Kgomarela Lethabo la Gago Tirelong ya Jehofa

“Thabang Moreneng ka mehla! Ke boêla ke re: Thabang!”​—BA-FILIPI 4:⁠4.

1, 2. Ngwanabo rena yo mongwe le lapa la gagwe ba ile ba kgona bjang go boloka lethabo la bona go sa šetšwe go lahlegelwa ke selo se sengwe le se sengwe seo ba bego ba e-na le sona?

JAMES, Mokriste wa nywaga e 70 yo a dulago Sierra Leone, o be a šomile ka thata bophelong bja gagwe ka moka. Akanya ka lethabo la gagwe ge mafelelong a ile a boloka tšhelete e lekanego bakeng sa go reka ntlo ya diphapoši tše nne e bogegago! Lega go le bjalo, ka morago ga nakwana James le lapa la gagwe ba hudugetše ka ntlong, go ile gwa tsoga ntwa ya bana ba thari nageng gomme ntlo ya bona e ile ya fišwa lore-lore. Ba ile ba lahlegelwa ke ntlo ya bona, eupša ga se ba ka ba lahlegelwa ke lethabo la bona. Ke ka baka la’ng go se gwa ba bjalo?

² James le lapa la gagwe ba ile ba boloka menagano ya bona e tsepamišitšwe go seo se bego se sa ba šaletše e sego go seo se ba lahlegetšego. James o hlalosa gore: “Gaešita le nakong ya letšhogo, re be re swara diboka, re bala Beibele, re rapela gotee e bile re abelana se senyenyane seo re nago le sona le ba bangwe. Re kgonne go boloka lethabo la rena ka gobane re ile ra lebiša tlhokomelo tswalanong e botse yeo re  nago le yona le Jehofa.” Ka go lebiša tlhokomelo ditšhegofatšong tša bona, tšeo e kgolo go di feta tšohle e lego go ba le tswalano ya kgaufsi ya motho ka noši le Jehofa, Bakriste ba ba botegago ba ile ba kgona go ‘tšwela pele ba thabile.’ (2 Ba-Korinthe 13:​11, NW) Ee, go be go se bonolo go kgotlelela maemo a bona a nyamišago. Eupša ga se ba ka ba kgaotša go thabela Jehofa.

3. Bakriste ba bangwe ba pele ba ile ba boloka bjang lethabo la bona?

³ Bakriste ba pele ba ile ba lebeletšana le diteko tše di swanago le tšeo James le lapa la gagwe ba ilego ba lebeletšana le tšona. Lega go le bjalo, moapostola Paulo o ile a ngwalela Bakriste ba ba-Hebere mantšu a: “Xe ba Le hlakola dilô tša lena, la kxôtlêlêla Lè thabile.” Ke moka Paulo o ile a hlalosa mothopo wa lethabo la bona a re: “Lè tseba xobane . . . Le ithuetše lehumô le le fetaxo dilô tšeo, lehumô le le dulaxo lè le xôna.” (Ba-Hebere 10:​34, mongwalo o sekamego ke wa rena.) Ee, Bakriste bao ba lekgolong la pele la nywaga ba be ba e-na le kholofelo e matla. Ka kgodišego ba ile ba lebelela pele go amogela selo seo se bego se ka se ke sa senywa​—“mphapahlôxô wa bophelô” wo o ka se kego wa senyega Mmušong wa Modimo wa legodimong. (Kutollo 2:​10) Lehono, kholofelo ya rena ya Bokriste​—e ka ba e le ya legodimong goba ya lefaseng​—e ka re thuša go boloka lethabo la rena gaešita le ge re lebana le mathata.

“Thabang Kholofelong”

4, 5. (a) Ke ka baka la’ng keletšo ya Paulo ya go ‘thaba kholofelong’ e be e le nakong kudu bakeng sa ba-Roma? (b) Ke eng seo se ka dirago Mokriste gore a lahlegelwe ke pono ya kholofelo ya gagwe?

