Phihlelo

Re be re le Badirišani

KA GE GO ANEGA MELBA BARRY

Ka July 2, 1999, nna le monna wa-ka re be re le pokanong e kgolo ya Dihlatse tša Jehofa go etša ge re ile ra ba go tšona ka makga a dikete nywageng ya rena e 57 ya ge re nyalane. Lloyd o be a nea polelo ya mafelelo kopanong ya selete kua Hawaii Labohlano leo. Gatee-tee o ile a wa. Go sa šetšwe maiteko ka moka a go mo phafoša, o ile a hwa. *

BANABABO rena ba Bakriste le dikgaetšedi kua Hawaii bao ba ilego ba nkema-emela bakeng sa go nthuša go lebeletšana le masetla-pelo a ke ba rategago gakaakang! Lloyd o ile a kgoma maphelo a ba bantši ba bona, gotee le a ba bangwe ba bantši go dikologa lefase.

Mo e nyakilego go ba nywaga e mebedi ka morago ga lehu la gagwe, ke ile ka gopola ka nywaga ya rena e kgahlišago ya ge re be re le gotee​—⁠e mentši re le kabelong ya boromiwa dinageng dišele, gotee le ntlong-kgolo ya lefase ya Dihlatse tša Jehofa kua Brooklyn, New York. Ke ile ka ikgopotša gape ka bophelo bja-ka bja pele kua Sydney, Australia le ditlhohlo tšeo nna le Lloyd re ilego ra lebeletšana le tšona e le gore re nyalane nakong ya mathomong a Ntwa ya II ya Lefase. Lega go le bjalo, sa pele anke ke le anegeleng kamoo ke bilego Hlatse le kamoo ke ilego ka kopana le Lloyd morago kua ka 1939.

Kamoo ke Bilego Hlatse ka Gona

James le Henrietta Jones e be e le batswadi ba-ka ba lerato le bao ba hlokomelago. Ke be ke e-⁠na le nywaga e 14 feela ge ke be ke fetša sekolo ka 1932. Ka nako yeo lefase le be le le gare ga Tšhaparego e Kgolo. Ke ile ka thoma go šoma bakeng sa go thuša lapa, go akaretša le baratho ba-ka ba babedi. Ka nywaga e sego kae, ke be ke šoma mošomo wo o lefago gabotse woo go wona go bego go e-⁠na le basetsana ba mmalwa bao ke ba okametšego.

 Ka nako yona yeo, ka 1935, mma o ile a amogela dipuku tša Beibele go yo mongwe wa Dihlatse tša Jehofa gomme kapejana o ile a kgodišega gore o hweditše therešo. Ka moka ga rena re be re nagana gore o hlakane hlogo. Lega go le bjalo, ka letšatši le lengwe, ke ile ka bona pukwana yeo e bego e e-⁠na le sehlogo se se rego Where Are the Dead?, gomme ke ile ka tanywa kgahlego ke sehlogo sa yona. Ka gona ke ile ka balela pukwana ka sephiring. Dilo di ile tša fetoga! Ka yona nako yeo ka napa ka thoma go ya le mma sebokeng sa gare ga beke seo se bego se bitšwa Thuto ya Mohlala. Pukwana yeo e bitšwago Model Study​—⁠mafelelong go ile gwa ba le tše tharo tša tšona​—⁠e be e na le dipotšišo le dikarabo gotee le mangwalo bakeng sa go thekga dikarabo.

Mo e ka bago ka nako yeo, ka April ya 1938, Joseph F. Rutherford, yo e bego e le moemedi go tšwa ntlong-kgolo ya lefase ya Dihlatse tša Jehofa o ile a etela Sydney. Polelo ya gagwe ya phatlalatša e bile ya mathomo yeo ke ilego ka ba gona go yona. E be e swanetše go ba e ile ya swarelwa Holong ya Toropo ya Sydney, eupša baganetši ba ile ba atlega tabeng ya go dira gore go diriša ga rena lefelo leo go phumolwe. Go e na le moo, polelo e ile ya newa Lebaleng le legolo la Dipapadi la Sydney. Ka baka la phatlalatšo e oketšegilego yeo e tlišitšwego ke kganetšo, ba e ka bago ba 10 000 ba ile ba ba gona, e lego palo e kgolo ge re nagana gore go be go na le Dihlatse tše 1 300 feela kua Australia ka nako yeo.

