se itšego seo o se dirago? Na ruri go na le taba gore ba bangwe ba nagana eng ka wena?

Therešo e sa Phemegego

Ka ge batho ba bangwe ba ka se kgone go bala dikgopolo tša rena le maikemišetšo a rena, ka nako e nngwe motho yo mongwe o tla kwešiša ka mo go fošagetšego mantšu a rena goba ditiro tša rena. Kgonagalo ya go ba le go se kwešišane e apareditše gohle. Ka dinako tše dingwe, re fo palelwa ke go hlalosa dikgopolo tša rena ka mo go kwagalago le ka mo go nepagetšego kamoo go ka kgonegago. Lešata le ditšhitišo tše dingwe di ka dira gore go be thata go ba bangwe go lebiša tlhokomelo ya bona e feletšego go rena.

Mekgwa le ditsela tše itšego le tšona di ka kwešišwa ka mo go fošagetšego. Ka mohlala, motho yo a nago le dihlong a ka tšewa ka phošo e le yo a se nago bogwera, yo a sa kgomegego ka ba bangwe goba yo a ikgantšhago. Diphihlelo tša nakong e fetilego di ka dira gore motho a arabele ka go laolwa ke maikwelo go e na le go arabela ka tsela e leka-lekanego maemong a itšego. Go fapana ga setšo le leleme go bolela gore taba ya go kwešišana ga batho e ka se fo ba e itiragalelago feela. Go tlaleletša go se ke ge e ba go e-⁠na le mabare-bare le lesebo, gomme ga se gwa swanela go re makatša gore seo se bolelwago ke dilo tšeo di bolelwago goba di dirwago ka dinako tše dingwe se fapana le seo mathomong se bego se rerilwe. Ee, tše ka moka di nea khomotšo e nyenyane go bao ba lemogago gore maikemišetšo a bona a kwešišitšwe ka mo go fošagetšego.

Ka mohlala, Anna o be a ile a fo ipolelela feela mabapi le go tuma ga mogwera wa gagwe yo a bego a se gona. Taba e ile ya fetišetšwa pele ka mo go sa nepagalago, ke moka Anna a maketše e bile a gakanegile, mogwera yoo wa gagwe ka pefelo o ile a mo latofatša pele ga babogedi ba bantši ka gore o hufegela ge yena mogwera yoo a ile a bontšhwa tlhokomelo ke mogwera yo mongwe wa monna. Seo Anna a se boletšego se be se kwetšwe thoko ka mo go feletšego, gomme maiteko a gagwe ka moka a go leka go kgonthišetša mogwera wa gagwe gore o be a sa ikemišetša go mo kweša bohloko a ile a ipontšha e le a lefeela. Boemo bjoo bo ile bja baka bohloko bjo bogolo, gomme go ile gwa feta nako e telele pele ga ge Anna a ka phošolla ka mo go feletšego go se kwešišane moo.

Gore ba bangwe ba go ahlola bjang gantši go ithekgile ka tsela yeo ba kwešišago maikemišetšo a gago ka gona. Ka gona ke ga tlhago go ikwa o ferekane ge batho ba gopolela maikemišetšo a gago ka mo go fošagetšego. O ka befelwa, o nagana gore ga o bone lebaka leo ka lona motho le ge e le mang a swanetšego go se go kwešiše. Go wena, go kalwa ka tsela e bjalo ke ga go beba sefahlego, ga go swaya diphošo goba mo go fošagetšego ka mo go feletšego, gomme e ka ba mo go kwešago bohloko ka mo go tseneletšego​—⁠kudu-kudu ge e ba o hlompha pono ya bao ba dirago dikahlolo tše sa lokago.