⁴ Moapostola Paulo o ile a kgothaletša badumedi-gotee kua Roma gore ba ‘thabe kholofelong’ ya bophelo bjo bo sa felego. (Ba-Roma 12:​12) Yeo e be e le keletšo e lego nakong bakeng sa ba-Roma. Lebaka la ka tlase ga nywaga e lesome ka morago ga ge Paulo a ba ngwaletše, ba ile ba ba ka tlase ga tlaišego e šoro gomme ba bangwe ba ile ba tlaišwa go fihla lehung ka taelo ya Mmušiši Nero. Tumelo ya bona ya gore Modimo o tla ba nea mphapahlogo o holofeditšwego wa bophelo ka ntle le pelaelo e ile ya ba thekga tlaišegong ya bona. Go thwe’ng ka rena lehono?

⁵ Bjalo ka Bakriste le rena re letetše go tlaišwa. (2 Timotheo 3:​12) Go oketša moo, re lemoga gore “nako le ditiragalo tše di sa letelwago” di re wela ka moka ga rena. (Mmoledi 9:​11, NW) Kotsi e ka tšea bophelo bja moratiwa wa rena. Bolwetši bjo kotsi bo ka bolaya motswadi goba mogwera wa kgaufsi. Ka ntle le ge re ka dula ka mehla re lebišitše tlhokomelo e feletšego kholofelong ya Mmušo, re ka ba kotsing ya go gobatšwa moyeng ge diteko tše bjalo di tšwelela. Ka baka leo, re dira gabotse go ipotšiša gore, ‘Na ke “thaba kholofelong”? Ke gakae ke iphago nako bakeng sa go naganišiša ka yona? Na Paradeise e tlago ke ya kgonthe go nna? Na ke ipona ke le moo? Na ke fagahlela gore bofelo bja tshepedišo ya gona bjale ya dilo bo tle go swana le kamoo ke bego ke bo fagahlela ka gona ge ke be ke thoma go ithuta therešo?’ Potšišo ye ya mafelelo e nyaka go naganišišwa ka mo go tseneletšego. Ka baka la’ng? Ka gobane rena batho ge re phetše gabotse, re e-na le tšhelete e ntši kudu, e bile re phela karolong ya lefase yeo ka tsela e itšego e sa kgongwego ke ntwa, go hlaelela ga dijo goba dikotsi tša tlhago, re ka lahlegelwa​—bonyenyane ka nakwana​—ke pono ya go nyakega mo go tšwelago pele ga gore lefase le lefsa la Modimo le tle.

6. (a) Ge Paulo le Silase ba be ba tlaišwa, ba ile ba tsepamiša dikgopolo tša bona go eng? (b) Mohlala wa Paulo le Silase o ka re kgothatša bjang lehono?

⁶ Paulo ka mo go tšwelago pele o ile a eletša ba-Roma go ‘kgotlelela tlaišegong.’ (Ba-Roma 12:​12) Paulo o be a tlwaelane le tlaišego. Ka nako e nngwe, o ile a bona ponong monna yo a ilego a mo laletša go “selêla Matsedonia” go yo thuša batho moo go ithuta ka Jehofa. (Ditiro 16:9) Ka nako yeo Paulo gotee le Luka, Silase le Timotheo ba ile ba ya Yuropa. Ke eng seo se bego se letetše baromiwa bao ba mafolofolo? Tlaišego! Ka morago ga ge ba dirile boboledi kua Matsedonia motseng wa Filipi, Paulo le Silase ba ile ba bethwa ka sefepi gomme ba lahlelwa kgolegong. Go molaleng gore badudi ba bangwe ba Filipi e be e se feela ba ba sa thabelego molaetša wa Mmušo​—ba be ba ganetša o šoro. Na phetogo ye ya ditiragalo e ile ya dira gore baromiwa ba mafolofolo ba lahlegelwe ke lethabo la bona? Aowa. Ka morago ga ge ba bethilwe e bile ba lahletšwe kgolegong, “è le mašexo-xare Paulo le Silase ba rapêla, ba ôpêlêla Modimo difela.” (Ditiro 16:​25, 26, mongwalo o sekamego ke wa rena.) Ee, bohloko bja go bethwa  ga se bja thabiša Paulo le Silase, eupša seo ga se seo baromiwa ba babedi ba bego ba lebišitše tlhokomelo go sona. Dikgopolo tša bona di be di lebišitšwe go Jehofa gotee le ditseleng tšeo a bego a ba šegofatša ka tšona. Ka go ‘kgotlelela tlaišegong’ ka lethabo, Paulo le Silase e bile mehlala e mebotse bakeng sa banababo bona kua Filipi le mafelong a mangwe.

