Thaba le Modimo yo a Thabilego

“Bana bešo ke fetša ka go re, tšwelang pele le thabile . . . gomme Modimo wa lerato le khutšo o tla ba le lena.”​—2 BA-KORINTHE 13:​11, NW.

1, 2. (a) Ke ka baka la’ng batho ba bantši ba hlaelelwa ke lethabo bophelong? (b) Lethabo ke eng, gomme re ka le hlagolela bjang?

MEHLENG ye ya lefsifsi, batho ba bantši ga ba bone go e-⁠na le lebaka la go thaba. Ge masetla-pelo a ba wela goba a wela yo mongwe yo ba mo ratago, ba ka ikwa bjalo ka Jobo wa bogologolo yo a itšego: “Motho e a belexwexo ke mosadi, matšatši a xaxwe xa se a makae, ’me ó hoše tapišexo.” (Jobo 14:⁠1) Bakriste ga se bao ba sa welwego ke dikgateletšo le mathata a “dinako tše [tše] hlobaetšago tšeo go lego thata go lebeletšana le tšona,” gomme ga se mo go makatšago gore bahlanka ba botegago ba Jehofa ka dinako tše dingwe ba ka nolega moko.​—⁠2 Timotheo 3:⁠1, NW.

² Lega go le bjalo, Bakriste ba ka thaba gaešita le ge ba le ka tlase ga teko. (Ditiro 5:​40, 41) Bakeng sa go kwešiša gore se se kgonega bjang, ela hloko pele gore lethabo ke eng. Lethabo le hlalositšwe e le “maikwelo ao a tsošwago ke go fihlelela se sebotse goba tebelelo ya sona.” * Ka baka leo, ge e ba re ipha nako ya go ela hloko ditšhegofatšo tšeo re nago le tšona gona bjale mola re dutše re naganišiša ka ditšhegofatšo tšeo di re letetšego lefaseng le lefsa la Modimo, re ka thaba.

3. Ke ka kwešišo efe go ka bolelwago gore yo mongwe le yo mongwe bonyenyane o na le mabaka a go thaba?

³ Motho yo mongwe le yo mongwe o na le ditšhegofatšo tše a ka di thabelago. Hlogo ya lapa e ka lahlegelwa ke mošomo. Ke ga tlhago gore a tshwenyege. O nyaka go hlokomela baratiwa ba gagwe. Lega go le bjalo, ge e ba a tiile mmeleng e bile a le boemong bjo bobotse bja tša maphelo, a ka thabela seo. Ge e ba a hwetša mošomo, o tla kgona go šoma ka thata. Ka lehlakoreng le lengwe, mosadi wa Mokriste a ka ba a ile a hlaselwa ke bolwetši bjo bo fokodišago ka mo go sa letelwago. Lega go le bjalo, a ka leboga thekgo ya bagwera ba lerato le ya ditho tša lapa tšeo di mo thušago go lebeletšana le bolwetši bja gagwe ka mokgwa o hlomphegago le ka sebete. Le gona Bakriste ba therešo ka moka, go sa šetšwe maemo a bona, ba ka thabela tokelo ya go tseba Jehofa, “Modimo yo a thabilego,” le Jesu Kriste ‘yo a thabilego le yo e lego Kgoši e matla a nnoši.’ (1 Timotheo 1:​11, NW; 6:​15, NW) Ee, Jehofa Modimo le Jesu Kriste ba thabile kudu-kudu. Ba bolokile lethabo la bona go sa šetšwe gore maemo mo lefaseng a fapane kudu le ao Jehofa a bego a a rerile mathomong. Mohlala wa bona o ka re ruta mo gontši mabapi le kamoo re ka bolokago lethabo la rena.

 Ga se ba ka ba Lahlegelwa ke Lethabo la Bona

4, 5. (a) Jehofa o ile a arabela bjang ge batho ba babedi ba pele ba be ba rabela? (b) Ke ka tsela efe Jehofa a ilego a dula a e-⁠na le boemo bjo bo nepagetšego bja kgopolo ka batho?