Gaešita le ge o ka tenwa ke tsela yeo batho ba go ahlolago ka yona, lega go le bjalo ke mo go swanetšego go hlompha kgopolo ya ba bangwe. Ga se tsela ya Bokriste go hlokomologa seo ba bangwe ba se naganago, gomme le ka mohla re ka se ke ra nyaka mantšu a rena goba ditiro di e-⁠ba le mafelelo a gobatšago bathong ba bangwe. (Mateo 7:​12; 1 Ba-Korinthe 8:​12) Ka gona ka dinako tše dingwe go ka nyakega gore o dire boiteko bja go lokiša kgopolo ya motho yo mongwe e fošagetšego ka wena. Lega go le bjalo, go kgomega ka mo go feteletšego mabapi le go amogelwa ke mo go se nago mohola, moo go lebišago go go lahlegelwa ke boitlhompho goba maikwelong a go ikwa o lahlilwe. Go feta moo, bohlokwa bja gago bja kgonthe ga se bja ithekga ka seo ba bangwe ba se naganago.

Ka lehlakoreng le lengwe, o ka lemoga gore go swawa ga gago diphošo go theilwe motheong o mobotse. Seo le sona e ka ba seo se kwešago bohloko, eupša ge e ba ka go ikemišetša le ka potego o amogela go se phethagale ga gago, diphihlelo tše bjalo e ka ba tšeo di holago, tša go tutueletša go dira diphetogo tšeo di nyakegago.

Mafelelo a sa Kgahlišego

Go se kwešišane go ka lebiša goba gwa se lebiše mafelelong a šoro. Ka mohlala, ge e ba o ka kwa monna a bolelela godimo ka lebenkeleng la go jela o ka phetha ka gore ke motho yo a ratago go bolela le batho goba ke mpogeng. O ka ba o fošitše. Motho yo a bolelago le yena a ka ba a e-⁠na le bothata bja go kwa. Goba mohlomongwe morekiši wa lebenkeleng o bonagala a se a thaba, eupša mohlomongwe a ka ba a sa ikwe gabotse. Gaešita le ge go bona dilo ka mo go fošagetšego mo go bjalo go lebiša dikgopolong tše di fošagetšego, mohlomongwe go ka se tšweletše mafelelo a šoro goba ao a tšeago lebaka le letelele. Lega go le bjalo, ka dinako tše dingwe go bona dilo ka mo go fošagetšego go ka baka kotsi. Ela hloko ditiragalo tše pedi historing ya Isiraele ya bogologolo.

Ge Nahasi, kgoši ya Amoni a be a e-⁠hwa, Dafida o ile a romela batseta go yo homotša morwa wa gagwe Hanuni, yo a bego a šetše a thomile go buša legatong la tatagwe. Lega go le bjalo, ketelo ya batseta e ile ya kwešišwa ka mo go fošagetšego e le go tlo hlolwa ga bonaba ga tikologo ya ba-Amoni, e lego seo se ilego sa tutueletša Hanuni go thoma ka go kokobetša batseta ke moka a tsoša ntwa malebana le Isiraele. E le mafelelo a se, go ile gwa hwa bonyenyane batho ba 47 000​ —⁠se ka moka e le ka baka la go kwešišetša thoko maikemišetšo a mabotse.​—⁠1 Koronika 19:​1-⁠19.

Pejana historing ya Isiraele, go kwešišetšwa thoko mo gongwe go ile gwa rarollwa ka mo go fapanego e le ka kgonthe. Meloko ya Rubeni le Gada le seripa sa moloko wa Manase e ile ya aga aletare e kgolo kgaufsi le Noka ya Jorodane. Isiraele ka moka e ile ya bona se e le tiro ya go se botege, e le go rabela malebana le Jehofa. Ka gona ba ile ba bokana bakeng sa go gata mogato wa tša bohlabani. Pele ba ka dira selo le ge e le sefe se sehlogo, ba-Isiraele ba ba bangwe ba ile ba romela batseta bakeng sa go yo hlalosa kgalefo malebana le tiro yeo e kwešišitšwego e le go se botege. E bile mo gobotse gore ba ile ba dira bjalo ka gobane baagi ba aletare ba arabile ka gore ba be ba se na maikemišetšo a go hlanogela borapedi bjo bo sekilego. Ka mo go fapanego, aletare e be e tla šoma bjalo ka segopotšo sa go botegela ga bona Jehofa. Go kwešišetša thoko mo go ka ba go ile gwa baka tšhollo e kgolo kudu ya madi, eupša bohlale bo ile bja phema mafelelo a bjalo a kotsi.​—⁠Jošua 22:​10-⁠34.

