Go Dirišana le Meoya le go Tsoma Boemo bja Moya bja Kgonthe

KA MOKA ga rena re na le dinyakwa tša moya gotee le tša dilo tše di bonagalago. Ke ka baka leo ba bantši ba botšišago dipotšišo tše bjalo ka, Morero wa bophelo ke ofe, ke ka baka la’ng batho ba tlaišega le gore go direga’ng ka rena ge re e-⁠hwa? Batho ba bantši ba botegago ba tsoma dikarabo tša dipotšišo tše le tše dingwe tše swanago le tšona go dinoge, moo ba boledišanago le ba malopo, ba holofela gore ba ka boledišana le meoya ya bahu. Mokgwa wo o bitšwa go dirišana le meoya.

Batho bao ba dirišanago le meoya ba hwetšagala dinageng tše dintši gomme ba bokana ka diphuthegong le dikerekeng. Ka mohlala kua Brazil, batho bao ba dirišanago le meoya bao ba akanyetšwago go 4 000 000, ba latela dithuto tše di rulagantšwego ke Hyppolyte Léon Denizard Rivail, morutiši wa Mofora wa lekgolong la bo-19 la nywaga le radifilosofi yo a ngwadilego ka tlase ga leina la Allan Kardec. Kardec o ile a thoma go ba le kgahlego ka ditiro tša go dirišana le meoya ka 1854. Ka morago o ile a botšiša dinoge tša mafelong a mantši dipotšišo gomme a ngwala dikarabo ka go The Book of Spirits, e gatišitšwego ka 1857. Dipuku tše dingwe tše pedi tšeo a di ngwadilego ke The Mediums’ Book le The Gospel According to Spiritism.

Go dirišana le meoya go be go dutše go kgokaganywa le mekgwa ya bodumedi e bjalo ka boloi, maleatlana goba borapedi bja Sathane. Lega go le bjalo, bao ba latelago dithuto tša Allan Kardec ba bolela gore ditumelo tša bona ke tše di fapanego. Dipuku tša bona gantši di tsopola Beibele, gomme ba bolela ka Jesu e le “mohlahli le mohlala wa batho ka moka.” Ba re dithuto tša Jesu ke “polelo e hlwekilego go di feta tšohle ya molao wa Modimo.” Allan Kardec o be a lebelela mengwalo ya go dirišana le meoya e le kutollo ya boraro ya molao wa Modimo go batho, tše pedi tša mathomo e le dithuto tša Moše le tša Jesu.

Go dirišana le meoya go gogela batho ba bantši ka gobane go lebiša tlhokomelo e kgolo leratong la boagišani le medirong ya go thuša bahloki. Motho yo mongwe yo a dirišanago le meoya o dumela gore: “Ka ntle le lerato ga go na phologo.” Batho ba bantši bao ba dirišanago le meoya ba mafolofolo tirelong ya tša leago, ba thuša tabeng ya go hloma dipetlele, dikolo le mafelo a mangwe. Maiteko a bjalo a a retwa. Lega go le bjalo, ditumelo tša batho bao ba dirišanago le meoya di fapana bjang le dithuto tša Jesu go etša ge di ngwadilwe ka Beibeleng? Anke re tšee mehlala e mebedi: kholofelo ka bahu le lebaka la go tlaišega.

Kholofelo ke Efe ka Bahu?

Batho ba bantši bao ba dirišanago le meoya ba dumela tabeng ya go tswalwa gape ka mmele o mongwe. Puku e nngwe ya batho bao ba dirišanago le meoya e re: “Go tswalwa gape ka mmele o mongwe ke thuto e nnoši yeo e kgotsofatšago kgopolo ya rena ya toka ya Modimo; ke thuto e nnoši yeo e ka hlalosago bokamoso le go matlafatša dikholofelo tša rena.” Batho bao ba dirišanago le meoya ba hlalosa gore moya (soul) goba “moya [spirit] o tswetšwego gape,” o tšwa mmeleng​—⁠go swana le serurubele ge se e-⁠tšwa sekgopaneng sa sona. Ba dumela gore meoya ye ka morago e tswalwa gape e le batho bakeng sa go hlwekiša dibe tšeo di dirilwego bophelong bja nakong e fetilego. Eupša dibe tšeo tša pele ga di sa gopolwa. The Gospel According to Spiritism e re: “Modimo o ile a bona e le mo go swanetšego gore tša bophelong bja nakong e fetilego di bipše.”