Kapejana ka morago ga moo, ke ile ka tšea karolo bodireding bja tšhemo ka lekga la pele​—⁠gomme e le ka ntle le tlwaetšo le ge e le efe. Ge sehlopha sa rena se be se fihla tšhemong yeo re bego re bolela go yona, yo a bego a eteletše pele o ile a re go nna, “Ntlo ya gago ke yela.” Ke be ke tšhogile kudu moo e lego gore ge mosadi a bula lemati, ke ile ka botšiša gore, “Ka kgopelo, na o ka mpotša gore ke nako mang?” O ile a tsena ka gare, a lebelela nako gomme a boa, a mpotša. Ya ba go fedile. Ka boela koloing.

Lega go le bjalo, ga se ka ka ka kgaotša, gomme kapejana ke be ke abelana le ba bangwe molaetša wa Mmušo ka mehla. (Mateo 24:​14) Ka March 1939 ke ile ka bontšha boineelo bja-ka go Jehofa ka go kolobetšwa ka pafong ya moagišani wa rena, Dorothy Hutchings. Ka ge go be go se na banababo rena, kapejana ka morago ga go kolobetšwa ga-ka, ke ile ka newa boikarabelo bja phuthego bjo ka tlwaelo bo newago banna ba Bakriste.

Ka tlwaelo re be re swarela diboka tša rena ka magaeng a batho, eupša ka dinako tše dingwe, re be re hira holo bakeng sa dipolelo tša phatlalatša. Ngwanabo rena yo mofsa yo mobotse wa go tšwa Bethele, e lego ofisi ya rena ya lekala, o ile a tla phuthegong ya rena e nyenyane go tlo nea polelo. Seo ke bego ke sa se tsebe ke gore o be a na le lebaka le lengwe la go tla​—⁠go tla go ntlhola. Ee, ke kamoo ke ilego ka kopana le Lloyd.

Go Kopana le Lapa la Gabo Lloyd

Kapejana ke ile ka ba le kganyogo ya go hlankela Jehofa ka nako e tletšego. Lega go le bjalo, ge ke be ke dira kgopelo ya bobulamadibogo (go tsenela modiro wa boboledi wa nako e tletšego), ke ile ka botšišwa ge e ba nka rata go hlankela Bethele. Ka gona, ka September 1939, kgwedi yeo Ntwa ya II ya Lefase e thomilego ka yona, ke ile ka ba setho sa lapa la Bethele kua Strathfield, lefelo la toropong ya Sydney.

Ka December 1939, ke ile ka ya New Zealand kopanong. Ka ge Lloyd a be a e-⁠tšwa New Zealand, le yena o be a e-⁠ya moo. Re ile re sepela ka sekepe se tee gomme re ile ra tsebana gakaone. Lloyd o ile a kgonthišetša gore ke kopana le mmagwe le tatagwe le dikgaetšedi tša gagwe kopanong kua Wellington gomme ka morago ya ba legaeng la bona kua Christchurch.

Go Thibelwa ga Modiro wa Rena

Ka Mokibelo January 18, 1941, balaodi ba Commonwealth ba ile ba tla ofising ya lekala ka dikoloi tša di-limousine tše ka bago tše tshela tše ntsho bakeng sa go tlo thopa lefelo. Ka ge ke be ke šoma ngwakwaneng wa bohlapetši kgorong ya go tsena Bethele, ke bile wa mathomo go ba bona. Mo e ka bago diiri tše 18 pele ga moo, re be re ile ra tsebišwa ka thibelo, ka gona mo e nyakilego e e-⁠ba dipuku ka moka le difaele di be di tlošitšwe lekaleng.  Bekeng e latelago, ditho tše hlano tša lapa la Bethele, go akaretša Lloyd, di ile tša lahlelwa kgolegong.

