O ka Atlega go sa Šetšwe Tsela Yeo o Godišitšwego ka Yona

NICHOLAS o be a e-⁠na le tshekamelo ya borabele go tloga bjaneng. * Ge nako e dutše e tšwela pele, dithulano tša gagwe tša ka gare di ile tša mo lebiša go dirišeng dihlare-tagi gampe le go nweng kudu. Nicholas o hlalosa gore: “Tate e be e le molemaledi wa bjala, gomme o ile a re tlaiša kudu nna le kgaetšedi ya-ka.”

Batswadi ba Malinda ba be ba bonagala ka gohle e le ditho tše hlomphegago tše tsenago kereke tša setšhaba sa gabo bona. Eupša gape ba be ba nweletše mekgweng ya borapedi bja bona. Malinda yoo ga bjale a lego nywageng ya bo-30 o lla ka gore: “Mekgwa e mengwe ya borapedi bja bona e bile e gobošago go nna le go senya tshekamelo ya monagano wa-ka bjalo ka ngwana.” O oketša ka gore: “Maikwelo a go hloka kholofelo le maikwelo a go hloka mohola ao a bjetšwego ka go nna a be a dutše a nkgoma ka mo go sa kgaotšego go ya kamoo ke gopolago ka gona.”

Ke mang yo a ka ganago gore nako ya bjana ya ba bantši e sentšwe ke bošoro, go gobošwa, go se šetše ga batswadi le dilo tše dingwe tše mpe? Dintho tša nako ya bjana e sa thabišego e ka ba tšeo di tseneletšego. Eupša na dikgobalo tše bjalo di swanetše go senyetša sa ruri kgonagalo ya motho ya go amogela therešo ya Lentšu la Modimo le go hwetša tekanyo e kgolo ya lethabo? Go sa šetšwe tsela yeo ba godišitšwego ka yona, na Nicholas le Malinda ba ka atlega e le batho ba botegago? Ela hloko pele mohlala wa Kgoši ya Juda Josia.

Mohlala wa Mangwalo

Josia o bušitše Juda ka nywaga e 31, lekgolong la bošupa la nywaga B.C.E. (659-629 B.C.E.) Nakong ya go bewa ga Josia sedulong sa bogoši, ka morago ga go bolawa ga tatagwe, maemo Juda e be e le a mabe kudu. Juda le Jerusalema di be di tletše ka barapedi ba Baali le bao ba dirago dikeno ka modimo yo mogolo wa ba-Amoni, Milikomo. Tsefanya yo e bego e le moporofeta wa Modimo ka nako yeo o itše: Bakgoma ba Juda e be e le ‘ditau tše di rorago’ gomme baahlodi e le “diphiri tša bošexo.” Ka baka leo, bošoro le boradia di be di atile nageng. Ba bantši ba be ba ipotša dipelong tša bona gore: “Morêna xa a setše, xa a hlokofatše.”​—⁠Tsefanya 1:⁠3–2:⁠3; 3:​1-⁠5.

Josia o ile a itlhatsela e le mmuši wa mohuta ofe? Mongwadi wa dikoronika tša Beibele e lego Esera o ngwala gore: “[Josia] ó dirile tše di kxahlilexo Morêna, a tšea ka tsela tša Dafida tat’axwe, a se kê a aroxêla ka xo le letona le xe e le xo la ntsôxôšo.” (2 Koronika 34:​1, 2) Go ya ka bohlatse bjo bo lego gona, Josia o ile a atlega go dira seo se lokilego mahlong a Modimo. Eupša setlogo sa lapa la gabo se be se le bjang?

Na ke Nako ya Bjana ya Kgodišo e Botse Goba ya go Gobošwa?

Ge Josia a be a belegwa ka 667 B.C.E., tatagwe, Amoni o be a e-⁠na le nywaga e 16 feela gomme rakgolo wa gagwe Manase o be a buša Juda. Manase e be e le e nngwe ya dikgoši tše kgopo kudu tšeo di kilego tša buša Juda. Ge a be a agela Baali dialetare, “ó dirile tše ntši-ntši tše di befetšexo Morêna.” O ile a dira gore barwa ba gagwe ba fete mollong, a diriša malea, a diriša bonoge, a kgothaletša mekgwa ya go dirišana le meoya le go tšholla madi a se nago molato ka bontši kudu. Manase gape o ile a tliša seswantšho se se betlilwego sa kota e kgethwa seo a se dirilego, ka ntlong ya Jehofa. O ile a aroša Juda le Jerusalema go “dira tše mpe tše di fetišaxo tša dithšaba tšela tše Morêna a di fedišitšexo mola Ba-Isiraele ba fihla.”​—⁠2 Koronika 33:​1-⁠9.