7. Ke ka baka la’ng dithapelo tša rena di swanetše go akaretša ditebogo?

⁷ Paulo o ngwadile gore: “Tiišang thapêlô.” (Ba-Roma 12:​12) Na o a rapela dinakong tša ge o tshwenyegile? O rapela ka eng? Mohlomongwe o bolela bothata bja gago ka go lebanya gomme wa kgopela thušo ya Jehofa. Eupša o ka akaretša gape le dipolelo tša tebogo bakeng sa ditšhegofatšo tšeo o di thabelago. Ge mathata a tsoga, go lebiša tlhokomelo go lokeng ga Jehofa ditirišanong tša gagwe le rena go re thuša go ‘thaba kholofelong.’ Dafida yoo bophelo bja gagwe bo bego bo tletše mathata o ngwadile gore: “Tše Wêna Morêna Modimo wa rena O re diretšexo tšôna ké tše ntši, ké mehlôlô, ké xo re setša. Mo-ka-Wêna xa’yô. Xe nka re ke a di bolêla, ka di anêxêla batho, di mpalêla xo di bala.” (Psalme 40:5) Ge e ba ka go swana le Dafida re naganišiša ka mehla ka ditšhegofatšo tše re di amogelago go Jehofa, ka kgonthe re tla thaba.

Boloka Moya o Nepagetšego

8. Ke eng seo se thušago Mokriste go dula a thabile ge a tlaišwa?

⁸ Jesu o kgothaletša balatedi ba gagwe go boloka moya o nepagetšego ge ba lebana le diteko tše fapa-fapanego. O re: “Ba lehlôxônôlô ké bô-lena, xe ba Le roxa, ba Le tlaiša, ba Le phara ka bobe ka moka ka maaká ka ’baka la-ka.” (Mateo 5:​11) Re na le lebaka lefe la go thaba ka tlase ga maemo a bjalo? Bokgoni bja rena bja go kgona go lebeletšana le kganetšo ke bohlatse bja gore moya wa Jehofa o na le rena. Moapostola Petro o boditše Bakriste-gotee le yena ba mehleng ya gagwe gore: “Ge le rogwa ka baka la leina la Kriste, gona le lešego, gobane moya wa letago le wa Modimo o dutše go lena.” (1 Petro 4:​13, 14, PK) Jehofa o tla re thuša gape ka moya wa gagwe gore re kgotlelele, gomme ka go rialo ra kgomarela lethabo la rena.

