Kamoo Bohlologadi bo Kgomilego Basadi ba Babedi ka Gona

SANDRA ke mohlologadi yo a dulago Australia. Ge monna wa gagwe a be a e-⁠hwa nywageng e sego kae e fetilego, karabelo ya Sandra ya kapejana e bile ya go tšhoga ka mo go feletšego. “Go lemoga gore ke lahlegetšwe ke molekane le mogwera wa potego ka mo go sa letelwago go ile gwa nkimela. Ke tloga ke sa kgone go gopola gore ke kgonne bjang go fihla gae ge ke e-⁠tšwa sepetlele goba gore ke ile ka dira eng letšatšing leo ka moka. Dibekeng tše di latetšego tše mmalwa, dipoifo tša-ka di ile tša fetoga sehlabi sa mmeleng se se sa felego.”

Sandra o na le mogwera yo a godilego, Elaine, yo e bilego mohlologadi ka nywaga e tshelelago. Elaine o ile a hlokomela monna wa gagwe David ka dikgwedi tše tshela pele ga lehu la gagwe a bolawa ke kankere. Manyami a gagwe e be e le a tseneletšego moo e lego gore kapejana ka morago ga lehu la monna wa gagwe, o ile a foufala ka lebakanyana. Nywaga e mebedi ka morago o ile a idibala a le gare ga batho. Ngaka ya gagwe ga se ya hwetša a e-⁠na le leswao la bolwetši bja mmeleng. Lega go le bjalo, o ile a lemoga gore Elaine o be a dutše a tswaleletše manyami a gagwe ka gare, ka gona o ile a mo kgothaletša gore a ye gae gomme a leke ka thata go lla. Elaine o dumela ka gore: “Go tšere nako e telele gore ke lebeletšane le manyami a-⁠ka,” gomme o oketša ka gore ge a be a lewa ke bodutu, “ke be ke bile ke tlwaetše go tsena ka phapošing ya go robala gomme ke ikhurumetša hlogo ka diaparo tša David.”

Ee, lehu la molekane yo a rategago le ka baka dikarabelo tše di fapa-fapanego, ka gobane go ba mohlologadi ka kgonthe go akaretša mo gontši go feta go fo dula ka ntle le molekane. Ka mohlala, Sandra o ile a tšea nako e itšego a ikwa eka ga e sa le yena. Go etša bahlologadi ba bangwe ba bantši bao ba sa tšwago go hwelwa, le yena o ile a ikwa a hlaselega gabonolo e bile a se a šireletšega. Sandra o gopola gore: “Ka ge ke be ke tlwaetše monna wa-ka e le yena a dirago diphetho tša mafelelo, ka mo go sa letelwago ke ge ke šetše ke nnoši bakeng sa go dira diphetho tšeo. Ke be ke hlorega boroko. Ke be ke lapile e bile ke fedile. Go be go le thata go tseba feela seo nka se dirago.”

Letšatšing le lengwe le le lengwe go ba le dikanegelo tše bjalo ka ya Sandra le ya Elaine lefaseng ka bophara. Bolwetši, dikotsi, dintwa, dipolao tša molokwana-rite le bošoro ka kakaretšo di tlaleletša palong e oketšegago ya bahlologadi.* Ba bantši ba basadi ba ba tlaišega ka setu, e le ge ba sa tsebe seo ba ka se dirago. Ke eng seo bagwera le metswalo ba ka se dirago go thuša bao ba itumelelanyago le maemo a bohlologadi? Sehlogo se se latelago se na le ditšhišinyo tše dingwe tšeo e ka bago tše di thušago.

[Mongwalo wa ka tlase]

Basadi ba bangwe ba boemong bjo bo swanago le bja bahlologadi ka gobane banna ba bona ba ba tlogetše. Gaešita le ge karogano le tlhalo di baka mathata a mohuta wa tšona, bontši bja melao ya motheo yeo e ahla-ahlwago sehlogong se se latelago e ka thuša gape le basadi ba ba lego maemong ao.