Manase e be e le yo kgopo moo Jehofa a ilego a dira gore a tlengwe ka ketwane a išwe Babele, o mongwe wa metse ya bogošing ya mmuši wa  Asiria. Manase o ile a itshola ge a be a le bothopša, a ikokobetša gomme a kgopela Jehofa tebalelo. Modimo o ile a kwa kgopelo ya gagwe bakeng sa kwelobohloko gomme a mmušetša bogošing Jerusalema. Ke moka Manase o ile a tloša kgobogo ka katlego.​—⁠2 Koronika 33:​10-⁠17.

Bokgopo bja Manase le go itshola ga gagwe mo go ilego gwa latela di ile tša kgoma bjang morwa wa gagwe Amoni? O ile a fetoga yo mobe kudu. Ge Manase a be a itshotše gomme a dira maiteko a go hlwekiša tšhilafalo yeo e bego e tlišitšwe ke yena setšhabeng, Amoni ga se a ka a arabela. Ge a hweditše bohwa bja sedulo sa bogoši a e-⁠na le nywaga e 22, Amoni “ó dirile tše di befetšexo Morêna, a etša Manase tat’axwe.” Go e na le gore a ikokobetše pele ga Jehofa, “tše Amoni a di dirilexo e be e le xo xodiša molato fêla.” (2 Koronika 33:​21-23) Josia o be a e-⁠na le nywaga e tshela feela ge Amoni a dirwa kgoši ya Juda. Josia o swanetše go ba a bile le nako ya bjana e boifišago gakaakang!

Pušo e kgopo ya Amoni e ile ya fela ka morago ga nywaga e mebedi ge bahlanka ba gagwe ba be ba mo logetše maano-mabe gomme ba mmolaya. Lega go le bjalo, batho ba naga ba ile ba bolaya bao ba logetšego Amoni maano gomme ba dira morwa wa gagwe Josia kgoši.​—⁠2 Koronika 33:​24, 25.

Go sa šetšwe maemo a gobatšago a bjaneng bja gagwe, Josia o ile a tšwela pele go dira se e bego e le se sebotse mahlong a Jehofa. Pušo ya gagwe e bile e atlegilego moo Beibele e rego: “Xo be xo sešo xwa ka xò e-⁠ba le kxoši e swanaxo le yêna a boetšexo xo Morêna ka pelo ya xaxwe ka moka, le ka môya wa xaxwe ka moka, le ka matla a xaxwe ka moka, a dira ka molaô wa Mošê ka moka; le xôna xa xwa ka xwa tla xwa tsoxa e nngwê kxoši e swanaxo le yêna.”​—⁠2 Dikxoši 23:​19-⁠25.

A mohlala o kgothatšago gakaakang woo Josia a ipontšhago e le wona go bao ba tla swanelago ke go kgotlelela nako ya bjana e šoro! Re ka ithuta eng mohlaleng wa gagwe? Ke eng se se thušitšego Josia go kgetha tsela e nepagetšego le go dula go yona?

 Tsoma go Tseba Jehofa

Tutuetšo e botse yeo e bego e apareditše nywageng ya pejana ya bophelo bja Josia e be e le ya rakgolo wa gagwe yo a itshotšego, Manase. Beibele ga e bolele gore ba babedi ba ba be ba batamelane gakaakang le gore Josia o be a e-⁠na le nywaga e mekae ge Manase a be a lokiša ditsela tša gagwe. Ka ge malapa a ba-Juda a be a batamelane, Manase a ka ba a ile a leka go hlakodiša setlogolo sa gagwe ditutuetšong tše gobošago tše di bego di mo dikologile ka go tsenya ka pelong ya setlogolo sa gagwe tlhompho ya go hlompha Modimo wa therešo Jehofa le lentšu la gagwe. Dipeu le ge e le dife tša therešo tšeo Manase a ilego a kgona go di bjala ka pelong ya Josia, mohlomongwe di kopane le ditutuetšo tše dingwe tše dibotse, mafelelong di ile tša tšweletša dienywa. Ngwageng wa gagwe wa seswai a le sedulong sa bogoši sa Juda, Josia wa nywaga e 15 o ile a tsoma go tseba le go dira thato ya Jehofa.​—⁠2 Koronika 34:​1-⁠3.