9. Ke eng seo se thušitšego banababo rena ba bangwe go hwetša mabaka a go thaba ge ba be ba golegetšwe tumelo ya bona?

⁹ Gaešita le ge re le maemong a šoro kudu, re ka hwetša mabaka a go thaba. Mokriste yo a bitšwago Adolf o ile a hwetša go le bjalo. O dula nageng yeo modiro wa Dihlatse tša Jehofa o bego o thibetšwe ka nywaga e mentši. Adolf gotee le bagwera ba gagwe ba mmalwa ba ile ba golegwa gomme ba ahlolelwa go dula nako e telele kgolegong ka gobane ba be ba ganne go latola ditumelo tša bona tše di theilwego Beibeleng. Bophelo bja kgolegong bo be bo le thata, eupša ka go  etša Paulo le Silase, Adolf le bagwera ba gagwe ba ile ba hwetša mabaka a go leboga Modimo. Ba lemogile gore phihlelo ya bona ya kgolegong e ba thušitše go matlafatša tumelo ya bona le go tšweletša dika tše bohlokwa tša Bokriste tše bjalo ka go fa kudu, kwelobohloko le go kgomega ka banababo bona. Ka mohlala, ge mogolegwa a be a amogetše sephuthelwana se se tšwago gae, o be a abelana dikagare tša sona le badumedi-gotee bao ba bego ba lebelela ditokišetšo tše tše oketšegilego e le tše di tšwago go Jehofa, Monei yo mogolo wa “ ’neô tšohle tše botse, le ’mphô tšôhle di tletšexo.” Ditiro tše bjalo tša botho di thabiša bobedi modiri le bao ba di amogelago. Ka gona, phihlelo ye e bego e reretšwe go fediša tumelo ya bona e ba matlafaditše moyeng!​—Jakobo 1:​17; Ditiro 20:35.

10, 11. Kgaetšedi yo mongwe o ile a swaragana bjang le go botšološišwa mo go sa kgaotšego mo go ilego gwa latelwa ke lebaka le letelele la go dula kgolegong?

¹⁰ Ella, yo le yena a dulago nageng yeo modiro wa Mmušo o bego o thibetšwe ka lebaka le letelele o ile a golegelwa go abelana le ba bangwe kholofelo ya gagwe ya Bokriste. Ka dikgwedi tše seswai, o be a botšološišwa ka go se kgaotše. Ge mafelelong a be a sekišwa, o ile a ahlolelwa go dula nywaga e lesome kgolegong yeo go yona go bego go se na barapedi ba bangwe ba Jehofa. Ella o be a e-na le nywaga e 24 feela ka nako yeo.

¹¹ Ee, Ella ga se a ka a fagahlela go fetša bogolo bja nywaga ya gagwe e le mofsa yo a tsenago bogolong a le ka seleng ya kgolego. Eupša ka ge a be a ka se kgone go fetoša boemo bja gagwe, o ile a kgetha go fetoša boemo bja gagwe bja kgopolo. Ka gona, o ile a thoma go lebelela kgolego e le tšhemo ya gagwe yeo a ka neago bohlatse go yona. O re: “Go be go e-na le modiro o montši wa boboledi o swanetšego go dirwa moo e lego gore nywaga e ile ya feta ka lebelo kudu.” Ka morago ga nywaga ya ka godimo ga e mehlano, Ella o ile a botšološišwa gape. Ka go lemoga gore ditshipi tša kgolego ga se tša fediša tumelo ya gagwe, babotšološiši ba gagwe ba ile ba mmotša gore: “Re ka se ke ra go lokolla; ga se wa fetoga.” Ella o ile a araba ka mo go tiilego gore: “Eupša ke fetogile! Ke na le boemo bja kgopolo bjo bokaone ga bjale go feta ge ke be e e-ya kgolegong la mathomo, gomme tumelo ya-ka e tiile kudu go feta pele!” Gomme o okeditše ka gore: “Ge e ba le sa nyake go ntokolla, ke tla dula go fihla Jehofa a bona go swanetše go ka ntokolla.” Nywaga e mehlano le seripa ya go ba kgolegong ga se ya amoga Ella lethabo la gagwe! O ile a ithuta go kgotsofalela maemo le ge e le afe ao a bego a ka ikhwetša a le go ona. Na o ka ithuta selo se itšego mohlaleng wa gagwe?​—Ba-Hebere 13:5.