Lokiša Ditaba ka Moya wa Lerato

Go bapiša dipego tše ke mo go rutago. Go a bonagala gore go hlalosa taba ka mo go kwagalago ke selo se bohlale. Tiragalong ye e ahla-ahlilwego la mafelelo, go tseba mang gore ke maphelo a makae ao a ilego a bolokwa e le feela ka gobane mahlakore ka bobedi a ile a boledišana? Mabakeng a mantši, maphelo a ka se ke a ba kotsing ge e ba o palelwa ke go kwešiša maikemišetšo a motho yo mongwe a kgonthe, eupša segwera se ka ba kotsing. Ka gona, ge e ba o nagana gore motho yo mongwe o go swere ka mo go sa swanelago, na o kgonthišegile gore o kwešiša dilo ka mokgwa wo di lego ka gona e le ka kgonthe, goba na o di kwešiša ka mo go fošagetšego? Maikemišetšo a motho yo mongwe e be e le afe? Mmotšiše. Na o nagana gore ga o kwešišwe? Bolela ka seo. O se ke wa dumelela boikgantšho bo go šitiša.

Jesu o neile tlhohleletšo e botse bakeng sa go rarolla diphapano: “Ké xôna, xe O tliša neô ya xaxo aletareng, ’me Ò le xôna-fao wa êlêlwa xore ngwan’eno ó na le taba le wêna, xôna tloxêla neô ya xaxo moo aletareng, O thômê xo y’o boêlana le ngwan’eno, O tseb’o tliša neô ya xaxo.” (Mateo 5:​23, 24) Ka gona selo se swanetšego seo se ka dirwago ke go boledišana le motho ka sephiring, ka ntle le go akaretša ba bangwe. Go ka se thuše ge e ba motho yo a go kgopišitšego a e-⁠kwa pelaelo ya gago ka motho yo mongwe pele. (Diema 17:⁠9) Pakane ya gago e swanetše go ba ya go dira khutšo ka moya wa lerato. Ka boleta hlalosa bothata ka mantšu a bonolo, a kwagalago le a se nago ditatofatšo. Hlalosa kamoo boemo bo go dirago gore o ikwe ka gona. Ke moka o theetše e le ka kgonthe pono ya motho yoo. O se ke wa akgofela go latofatša ka maikemišetšo a fošagetšego. Ikemišetše go lebelela motho yo mongwe e le yo a bego a se na maikemišetšo a fošagetšego. Gopola gore lerato “le dumêla tšohle.”​—⁠1 Ba-Korinthe 13:⁠7.

Ee, gaešita le ge go se kwešišane go lokišitšwe, go sa dutše go ka ba le maikwelo a kwelego bohloko goba mafelelo a fošagetšego ao a tšeago nako e telele. Go ka dirwa eng? Moo go nyakegago, go kgopela tshwarelo ka mo go tšwago pelong ke mo go swanetšego gotee le mogato le ge e le ofe wo ka mo go kwagalago o ka gatwago wo o lebišago go lokišeng ditaba. Maemong a bjalo ka moka, motho yo a kwešitšwego bohloko o tla dira gabotse go latela keletšo e buduletšwego e rego: “Tšwelang pele le rwalana gomme le lebalelana ka bolokologi ge e ba le ge e le mang a e-⁠na le pelaelo le yo mongwe. Go fo etša ge Jehofa a le lebaletše ka bolokologi, le lena le dire bjalo. Eupša, ka godimo ga dilo tše ka moka, ikapešeng lerato, ka gobane ke tlemo e phethagetšego ya botee.”​—⁠Ba-Kolose 3:​13, 14, NW; 1 Petro 4:⁠8.