Ke be ke tseba gore seo banabešo ka kgolegong ba bego ba se nyaka kudu e be e le dijo tša moya. Bakeng sa go thuša Lloyd, ke ile ka phetha ka go mo ngwalela “mangwalo a baratani.” Ke be ke ngwala mathomo ka mokgwa wo o bego o tlwaetšwe bakeng sa lengwalo le bjalo, gare ke kopiša dihlogo tše di feletšego tša Morokami gomme mafelelong ke saena gore ke nna moratiwa wa gagwe. Ka morago ga dikgwedi tše nne le seripa, Lloyd o ile a lokollwa.

Lenyalo le Tirelo e Tšwelago Pele

Ka 1940, mmago Lloyd o ile a etela Australia, gomme Lloyd a mmotša gore re be re nagana ka lenyalo. O ile a mo eletša gore a se nyale ka gobane bofelo bja tshepedišo ya dilo bo be bo bonala bo le kgaufsi. (Mateo 24:​3-14) Gape o ile a bolela ka maikemišetšo a gagwe go bagwera ba gagwe, eupša nako le nako ba ile ba mo kgothaletša go se nyale. Mafelelong, ka letšatši le lengwe ka February 1942, Lloyd o ile a ntšea ka sephiri​—⁠gotee le Dihlatse tše nne tšeo di bego di ikanne gore di ka se utolle taba​—⁠ra ya ofising ya boingwadišo gomme ra nyalana. Ka nako yeo go be go se na tokišetšo kua Australia ya gore Dihlatse tša Jehofa di nyadiše.

Gaešita le ge re se ra ka ra dumelelwa go tšwetša pele tirelo ya rena ya Bethele re le banyalani, re ile ra kgopelwa ge e ba re ka rata go tsenela modiro wa bobulamadibogo bjo bo kgethegilego. Ka lethabo re ile ra amogela kabelo ya go ya naga-toropong yeo leina la yona e lego Wagga Wagga. Modiro wa rena wa boboledi o be o sa dutše o thibetšwe, gomme re be re se na thekgo ya tša ditšhelete, ka gona re be re tloga re swanetše go lahlela morwalo wa rena go Jehofa.​—⁠Psalme 55:⁠22.

Re be re sepela ka paesekele ya banamedi ba babedi go ya magaeng, re kopana le batho ba ba nago le botho gomme re e-⁠ba le dipoledišano tše ditelele le bona. Ga se ba bantši bao ba bego ba amogela thuto ya Beibele. Lega go le bjalo, rakgwebo yo mongwe o be a leboga modiro wo re bego re o dira kudu mo a bego a re fa dienywa le merogo beke e nngwe le e nngwe. Ka morago ga ge re feditše dikgwedi tše tshela kua Wagga Wagga, re ile ra laletšwa gape Bethele.

 Lapa la Bethele le be le tlogile ofising ya Strathfield ka May 1942 gomme la hudugela magaeng a batho. Ba be ba dula go tloga lapeng le lengwe go ya go le lengwe dibeke tše mmalwa goba go feta moo, e le go dira gore ba se lemogwe. Ge nna le Lloyd re be re boela Bethele ka August, re ile ra ba tlatša go le lengwe la mafelo a. Kabelo ya rena mosegare e be e le go šoma go le lengwe la mafelo a go gatiša a ka sephiring ao a bego a hlomilwe. Mafelelong, ka June 1943, thibelo modirong wa rena e ile ya fedišwa.

Tokišetšo Bakeng sa Tirelo ya Dinageng di Šele

Ka April 1947, re ile ra fiwa kgopelo ya pele ga nako ya go ba gona Sekolong sa Beibele sa Watchtower sa Gilead, seo se bego se le kua South Lansing, New York, U.S.A. Ka nako e swanago, re ile ra abelwa go etela diphuthego kua Australia bakeng sa go di matlafatša moyeng. Ka morago ga dikgwedi tše sego kae, re ile ra amogela taletšo ya rena ya go ba gona sehlopheng sa bo-11 sa Gilead. Re be re e-⁠na le dibeke tše tharo tša go beakanya ditaba tša rena le go phutha dilo tša rena. Re ile ra tlogela lapa le bagwera ka December 1947 gomme ra leba New York le ba bangwe ba 15 go tšwa Australia bao ba bego ba laleditšwe sehlopheng se se swanago.