12. Ke eng seo se ka tlišetšago Mokriste khutšo ya monagano maemong a thata?

¹² O se ke wa phetha ka gore Ella o na le mpho e sa tlwaelegago yeo e dirago gore a kgone go lebeletšana le ditlhohlo tše bjalo. Ge a be a bolela ka nako ya go botšološišwa yeo a ilego a lebeletšana le yona dikgweding tša pele ga ge a ka hwetša kahlolo ya gagwe, Ella o dumela ka gore: “Ke gopola meno a-ka a bethana, gomme ke ile ka ikwa ke swana le nonyana e nyenyane e tšhogilego.” Lega go le bjalo, Ella o na le tumelo e tiilego go Jehofa. O ithutile go mmota. (Diema 3:​5-7) Ka baka la se, Modimo ke wa kgonthe kudu go yena go feta pele. O hlalosa gore: “Nako le nako ge ke be ke tsena ka phapošing ya go botšološišwa, ke be ke ikwa ke aparelwa ke khutšo. . . . Ge boemo bo be bo fetoga bjo bo boifišago kudu, ke moo khutšo e bego e e-ba e tseneletšego kudu.” Jehofa e be e le mothopo wa khutšo yeo. Moapostola Paulo o hlalosa gore: “A Le se kê la belaêla selô. Mo xo kaxo ba le tše Le di nyakaxo, Le di tlišê pele xa Modimo ka kxopêlô le ka thapêlô e naxo le teboxô. Xomme khutšô ya Modimo, ye e fetaxo thlaoloxanyô yohle, a e bolokê dipelo tša lena le ’kxopolô tša lena xo Kriste Jesu.”​—Ba-Filipi 4:​6, 7.

13. Ke eng seo se re kgonthišetšago gore ge re welwa ke tlaišo, re tla ba le matla a go kgotlelela?

¹³ Ella, ga e sa le a lokollwa o bolokile lethabo la gagwe go sa šetšwe mathata. O dirile se e sego ka matla a gagwe, eupša ka matla ao Jehofa a mo neilego ona. Go be go le bjalo le ka moapostola Paulo yo a ngwadilego gore: “Ké xôna ke rexo xo kaone xe nka kxahlwa ke xo kxanthša diphôkôlô tša-ka, xore matla a Kriste a axê mo xo nna. . . . Xobane xe ke fôkôla ké mo ke naxo le matla.”​—2 Ba-Korinthe 12:​9, 10.

14. Bontšha kamoo Mokriste a ka lebelelago maemo a lekago ka pono e nepagetšego le gore mafelelo e ka ba afe.

¹⁴ Dikgateletšo tšeo o lebeletšanago le tšona lehono e ka ba tše fapanego ka tsela e itšego le tšeo re sa tšwago go di ahla-ahla mo. Lega go le bjalo,  go sa šetšwe gore ke dikgateletšo tša mohuta ofe, go thata go di kgotlelela. Ka mohlala, mothwadi wa gago e ka ba yo a swayago mošomo wa gago diphošo kudu​—go feta kudu kamoo a swayago mošomo wa bašomedi bao e lego ba ditumelo tša madumedi a mangwe. Go ka no se kgonege gore o nyake mošomo o mongwe. O ka boloka bjang lethabo la gago? Gopola Adolf le bagwera ba gagwe, bao phihlelo ya go ba kgolegong e ba rutilego go tšweletša dika tše bohlokwa. Ge e ba o dira boiteko bjo bo tšwago pelong bja go kgotsofatša mothwadi wa gago​—gaešita le yo go lego ‘thata go mo kgahliša’​—o tla hlagolela dika tša Bokriste tše bjalo ka kgotlelelo le go se fele pelo. (1 Petro 2:​18, NW) Go oketša moo, o ka ba mošomi yo a tšeelwago godimo kudu, e lego seo se ka oketšago dibaka tša gago tša go hwetša mošomo o kgotsofatšago ka letšatši le lengwe. Ga bjale anke re ahla-ahleng ditsela tše dingwe tšeo ka tšona re ka bolokago lethabo la rena tirelong ya Jehofa.

Go Nolofatša Dilo go Lebiša Lethabong

15-17. Banyalani ba bangwe ba ile ba ithuta gore ke eng seo se bego se ka ba imolla kgateletšegong gaešita le ge mothopo wa yona o be o ka se ke wa tlošwa ka mo go feletšego?