⁴ Tšhemong ya Edene, Adama le Efa ba be ba le boemong bjo bobotse bja tša maphelo e bile ba e-⁠na le menagano e phethagetšego. Ba be ba e-⁠na le mošomo o nago le tšweletšo wo ba bego ba swanetše go o dira le ditikologo tše dibotse tšeo ba bego ba tla o direla go tšona. Se sekaone go feta tšohle, ba be ba e-⁠na le tokelo ya go boledišana le Jehofa ka mehla. E be e le morero wa Modimo gore ba thabele bokamoso bjo bo thabišago. Eupša batswadi ba rena ba pele ba be ba sa kgotsofalela dimpho tše ka moka tše dibotse; ba ile ba utswa seenywa se se bego se ileditšwe ‘sehlareng sa go tseba botse le bobe.’ Tiro ye ya go se kwe e ile ya thea motheo wa go se thabe ka moka moo rena, ditlogolwana tša bona, re lebeletšanago le gona lehono.​—⁠Genesi 2:​15-17; 3:⁠6; Ba-Roma 5:⁠12.

⁵ Lega go le bjalo, Jehofa ga se a ka a dumelela mokgwa wa go se leboge wa Adama le Efa o mo amoga lethabo la gagwe. O be a kgodišegile gore bonyenyane dipelo tša ba bangwe ba bana ba bona di be di tla tutueletšega go mo hlankela. Ge e le gabotse, o be a kgodišegile kudu moo e lego gore gaešita le pele Adama le Efa ba ka ba le ngwana wa bona wa mathomo, o ile a ba a tsebiša morero wa gagwe wa go tlo lokolla ditlogolwana tša bona tše di kwago! (Genesi 1:​31; 3:​15) Nywaga-kgolong e latetšego, bontši bja batho bo ile bja sepela mehlaleng ya Adama le Efa, eupša Jehofa ga se a ka a hlanogela lapa la batho ka baka la go se kwe mo go bjalo mo go apareditšego. Go e na le moo, o ile a lebiša tlhokomelo ya gagwe go banna le basadi bao ‘ba ilego ba thabiša pelo ya gagwe,’ bao ba ilego ba dira boiteko bja kgonthe bja go mo thabiša ka gobane ba be ba mo rata.​—⁠Diema 27:​11; Ba-Hebere 6:⁠10.

6, 7. Ke mabaka afe ao a thušitšego Jesu go dula a thabile?

⁶ Go thwe’ng ka Jesu​—⁠o ile a boloka bjang lethabo la gagwe? E le sebopiwa se matla sa moya legodimong, Jesu o be a e-⁠na le dibaka tšohle tša go ela hloko mediro ya banna le basadi lefaseng. Go se phethagale ga bona go be go le molaleng, eupša Jesu o ile a ba rata. (Diema 8:​31) Ka morago, ge a be a e-⁠tla lefaseng gomme a “axa” le batho ka tsela ya kgonthe, pono ya gagwe ka batho ga se ya ka ya fetoga. (Johane 1:​14) Ke eng seo se ilego sa dira gore Morwa wa Modimo yo a phethagetšego a kgone go dula a e-⁠na le pono e bjalo e nepagetšego ka lapa la batho leo le nago le sebe?

⁷ Sa mathomo, Jesu e be e le yo a leka-lekanego ka ditebelelo tša gagwe gotee le ka tša ba bangwe. O be a tseba gore o be a ka se ke a sokolla lefase. (Mateo 10:​32-39) Ka gona o be a thaba ge motho le o tee feela yo a botegago a arabela ka mo go swanetšego molaetšeng wa Mmušo. Gaešita le ge boitshwaro le boemo bja kgopolo bja barutiwa ba gagwe e be e se tše di kgotsofatšago ka mehla, Jesu o be a tseba gore ka pelong ba be ba tloga ba nyaka go dira thato ya Modimo gomme o ile a ba rata ka baka la seo. (Luka 9:​46; 22:​24, 28-32, 60-62) Ka mo go kgethegilego, ge a be a rapela Tatagwe wa legodimong, Jesu o ile a akaretša tsela e nepagetšego yeo barutiwa ba gagwe ba e tšerego go fihla boemong bjoo: “Ba lototše ’ntšu la xaxo.”​—⁠Johane 17:⁠6.