Allan Kardec o ngwadile gore: “Go gana taba ya go tswalwa ka mmele o mongwe gape ke go gana mantšu a Kriste.” Lega go le bjalo, Jesu le ka mohla ga se a ka a bolela ka polelwana “go tswalwa gape ka mmele o mongwe,” e bile ga se a ka a bolela ka kgopolo e bjalo. (Bona “Na Beibele e Ruta Taba ya go Tswalwa Gape ka Mmele o Mongwe?” go letlakala 22.) Go e na le moo, Jesu o rutile ka tsogo ya bahu. Nakong ya bodiredi bja gagwe bja lefaseng o ile a tsoša batho ba bararo​ —⁠morwa wa mohlologadi wa Naini, morwedi wa mohlankedi yo a okamelago wa Sinagoge le mogwera wa gagwe wa kgaufsi Latsaro. (Mareka 5:​22-24, 35-43; Luka 7:​11-15; Johane 11:​1-44) Anke re eleng hloko e nngwe ya ditiragalo tšeo tše di kgahlišago kudu gomme re bone seo Jesu a bego a se bolela ka “tsogo.”

Tsogo ya Latsaro

Jesu o ile a kwa gore mogwera wa gagwe Latsaro o be a babja. Ka morago ga matšatši a mabedi, o ile a botša barutiwa ba gagwe gore: “Latsaro moxwêra-rena ó robetše; xomme ke ya xo mo tsoša borokong.” Barutiwa ga se ba ka ba kwešiša seo Jesu a bego a se bolela, ka gona o ile a bolela ka mo go kwagalago gore: “Latsaro ó hwile.” Ge Jesu mafelelong a e-⁠tla lebitleng la Latsaro, monna o be a šetše a e-⁠na le matšatši a mane a hwile. Lega go le bjalo, Jesu o ile a laela gore lefsika leo le bego le tswaletše mojako wa lebitla le tlošwe. Ke moka o ile a goeletša ka gore: “Latsaro! Tšwaa O tlê mó!” Ge a rialo, gwa direga semaka. “Mohu a tšwa à tatetšwe matsôxô le maoto ka mašela, sefahloxong à tatetšwe ka lešelana. Jesu a re: Mo tlemolleng le mo lesê a ikêlê.”​—⁠Johane 11:​5, 6, 11-14, 43, 44.

Go molaleng gore se e be e se go tswalwa gape ka mmele o mongwe. Jesu o ile a re Latsaro yo a hwilego o be a robetše, a sa kwe selo. Bjalo ka ge Beibele e gatelela se, ‘maano a gagwe a be a fedile.’ O be a ‘sa tsebe selo.’ (Psalme 146:⁠4; Mmoledi 9:⁠5) Latsaro yo a tsošitšwego e be e se motho yo a fapanego ka moya o tswetšwego gape ka mmele o mongwe. O be a na le semelo se se swanago, a le bogolong bjo bo swanago e bile a e-⁠na le dikgopolo tše di swanago. O ile a tšwetša pele bophelo bja gagwe go thoma moo a bo tlogetšego gona ka baka la lehu la gagwe leo le sa letelwago gomme a boela go baratiwa ba gagwe bao ba bego ba ile ba llišwa ke lehu la gagwe.​—⁠Johane 12:​1, 2.

Ka morago Latsaro o ile a hwa gape. Ka gona, tsogo ya gagwe e phethile morero ofe? Yona gotee le ditsogo tše dingwe tšeo Jesu a di dirilego, e thekga kholofelo ya rena kholofetšong ya Modimo ya gore bahlanka ba Gagwe ba botegago ba tla tsošwa bahung ka nako ya Gagwe e swanetšego. Mehlolo yeo ya Jesu e oketša mošito o mogolo mantšung a gagwe a rego: “Ké Nna tsoxô le bophelô. E a ntumetšexo ó tlo phela le xe a ka hwa.”​—⁠Johane 11:⁠25.