¹⁵ O ka fo ba o se na boikgethelo ka mohuta wa mošomo wo o o šomago goba ka lefelo leo o šomago go lona, eupša go ka ba go e-na le dikarolo tše dingwe tša bophelo bja gago tšeo go tšona o ka bontšhago boitshwaro. Ela hloko phihlelo e latelago.

¹⁶ Banyalani ba Bakriste ba ile ba laletša mogolo dijong legaeng la bona. Mantšiboeng ao, ngwanabo rena le mosadi wa gagwe ba ile ba tšholla sa mafahleng ka go bolela gore morago bjale ba be ba ikwa ba imelwa ke dikgateletšo tša bophelo. Gaešita le ge bobedi ba e-na le mešomo e ba nyakago mo gontši, ba be ba sa ikemišetša go tsoma mošomo o mongwe. Ba be ba ipotšiša gore ba tla kgona go lebeletšana le boemo ka lebaka le lekaakang.

 ¹⁷ Ge a be a kgopelwa keletšo, mogolo o ile a araba ka gore, “Nolofatšang dilo.” Bjang? Monna le mosadi wa gagwe ba be ba fetša diiri tše tharo tseleng letšatši le lengwe le le lengwe ge ba e-ya le ge ba boa mošomong. Mogolo yo a bego a tseba banyalani gabotse o ile a šišinya gore ba nagane ka go hudugela kgaufsi le lefelo la bona la mošomo, e le gore ba kgone go fokotša nako yeo ba e fetšago ge ba e-ya le ge ba boa mošomong letšatši le lengwe le le lengwe. Nako e bolokilwego e ka dirišetšwa go phetha merero e mengwe e bohlokwa​—goba go fo khutša. Ge e ba dikgateletšo tša bophelo di go amoga tekanyo e itšego ya lethabo, ke ka baka la’ng o sa hlahlobe boemo bja gago go bona ge e ba o ka hwetša kimologo ka go dira diphetogo tše itšego?

18. Ke ka baka la’ng go le bohlokwa go nagana ka kelohloko pele o dira diphetho?

¹⁸ Tsela e nngwe ya go theoša kgateletšego ke go naganišiša ka kelohloko pele o dira diphetho. Ka mohlala, Mokriste yo mongwe o ile a dira phetho ya go aga ntlo. O ile a kgetha polane e raraganego kudu, gaešita le ge a be a se a ka a aga ntlo pele. Bjale o lemoga gore a ka be a ile a phema mathata a sa nyakegego ge nkabe a ile a “hlatha dikxatô” tša gagwe pele a kgetha polane ya legae la gagwe. (Diema 14:​15) Mokriste yo mongwe o ile a dumela go ba hlatse kadimong ya tšhelete ya modumedi-gotee le yena. Go ya ka tumelelano, ge e ba moadingwa a sa kgone go lefa kadimo, hlatse ya gagwe e tla swanela ke go e lefa. Mathomong ga se gwa ba le bothata, eupša ge nako e tšwela pele moadingwa ga se a phethagatša tumelelano. Moadimiši o ile a thoma go tšhošwa ke seo gomme a nyaka gore hlatse e lefe kadimo ka moka. Se se ile sa bakela hlatse kgateletšo e kgolo kudu. Na se se ka be se ile sa phengwa ge nkabe a be a ile a lebiša tlhokomelo e kgolo kudu mabakeng ka moka pele a ka dumela go rwala boikarabelo bja sekoloto?​—Diema 17:18.