8. Nea ditsela tše dingwe tšeo ka tšona re ka ekišago Jehofa le Jesu ge go tliwa tabeng ya go boloka lethabo la rena.

⁸ Ka ntle le pelaelo, ka moka ga rena re tla holwa ke go lebiša tlhokomelo mohlaleng o beilwego ke Jehofa Modimo le Kriste Jesu tabeng ye. Na re ka ekiša Jehofa ka mo go tletšego, mohlomongwe ka go se tshwenyege ka mo go feteletšego ge dilo di sa sepele ka mokgwa wo re bego re holofetše ka gona? Na re ka latela kgaufsi kudu mehlaleng ya Jesu ka go dula re e-⁠na le pono e nepagetšego ka maemo a rena a gona bjale, gotee le ka go ba bao ba leka-lekanego ka seo re se letelago go rena ka noši gotee le go ba bangwe? Anke re boneng gore ke bjang e mengwe ya melao ye ya motheo e ka dirišwago ka tsela e šomago karolong yeo e lego e rategago kudu go Bakriste kae le kae​—⁠e lego bodiredi bja tšhemo.

Boloka Pono e Nepagetšego ka Bodiredi

9. Lethabo la Jeremia le ile la mpshafatšwa bjang, gomme mohlala wa gagwe o ka re thuša bjang?

⁹ Jehofa o nyaka gore re thabe tirelong ya gagwe. Lethabo la rena ga se la swanela go ithekga ka mafelelo ao re a hwetšago. (Luka 10:​17,  20) Moporofeta Jeremia o ile a dira boboledi ka nywaga e mentši tšhemong yeo e sa enywego dienywa. Ge a be a ka lebiša tlhokomelo karabelong ya batho e sa kgahlišego, o be a ka lahlegelwa ke lethabo la gagwe. (Jeremia 20:⁠8) Eupša ge a be a naganišiša ka botse bja molaetša ka bowona, lethabo la gagwe le be le mpshafatšwa. Jeremia o itše go Jehofa: “Mantšu a xaxo a hweditšwe ya ba dijô tša-ka; mantšu a xaxo a nkušitše pelo a nthabiša, kè e-⁠kwa kè bitšwa ka leina l’axo, Morêna Modimo wa mašaba.” (Jeremia 15:​16) Ee, Jeremia o ile a thabela tokelo ya gagwe ya go ruta lentšu la Modimo. Le rena re ka thaba.

10. Re ka boloka bjang lethabo la rena bodireding gaešita le ge tšhemo ya gabo rena e sa enywe mo nakong ye?

¹⁰ Gaešita le ge bontši bo gana go arabela ditabeng tše dibotse, re na le mabaka ka moka a go thaba ge re le bodireding bja tšhemo. Gopola gore Jehofa o be a kgodišegile e le ka kgonthe gore batho ba bangwe ba be ba tla tutueletšega go mo hlankela. Ka go swana le Jehofa, le ka mohla ga se ra swanela go lahla kholofelo ya gore bonyenyane ba bangwe mafelelong ba tla lemoga kgang ya legohle gomme ba amogela molaetša wa Mmušo. Ga se ra swanela go lebala gore maemo a batho a a fetoga. Ge a lebeletšane le go lahlegelwa mo go sa letelwago goba mathata, gaešita le motho yo a ikwago a kgotsofetše kudu a ka thoma go naganišiša ka morero wa bophelo. Na o tla ba moo bakeng sa go nea thušo ge motho yo bjalo a thoma go ‘lemoga senyakwa sa gagwe sa moya’? (Mateo 5:⁠3, NW) Ee, yo mongwe tšhemong ya geno a ka ba a loketše go theetša ditaba tše dibotse nakong e latelago ge o mo etela!

11, 12. Go diragetše eng toropong e nngwe, gomme ke eng seo re ka ithutago sona go seo?