Dikgwedi tša rena tše sego kae Sekolong sa Gilead di ile tša feta ka lebelo, gomme re ile ra amogela kabelo ya boromiwa ya go ya Japane. Ka ge go tšere nako gore re hwetše dipampiri tša rena tša go lokela go ya Japane, Lloyd o ile a abelwa gape go ba molebeledi wa mosepedi wa Dihlatse tša Jehofa. Diphuthego tšeo re bego re abetšwe go di etela, di be di tloga motseng wa Los Angeles go theoga go ya mollwaneng wa Mexico. Re be re se na koloi, ka gona beke e nngwe le e nngwe Dihlatse ka lerato di be di re tšea go tloga phuthegong e nngwe go ya go e nngwe. Lefelo leo le bego le akaretšwa ke tikologo yeo e kgolo gona bjale le bopa karolo ya dilete tše tharo tša Seisemane le tše tharo tša Sepaniši, selete se sengwe le se sengwe se dirwa ke mo e ka bago ditikologo tše lesome!

Ge re re phaphara, e be e šetše e le October 1949, gomme re be re le tseleng ya rena ya go ya Japane ka sekepe seo pele se bego se rwala bahlabani. Lehlakore le lengwe la sekepe le be le kgethetšwe banna gomme le lengwe le kgethetšwe basadi le bana. Letšatši le tee feela pele re ka fihla kua Yokohama, re ile ra gahlana le ledimo. Go bonagala le ile la dira gore legodimo le apoge, gobane ge letšatši le ntšha nko letšatšing leo le latelago ka October 31, re be re kgona go bona Thaba ya Fuji le letago la yona ka moka. A kamogelo e botse gakaakang kabelong ya rena e mpsha!

Go Šoma le Majapane

Ge re dutše re batamela kgaufsi le maema-kepe, re ile ra bona batho ba makgolo ba moriri o moso. Ge re be re e-⁠kwa lešata le legolo re ile ra nagana gore ‘A batho ba lešata!’ Yo mongwe le yo mongwe o be a rwele dieta tša go ba le sola ya legong tšeo di bego di dira lešata godimo ga lefelo la go fologela leo le dirilwego ka legong. Ka morago ga go robala bošego bjo tee kua Yokohama, re ile ra namela setimela go ya kabelong ya rena ya boromiwa kua Kobe. Moo Don Haslett, yo re bilego le yena sekolong kua Gilead, yo a gorogilego Japane dikgwedi tše sego kae pejana, o be a hirišitše legae la baromiwa. E be e le ntlo e botse le e kgolo ya mabato a mabedi ya go agwa ka mokgwa wa ka Bodikela​—⁠eupša ka gare e re ngoo!

Bakeng sa go dira malawana mo re bego re tla robala gona, re ile ra ripa bjang bjo bo telele ka jarateng gomme ra bo ala lebatong. Ke kamoo re thomilego bophelo bja rena bja boromiwa ka gona, re se na selo ge e se seo re bego re se swere merwalong ya rena. Re ile ra hwetša ditofo tše dinyenyane tša malahla a mošidi tšeo di bego di bitšwa di-hibachi bakeng sa go ruthetša ntlo le go apeela go tšona. Bošegong bjo bongwe, Lloyd o ile a hwetša baromiwa ba babedi, Percy le Ilma Iszlaub, ba idibetše. O ile a kgona go ba tsoša ka go bula mafasetere gore go tsene moya wo o hlwekilego le o tonyago. Le nna nkile ka idibala nakong ya ge ke be ke apeile mollong wa malahla a mošidi. Dilo tše dingwe go be go tšea nakonyana go di tlwaela!

