Na o “Reka Nako e Swanetšego”?

MOAPOSTOLA Paulo o ile a eletša Bakriste ba lekgolong la pele la nywaga kua Efeso ka gore: “Ké xôna phakxamêlang xo swara tsela ka xo itôta; Le se etšê mašilo, Le etšê bahlale. Le thakanêlê sebaka se botse [“reka nako e swanetšego,” NW]; xobane mehla yeno ké e mebe.” (Ba-Efeso 5:​15, 16) Ke ka baka la’ng keletšo ye e be e nyakega? Go araba potšišo yeo go nyaka go ba le tsebo ka maemo ao Bakriste ba bego ba lebeletšane le ona motseng woo wa bogologolo.

Efeso e be e tsebja ka mahumo a yona a magolo, boitshwaro bjo bo gobogilego, bosenyi bjo bontši le mediro e fapa-fapanego ya batemona. Go oketša moo, Bakriste ba moo ba be ba swanetše go ganetšana le ditumelo tša filosofi mabapi le nako. Ba-Gerika bao e bego e se Bakriste kua Efeso ba be ba sa dumele gore nako e sepelela ka lehlakoreng le tee. Filosofi ya Gerika e be e ba rutile gore bophelo bo be bo bušeletšwa ka mediko e sa felego. Motho yo a bego a senya nako ya gagwe modikong o mongwe wa bophelo o be a ka kgona go e hwetša modikong o latelago. Mokgwa wo wa go nagana o ka ba o ile wa tutuetša Bakriste ba ba-Efeso gore ba be le mokgwa wa go se šetše thulaganyo ya Jehofa ya ditiragalo, go akaretša tšhupa-mabaka ya gagwe bakeng sa go phetha kahlolo ya gagwe. Lega go le bjalo, keletšo ya Paulo ya go “reka nako e swanetšego” e be e le e swanetšego.

Paulo o be a sa bolele feela ka nako ka kwešišo ya kakaretšo. Lentšu la Segerika leo a le dirišitšego le bontšha nako e beilwego, nako e swanetšego bakeng sa morero o itšego. Paulo o be a eletša Bakriste ba lekgolong la pele la nywaga gore ba diriše gabotse nako e swanetšego, goba sebaka se sebotse seo ba bego ba se thabela ka nako yeo, pele ga ge se ka fela gomme kgaugelo ya Modimo le go newa phologo di sa hlwe di le gona.​—⁠Ba-Roma 13:​11-13; 1 Ba-Thesalonika 5:​6-⁠11.

Re phela mehleng e swanago ya nako e swanetšego. Go e na le go senya sebaka se se se rategago seo se ka se tsogego se bušeleditšwe le ka mohla ka go phegelela maipshino a nakwana ao a newago ke lefase, Bakriste ba dira ka bohlale ge e ba ba diriša nako ye ba nago le yona bakeng sa go dira “mediro ya boineelo go Modimo” gomme ka go rialo ba matlafatša tswalano ya bona le Mmopi, Jehofa Modimo.​—⁠2 Petro 3:​11, NW; Psalme 73:​28; Ba-Filipi 1:⁠10.