Go Thuša Bahlologadi Ditekong tša Bona

NNGWE ya dikanegelo tše di tsebjago kudu ka bahlologadi ke pego ya ka Beibeleng ya Ruthe le mmatswale’agwe Naomi. Bobedi basadi ba e be e le bahlologadi. Lega go le bjalo, Naomi ga se a lahlegelwa feela ke monna wa gagwe eupša o lahlegetšwe gape le ke barwa ba gagwe ba babedi, bao yo mongwe wa bona e bego e le monna wa Ruthe. Ka ge ba be ba dula setšhabeng sa temo seo se bego se ithekgile kudu ka banna ba sona, boemo bja bona e be e tloga e le bjo bo nyamišago e le ka kgonthe.​—⁠Ruthe 1:​1-5, 20, 21.

Lega go le bjalo, Naomi o bile le mogwera yo mobotse le mohomotši e lego ngwetši ya gagwe Ruthe, yo a ilego a gana go mo tlogela. Ge nako e dutše e tšwela pele, Ruthe o ile a ipontšha ‘a le kaone go Naomi go feta barwa ba šupago’​—⁠e sego feela ka baka la lerato la gagwe le le tseneletšego la go rata Naomi eupša gape ka baka la lerato la gagwe la go rata Modimo. (Ruthe 4:​15, bapiša le NW.) Ge Naomi a be a laela gore Ruthe a boele go lapa la gabo la ba-Moaba le bagwera, Ruthe o ile a araba ka e nngwe ya dipolelo tše di kgomago maikwelo tša potego e sa kwanantšhego tšeo  di kilego tša begwa: “Mo o yaxo, le nna ke ya xôna; mo O dulaxo, le nna ke tlo dula xôna; sethšaba sa xeno ke tlo re ke sa xešo; Modimo wa xaxo e tlo ba Modimo wa-ka; mo o hwaxo, le nna ke tlo hwêla xôna ka bolokwa xôna; Morêna a a ntirê ka mo a rataxo; se se tl’o xo nkaroxanya le wêna ké lehu fêla.”​—⁠Ruthe 1:​16, 17.

Jehofa Modimo o ile a ela hloko boemo bja kgopolo bja Ruthe. O ile a šegofatša lapa le lenyenyane la Naomi le Ruthe, gomme mafelelong Ruthe o ile a nyalwa ke Boase wa mo-Isiraele. Ngwana wa bona, yo a ilego a tla a ba rakgolokhukhu wa Jesu Kriste, o ile a hlokomelwa ke Naomi bjalo ka ge eka e be e le wa gagwe. Histori ye ke mohlala wa kamoo Jehofa a lebelelago bahlologadi bao ba batamelago kgaufsi le yena le go mo holofela, e le ba bohlokwa ka gona. Go tšwela pele, Beibele e re botša gore o tšeela godimo bao ba thušago bahlologadi ka lerato ditekong tša bona. Ka gona, lehono re ka hlokomela bjang bahlologadi bao ba lego gare ga rena?​—⁠Ruthe 4:​13, 16-22; Psalme 68:⁠5.

Nea Thušo e Lebanyago Eupša e Sego ka Mokgwa wa go Laola

Ge o thuša mohlologadi, go kaone go ba yo a kwagalago le yo a lebanyago eupša e sego yo a laolago. Phema dipolelo tše sa kwagalego tše bjalo ka, “O mpotše ge e ba o nyaka selo se itšego.” Seo se ka swana le go bolela gore, ‘Sepela o yo apara gomme o khore’ mothong yo a swerwego ke phefo e bile a swerwe ke tlala gomme wa se dire selo bakeng sa go mo thuša. (Jakobo 2:​16) Batho ba bantši ga ba kgopele thušo ge ba hloka selo se itšego; go e na le moo ba tla fo tlaišega ka setu. Bakeng sa go thuša batho ba bjalo go nyakega temogo, e lego go lemoga dinyakwa tša bona. Ka lehlakoreng le lengwe, go leka go thuša ka mo go feletšego​—⁠ge e le gabotse e le go laola bophelo bja mohlologadi​—⁠go ka feleletša ka maikwelo a kwešitšwego bohloko goba ka phapano. Lega go le bjalo, Beibele e gatelela go nyakega ga go leka-lekana ge re dirišana le ba bangwe. Le ge e re kgothaletša gore re kgahlegele batho ba bangwe ka tsela e se nago boithati, e re gopotša gore re se ke ra ba ba go itšhunya-tšhunya ditabeng tša ba bangwe.​—⁠Ba-Filipi 2:⁠4; 1 Petro 4:​15, bapiša le NW.