Go ithuta leleme e be e le selo sa pele, gomme re be re ithuta Sejapane diiri tše 11 ka letšatši lebaka la kgwedi. Ka morago ga moo, re ile ra thoma bodireding re e-⁠na le lefoko goba a mabedi ao a ngwadilwego fase bakeng sa go re thuša go thomiša. Letšatšing la-ka la mathomo-thomo la go tšwa, ke ile ka kopana le mosadi yo a nago le botho e lego Miyo Takagi, yo a ilego a nkamogela ka botho. Nakong ya maeto a go boela, re ile ra katana ka thušo ya pukuntšu ya Sejapane le Seisemane go  fihlela go thongwa thuto e botse ya Beibele. Ka 1999, ge ke be ke ile go neelweng ga meago ya katološo ya lekala kua Japane, ke ile ka bona Miyo gape gotee le ba bantši ba baratiwa ba bangwe bao ke ilego ka ithuta le bona. Go šetše go fetile nywaga e 50, eupša e sa dutše e le bagoeledi ba mafolofolo ba Mmušo, ba dira seo ba ka se kgonago go hlankela Jehofa.

Kua Kobe ka April 1, 1950, ba e ka bago ba 180 ba bile gona monyanyeng wa Segopotšo sa lehu la Kriste. Seo se ilego sa re makatša ke gore mesong e latelago, batho ba 35 ba ile ba iponagatša bakeng sa go tšea karolo bodireding bja tšhemo. Moromiwa yo mongwe le yo mongwe o ile a tšea ba bararo goba ba bane ba ba bao ba sa tšwago go thoma go kopanela go ya le bona tirelong. Beng ba dintlo ba be ba sa bolele le nna​—⁠motho o šele yo a sa kwešišego leleme la bona​—⁠eupša go e-⁠na le moo ba be ba bolela le Majapane ao a bego a bile gona Segopotšong ao a bego a sepela le nna. Dipoledišano di be di tšwela pele, eupša ke be ke sa kwešiše seo ba bego ba boledišana ka sona. Ke a thaba go bolela gore ba bangwe ba ba, bao ba bego ba sa tšwa go thoma go kopanela ba ile ba tšwela pele ka tsebo gomme ba tšwetše pele modirong wa boboledi go ba go fihla le lehono.

Ditokelo tše Dintši le Dikabelo

Re ile ra tšwela pele modirong wa rena wa boromiwa kua Kobe go fihlela ka 1952, e lego ka nako yeo re ilego ra abelwa go ya Tokyo moo Lloyd a ilego a abelwa go okamela ofisi ya lekala. Ge nako e dutše e e-⁠ya, kabelo ya gagwe e ile ya mo sepediša le Japane ka moka le dinaga tše dingwe. Ka morago, go le lengwe la maeto a gagwe a go ya Tokyo, Nathan H. Knorr, go tšwa ntlong-kgolo ya lefase o ile a re go nna: “Fale, o tseba moo monna wa gago a yago gona leetong la gagwe le le latelago la selete? Australia le New Zealand.” O ile a oketša ka gore: “Le wena o ka ya ge e ba o ka itefelela leeto la gago.” A lethabo le legolo gakaakang! Gape e be e le nywaga e senyane ga e sa le re tloga gae.

Go ngwalelana mangwalo go ile gwa latela kapejana. Mma o ile a nthuša go hwetša thekethe. Nna le Lloyd re be re swaregile dikabelong tša rena gomme re be re se na tšhelete ya go etela malapa a gabo rena. Ka gona, se e bile karabo dithapelong tša-ka. Bjalo ka ge o ka akanya, mma o be a thabetše kudu go mpona. O ile a re, “Ee, ke tlo go bolokela tšhelete gore o tle gape lebakeng la nywaga e meraro.” Re ile ra arogana re e-⁠na le seo monaganong, eupša ka manyami o ile a hlokofala ka July e latelago. Ke holofela go tlo kopana gape le yena ka lethabo le lekaakang lefaseng le lefsa!

