Mokgatlo wa Lefase ka Bophara wo o Hlokomelanago

GO FIHLA moo mahlo a kgonago go bona gona, go na le batho. Ba bantši ba tšofetše, bao ba bangwe ba bona ba golofetšego kudu moo e lego gore ga ba kgone le go sepela. Go na le basadi bao ba imilego le banyalani ba bafsa bao ba etetšago bana ba banyenyane. Ka moka ga bona ke bafaladi​—⁠banna, basadi le bana​—⁠bao ba gapeleditšwego ke ntwa ya selegae, dikotsi tša tlhago goba maemo a mangwe go tšhaba magaeng a bona ba tšhabela nageng ya kgaufsi. Ba bangwe ba ile ba gapeletšega leboelela gore ba tloge moo ba dulago gona. Ge go thoma go e-⁠ba le leswao la dikgaruru tša selegae goba la kotsi ya tlhago, ba tšea dilo tše mmalwa tša ka ntlong, ba kgoboketša bana ba bona gomme ba ya mo ba tlago go šireletšega gona. Ka gona, ge maemo a boela sekeng, bafaladi ba bantši ba boela magaeng a bona go yo aga lefsa le go thomološa bophelo fase.

Go theoša le nywaga, Repabliki ya Afrika Bogare e butše dikgoro tša yona bakeng sa bafaladi ba tšwago dinageng tše dintši. Morago bjale, batho ba dikete bao ba akaretšago le Dihlatse tša Jehofa tše dintši, ba ile ba gapeletšega go tšhaba Democratic Republic of Congo e sentšwego ke ntwa ba tšhabela Repabliking ya Afrika Bogare gore ba lotege.

Banababo Rena ba a Thuša

Dihlatse Repabliking ya Afrika Bogare di ile tša go lebelela e le tokelo go rulaganya thušo ya tlhakodišo ya batho. Banababo rena ba Bakriste bao ba fihlago ba be ba hweletšwa madulo. Mathomong, diphapoši di be di hwetšagala magaeng a batho, eupša ge palo ya bafaladi e dutše e gola, go ile gwa ba molaleng gore go be go nyakega gore go dirwe dithulaganyo tše oketšegilego e le ka kgonthe. Diholo tše dingwe tša Mmušo di ile tša fetošwa mafelo a bodulo. Dihlatse tša lefelong leo di ile tša ithapela go šoma ka thata go tsenya mabone a oketšegilego, go tsenya diphaephe tša meetse le go ritela mabato ka samente bakeng sa gore bao ba bego ba tla dula moo ba iketle. Bafaladi ba ile ba šoma gotee le banababo rena ba lefelong leo go hloma mafelo a a bodulo a nakwana. Lenaneo le le feletšego la diboka tša Bokriste le ile la lokišetšwa ka polelo ya se-Lingala e le gore bao ba fihlago ba ka abelwa dijo tša moya tšeo di phološago bophelo. Tirišano ya kgaufsi magareng ga Dihlatse tša lefelong leo le baeng ba bona e ile ya bontšha gore borwarre bja lefase ka bophara ke selo sa kgonthe.

Malapa a bafaladi ga se ka dinako ka moka moo a bego a goroga gotee. Ka dinako tše dingwe, ditho tša lapa tšeo di bego di arogantšwe  di be di kopanywa gape mafelong ao di bego di fihlela go ona. Lelokelelo la bao ba bego ba fihlile ba šireletšegile le be le bolokwa Holong e nngwe le e nngwe ya Mmušo. Go be go dirwa dithulaganyo bakeng sa go hwetša bao ba bego ba sa timetše. Ofisi ya lekala yeo e hlahlago modiro wa Dihlatse tša Jehofa ka nageng e be e romela dikoloi tše tharo ka letšatši go yo thuša Dihlatse tšeo di bego di sa le tseleng le go tsoma le ge e le mang yo a ka bago a timetše. Dikoloi tše di be di tsebja ka leswao le legolo, leo le balegago ka gore “WATCH TOWER​—⁠Jehovah’s Witnesses.”

Akanya lethabo leo le bilego gona ge sehlopha sa bafaladi sa bana ba šupago bao ba bego ba arogantšwe le batswadi ba bona se bona bene ya Dihlatse tša Jehofa. Ba ile ba kitimela koloing gatee-tee gomme ba itsebiša e le Dihlatse. Banababo rena ba ile ba ba nametša ka beneng gomme ba ba iša Holong ya Mmušo, moo mafelelong ba ilego ba kopanywa gape le malapa a gabo bona.

Ke eng seo se ilego sa dira gore Bakriste ba ba botegago ba kgone go lebeletšana le maemo a bjalo, e sego gatee feela eupša leboelela? Ba tloga ba kgodišegile gore re phela mehleng ya bofelo bjalo ka ge go ile gwa bolelwa e sa le pele ka Mangwalong a Makgethwa.​—⁠2 Timotheo 3:​1-⁠5; Kutollo 6:​3-⁠8.

Lega go le bjalo, ba a tseba gore kgaufsinyane Jehofa Modimo o tla fediša dintwa, lehloyo, bošoro le dithulano. Bothata bja bafaladi e tla ba selo sa nakong e fetilego. Mo lebakeng la bjale, ka go dumelelana le keletšo ya moapostola Paulo e lego go 1 Ba-Korinthe 12:​14-26, Dihlatse tša Jehofa di katanela go hlokomelana. Gaešita le ge di arogantšwe ke dinoka, mellwane, maleme le bokgole, di a hlokomelana, ka gona di gata mogato kapejana ge yo mongwe a wela bohloking.​—⁠Jakobo 1:​22-⁠27.

[Mmapa go letlakala 30]

(Bakeng sa mongwalo o beakantšwego ka mokgwa wa kgatišo, bona kgatišo ka boyona)

AFRIKA

Repabliki ya Afrika Bogare

Democratic Republic of Congo

[Mothopo]

Mountain High Maps® Copyright © 1997 Digital Wisdom, Inc.

[Diswantšho go letlakala 30]

Diholo tša Mmušo tše tharo di ile tša fetošwa mafelo a bogorogelo

[Seswantšho go letlakala 31]

Ditlabakelo tša ka khitšhing di ile tša tsenywa kapejana

[Seswantšho go letlakala 31]

Bafaladi ba oketšegilego ba ile ba goroga

[Seswantšho go letlakala 31]

Ba sa tšwa go belegwa gomme e šetše e le bafaladi