Ge feela re sa dutše re sa phethagala, go tla ba le go se kwešišane le maikwelo a gobaditšwego. Motho le ge e le mang a ka dira phošo goba a bolela ka mokgwa wo o kwagalago o sa bontšhe go naganela goba o se nago botho. Beibele e re: “Re ba xo foša xa-ntši ka moka xa rena. Xe xo ka ba le e a sa fošexo ka leleme, yêna-eo ké monna yo bolô-ka-tlalô, e a kxônaxo xo buša mmele wa xaxwe ka moka ka moxala.” (Jakobo 3:⁠2) Ka ge Jehofa Modimo a tseba se ka moka, o re neile ditaelo tše: “Se phakê xo selekêxa ka pelong; thselekêxô e axile mo pelong ya setlatla. Le xôna o se kê wa ya le mantšu ka moka a batho ba a bolêlaxo, o se tlo kwa xe mohlanka w’axo a xo roxa;  xobane pelo ya xaxo e tseba xobane ké xa-ntši le wêna Ò roxa ba bangwê.”​—⁠Mmoledi 7:​9, 21, 22.

“Morêna ó Hlatha Dipelo”

Go thwe’ng ge e ba go bonala go ka se kgonege go lokiša maikwelo a motho yo mongwe a fošagetšego ka wena? O se ke wa langwa. Tšwela pele o hlagolela le go bontšha dika tša Bokriste ka gohle kamoo o ka kgonago ka gona. Kgopela Jehofa gore a go thuše go kaonefatša moo o swanetšego go kaonefatša gona. Bohlokwa bja gago bja kgonthe bjalo ka motho mafelelong ga bo laolwe ke batho ba bangwe. Ke Jehofa feela yo a ka ‘hlathago dipelo’ ka mo go nepagetšego. (Diema 21:⁠2) Gaešita le Jesu o be a tšeelwa fase gomme o be a nyatšwa ke batho, eupša seo ga se sa ka sa kgoma tsela yeo Jehofa a bego a mo lebelela ka yona. (Jesaya 53:⁠3) Gaešita le ge ba bangwe ba ka go ahlola ka mo go fošagetšego, o ka ‘tšhollela pelo ya gago’ go Jehofa, o kgodišegile gore o a go kwešiša, “ka xobane yo batho ba mmôxêlaxo, xa se yêna. Motho ó bôna se se lebanaxo le mahlô a xaxwe; Morêna Yêna ó bôna pelo.” (Psalme 62:⁠8; 1 Samuele 16:⁠7) Ge e ba o phegelela go direng se se lokilego, bao ba bopilego kgopolo e fošagetšego ka wena, ge nako e dutše e tšwela pele ba lemoga phošo ya bona gomme ba fetoša kgopolo ya bona.​—⁠Ba-Galatia 6:⁠9; 2 Timotheo 2:⁠15.

Na o gopola Antonio yo go boletšwego ka yena mathomong a sehlogo se? O ile a rapa sebete sa go latela keletšo ya Mangwalo, gomme a bolela le mogwera wa gagwe Leonardo, a mmotšiša gore o dirile eng sa go mo kgopiša. Mafelelo e bile afe? Leonardo o be a maketše. O ile a araba ka gore Antonio o be a sa dira selo se se mo kgopišitšego le gatee gomme a mo kgonthišetša gore o be a sa ikemišetša go mo swara ka tsela e fapanego. Ge e ba go be go bonagala a sa arabele, mohlomongwe o be a fo ba a ile le megopolo. Leonardo o ile a kgopela tshwarelo ka gore o ile a kweša mogwera wa gagwe bohloko maikwelong a sa lemoge gomme a mo lebogela ge a mo hlokomedišitše taba yeo. O ile a oketša ka gore nakong e tlago, o tla ela hloko kudu e le gore a se ke a nea kgopolo e swanago go ba bangwe. Go se kwešišane ka moka go ile gwa fo nyamelela, gomme bagwera ba babedi ba ile ba itlhatsela e le ba gweranego kgaufsi kudu go swana le pele.

Ga se mo go thabišago le gatee go nagana gore ga o kwešišwe. Lega go le bjalo, ge e ba o gata megato ka moka e ka kgonegago bakeng sa go lokiša ditaba le go latela melao ya motheo ya Mangwalo ya lerato le go lebalela, mohlomongwe le wena o tla fihlelela mafelelo a swanago a mabotse.

[Mengwalo ya ka tlase]

[Diswantšho go letlakala 23]

Go lokiša ditaba ka moya wa lerato le wa go lebalela go ka lebiša mafelelong a thabišago