Kgokagano e nnoši ya moya yeo batho ba bangwe ba bilego le yona bjaneng bja bona e be e le ka wa leloko la kgole, mogwera goba moagišani. Lega go le bjalo, ge e ba di nošetšwa, dipeu tšeo di bjetšwego ka tsela ye di ka tšweletša dienywa tše dibotse ka morago. Malinda yo go boletšwego ka yena pejana, o be a e-⁠na le rakgolo yo botho wa moagišani yoo a bego a tliša dimakasine tša Morokami le Phafoga! gantši ka gabo. A mo gopola ka lerato, o re: “Se se ilego sa nkgahla kudu mabapi le moagišani wa-ka e be e le gore o be a sa bine matšatši a maikhutšo. Se se be se le bohlokwa go nna ka gobane Halloween le matšatši a mangwe a maikhutšo e be e le mabakeng ao go ona go bego go dirwa mekgwa ya ditirelo tša bodumedi borapeding bja batswadi ba-ka.” Ka morago ga nywaga e lesome, ge mogwera a be a laleletša Malinda dibokeng tša Bokriste Holong ya Mmušo ya Dihlatse tša Jehofa, o ile a gopola moagišani yo gomme a amogela taletšo gatee-tee. Se se ile sa mo thuša go tsoma therešo.

Ikokobetše Pele ga Modimo

Pušo ya Josia e be e swailwe ka diphetogo tše dikgolo tša bodumedi nageng ya Juda. Ka morago ga go kgatlampana ka lesolo la nywaga e selelago malebana le borapedi bja medimo ya diswantšho le go hlwekiša naga ya Juda, Josia o ile a tšwela pele go lokiša ntlo ya Jehofa. Ge mošomo woo o be o tšwela pele, Moperisita yo Mogolo Hilikia o ile a utolla selo se bohlokwa gakaakang! O ile a hwetša kopi ya mathomong ya “Puku ya Melaô ya Morêna.” A romilwe ke Hilikia ka seutollwa se se thabišago, Safane e lego mongwaledi o ile a begela kgoši seo se diregilego. Na dilo tše a di fihleletšego di ile tša dira gore Josia wa nywaga e 25 a ikgogomoše?​—⁠2 Koronika 34:​3-⁠18.

Esera o ngwala gore: “Ya re xe kxoši e e-⁠kwa se se bolêlwaxo ke molaô, ya xaxola diaparô tša yôna.” Ye e be e le pontšho e tšwago pelong ya manyami ka gobane o ile a lemoga gore ga se ditaelo ka moka tša Modimo tše di latetšwego ke bagologolo ba bona. Le ruri ke leswao la boikokobetšo! Kapejana kgoši e ile ya laela baemedi ba banna ba bahlano gore ba yo botšiša go Jehofa ka moporofeta wa mosadi Huluda. Baemedi ba ile ba tliša pego ka mokgwa wo: ‘Bošula bo tlo tla e le mafelelo a go se theetše Molao wa Jehofa. Eupša ka gobane wena, Kgoši Josia o ikokobeditše, o tla išwa lebitleng la gago ka khutšo gomme o ka se bone bošula.’ (2 Koronika 34:​19-28) Jehofa o be a thabišitšwe ke boemo bja kgopolo bja Josia.

Go sa šetšwe tsela yeo re godišitšwego ka yona, le rena ka mo go swanago re ka ikokobetša pele ga Modimo wa therešo, Jehofa, gomme ra bonagatša go ba le boemo bja kgopolo bja tlhompho go yena le Lentšung la gagwe, Beibele. Nicholas, yo go boletšwego ka yena mathomong o dirile se. O re: “Gaešita le ge bophelo bja-ka bo be bo tletše mathata ka baka le go diriša dihlare-tagi gampe le go nwa kudu, ke be ke e-⁠na le kgahlego Beibeleng gomme ke hlologetše go ba le morero bophelong. Mafelelong, ke ile ka kopana le Dihlatse tša Jehofa, ka fetoša mokgwa wa-ka wa bophelo gomme ka amogela therešo.” Ee, re ka bontšha boemo bja kgopolo bja tlhompho go Modimo le Lentšung la gagwe go sa šetšwe maemo a rena.

Holwa ke Thulaganyo ya Jehofa

Josia le yena o be a e-⁠na le tlhompho e tseneletšego ka baporofeta ba Jehofa. Ga se a nyaka go tseba feela ka moporofeta wa mosadi Huluda eupša o be a tutueditšwe kudu ke baporofeta ba bangwe ba mehleng ya gagwe. Ka mohlala, bobedi Jeremia le Tsefanya ba be ba swaregile ka go tsebatša go solwa ga borapedi bja medimo ya  diswantšho bjo bo bego bo dirwa Juda. Go ela hloko melaetša ya bona go swanetše go ba go ile gwa matlafatša Josia gakaakang ge a be a dutše a kgatlampana ka lesolo la gagwe malebana le borapedi bja maaka!​—⁠Jeremia 1:​1, 2; 3:​6-10; Tsefanya 1:​1-⁠6.