Modiro wa boromiwa e be e dutše e le yona kabelo ya-ka e nnoši go ba go fihla ka 1960, eupša ka morago ke ile ka amogela lengwalo leo le bego le hlalosa gore: “Thulaganyo go tloga ka letšatši le e tla ba gore o dire mošomo wa go hlatswa le go šidulla bakeng sa lapa ka moka la Bethele.” Lapa la rena ka nako yeo le be le akaretša feela sehlopha sa batho ba ka bago ba 12, ka gona ke be ke kgona go hlokomela mošomo wo go tlaleletša kabelong ya-ka ya boromiwa.

Ka 1962 legae la rena la go agwa ka mokgwa wa Sejapane le ile la phušolwa gomme Legae le lefsa la Bethele la mabato a tshela le ile la agwa lefelong leo ngwageng o latelago. Ke ile ka abelwa go thuša banababo rena ba bafsa ba Bethele go boloka diphapoši tša bona di phuthilwe gabotse le go hlwekiša dilo tša bona. Ka tlwaelo, bašemane kua Japane ba be ba se ba rutwa go dira selo ka lapeng. Tlhokomelo e be e lebišitšwe kudu thutong ya lefase gomme bo-mmago bona ba be ba ba direla se sengwe le se sengwe. Kapejana ba ile ba tseba gore ga ke mmago bona. Ge nako e tšwela pele, ba bantši ba ile ba tšwela pele go dira dikabelo tše difsa le tše boima ka gare ga mokgatlo.

Letšatšing le lengwe leo le bego le fiša kudu la selemo, morutwana wa Beibele o be a sepedišwa le meago ya rena gomme a mpona ke hlatswa diphapoši tša bohlapelo. O ile a re, “Hle botša yo a ikarabelago  gore nka rata go lefelela gore go be le mošomedi yo a ka tlago a go direla mošomo wo.” Ke ile ka mo hlalosetša gore gaešita le ge ke leboga kgopolo ya gagwe e botho, ke ikemišeditše kudu go dira se sengwe le se sengwe seo ke abetšwego go se dira ka gare ga mokgatlo wa Jehofa.

Mo e ka bago ka nako yeo, nna le Lloyd re ile ra amogela taletšo ya go ba gona sehlopheng sa bo-39 sa Gilead! E be e le tokelo e kaakang ka 1964 go ya sekolong gape ke e-⁠na le nywaga e 46! Thuto e be e newa kudu-kudu bakeng sa go thuša bao ba hlankelago diofising tša makala gore ba hlokomele boikarabelo bja bona. Ka morago ga thuto ya dikgwedi tše lesome, re ile ra abelwa go boela Japane. Ka nako ye, re be re e-⁠na le bagoeledi ba Mmušo ba fetago 3 000 nageng yeo.

Kgolo e ile ya direga ka lebelo kudu mo e lego gore ka 1972 go be go na le Dihlatse tše fetago 14 000, gomme ofisi ya lekala ya mabato a mahlano e ile ya agwa kua Numazu, ka borwa bja Tokyo. Moagong wa rena, re be re kgona go bona Thaba ya Fuji ka mo go kgahlišago kudu. Ka kgwedi go ile gwa thongwa go gatišwa dimakasine tše fetago dimilione ka Sejapane ka motšhene o mofsa o mogolo wa go gatiša wa rotary. Eupša re be re tla tlelwa ke phetogo go se go ye kae.

Go ya mafelelong a 1974, Lloyd o ile a amogela lengwalo le le tšwago ntlong-kgolo ya Dihlatse tša Jehofa kua Brooklyn leo le bego le mo laletša go tlo hlankela Sehlopheng se Bušago. Mathomong ke ile ka nagana gore: ‘Bjale go fedile. Ka ge Lloyd a e-⁠na le kholofelo ya legodimong gomme nna ke na le ya lefaseng, go ba gona ka nako e itšego re tla swanelwa ke go arogana. Mohlomongwe Lloyd o swanetše go ya Brooklyn a ntlogele.’ Eupša kapejana ke ile ka lokiša kgopolo ya-ka gomme ka sepela le Lloyd ka ntle le go belaela ka March 1975.