Ruthe o ile a bontšha boemo bja kgopolo bjo bjalo bjo bo leka-lekanego ka Naomi. Ge a be a kgomaretše mmatswale’agwe ka potego e sa kwanantšhego, Ruthe ga se a ka a mo gatelela goba go mo laola. O ile a gata megato ya pele e kwagalago, e bjalo ka go hwetša dijo bakeng sa gagwe le Naomi, eupša gape o ile a ba a latela le ditaelo tša Naomi.​—⁠Ruthe 2:​2, 22, 23; 3:​1-⁠6.

Ee, seo se nyakegago se ka fapana go ya ka batho. Sandra yo go boletšwego ka yena pejana, o re: “Ke be ke e-⁠na le seo ke bego ke se nyaka manyaming a-⁠ka​—⁠bagwera ba rategago le bao ba nago le lerato kudu bao ba ilego ba mphara-fara.” Ka lehlakoreng le lengwe, Elaine yo go boletšwego ka yena pejana o be a nyaka go ba noši. Ka gona, go ba yo a thušago go bolela go ba le temogo le go ba le teka-tekano magareng ga go hlompha go nyaka go ba noši ga motho yo mongwe le go ba yo a hwetšagalago bakeng sa go thuša ge go nyakega.

Thušo go tšwa ka Lapeng

Lapa le borutho le le lerato, ge e ba le le gona, le ka dira mo gontši go kgonthišetša mohlologadi gore o tla kgona go lebeletšana ka katlego le bohlologadi bja gagwe. Gaešita le ge ditho tše dingwe tša lapa di ka kgona go nea thušo e ntši go feta tše dingwe, ka moka di ka ba le karolo. “Ge e ba mohlologadi le ge e le ofe a e-⁠na le bana goba ditlogolo, sa pele anke ba ithute go diriša boineelo go Modimo ka lapeng la gabo bona le go tšwela pele ba lefa pušetšo e swanetšego go batswadi ba bona, ka gobane se ke se amogelegago mahlong a Modimo.”​—⁠1 Timotheo 5:⁠4, NW.

Mabakeng a mantši, thekgo ya tša ditšhelete goba “pušetšo” e ka no se nyakege. Bahlologadi ba bangwe ba na le tšhelete e lekanego go hlokomela dinyakwa tša bona, gomme ba bangwe ba  swanelegela go ka hwetša tšhelete ya mmušo ya mogolo yeo e hwetšagalago dinageng tše dingwe. Eupša moo bahlologadi ba nyakago thušo, ditho tša lapa di swanetše go thuša. Ge e ba mohlologadi a se na metswalo ya kgaufsi yeo e ka mo thušago goba metswalo e bjalo e sa kgone go thuša, Mangwalo a kgothaletša badumedi-gotee gore ba mo thuše: “Borapedi byo Modimo Tata-wešo a bônaxo bò se na thšila le senyalô, ké xo hlôla dišuana le bahlôlôxadi mahlokong a bôná, le xo itôta xore lefase le se xo thšilafatšê.”​—⁠Jakobo 1:⁠27.

