Dipotšišo tše Tšwago go Babadi

“Sekxêthwa-kxêthwa” se ile sa tlotšwa neng, bjalo ka ge go boletšwe e sa le pele go Daniele 9:​24 (NW)?

Daniele 9:​24-27 ke boporofeta bjo bo lego mabapi le go tšwelela ga “Motlotšwa [“Mesia,” NW] Mo-êta-pele”​—Kriste. Go tlotšwa ga “Sekxêthwa-kxêthwa” mo go boletšwego e sa le pele ka nako yeo, ga go šupe go tlotšwa ga karolo ya Sekgethwa-kgethweng sa tempele kua Jerusalema. Go e na le moo, polelwana “Sekxêthwa-kxêthwa” e šupa go sekgethwa sa Modimo sa legodimong​—Sekgethwa-kgethwa sa legodimong⁠—​tempeleng e kgolo ya moya ya Jehofa. *​—⁠Ba-Hebere 8:​1-⁠5; 9:​2-10, 23.

Tempele ya Modimo ya moya e thomile neng go šoma? Ela hloko seo se diragetšego ge Jesu a e-⁠tla go tlo kolobetšwa ka 29 C.E. Go tloga ka nako yeo go ya pele, Jesu o phethagaditše mantšu a Psalme 40:​6-⁠8 bophelong bja gagwe. Moapostola Paulo ka morago o ile a bontšha gore Jesu o be a rapetše Modimo ka gore: “Xa O kxahlwe ke didimo le dibexô; se o nthakxetšexo sôna ké mmele.” (Ba-Hebere 10:⁠5) Jesu o tsebile gore Modimo ga a “kxahlwe” ke gore dihlabelo tša diphoofolo di tšwele pele di newa tempeleng ya Jerusalema. Go e na le moo, Jehofa o ile a lokišeletša Jesu mmele o phethagetšego wa motho bakeng sa go o neela e le sehlabelo. Ge a bontšha kganyogo ya gagwe e tšwago pelong, Jesu o tšwetše pele ka gore: “Ké Nna é, ke a tla, Modimo; ke dira tše di Xo kxahlaxo; matlakaleng a puku xo ngwadilwe tše di ntebanexo.” (Ba-Hebere 10:⁠7) Karabelo ya Jehofa e bile efe? Ebangedi ya Mateo e re: “Ya re xe Jesu a kolobeditšwe, à e-⁠tšwa meetseng, xwa napa xwa bulêxa lexodimo, ’me a bôna Moya wa Modimo ò theoxa byalo ka leeba, ò e-⁠tla xodimo xa xaxwe. Xwa tloxa xò kwala lentšu le le tšwaxo lexodimong lè re: Yêna-yó ké Yêna Morwa-moratwa wa-ka, yo ke kxahlwaxo ke Yêna.”​—⁠Mateo 3:​16, 17.

Go amogela ga Jehofa Modimo go neelwa ga mmele wa Jesu e le sehlabelo go be go bolela gore aletare e kgolo go feta aletare ya kgonthe ka tempeleng ya Jerusalema e be e šetše e le gona. Ye e be e le aletare ya “thato” ya Modimo, goba thulaganyo ya go amogela bophelo bja Jesu e le motho bjalo ka sehlabelo. (Ba-Hebere 10:​10, NW) Go tlotšwa ga Jesu ka moya o mokgethwa go be go bolela gore Modimo bjale o tlišitše tokišetšo ya gagwe ka moka ya tempele ya moya. * Lega go le bjalo, nakong ya ge Jesu a be a kolobetšwa, bodulo bja Modimo bja legodimong bo ile bja tlotšwa, goba bja beelwa ka thoko e le “Sekxêthwa-kxêthwa” thulaganyong e kgolo ya tempele ya moya.

[Mengwalo ya ka tlase]

[Seswantšho go letlakala 27]

“Sekxêthwa-kxêthwa” se ile sa tlotšwa ge Jesu a be a kolobetšwa