19. Ditsela tše dingwe tšeo ka tšona re ka fokotšago kgateletšego maphelong a rena ke dife?

¹⁹ Ge re ikwa re lapile, anke le ka mohla re se ke ra phetha ka gore re ka fokotša kgateletšego e lego godimo ga rena gomme ra buša lethabo la rena ka go fokotša nako ya thuto ya motho ka noši ya Beibele, ya tirelo ya tšhemo le ya go ba gona dibokeng. Aowa, a re se ke ra dira bjalo ka gobane tše ke ditsela tše bohlokwa tšeo ka tšona re ka amogelago moya o mokgethwa wa Jehofa, woo seenywa sa wona e lego lethabo. (Ba-Galatia 5:​22) Mediro ya Bokriste ke e lapološago ka mehla e bile gantši ga se e lapišago kudu. (Mateo 11:​28-30) Go na le kgonagalo e kgolo kudu ya gore mediro ya rena ya boiphedišo goba ya boitapološo ke e tlaleletšago go lapeng ga rena e sego mediro ya moya. Go ithuta go robala ka nako e swanetšego go ka re thuša gore re lapologe. Go khutša ka mo go oketšegilego go ka re thuša kudu. N. H. Knorr, yo a hlanketšego e le setho sa Sehlopha se Bušago sa Dihlatse tša Jehofa go fihla lehung la gagwe, o be a dula a botša baromiwa gore: “Ge e ba o ikwa o nyama, selo sa mathomo seo o swanetšego go se dira ke gore o khutše. O tla makala kamoo bothata bjo bongwe le bjo bongwe bo bonagalago bo kaonefetše ka gona ka morago ga ge o robetše gabotse bošego!”

20. (a) Akaretša tše dingwe tša ditsela tšeo ka tšona re ka bolokago lethabo la rena. (b) Ke mabaka afe ao o ka naganago ka ona a go thaba? (Bona lepokisi go letlakala 17.)

²⁰ Bakriste ba na le tokelo ya go hlankela “Modimo yo a thabilego.” (1 Timotheo 1:​11, NW) Bjalo ka ge re bone, re ka boloka lethabo la rena gaešita le ge re hlasetšwe ke mathata a šoro. Anke re bolokeng kholofelo ya Mmušo ka pele ga rena, re lokiše boemo bja rena bja kgopolo ge go nyakega gomme re boloke maphelo a rena a le bonolo. Ke moka, boemong le ge e le bofe bjo re ikhwetšago re le go bjona, re tla arabela mantšung a moapostola Paulo a rego: “Thabang Moreneng ka mehla! Ke boêla ke re: Thabang!”​—Ba-Filipi 4:4.

Naganišiša ka mo go Tseneletšego ka Dipotšišo tše:

• Ke ka baka la’ng Bakriste ba swanetše go lebiša tlhokomelo e kgolo kholofelong ya Mmušo?

• Ke eng seo se ka re thušago go boloka lethabo la rena maemong a thata?

• Ke ka baka la’ng re swanetše go leka go nolofatša maphelo a rena?

• Ba bangwe ba nolofaditše maphelo a bona dikarolong dife?

[Dipotšišo tša Thuto]

[Lepokisi/Diswantšho go letlakala 17]

Mabaka a Oketšegilego a go Thaba

Bjalo ka Bakriste, re na le mabaka a mantši a go thaba. Ela hloko a latelago:

1. Re tseba Jehofa.

2. Re ithutile therešo ya Lentšu la Modimo.

3. Re ka lebalelwa dibe ka tumelo ya rena motheong wa sehlabelo sa Jesu.

4. Mmušo wa Modimo o a buša​—lefase le lefsa le tla ba gona kgaufsinyane!

5. Jehofa o re tlišitše paradeiseng ya moya.

6. Re thabela bogwera bjo bo agago bja Bokriste.

7. Re na le tokelo ya go ba le karolo modirong wa boboledi.

8. Re a phela gomme re na le tekanyo e itšego ya matla.

Ke mabaka a makae a mangwe a go thaba ao o ka a bolelago?

[Seswantšho go letlakala 13]

Paulo le Silase ba be ba thabile gaešita le ge ba be ba le kgolegong

[Diswantšho go letlakala 15]

Na pono ya gago e lebišitšwe tebelelong e thabišago ya lefase le lefsa la Modimo?