¹¹ Mohuta wa tšhemo ya rena le wona o ka fetoga. Ela hloko mohlala wo. Toropong e nyenyane, go be go dula sehlopha se se dirišanago kgaufsi kudu sa banyalani ba bafsa le bana ba bona. Ge Dihlatse tša Jehofa di be di etela di be di hwetša karabo e swanago mojakong o mongwe le o mongwe e rego, “Ga re thabele!” Ge motho yo mongwe a be a ka bontšha kgahlego e le ka kgonthe molaetšeng wa Mmušo, baagišani ba be ba sa mo senyetše nako go mo nyemiša moko gore a kgaotše go ikgokaganya le Dihlatse ka mo go tšwelago pele. Go molaleng gore e be e le tlhohlo go dira boboledi moo. Lega go le bjalo, Dihlatse ga se tša ka tša langwa; di ile tša tšwela pele di bolela. Ka mafelelo afe?

¹² Ge nako e dutše e tšwela pele, bana ba bantši toropong yeo ba ile ba gola, ba tsena lenyalong gomme ba ba le magae a bona. Ge ba lemoga gore tsela ya bona ya go phela ga se ya feleletša ka lethabo la kgonthe, ba bangwe ba bafsa ba ba ba godilego ba ile ba thoma go tsoma therešo. Ba ile ba e hwetša ge ba be ba arabela ka mo go swanetšego ditabeng tše dibotse tšeo di tsebatšwago ke Dihlatse. Ka gona e bile ka morago ga nywaga yeo e mentši moo phuthego e nyenyane e ilego ya thoma go gola. Akanya ka lethabo leo bagoeledi ba Mmušo bao ba sa kago ba langwa ba bilego le lona! Eka go phegelela go abelaneng molaetša o thabišago wa Mmušo go ka re tlišetša lethabo le rena!

Badumedi-gotee ba tla go Thekga

13. Re ka retologela go mang ge re nyamile?

¹³ Ge dikgateletšo di gola goba ge o hlaselwa ke mathata, o ka retologela kae bakeng sa khomotšo?  Dimilione tša bahlanka ba Jehofa bao ba ineetšego ba retologela go Jehofa pele ka thapelo, ke moka ba ya go banababo bona le dikgaetšedi ba Bakriste. Ge a be a sa le lefaseng, Jesu ka noši o ile a thabela thekgo ya barutiwa ba gagwe. Bošegong bja pele ga lehu la gagwe o ile a bolela ka bona e le “ba ba kxotleletšexo le Nna melekong ya-ka.” (Luka 22:​28) Ke therešo gore barutiwa bao ba be ba sa phethagala, eupša potego ya bona e sa kwanantšhego e be e le khomotšo go Morwa wa Modimo. Le rena ka mo go swanago re ka hwetša matla go barapedi-gotee le rena.

14, 15. Ke eng seo se thušitšego banyalani ba bangwe go lebeletšana le lehu la morwa wa bona, gomme o ithuta eng phihlelong ya bona?

¹⁴ Banyalani ba Bakriste ba ba bitšwago Michel le Diane ba ile ba ithuta kamoo thekgo ya banababo bona le dikgaetšedi e ka bago le mohola ka gona. Morwa wa bona wa nywaga e 20, Jonathan, Mokriste yo mafolofolo le yo a nago le ditebelelo tše dibotse o ile a hwetšwa a e-⁠na le serurugi sa bjoko. Dingaka di ile tša leka ka matla go mo phološa, eupša boemo bja Jonathan bja mmele bo ile bja befela pele go fihlela mantšiboeng a mangwe ge a tla ithobalela lehung. Michel le Diane ba be ba nolegile moko. Ba ile ba lemoga gore Seboka sa Tirelo seo se bego se swerwe mantšiboeng ao se be se le kgaufsi le go fela. Lega go le bjalo, e le ge ba be ba tloga ba nyaka khomotšo, ba ile ba kgopela mogolo yo ba bego ba e-⁠na le yena gore a ba felegetše Holong ya Mmušo. Ba ile ba fihla ge phuthego e be e tsebišwa ka lehu la Jonathan. Ka morago ga diboka, batswadi bao ba tletšego megokgo ba be ba dikologilwe ke banababo bona le dikgaetšedi bao ba ilego ba ba gokarela gomme ba ba nea mantšu a khomotšo. Diane o gopola gore: “Re ile ra ikwa re nolegile moko ge re fihla holong, eupša banababo rena ba ile ba re nea khomotšo e kgolo gakaakang​—⁠ba ile ba re dira gore re ikwe re kaonefetše gakaakang! Gaešita le ge ba se ba kgona go tloša bohloko bja rena, ba re thušitše go kgotlelela ka tlase ga kgateletšego!”​—⁠Ba-Roma 1:​11, 12; 1 Ba-Korinthe 12:​21-⁠26.