Mabapi le tsogo yeo ya nakong e tlago Jesu o itše: “Xo tla lebaka leo bohle ba lexo mabitleng ba tl’o xo kwa Lentšu [la-ka] ka lôna. Xomme ba tlo tšwa; ba ba dirilexo tše botse ba tlo tsoxa ba phela; ba ba dirilexo tše mpe ba tlo tsoxa ba lahlwa.” (Johane 5:​28, 29) Ka ge go bile bjalo ka Latsaro, le tsogo ya bahu e tla ba bjalo. E ka se be go kopanywa gape ga meoya e phelago le mebele e tsošitšwego yeo e bodilego le yeo mohlomongwe e bilego e le karolo ya diphedi tše dingwe. Go tsoša bahu go kgonwa ke Mmopi wa legodimo le lefase, yoo a nago le bohlale le matla tšeo di se nago tekanyo.

Na thuto ya tsogo ga e utolle lerato la Modimo le le tseneletšego ka batho ka o tee ka o tee bjalo ka ge Jesu Kriste a ile a ruta ka yona? Eupša go thwe’ng ka potšišo ya bobedi e boletšwego pejana?

Lebaka la go Tlaišega ke Lefe?

Go tlaišega mo gogolo ga batho go tlišwa ke dilo tšeo batho ba sego bohlale, ba se nago phihlelo goba gaešita le ba babe ba di dirago. Lega go le bjalo, go thwe’ng ka ditiragalo tše sehlogo tšeo batho ba sa ikarabelego ka tšona? Ka mohlala, ke ka baka la’ng go e-⁠ba le dikotsi le dikotsi tša tlhago? Ke ka baka la’ng bana ba bangwe ba belegwa ba e-⁠na le mafokodi a leabela? Allan Kardec o ile a lebelela dilo tše bjalo e le dikotlo. O ngwadile gore: “Ge e ba re otlwa go swanetše go ba go  e-⁠na le phošo e dirilwego. Ge e ba phošo yeo e se ya bophelong bja gona bjale, gona e swanetše go ba e e-⁠tšwa bophelong bja nakong e fetilego.” Bao ba dirišanago le meoya ba rutilwe gore ba rapele ka gore: “Morena, O wa toka ka moka. Bolwetši bjo O kgethago go nthomela bjona ke bjo bo swanetšego . . . Ke bo amogela e le kotlo bakeng sa bophelo bja nakong e fetilego le teko ya tumelo ya-ka gotee le go kwa thato ya Gago e šegofaditšwego.”​—⁠The Gospel According to Spiritism.

Na Jesu o ile a ruta selo se bjalo? Aowa. Jesu o be a tseba gabotse polelo ya ka Beibeleng e rego: “Nako le ditiragalo tše di sa letelwago di ba wela bohle.” (Mmoledi 9:​11, NW) O be a tseba gore ka dinako tše dingwe dilo tše mpe di fo direga. Ga se tša swanela go ba kotlo bakeng sa dibe.

Ela hloko tiragalo ye bophelong bja Jesu: “Jesu, xe a iphetêla, a bôna motho e a tswetšwexo è le sefofu. Barutiwa ba xaxwe ba mmotšiša ba re: Moruti, xo sentše mang? A e ka ba yêna xoba batswadi ba xaxwe, xe a tlo tswalwa e le sefofu?” Karabo ye Jesu a e neilego e be e le e rutago kudu: “Xa xo a senya yêna, le xe e le batswadi ba xaxwe. Xe a le byalo ké xore mo xo yêna xo bônaxatšwê medirô ya Modimo. Xe a itš’alo, a thswa marê a duba seretse ka ôna, ’me a tlotša mahlô a sefofu seo, A re: Sepela O y’o hlapa sedibeng sa Siloa . . . Motho eo a ya, a hlapa, a boa à bôna.”​—⁠Johane 9:​1-3, 6, 7.

Mantšu a Jesu a bontšhitše gore ga se monna yo goba batswadi ba gagwe bao ba bego ba ikarabela ka bofofu bja gagwe bja leabela. Ka gona Jesu ga se a ka a thekga kgopolo ya gore monna o be a otlwa ka baka la dibe tšeo a di dirilego bophelong bja nakong e fetilego. Ee, Jesu o be a tseba gore batho ka moka ba na le sebe sa leabela. Eupša ba abetšwe sebe sa Adama, e sego dibe tšeo ba di dirilego pele ba belegwa. Ka baka la sebe sa Adama, batho ka moka ba belegwa ba sa phethagala mmeleng, ba hlaselwa ke bolwetši le lehu. (Jobo 14:⁠4; Psalme 51:⁠5; Ba-Roma 5:​12; 9:​11) Ge e le gabotse, bjo ke boemo bjoo Jesu a bego a rometšwe go tlo bo lokiša. Johane Mokolobetši o itše Jesu e be e le “Kwana ya Modimo e rwelexo sebe sa lefase.”​—⁠Johane 1:​29. *