Ditšhegofatšo Ntlong-kgolo

Gaešita le kua Brooklyn, pelo ya Lloyd e be e le tšhemong ya Japane kudu, gomme o be a dula a bolela ka diphihlelo tše re bilego le tšona moo. Eupša mo nakong ye go be go na le dibaka tša go katološa. Lebakeng la nywaga ya gagwe e 24 ya mafelelo ya bophelo bja gagwe, Lloyd o ile a dirišwa ka mo go oketšegilego bakeng sa modiro wa go etela makala wo o bego o akaretša go sepela lefaseng ka moka. Ke ile ka mo felegetša go dikologa lefase ka makga a mmalwa.

Go etela banababo rena ba Bakriste dinageng tše dingwe go nthušitše go lemoga maemo ao ba bantši ba phelago le go šoma go ona. Le ka mohla nka se ke ka lebala sefahlego sa Entellia wa nywaga e lesome, e lego ngwanenyana yo ke kopanego le yena ka leboa la Afrika. O be a rata leina la Modimo gomme a sepela iri le seripa go ya le go boa dibokeng tša Bokriste. Go sa šetšwe tlaišo e šoro ya lapa la gabo, Entellia o be a ineetše go Jehofa. Ge re be re etetše phuthego ya gabo, go be go na le feela lebone le tee le le fokolago le lekeleditšwe ka godimo ga pampiri ya seboledi​—⁠ge e le lefelo la diboka e be e le kgampi ya lefsifsi. Lefsifsing leo ka moka e be e le mo go thabišago go kwa moopelo o mobose wa banababo rena le dikgaetšedi.

Selo se se thabišitšego kudu maphelong a rena e bile ka December 1998 ge nna le Lloyd re be re le gare ga baemedi Dikopanong tša Selete tša “Tsela ya Modimo ya Bophelo” tšeo di bego di swaretšwe kua Cuba. Re be re thabišitšwe gakaakang ke tebogo le lethabo leo banababo rena le dikgaetšedi moo ba ilego ba di bontšha bakeng sa go etelwa ke ba bangwe bao ba tšwago ntlong-kgolo kua Brooklyn! Ke thaba kudu ge ke gopola gantši ka go kopana le baratiwa bao ba lego mafolofolo go išeng legoa le legolo la theto go Jehofa.

Go Iketla le Batho ba Modimo

Gaešita le ge naga ya gešo e le Australia, ke ile ka rata batho ba kae le kae moo ke bego ke romelwa ke mokgatlo wa Jehofa. Seo e bile sa therešo Japane, gomme mo nakong ye ka ge ke bile United States ka nywaga e fetago e 25, ke hwetša e le se swanago le mo. Ge ke be ke hwelwa ke monna wa-ka, kgopolo ya-ka e be e se ya go boela Australia, eupša e bile go dula Bethele ya Brooklyn moo Jehofa a nkabetšego gona.

Mo nakong ye ke nywageng ya-ka ya bo-80. Ka morago ga nywaga e 61 ke le bodireding bja nako e tletšego, ke sa dutše ke ikemišeditše go hlankela Jehofa kae le kae moo a bonago go swanetše. Ka kgonthe o ntlhokometše kudu. Ke lebelela nywaga e 57 yeo ke ilego ka kgona go abelana bophelo le mogwera yo a rategago yo a ratago Jehofa e le e bohlokwa. Ke kgodišegile ka ditšhegofatšo tše di tšwelago pele tša Jehofa go rena, gomme ke tseba gore A ka se ke a lebala modiro wa rena le lerato leo re le bontšhitšego leineng la gagwe.​—⁠Ba-Hebere 6:⁠10.

[Mengwalo ya ka tlase]

[Seswantšho go letlakala 25]

Ke e-⁠na le mma ka 1956

[Seswantšho go letlakala 26]

Ke e-⁠na le Lloyd le sehlopha sa bagoeledi ba Majapane mathomong a bo-1950

[Diswantšho go letlakala 26]

Ke e-⁠na le morutwana wa-ka wa mathomo wa Beibele, Miyo Takagi, kua Japane mathomong a bo-1950 le ka 1999

[Seswantšho go letlakala 28]

Ke e-⁠na le Lloyd modirong wa go aba dimakasine Japane