Kamoo o ka Lebeletšanago le Maikwelo a Fošagetšego ka Gona

● Asafa o ile a belaela ka gore: “Hleng e ke ké lefêla xe ke seketša pelo ya-ka, xe ke hlapa diatla ka xo ila dibe? Le xe xo le byalo ke a ôtlwa ka matšatši ohle; ka mehla ke tsoxa kè sôlwa.”​—⁠Psalme 73:​13, 14.

● Baruke o bobotše ka gore: “Ke yo madi-mabe! Hleng mahloko a-⁠ka Morêna ó a hlatlaxanya le ma-ja-pelô! Ke fedile matla ka phêxêlô; mo nkaxo khutša se xo bône!”​—⁠Jeremia 45:⁠3.

● Naomi o llile ka gore: “Yo-matla-ka-moka ó ntirile tše di xalakaxo ruri. Ke tloxile kè humile; byale Morêna ó mpušetša xaê kè le fêla. Le re’ng Lé sa mpitša ka la Naomi kè lahlilwe ke Morêna, kè hlokofaditšwe ke Yo-matla-ka-moka?”​—⁠Ruthe 1:​20, 21.

BEIBELE e na le mehlala e mentši ya barapedi ba botegago ba Jehofa bao ka dinako tše dingwe ba ilego ba aparetšwa ke maikwelo a go nyama. Therešo ke gore bjalo ka batho ba sa phethagalago ka moka ga rena re lebeletšana le maikwelo a bjalo nako le nako. Ba bangwe ba rena re ka ba re sekametše kudu go nyameng​—⁠mohlomongwe e bile re e-⁠na le tekanyo e itšego ya go ikwela bohloko​—⁠go feta ba bangwe ka baka la ge re ile ra lebeletšana le diphihlelo tše šoro bophelong.

Lega go le bjalo, ge a sa hlokomelwe, maikwelo a a ka senya tswalano ya gago le ba bangwe gotee le Jehofa Modimo. Mosadi yo mongwe wa Mokriste yo a sekametšego go ikweleng bohloko o dumela gore: “Ke ile ka gana ditaletšo tše dintši bakeng sa dipokano tša bogwera ka gobane ke be ke ikwa ke sa swanelege go ka gwerana le bao ba lego ka phuthegong.” A mafelelo a senyago gakaakang ao maikwelo a bjalo a ka bago le ona bophelong bja motho! O ka dira eng bakeng sa go a lwantšha?

Batamela Jehofa

Go Psalme 73, Asafa o ngwadile ka potego mabapi le kgakanego ya gagwe. Ge a be a bapetša boemo bja gagwe le bophelo bjo bo atlegago bja ba babe, o ile a ba duma. O ile a lemoga gore batho bao ba sa boifego Modimo ba be ba ikgogomoša e bile e le ba šoro, gomme ba be ba bonagala ba sa otlwe. Ke moka Asafa o ile a bontšha dipelaelo mabapi le mohola wa go phegelela tsela ya go loka bophelong.​—⁠Psalme 73:​3-9, 13, 14.

Na le wena, bjalo ka Asafa, o lemogile seo se bonalago eka ke katlego ya ba babe bao ba kgantšhago mekgwa ya bona e mebe? Asafa o ile a fenya bjang maikwelo a gagwe a fošagetšego? O tšwela pele ka gore: “Xomme ka re kè akanya taba yeo xore ke e hlaloxanyê, ka hwetša è nthatafalêla. Ka bá ka ya Sekxethweng sa Modimo, le xôna ka šetša bofêlô bya bála.” (Psalme 73:​16, 17) Asafa o ile a gata megato e swanetšego ka go retologela go Jehofa ka thapelo. A diriša mantšu ao ka morago a ilego a dirišwa ke moapostola Paulo, Asafa o ile a fenya ‘motho wa nama’ ka go tsoša “motho wa môya” ka go yena. Ka pono e tsošološitšwego ya moya, o ile a kwešiša gore Jehofa o hloile bobe le gore ka nako e swanetšego ba babe ba tla otlwa.​—⁠1 Ba-Korinthe 2:​14, 15.

Ke gabohlokwa gakaakang gore o dumelele  Beibele go go thuša gore o lebiše tlhokomelo dilong tša kgonthe bophelong! Jehofa o re gopotša gore ga se gore ga a bone seo batho ba babe ba se dirago. Beibele e ruta gore: “Le se kê la timêla; Modimo xa a kwêrwe. Se motho a se byalaxo, ké sôna se a tl’o xo se buna. . . . A re se kê ra lapa xo dira botse.” (Ba-Galatia 6:​7-⁠9) Jehofa o tla bea ba babe “matheleding”; o tla ba “uša ba rôbêxa.” (Psalme 73:​18) Toka ya Modimo ka mehla e tla fenya mafelelong.

Lenaneo la ka mehla la go fepša moyeng tafoleng ya Jehofa le bogwera bjo bo agago le batho ba Modimo di tla go thuša gore o tiiše tumelo ya gago le go fenya go nyama goba maikwelo a mangwe a fošagetšego. (Ba-Hebere 10:​25) Bjalo ka Asafa, ka go dula kgaufsi le Modimo, o ka hwetša thekgo ya gagwe e lerato. Asafa o tšwela pele ka gore: “Xe e le nna ke dula kè na naxô’; O nthswere ka seatla sa-ka sa le letona. O nthsepediša ka morêrô w’axo, wa tlo bá wa nkamoxêla wa nkxodiša.” (Psalme 73:​23, 24) Mokriste yo mongwe yo a ilego a gobošwa e sa le ngwana o ithutile bohlale bja mantšu a. O re: “Go gwerana kgaufsi le phuthego go mpontšhitše lehlakore leo le fapanego la bophelo. Ke ile ka bona gabotse kudu gore bagolo ba Bakriste ke ba lerato, gore ga se maphodisa eupša ke badiši.” Ee, bagolo ba Bakriste ba nago le kwelobohloko ba kgatha tema e bohlokwa tabeng ya go fediša maikwelo a gobatšago.​—⁠Jesaya 32:​1, 2; 1 Ba-Thesalonika 2:​7, 8.