Bao ba dirišago melao ye ya motheo ya Beibele ba ‘godiša bahlologadi’ e le ka kgonthe. (1 Timotheo 5:⁠3) Ge e le gabotse go godiša motho go bolela go bontšha tlhompho go motho yoo. Batho bao ba hlompšhago ba ikwa ba e-⁠na le mohola, ba ratwa e bile ba e-⁠na le seriti. Ga ba ikwe gore ba bangwe ba thuša feela ka baka la gore ba tlamega. Gaešita le ge Ruthe ka noši e be e le mohlologadi ka lebakanyana, o ile a hlompha Naomi e le ka kgonthe ka gore ka go ikemišetša le ka lerato a kgonthišetše gore dinyakwa tša Naomi tša mmele le tša maikwelo di a hlokomelwa. Ge e le gabotse, boemo bja kgopolo bja Ruthe go se go ye kae bo ile bja mo nea botumo bjo bobotse, moo e lego gore yo e bego e tla ba monna wa gagwe o itše go yena: “Motho yo mongwe le yo mongwe motseng wa batho ba gešo o tseba gore o mosadi-sadi.” (Ruthe 3:​11, mongwalo wa ka tlase wa NW) Ka nako e swanago, lerato la Naomi la go rata Modimo, mokgwa wa gagwe wa go se nyake dilo ka šiši le go leboga ka mo go tseneletšego maiteko ao Ruthe a bego a a dira ka baka la gagwe, ka ntle le pelaelo di ile tša dira gore Ruthe a ikwe a thabela go mo thuša. Naomi ke mohlala o mobotse gakaakang go bahlologadi ba lehono!

Batamela Modimo

Ke therešo gore ditho tša lapa le bagwera ba ka se ke ba thiba sekgoba seo se tlogetšwego ke lehu la molekane. Ka lebaka leo go bohlokwa gore yo a hwetšwego a batamele kgaufsi kudu-kudu go “Radikxauxêlô, Modimo wa khomotšô yohle, E a re homotšaxo mahlokong a rena ohle.” (2 Ba-Korinthe 1:​3, 4) Ela hloko mohlala wa Anna, mohlologadi yo a ineetšego yo a bego a e-⁠na le nywaga e 84 ka nako ya ge Jesu a belegwa.

Ge monna wa Anna a be a e-⁠hwa ka morago ga nywaga e šupago ba nyalane, o ile a retologela go Jehofa bakeng sa khomotšo. “[O be] à sa tloxe Ntlong-kxêthwa, à dirêla Modimo ka xo ikôna le ka xo rapêla Modimo bošexo le mosexare.” (Luka 2:​36, 37) Na Jehofa o ile a arabela boineelong bja Anna bja go ineela go Modimo? Ee! O ile a bontšha lerato la gagwe go yena ka tsela e kgethegilego kudu ka go mo dumelela go bona ngwana yo a bego a tla gola go ba Mophološi wa lefase. Se se ile sa thabiša le go homotša Anna gakaakang! Ka mo go kwagalago, o ile a bona go rereša ga Psalme 37:⁠4: “O thabêlê Morêna, ’me Yêna ó tlo Xo nea tše pelo y’axo e di kxopêlaxo.”

Modimo o Šoma ka Bakriste-gotee le Rena

Elaine o re: “Ka lebaka le letelele ka morago ga lehu la David, ke ile ka ba le sehlabi mmeleng, se se etšago thipa e ntlhaba dikgopong. Ke be ke nagana gore ke go se šilege ga dijo. Ka letšatši le lengwe se ile sa ba šoro moo ke ilego ka nagana gore ke swanetše go yo bona ngaka. Kgaetšedi wa moya yo e bilego e le mogwera yo a nago le temogo o ile a šišinya gore manyami a-⁠ka e ka ba e le ona a se bakago gomme a nkgothaletša gore ke kgopele thušo le khomotšo go Jehofa. Ke ile ka tšea keletšo ya gagwe kapejana gomme ka rapela ka setu go tšwa pelong, ke kgopela Jehofa gore a nthekge manyaming a-⁠ka. Gomme o ile a dira bjalo!” Elaine o ile a thoma go ikwa kaone, gomme kapejana ka morago ga moo sehlabi sa gagwe sa mmeleng se ile sa tloga.