Ela hloko gape gore Jesu ga se a ka a re Modimo ka boomo o ile a bakela gore monna yoo a tswalwe e le sefofu e le gore Jesu a tle a tlele go mo alafa ka letšatši le lengwe. Yeo e be e tla ba tiro e sehlogo le e belaetšago gakaakang! Na seo se be se ka tumiša Modimo? Aowa. Go e na le moo, phodišo ya mohlolo ya monna wa sefofu e šomile go ‘bonagatša mediro ya Modimo.’ Go swana le diphodišo tše dingwe tše dintši tšeo Jesu a di dirilego, e ile ya bonagatša lerato la Modimo la kgonthe go batho ba tlaišegago le go tiišetša go botega ga kholofetšo ya Gagwe ya go fediša malwetši ka moka a batho le tlaišego ka nako ya Gagwe e swanetšego.​—⁠Jesaya 33:⁠24.

Na ga se mo go homotšago go ithuta gore go e na le go bakela tlaišego, Tatago rena wa legodimong o nea ‘ba ba mo kgopelago dilo tše dibotse’? (Mateo 7:​11) Se se tla tlišetša Yo Godimo-dimo letago le lekaakang ge mahlo a difofu a budollwa, ditsebe tša difoa di thibollwa, ge digole di sepela, di taboga e bile di kitima!​—⁠Jesaya 35:​5, 6.

Go Kgotsofatša Dinyakwa tša Rena tša Moya

Jesu o itše: “Motho xa a phele ka boxôbê fêla; ó phela ka mantšu ohle a a tšwaxo molomong wa Modimo.” (Mateo 4:⁠4) Ee, dinyakwa tša rena tša moya di a kgotsofatšwa ge re bala Lentšu la Modimo, Beibele, gomme re itshwara ka go dumelelana le yona. Go ya go dinoge go tloga go sa kgotsofatše dinyakwa tša rena tša moya. Ruri, mokgwa o bjalo o solwa ka go lebanya go seo Allan Kardec a boletšego ka sona e le kutollo ya mathomo ya molao wa Modimo.​—⁠Doiteronomio 18:​10-⁠13.

Ba bantši go akaretša le bao ba dirišanago le meoya, ba a lemoga gore Modimo ke Mo-ba-Gona yo a Phagamego, wa ka mo go sa felego, yo a phethagetšego ka mo go feletšego, yo botho, yo botse le wa toka. Eupša Beibele e utolla mo gontši kudu. E utolla gore o na le leina le le mo hlaolago, Jehofa, leo re swanetšego go le hlompha bjalo ka ge Jesu a dirile. (Mateo 6:⁠9; Johane 17:⁠6) E bontšha Modimo e le motho wa kgonthe yoo batho ba ka thabelago tswalano ya kgaufsi le yena. (Ba-Roma 8:​38, 39) Ka go bala Beibele, re ithuta gore Modimo o na le kgaugelo le gore “se a re diraxo sôna xa se xo latiša bokxôpô, xa se xo lefeletša sebe.” (Psalme 103:​10) Ka Lentšu la gagwe le le ngwadilwego, Morena yo a Phagamego Jehofa o utolla lerato la gagwe, bophagamo bja gagwe le go ba ga gagwe yo a nago le teka-tekano. Ke Yena a hlahlago le go šireletša batho bao ba kwago. Go tseba Jehofa le Morwa wa gagwe Jesu Kriste, go bolela “bophelô byo bo sa felexo.”​—⁠Johane 17:⁠3.

