Bagoeledi Ba Mmušo Ba A Bega

Kgobošo e Tlošwa Leineng la Modimo

LENTŠU la Modimo, Beibele, le re: “Tsela ye Le tšeaxo ka yôna Lè le xare xa ba-ntlê, a e bê e botse, xore xe ba Le phara ba re Le disenyi, e tlê e re xe ba lebeleša, ba bônê medirô e botse ya lena ’me ba rêtê Modimo, è le letšatši le a ba etetšexo ka lôna.” (1 Petro 2:​12) Ka gona, Bakriste ba therešo ba katanela go boloka boitshwaro bjo bobotse bakeng sa go phema go tliša kgobošo leineng la Jehofa.

Tikologong e lego lekatana ya Zambia yeo e bitšwago Senanga, morutiši wa sekolo o ile a utswetšwa radio ka ntlong ya gagwe. Ka ge Dihlatse tša Jehofa di be di bolela tikologong yeo, monna o ile a di latofatša ka bohodu. O ile a bega molato maphodiseng, a bolela gore Dihlatse di utswitše radio ya gagwe. E le go hlatsela gore Dihlatse di be di le ntlong ya gagwe, o ile a ntšha pampišana yeo a e hweditšego lebatong. Lega go le bjalo, maphodisa a ile a se ke a mo kgolwa. Ba ile ba mo eletša gore a dire dinyakišišo tše dingwe tše di tseneletšego.

Dihlatse tšeo di bego di šoma tikologong ya morutiši letšatšing leo di ile tša kgothaletšwa ke sehlopha sa bagolo gore di yo boledišana le morutiši ka taba yeo. Ba bangwe ba banababo rena ba ile ba ya gomme ba boledišana le yena, ba hlalosa gore ba be ba nyaka go tloša kgobošo leineng la Jehofa. Nakong ya poledišano ya bona, ba ile ba mmotša gore ba hweditše lesogana ka ntlong ya gagwe gomme ba le nea pampišana. Ka mokgwa wo ba le hlalositšego ka gona, morutiši o ile a tseba lesogana leo. Ge e le gabotse ba be ba tsena kereke e tee. Morutiši o ile a boledišana le lesogana, eupša le ile la gana ditatofatšo. Ke moka morutiši o ile a boledišana le batswadi ba lesogana ka taba ye gomme a boela gae. Pele iri e fela, mmago lesogana o ile a buša radio yeo e bego e utswitšwe.

A tutueditšwe ke go nyama mo gogolo, morutiši o ile a ya go sehlopha sa bagolo gomme a kgopela tshwarelo ka go dira ditatofatšo tša maaka. Bagolo ba ile ba mo swarela eupša ba kgopela gore mafelelo a dinyakišišo a tsebatšwe phatlalatša e le gore yo mongwe le yo mongwe a tsebe gore Dihlatse di be di se na molato. Tsebišo e ile ya dirwa sekolong, ka go rialo gwa tlošwa kgobošo leineng la Jehofa. Dihlatse tša Jehofa di ka tšwela pele di bolela ka bolokologi tikologong.

[Mebapa/Seswantšho go letlakala 19]

(Bakeng sa mongwalo o beakantšwego ka mokgwa wa kgatišo, bona kgatišo ka boyona)

AFRIKA

Zambia

[Mothopo]

Mountain High Maps® Copyright © 1997 Digital Wisdom, Inc.