“Mong,” Jesu Kriste o kgethile sehlopha se kopanego sa balatedi ba gagwe ba tloditšwego​—⁠“molaki e a bôtêxaxo yo bohlale”​—⁠go nea dijo tša moya ka nako e swanetšego. (Mateo 24:​45-47) Ka dipuku tšeo di theilwego Beibeleng le thulaganyo ya phuthego, sehlopha sa molaki se lebiša tlhokomelo meholeng ya go theetša keletšo ya Beibele le go nea ditšhišinyo tše di šomago mabapi le go e diriša maphelong a rena a letšatši le letšatši. Ke mo go swanetšego gakaakang gore re diriše thulaganyo ya Jehofa go re thuša go fenya boemo bja kgopolo le ge e le bofe bjo bo tseneletšego le bjo bo sa agišego! Go tloga bjaneng, Nicholas o be a hloile matla a taolo ka mo go feletšego. Gaešita le ge a ithutile therešo ya Lentšu la Modimo, bofokodi bjo bo ile bja mo swarelela go hlankela Jehofa ka mo go tletšego kudu. Go fetoša boemo bjo bja kgopolo e be e se selo se bonolo go yena. Eupša ge nako e dutše e tšwela pele, o ile a atlega. Bjang? Nicholas o hlalosa gore: “Ka thušo ya bagolo ba babedi ba kwešišago ke ile ka amogela bothata bja-ka gomme ka thoma go diriša keletšo ya bona e lerato ya Mangwalo.” O oketša ka gore: “Gaešita le ge go galefa ganyenyane ka dinako tše dingwe go tšwelela, ga bjale ke laotše mokgwa wa-ka wa borabele.”

Malinda le yena o tsoma keletšo ya bagolo ge a dira diphetho tše bohlokwa bophelong bja gagwe. Ka go swaragana le maikwelo a go hloka kholofelo le maikwelo a go hloka mohola ao a tšwago nywageng ya gagwe ya bjaneng, seo a se hwetšago se le bohlokwa ka mo go kgethegilego ke dihlogo tše di fapa-fapanego ka go Morokami le Phafoga! O re: “Ka dinako tše dingwe ke kgongwa ke serapa goba lefoko​—⁠e lego karolwana e nyenyane feela sehlogong. Mo e ka bago nywaga e senyane e fetilego, ke ile ka thoma go boloka dihlogo tše bjalo ka pukung ya matlakala a sa tlengwago e le gore nka di hwetša gabonolo.” Lehono, dipuku tša gagwe tše tharo di na le dihlogo tše ka bago 400!

Aowa, batho ga se ba swanela go ba bahlaselwa ba sa ruri ba bophelo bja lapa bjo bobe. Ka thušo ya Jehofa ba ka atlega moyeng. Go fo etša ge go godišwa gabotse go sa kgonthišetše gore motho o tla botega, nako ya bjaneng e sa kgahlišego ga e thibele motho go ba yo a boifago Modimo.

Ka morago ga go utollwa ga puku ya Molao nakong ya modiro wa go lokišwa ga tempele, Josia ‘o ile a dira kgwerano pele ga Jehofa ya go latela Jehofa le go mo theetša ka pelo ya gagwe ka moka le ka moya wa gagwe ka moka.’ (2 Koronika 34:​31) Le gona ga se a ka a šišinyega boikemišetšong bja gagwe go fihlela lehung la gagwe. Malinda le Nicholas ka mo go swanago ba ikemišeditše go dula ba botegela Jehofa Modimo le go atlega bjalo ka batho ba potego. Eka le wena o ka ikemišetša go dula o le kgaufsi le Modimo le go mo hlankela ka potego. O ka kgodišega gore o tla atlega, ka ge Jehofa a holofetša gore: “O se boifê xobane ke na le wene. O se kê wa thšoxa, xobane Modimo wa xaxo ké Nna. Ke a xo tiiša; ke a xo thuša; ke xo hleka ka letsôxô la-ka le letona le-ya-ka-tokô.”​—⁠Jesaya 41:​10, 13.

[Mengwalo ya ka tlase]

[Diswantšho go letlakala 26]

Go sa šetšwe gore o bile le nako ya bjana e šoro, Josia o ile a tsoma go tseba Jehofa le go dira gore bophelo bja gagwe bo atlege

[Seswantšho go letlakala 28]

Bagolo ba ka go thuša go fenya tshekamelo e itšego ya semelo yeo e tsemilego medu

[Seswantšho go letlakala 28]

“Morokami” le “Phafoga!” di ka go thuša go kgomarela potego