Re be re se Noši ge Tumelo ya Rena e be e Lekwa

Vicky e be e le ngwana wa ngwanenyana yo a rategago​—⁠a phetše gabotse mmeleng, e le yo mobotsana e bile a e-⁠na le matšato. Ee, ge a be a belegwa seruthwaneng sa 1993, lethabo la rena le be le se na mellwane. Re be re dula toropong e nyenyane ka borwa bja Sweden, gomme bophelo e be e le bjo bo thabišago.

LEGA go le bjalo, ge Vicky a be a e-⁠na le ngwaga le seripa bophelo bja rena bo ile bja bonagala eka bo a šwalalana. E be e šetše e le lebakanyana a sa phele gabotse mmeleng, ka gona re ile ra mo iša sepetlele. Re ka se tsoge re lebetše nako ya ge ngaka e be e re botša gore morwedi wa rena o be a swere ke lymphoblastic leukemia e šoro, mohuta wa kankere ya bjaneng yeo e kgomago disele tše ditšhweu tša madi.

Go be go le thata go kwešiša le go dumela gore ngwanenyana wa rena yo monyenyane o be a e-⁠na le bolwetši bjo bjo bo boifišago. E be e le gona a thomago go lemoga lefase leo le mo dikologilego, gomme ga bjale o be a e-⁠hwa. E leka go re homotša, ngaka e ile ya bolela gore go ka newa kalafo e atlegago ka mo go lekanyeditšwego, yeo e akaretšago kalafo ya tša dikhemikhale gotee le ditšhelo tša madi tše mmalwa. Ye e bile kgakanego ya rena e latetšego.

Tumelo ya Rena e a Lekwa

Re be re rata morwedi wa rena e le ka kgonthe gomme re be re nyaka gore a hwetše tlhokomelo ya tša kalafo e di phalago tšohle. Lega go le bjalo, ditšhelo tša madi di be di sa amogelege ka mo go feletšego. Re dumela ka mo go tiilego Lentšu la Modimo, Beibele, leo le bontšhago gabotse gore Bakriste ba swanetše go ‘ila madi.’ (Ditiro 15:​28, 29) Gape re be re tseba gore ditšhelo tša madi di kotsi ka botšona. Ba dikete ba fetetšwe ke malwetši gomme ba bolailwe ke ditšhelo tša madi. Kalafo e nnoši e nngwe gape e be e le ya maemo a godimo yeo e bego e sa akaretše ditšhelo tša madi. Mabapi le se, ntwa ya rena ya go lwela tumelo bjale e ile ya thoma.

 Ke eng seo re bego re ka se dira? Re ile ra ikgokaganya le Lefapha la tša Tsebišo ya Sepetlele ofising ya lekala ya Sweden ya Dihlatse tša Jehofa bakeng sa go kgopela thušo. * Gatee-tee di-fax di ile tša romelwa dipetleleng tše di fapa-fapanego go dikologa Yuropa bakeng sa go tsoma ga rena sepetlele le ngaka yeo e ratago go dira kalafo ya dikhemikhale ka ntle le ditšhelo tša madi. Phišego le lerato tše di bontšhitšwego ke banababo rena ba Bakriste maitekong a bona a go leka go re thuša e be e le tše di matlafatšago kudu. Re be re sa tlogelwa re le noši ntweng ya rena ya go lwela tumelo.

Lebakeng la diiri tše sego kae, go ile gwa hwetšwa sepetlele le ngaka kua Homburg/Saar, Jeremane. Re ile ra direlwa dithulaganyo tša gore re fofele moo letšatšing le le latelago gore Vicky a yo hlahlobja. Ge re fihla, banababo rena ba Bakriste ba phuthegong ya lefelong leo ya Dihlatse tša Jehofa kua Homburg, gotee le ba bangwe ba metswalo ya rena, ba be ba le moo bakeng sa go re amogela. Le moemedi wa Komiti ya go Hloma Kwano le Sepetlele o ile a re amogela ka borutho. O ile a sepela le rena go ya sepetlele gomme a re nea thekgo ka moka e ka kgonegago. Re ile ra ikwa re homotšegile go bona gore gaešita le nageng e šele, re be re e-⁠na le banababo rena ba moya bao ba re thekgago.

Ge re be re kopana le Dr. Graf sepetlele re ile ra homotšega gape. O be a kwešiša kudu gomme a re kgonthišetša gore o tla dira sohle seo a ka se kgonago go alafa Vicky ka ntle le ditšhelo tša madi. Gaešita le ge tekanyo ya hemoglobin ya gagwe e be e ka theoga go fihla go 5 g/dl, o tla ba a ikemišeditše go tšwetša pele kalafo ka ntle le ditšhelo tša madi. O ile a ba a bolela gore go hwetšwa ga bolwetši e sa le ka pela le go gata mogato kapejana wa go iša Vicky moo go mo neile sebaka se sebotse bakeng sa go hwetša kalafo e atlegago. O ile a dumela ka gore le e be e tla ba lekga la mathomo a dira kalafo ya tša dikhemikhale ka ntle le ditšhelo tša madi bolwetšing bjo bo swanago le bja Vicky. Re ile ra leboga kudu gomme ra hlompha sebete sa Dr. Graf le boikemišetšo bja gagwe bakeng sa go thuša.