¹⁵ Mathata a ile a dira gore Michel le Diane ba batamelane le banababo bona. Gape a ile a dira gore bona seng ba batamelane kgaufsi. Michel o re: “Ke ithutile go rata mosadi wa-ka yo a rategago ka mo go oketšegilego. Dinakong tša manyami, re boledišana ka therešo ya Beibele le kamoo Jehofa a re thekgago ka gona.” Diane o oketša ka gore: “Kholofelo ya Mmušo e bolela mo gontši kudu go rena ga bjale.”

16. Ke ka baka la’ng go le bohlokwa go gata mogato wa pele bakeng sa go tsebiša banababo rena dinyakwa tša rena?

¹⁶ Ee, banababo rena le dikgaetšedi ba Bakriste ba ka dira e le “thušo e matlafatšago” go rena dinakong tše thata tša bophelo gomme ka go rialo ba re thuša go boloka lethabo la rena. (Ba-Kolose 4:​11, NW) Go ba gona, ba ka se kgone go bala menagano ya rena. Ka gona, ge re nyaka thušo e ka ba mo gobotse go ba tsebiša. Ke moka re ka bontšha tebogo ya kgonthe bakeng sa khomotšo le ge e le efe yeo banababo rena ba kgonago go e nea, re e lebelela e le e tšwago go Jehofa.​—⁠Diema 12:​25; 17:⁠17.

Lebelela ka Phuthegong ya Geno

17. Ke ditlhohlo dife tšeo mma yo mongwe yo a se nago molekane a lebeletšanago le tšona, gomme re lebelela bjang batho ba swanago le yena?

¹⁷ Ge o lebeledišiša badumedi-gotee le wena kgaufsi, ke moo o tlago go ithuta ka mo go oketšegilego go ba leboga le go hwetša lethabo bogwereng bja bona. Lebelela ka phuthegong ya geno. O bona eng? Na go na le motswadi yo a se nago molekane yo a katanago le go godišetša bana ba gagwe tseleng ya therešo? Na o ile wa naganišiša ka mohlala o mobotse wo a o beago? Leka go akanya ka a mangwe a mathata ao a lebeletšanago le ona. Mma yo a se nago molekane yo a bitšwago Jeanine o bolela ka a mangwe a mathata ao: bodutu, ditšhišinyo tša boitshwaro bjo bo gobogilego ka banna mošomong le thulaganyo ya tirišo ya tšhelete e lekanyeditšwego kudu. Eupša o re bothata bjo bogolo go a feta ka moka bo akaretša go hlokomela dinyakwa tša maikwelo tša bana ba gagwe, ka ge ngwana yo mongwe le yo mongwe e le moswana-noši. Jeanine o tšweletša bothata bjo bongwe ka gore: “E ka ba tlhohlo ya kgonthe go phema tshekamelo ya go dira morwa wa gago hlogo ya lapa e le gore a ka thiba sekgoba sa monna wa gago. Ke na le morwedi, gomme go thata go gopola gore ke se mo imetše ka go mo go feteletšego ka mathata a-⁠ka.” Go swana le batswadi ba se nago balekane ba dikete ba boifago Modimo, Jeanine o šoma  ka nako e tletšego gomme o hlokomela lapa la gagwe. Gape o ithuta Beibele le bana ba gagwe, o ba tlwaetša bodireding le go ya le bona dibokeng tša phuthego. (Ba-Efeso 6:⁠4) Jehofa o swanetše go ba a thaba gakaakang ge ka mehla a bona maiteko ao lapa le le a dirago bakeng sa go lwela go kgomarela potego! Na go ba le batho ba bjalo gare ga rena ga go thabiše dipelo tša rena? Go bjalo e le ka kgonthe.