Bagolo ba phuthego ka mo go kgethegilego ba ka nea bogwera ka mokgwa o botho go bahlologadi bao ba nyamilego. Ka go nea thekgo ya ka mehla ya moya le khomotšo ka mokgwa o bohlale le wa temogo, bagolo ba ka ba thuša go dula ba le kgaufsi le Jehofa go sa šetšwe diteko tša bona. Moo go nyakegago, bagolo ba ka thuša ka go rulaganya thušo ya dilo tše di bonagalago. Bagolo ba bjalo bao ba nago le kwelobohloko le temogo ruri e ba “tšhireletšo ge phefo e foka.”​—⁠Jesaya 32:⁠2, PK; Ditiro 6:​1-⁠3.

Khomotšo ya ka mo go sa Felego e Tšwago go Kgoši e Mpsha ya Lefase

Yoo Anna yo a tšofetšego a ilego a thabela go mmona nywageng e dikete tše pedi e fetilego ga bjale ke Kgoši yeo e lego Mesia ya Mmušo wa Modimo wa legodimong. Mmušo wo kgaufsinyane o tla fediša dibaki ka moka tša manyami go akaretša  le lehu. Mabapi le se, Kutollo 21:​3, 4 e re: “Šoo ngwakô wa Modimo mo xare xa batho . . . ’Me Yêna Modimo ó tlo phomola mexôkxô ka moka mahlong a bôná; le lehu le ka se hlwê le e-⁠ba xôna; le xe e le manyami le dillô le bohloko, di ka se hlwê di e-⁠ba xôna; xobane tša pele di fetile.” Na o hlokometše gore temana ye e bolela ka “batho”? Ee, batho ba tla lokollwa lehung le mahlokong ka moka le dillong tšeo le di tlišago.

Eupša go na le ditaba tše dibotse ka mo go oketšegilego! Beibele gape e holofetša tsogo ya bahu. “Xobane xo tla lebaka leo bohle ba lexo mabitleng ba tl’o xo kwa Lentšu la Morwa Modimo ka lôna. Xomme ba tlo tšwa.” (Johane 5:​28, 29) Go fo swana le Latsaro yo Jesu a mo tsošitšego bahung, ba tla tšwa e le batho e sego dibopiwa tša moya. (Johane 11:​43, 44) Bao ka morago ga moo ba ‘dirago dilo tše dibotse’ ba tla tlišwa phethegong ya batho gomme ba thabele ka noši tlhokomelo ya Jehofa ya botate ge a ‘khupurolla seatla sa gagwe, gomme ka moka tše di phelago a di horiša lethabo.’​—⁠Psalme 145:⁠16.

Bao ba lahlegetšwego ke baratiwa lehung gomme ba e-na le tumelo kholofetšong ye e kgonthišeditšwego, ba e hwetša e le mothopo wa khomotšo e kgolo. (1 Ba-Thesalonika 4:​13) Ka gona ge e ba o le mohlologadi, kgonthišetša gore o “se kxaotše xo rapêla” bakeng sa khomotšo le thušo tšeo o di nyakago letšatši le letšatši gore o kgone go rwala dikgateletšo tša gago tše fapa-fapanego. (1 Ba-Thesalonika 5:​17; 1 Petro 5:⁠7) Le gona, iphe nako letšatši le lengwe le le lengwe bakeng sa go bala Lentšu la Modimo e le gore dikgopolo tša Modimo di ka go homotša. Ge e ba o dira dilo tše, o tla iponela ka noši kamoo Jehofa a ka go thušago e le ka kgonthe go hwetša khutšo, go sa šetšwe diteko ka moka le ditlhohlo tšeo o lebeletšanago le tšona o le mohlologadi.

[Ntlhakgolo go letlakala 5]

Go ba yo a thušago go bolela go ba le teka-tekano magareng ga go hlompha go nyaka go ba noši ga motho yo mongwe le go ba yo a hwetšagalago ge go nyakega

[Seswantšho go letlakala 7]

Mohlologadi yo a tšofetšego Anna o ile a šegofatšwa ke Modimo