“Jehofa e Bile yo a Lokilego Kudu go Nna!”

MANTŠIBOENG a kgahlišago kudu ka March 1985, banna le basadi Lefapheng la Bongwadi ntlong-kgolo ya Dihlatse tša Jehofa kua New York, U.S.A., ba ile ba keteka tiragalo e bohlokwa. Ka nako yeo Karl F. Klein o be a hlanketše ka nywaga e 60 bodireding bja nako e tletšego. Ka phišego, Ngwanabo rena Klein o itše: “Jehofa e bile yo a lokilego kudu go nna!” O ile a bolela gore Psalme 37:⁠4 e be e le temana ya gagwe ya Beibele ya mmamoratwa. Ka morago, o ile a thabiša bohle ka go bapala fiolo ya gagwe.

Ka nywaga e 15 e latetšego, Ngwanabo rena Klein o ile a tšwela pele go šoma e le setho sa bašomi ba lefapha la bongwaledi le go hlankela Sehlopheng se Bušago sa Dihlatse tša Jehofa. Ke moka ka January 3, 2001, Karl Klein o ile a fetša tsela ya gagwe ya lefaseng ka potego a e-⁠na le nywaga e 95.

Karl o belegetšwe Jeremane. Lapa la gabo le ile la hudugela United States, gomme Karl o ile a golela motseng wa ka ntle ga toropo wa Chicago, Illinois. Ge e be e sa le ba bafsa bobedi Karl le moratho wa gagwe Ted ba ile ba ba le kgahlego e tseneletšego kudu ka Beibele. Karl o ile a kolobetšwa ka 1918, gomme dilo tše di kgahlišago tšeo a di kwelego kopanong ya Barutwana ba Beibele ka 1922 di ile tša hlohleletša ka go yena lerato la go rata bodiredi bja tšhemo bophelong bja gagwe ka moka. O be a sa nyake gore beke e fele a se a ba le karolo modirong wa boboledi, o ile a dira bjalo gaešita le dibekeng tša mafelelo tša bophelo bja gagwe.

Karl e bile setho sa bašomi ba ntlong-kgolo ka 1925, a šoma la mathomo lefelong la kgatišo. O be a rata mmino e le ka kgonthe, gomme o ile a bapala fiolo ka nywaga e mentši sehlopheng sa dibapadi tša mmino wa diletšo seo se bego se bapala dikgašong tša Bokriste radiong. Ka morago ga moo, o ile a šoma Lefapheng la Tirelo, a thabela ka mo go kgethegilego tswalano ya gagwe le molebeledi wa lona T. J. Sullivan. Go sa dutše go le bjalo, Ted o ile a nyala gomme yena gotee le mosadi wa gagwe Doris ba ile ba tsenela tirelo ya boromiwa kua Puerto Rico.

Karl Klein o ile a šoma Lefapheng la Tirelo ka lebaka la seripa-gare sa ngwaga-kgolo moo a ilego a kgatha tema e kgolo ka baka la gore a be a rata go dira dinyakišišo gomme a be a e-⁠na le tsebo e tseneletšego ya Beibele. Ka 1963, Karl o ile a nyala Margareta, moromiwa wa Mojeremane yo a bego a hlankela Bolivia. Ka thekgo ya gagwe e lerato, kudu-kudu ge a be a lebeletšane le mathata a maphelo, o be a kgona go ba le tšweletšo gaešita le ge e be e le kgale a fetile nywaga yeo ba bantši ba rolago modiro ka yona. Go bolela ka go lebanya ga Karl, go kopane le phišego ya go ba sebapadi sa mmino, di ile tša tlaleletša dipolelong tše di sa lebalegego diphuthegong le dikopanong. Pejana ga lehu la gagwe o ile a swara poledišano ya temana ya mesong bakeng sa lapa le legolo la Bethele ya New York, yeo e ilego ya thabiša le go hola bohle.

Babadi ba bantši ba ka mehla ba Morokami ba tla gopola phihlelo ya Ngwanabo rena Klein, pego e ipiletšago ya diphihlelo tša gagwe tšeo di gatišitšwego ka tokollong ya October 1, 1984. O tla thabela go bala goba go bala gape pego yeo, o gopola gore mongwadi wa yona o ile a fetša gape ngwaga-some le seripa e le Mokriste yo a botegago le yo a ineetšego.

Bjalo ka yo mongwe wa batlotšwa ba Morena, Ngwanabo rena Klein o be a kganyoga ka pelo ya gagwe ka moka go buša le Kriste legodimong. Re na le mabaka ka moka a go dumela gore Jehofa ga bjale o phethagaditše kganyogo yeo.​—⁠Luka 22:​28-⁠30.

[Seswantšho go letlakala 31]

Karl ka 1943 a e-⁠na le T. J. Sullivan, Ted le Doris

[Seswantšho go letlakala 31]

Karl le Margareta, October 2000