18, 19. Bontšha kamoo re ka godišago tebogo ya rena bakeng sa ditho tša phuthego.

¹⁸ Lebelela gape ka phuthegong ya geno. Mo gongwe o ka bona bahlologadi goba bahlolo ba botegago bao ba ‘sa hlokwego le ka mohla’ dibokeng. (Luka 2:​37, NW) Na ba lewa ke bodutu ka dinako tše dingwe? Ee. Ba hlologela balekane ba bona kudu! Eupša ba tšwela pele ba swaregile tirelong ya Jehofa le go bontšha kgahlego ya motho ka noši go ba bangwe. Boemo bja bona bja kgopolo bjo bo tsepamego le bjo bo nepagetšego bo oketša lethabong la phuthego! Mokriste yo a hlanketšego bodireding bja nako e tletšego ka nywaga e fetago e 30 o re: “Selo se sengwe seo se nthabišago kudu ke go bona banababo rena le dikgaetšedi ba ba godilego bao ba ilego ba lebeletšana le diteko tše dintši ba sa dutše ba hlankela Jehofa ka potego!” Ee, Bakriste ba ba godilego gare ga rena ke kgothatšo e kgolo go ba bafsa.

¹⁹ Go thwe’ng ka ba bafsa bao ba sa tšwago go thoma go kopanela le phuthego? Na ga re kgahlege ge ba bontšha tumelo ya bona dibokeng? Nagana ka tšwelopele yeo ba e dirilego ga e sa le  ba thoma go ithuta Beibele. Jehofa o swanetše go ba a ba thabela kudu. Na re a ba thabela? Na re bontšha kamogelo ya rena, gomme ra ba reta bakeng sa maiteko ao ba a dirago?

20. Ke ka baka la’ng go ka thwe setho se sengwe le se sengwe sa phuthego se kgatha tema e bohlokwa ka phuthegong?

²⁰ Na o lenyalong, na ga o lenyalong goba na o motswadi yo a se nago molekane? Na o sešuana, mohlologadi goba mohlolo? Na o yo a bego a dutše a kopanela le phuthego ka nywaga e mentši goba yo a sa tšwago go thoma go kopanela? Kgonthišega gore mohlala wa gago wa potego ke o kgothatšago go rena ka moka. Ge o kopanela go opeleng kopelo ya Mmušo, ge o araba goba o nea polelo ya morutwana Sekolong sa Bodiredi sa Pušo ya Modimo, go tšea karolo ga gago go tlaleletša lethabong la rena. Sa bohlokwa kudu, o thabiša pelo ya Jehofa.

21. Re na le mabaka a mantši a go dira eng, eupša go rotoga dipotšišo dife?

²¹ Ee, gaešita le dinakong tše tša mathata, re ka thabela go rapela Modimo wa rena yo a thabilego. Re na le mabaka a mantši a go ka arabela kgothatšong ya Paulo e rego: “Tšwelang pele le thabile . . . gomme Modimo wa lerato le khutšo o tla ba le lena.” (2 Ba-Korinthe 13:​11, NW) Lega go le bjalo, go thwe’ng ge e ba re welwa ke kotsi ya tlhago, tlaišo goba mathata a magolo a tša boiphedišo? Na go a kgonega go boloka lethabo la rena gaešita le maemong a bjalo? Itirele diphetho ge o dutše o naganišiša ka sehlogo se se latelago.

Na o ka Araba?

• Lethabo le hlaloswa bjang?

• Go boloka boemo bjo bo nepagetšego bja kgopolo go ka re thuša bjang go re boloka re thabile?

• Ke eng seo se ka re thušago go ba le pono e nepagetšego ka tšhemo ya phuthego ya gabo rena?

• Ke ka ditsela dife o lebogago banababo rena le dikgaetšedi ka phuthegong ya geno?

[Mengwalo ya ka tlase]

[Dipotšišo tša Thuto]

[Seswantšho go letlakala 10]

Batho ba tšhemong ya gabo rena ba ka fetoga

[Diswantšho go letlakala 12]

Ke ditlhohlo dife tšeo bao ba lego ka phuthegong ya geno ba lebeletšanego le tšona?