Mathata a tša Boiphedišo

Ga bjale potšišo e be e le gore, Re be re tlo lefelela bjang dikalafo tša Vicky? Re be re tlabegile ge re be re botšwa gore nywaga e mebedi ya dikalafo e be e tla bitša mo e ka bago di-deutsche mark tše ka bago 150 000 (diranta tše 520 000). Re be re se na gaešita le karolo e nyenyane ya tšhelete yeo e bego e nyakega, le gona go be go nyakega gore go thongwe dikalafo tša Vicky gatee-tee. Ka ge re tlogile Sweden go ya Jeremane bakeng sa dikalafo, re be re ka se fiwe phemelo ya tša maphelo le ge e le efe ye e fiwago batho bohle. Ka gona re be re le moo le ngwanenyana wa rena yo monyenyane yo a babjago kudu gomme setsebi sa tša kalafo se ikemišeditše go thuša, eupša re se na tšhelete e lekanego.

Sepetlele se ile sa re namolela gomme sa re botša gore dikalafo di tla thoma gatee-tee ge e ba re be re ka lefa di-mark tše 20 000 (diranta tše 70 000) gomme ra saena go kgonthišetša gore re tla lefa ye e šetšego. Re be re e-⁠na le yeo re bego re e bolokile, gomme ka thušo e lerato e tšwago go bagwera le metswalo, re ile ra kgona go lefa di-mark tše 20 000 (diranta tše 70 000)–eupša go thwe’ng ka e šetšego?

Re ile ra gopotšwa gape gore re be re se noši ntweng ya rena ya go lwela tumelo. Ngwanabo rena wa moya, yoo ka nako yeo re bego re sa mo tsebe, o be a ikemišeditše go rwala boikarabelo bja e šetšego. Lega go le bjalo, re be re sa nyake go diriša mpho ya gagwe ya seatla se se bulegilego ka ge re ile ra kgona go dira dithulaganyo tše dingwe.

Setsebi sa tša Kalafo se a Šoma

Kalafo ya dikhemikhale e ile ya thoma. Matšatši le dibeke di ile tša feta. Ka dinako tše dingwe, go be go le thata kudu le mo go lapišago go rena gotee le go morwedi wa rena yo monyenyane. Ka lehlakoreng le lengwe, re be re thaba kudu e bile re leboga nako e nngwe le e nngwe ge a be a bontšha dika tša go kaonefala. Kalafo ya dikhemikhale e ile ya tšea dikgwedi tše seswai. Tekanyo ya tlase kudu ya hemoglobin yeo Vicky a kilego a ba le yona e be e le 6 g/dl, gomme Dr. Graf o ile a phetha kholofetšo ya gagwe.

Nywaga ya ka godimo ga e tshela e fetile, gomme  tlhahlobo ya mafelelo ya diela tša gagwe tša mongetsaneng ga e bontšhe maswao a leukemia. Ga bjale ke ngwanenyana yo a thabilego yo a se nago maswao le ge e le afe a bolwetši bjo šoro. Ee, go bonagala eka ke toro gore Vicky o fodile ka mo go feletšego ka mokgwa wo. Re a tseba gore bana ba bantši bao ba nago le bolwetši bjo bo swanago ba a hwa go sa šetšwe gore ba amogela kalafo ya tša dikhemikhale le ditšhelo tša madi.

Re ile ra fenya ntweng ya rena ya go lwela tumelo, eupša e sego ka ntle le thušo ya metswalo ya rena, banababo rena le dikgaetšedi ba Bakriste le ditsebi tša tša kalafo. Lefapha la tša Tsebišo ya Sepetlele le re neile thekgo e feletšego diiri tše 24 ka letšatši. Dr. Graf le bašomi-gotee le yena ba ile ba diriša bokgoni bja bona go thuša Vicky gore a fole. Bakeng sa tše ka moka, re leboga e le ka kgonthe.

Tumelo ya Rena e Matlafaditšwe

Lega go le bjalo, ka godimo ga tše ka moka re leboga Modimo wa rena Jehofa, bakeng sa tlhokomelo ya gagwe e lerato le matla ao re a amogetšego ka Lentšu la gagwe, Beibele. Ge re lebelela morago, re lemoga mo gontši kudu moo re ithutilego gona le kamoo phihlelo ye e šoro bophelong e bilego e matlafatšago tumelo ka gona.

Ga bjale kganyogo ya rena e tšwago pelong ke go boloka tswalano ya kgaufsi le Jehofa Modimo le go ruta morwedi wa rena bohlokwa bja go phela bophelo bjo bo dumelelanago le dilo tšeo Modimo a di nyakago. Ee, re nyaka go mo nea bohwa bjo bobotse bja moya bja bophelo bjo bo sa felego Paradeiseng e tlago mo lefaseng.​—⁠E neetšwe.

[Mengwalo ya ka tlase]