Beibele e nea tsebišo ka moka ye re e nyakago mabapi le merero ya Modimo, e bile e re botša seo re swanetšego go se dira ge e ba re nyaka go mo thabiša. Go hlahloba Beibele ka kelohloko go re nea dikarabo tša therešo le tše di kgotsofatšago dipotšišong tša rena. Beibele gape e re nea tlhahlo mabapi le seo se lokilego le seo se sa lokago, gomme e nea kholofelo e tiilego. E re kgonthišetša gore kgaufsinyane nakong e tlago, Modimo “ó tlo phomola mexôkxô ka moka mahlong a bôná; le lehu le ka se hlwê le e-⁠ba xôna; le xe e le manyami le dillô le bohloko, di ka se hlwê di e-⁠ba xôna; xobane tša pele di [tla be di] fetile.” (Kutollo 21:​3, 4) Ka Jesu Kriste, Jehofa o tla lokolla batho sebeng sa leabela gotee le go se phethagaleng, gomme batho ba kwago ba tla hwetša bohwa bja bophelo bjo bo sa felego lefaseng la paradeise. Ka nako yeo, dinyakwa tša bona tša nama gotee le tša moya di tla kgotsofatšwa ka mo go feletšego.​—⁠Psalme 37:​10, 11, 29; Diema 2:​21, 22; Mateo 5:⁠5.

[Mengwalo ya ka tlase]

[Lepokisi go letlakala 22]

NA BEIBELE E RUTA TABA YA GO TSWALWA GAPE KA MMELE O MONGWE?

Na thuto ya go tswalwa gape ka mmele o mongwe e thekgwa ke ditemana tša Beibele le ge e le dife? Ela hloko a mangwe a mangwalo ao ba bangwe bao ba dumelago thuto ye ba a dirišitšego:

“Xobane baporofeta ka moka, le wôna Molaô, ba be ba porofeta ba xôma ka Johane. . . . Ké yêna Eliya, yo a bexo a thwe ó tlo tla.”​—⁠Mateo 11:​13, 14.

Na Johane Mokolobetši e be e le Eliya yo a tswetšwego gape? Ge a be a botšišwa gore: “A o Eliya?” Johane o ile a araba ka mo go kwagalago gore: “Aowa!” (Johane 1:​21) Lega go le bjalo, go be go ile gwa bolelwa e sa le pele gore Johane o be a tla eta Mesia pele “ka môya wa Eliya le ka matla a xaxwe.” (Luka 1:​17; Maleaki 4:​5, 6) Ka mantšu a mangwe, Johane Mokolobetši e be e le Eliya ka kwešišo ya gore o ile a dira mošomo o swanago le wa Eliya.

“Xe motho e se wa xo tswalwa lefsa, a ka se kê a bona mmušô wa Modimo. O se kxotsê xe ke Xo botša ke re: Le swanetše xo tswalwa lefsa.”​—⁠Johane 3:​3, 7.

Yo mongwe wa baapostola ka morago o ngwadile gore: “A xo rêtwê Modimo Tata xo Mong wa rena Jesu Kriste, wa xo re tswala xapê ka kxauxêlô e kxolo ya xaxwe, ra tla re ba ba kholofêlô ye e phelaxo ka xe Jesu Kriste a tsoxile bahung.” (1 Petro 1:​3, 4; Johane 1:​12, 13) Ka mo go kwagalago, go tswalwa gape mo Jesu a boletšego ka gona e be e le tiragalo ya moya yeo e bego e tla direga ge barutiwa ba gagwe ba be ba sa dutše ba phela, e sego go tswalwa gape ka mmele o mongwe ga nakong e tlago.

“Ge motho a hwile, o phela ka mo go sa felego: ge matšatši a go ba gona ga-ka Lefaseng a fedile, ke tla leta, ka go bona gore ke tla boa gape.”​—⁠“Phetolelo ya Segerika” ya Jobo 14:​14 yeo e tsopotšwego ka go The Gospel According to Spiritism.

Revised Standard Version e fetolela temana ye ka gore: “Ge motho a e-⁠hwa, na o tla phela gape? Matšatši ka moka a go hlankela ga-ka ke tla leta, go fihlela go lokollwa ga-ka go ka fihla.” Bala taba e dikologilego temana yeo. O tla bona gore bahu ba leta go “lokollwa” ga bona lebitleng. (Temana 13) Ge ba sa letile, ga ba gona. “Motho yo a hwilego o sepetše ka mo go feletšego; gomme ge motho yo a hwago a hwile, ga a sa le gona.”​—⁠Jobo 14:​10, phetolelo Septuagint ya Bagster.

[Seswantšho go letlakala 21]

Kholofelo ya tsogo e utolla kgahlego ya Modimo e tseneletšego ka rena re le motho ka o tee ka o tee

 [Diswantšho go letlakala 23]

Modimo o tla fediša tlaišego ka moka ya batho