Amogela Keletšo ya Jehofa

Baruke, mongwaledi wa moporofeta Jeremia o ile a fegelwa ka baka la kgateletšego ya maikwelo yeo a bego a e bakelwa ke kabelo ya gagwe. Lega go le bjalo, Jehofa ka botho o ile a lebiša tlhokomelo go Baruke dilong tša kgonthe. “Xomme wêna, a O sa inyakêla tše kxolo? Se di nyakê! Tseba xobane ke tliša bošula bo tl’o xo wêla nama yohle. Ó r’yalo Morêna. Xe e le wêna, ke Xo fa bophelô bya xaxo, xore mo xo fêla mo O yaxo, O yê Ò thšabile Ò na nabyô’.”​—⁠Jeremia 45:​2-⁠5.

Ka polelo e sa pepetletšego Jehofa o ile a hlalosa gore dikgahlego tša Baruke tša boithati e be e le mothopo wa tlalelo ya gagwe. Baruke o be a ka se hwetše lethabo kabelong ya gagwe yeo a e neilwego ke Modimo ge ka nako e swanago a be a itsomela dilo tše dikgolo. Le wena ka mo go swanago o ka hwetša gore kgato e botse e le ka kgonthe tabeng ya go fenya go nyama ke go phema ditšhitišo le go amogela ka mo go feletšego khutšo ya monagano yeo e tlišwago ke kgotsofalo ya go boifa Modimo.​—⁠Ba-Filipi 4:​6, 7.

Naomi wa mohlologadi ga se a ka a dumelela kgateletšo e mo ngena moko kua Moaba ge monna wa gagwe le barwa ba gagwe ba babedi ba be ba hwile. Lega go le bjalo, go na le tšhupetšo ya gore o ile a tšea nako e itšego a e-⁠na le maikwelo a bohloko mabapi le boemo bja gagwe le bja betši ba gagwe ba babedi. Ge a be a re ba sepele, Naomi o itše: “Ka xo kwêla lena bohloko e ba mo ke kwaxo seatla sa Morêna sè nkimêla.”  Gape, ge a be a fihla Betlehema, o ile a phegelela ka gore: “Lesang xo mpitša ka la Naomi [“Lethabo La-ka”]; a nke le re Mara [“Yo a Galakago”], ka xobane Yo-matla-ka-moka ó ntirile tše di xalakaxo ruri.”​—⁠Ruthe 1:​13, 20.

Lega go le bjalo, Naomi ga se a ka a ikarola bathong ka go dula a lla​—⁠a le kgole le Jehofa le batho ba gagwe. Kua Moaba o ile a kwa gore “Morêna ó atlile sethšaba sa xabô a se fa boxôbê.” (Ruthe 1:⁠6) O ile a kwešiša gore lefelo le lebotse kudu bakeng sa gagwe e be e le la go ba le batho ba Jehofa. Ka morago ga moo Naomi gotee le ngwetši ya gagwe Ruthe, ba ile ba boela Juda gomme ka bokgoni a hlahla Ruthe gore o swanetše go itshwara bjang go setho sa lapa la gabo bona Boase, molopolodi wa gagwe.

Ka mo go swanago lehono, ba botegago bao ba lahlegetšwego ke balekane ba bona ka lehu ba lebeletšana ka katlego le kgateletšego ya maikwelo ka go dula ba swaregile ka phuthegong ya Bokriste. Bjalo ka Naomi, ba tšwela pele ba katana ditabeng tša moya, ba bala Lentšu la Modimo ka mehla.

Mehola e Tlišwago ke go Diriša Bohlale bja Modimo

Dipego tše tša Beibele di nea temogo mabapi le kamoo motho a ka lebeletšanago ka gona le ditla-morago tša maikwelo a fošagetšego. Asafa o ile a tsoma thušo sekgethweng sa Jehofa gomme ka go se fele pelo a letela Jehofa. Baruke o ile a amogela keletšo gomme a phema ditšhitišo tša dilo tše di bonagalago. Naomi o ile a tšwela pele a le mafolofolo gare ga batho ba Jehofa, a lokišeletša mosadi yo mofsa e lego Ruthe bakeng sa ditokelo tša gagwe borapeding bja Modimo wa therešo.​—⁠1 Ba-Korinthe 4:⁠7; Ba-Galatia 5:​26; 6:⁠4.

O ka fenya go nyama le maikwelo a mangwe a fošagetšego ka go dula o lebišitše tlhokomelo diphenyong tša Modimo tšeo Jehofa a di neilego batho ba gagwe ka o tee ka o tee le ge e le sehlopha. Gore o fihlelele seo, naganišiša ka mogato wa Jehofa o phagamego kudu wa lerato ka go neela topollo bakeng sa gago. Thabela lerato la kgonthe la borwarre bja Bokriste. Lebiša tlhokomelo bophelong bja gago lefaseng le lefsa la Modimo leo le lego ka pele. Le gona eka ke ge o ka arabela bjalo ka Asafa ka gore: “Xe e le nna ke natefêlwa ke xo ba kxaufsi le Modimo. Sethšabêlô sa-ka, ke tseba è le Wene Mong’a-ka Morêna. Xo byalo, xore ke bê ke bolêlê ditirô tša xaxo ka moka.”​—⁠Psalme 73:​28.