Go Aga Lapa le le Tiilego Moyeng
Go Aga Lapa le le Tiilego Moyeng
“Le ba godiše go ya ka tayo le tlhahlo ya monagano ya Jehofa.”—BA-EFESO 6:4, NW.
1. Morero wa Modimo ka lapa e be e le ofe, eupša go e na le moo ke eng seo se ilego sa direga?
“TSWALANG Le atê, tlalang lefase.” (Genesi 1:28) Ka mantšu ao a a boditšego Adama le Efa, Jehofa Modimo o ile a hloma thulaganyo ya lapa. (Ba-Efeso 3:14, 15, NW) Ge ba be ba lebelela pele, batho bao ba babedi ba pele ba be ba bona ka leihlo la kgopolo lefase leo le tletšego bana ba bona—lapa leo le katološitšwego la batho bao ba phethagetšego bao ba phelago ka lethabo lefaseng la paradeise gomme ba rapela Mmopi wa bona yo Mogolo ka botee. Eupša Adama le Efa ba ile ba wela sebeng, gomme lefase ga se la ka la tlala batho bao ba lokilego le bao ba boifago Modimo. (Ba-Roma 5:12) Go e na le moo, go se go ye kae bophelo bja lapa bo ile bja senyega, gomme lehloyo, bošoro le go hlokega ga “maikwelo a borutho a tlhago” di ile tša aparetša, kudu-kudu ‘mehleng ye ya bofelo.’—2 Timotheo 3:1-5, bapiša le NW; Genesi 4:8, 23; 6:5, 11, 12.
2. Ke’ng seo bana ba Adama ba bego ba ka se tseba, eupša go be go tla nyakega eng bakeng sa go aga lapa le le tiilego moyeng?
2 Adama le Efa ba be ba bopilwe ka seswantšho sa Modimo. Gaešita le ge bjale Adama e be e le modiradibe, Jehofa o ile a mo dumelela go ba le bana. (Genesi 1:27; 5:1-4) Go swana le tatago bona, bana ba Adama ba be ba ka tseba se sengwe ka ga boitshwaro gomme ba be ba ka ithuta go kgethologanya magareng ga seo se nepagetšego le seo se fošagetšego. Ba be ba ka rutwa mabapi le tsela yeo ba ka rapelago Mmopi wa bona le bohlokwa bja go mo rata ka pelo, moya, monagano le matla ka moka. (Mareka 12:30; Johane 4:24; Jakobo 1:27) Go feta moo, ba be ba ka tlwaeletšwa go ‘dira toko le go rata botho le go sepela le Modimo ba na le boipoetšo.’ (Mika 6:8) Lega go le bjalo, bjalo ka badiradibe, ba be ba tla swanelwa ke go ba le šedi kudu e le gore ba age lapa le le tiilego moyeng.
Reka Nako
3. Batswadi ba ka ‘reka nako’ bjang bakeng sa go godiša bana ba Bakriste?
3 Mehleng ye e raraganego le e hlobaetšago, go swanetše gore go dirwe boiteko bjo bogolo e le gore bana e tle e be “ba-rata-Modimo” bao ba ‘hloilego bobe’ e le ka kgonthe. (Psalme 97:10) Batswadi ba bohlale ba tla ‘reka nako’ bakeng sa go swaragana le tlhohlo ye. (Ba-Efeso 5:15-17, NW) Ge e ba o le motswadi, o ka dira se bjang? Sa mathomo, bea dilo tšeo di tlago pele, o lebiše tlhokomelo go “dilo tša bohlokwa bjo bogolo,” go akaretša go ruta le go tlwaetša bana ba gago. (Ba-Filipi 1:10, 11, NW) Sa bobedi, nolofatša mokgwa wa gago wa bophelo. O ka swanelwa ke gore o beele ka thoko mediro yeo e tlogago e se bohlokwa. Goba mo gongwe o ka swanelwa ke gore o lahle dilo tšeo di sego bohlokwa tšeo di nyakago nako e ntši bakeng sa go di hlokomela. Bjalo ka motswadi wa Mokriste, le ka mohla o ka se itsholele gore o dirile boiteko bjo bo nyakegago bakeng sa go godiša bana bao ba boifago Modimo.—Diema 29:15, 17.
4. Ke bjang lapa le ka bolokwago le kopane?
4 Go fetša nako le bana ba gago, kudu-kudu ge go theilwe dilong tša moya, ke mo go swanetšwego ke go katanelwa gomme ke e nngwe ya ditsela tše kaone tša go boloka lapa e le leo le tlemaganego. Eupša o se ke wa dira se ka ntle le thulaganyo. Rulaganya dinako tše itšego tšeo le tla di fetšago le le gotee. Se ga se bolele feela go fo ba ka ntlong e tee, yo mongwe le yo mongwe a itirela seo a se ratago. Bana ba gola gabotse kudu ka go fiwa tlhokomelo ya motho ka noši letšatši le lengwe le le lengwe. Lerato le go kgomega di swanetše go bontšhwa ka go se timane. Gaešita le pele ba ka dira phetho ya go ba le bana, banyalani ba swanetše go naganišiša ka mo go tseneletšego ka boikarabelo bjo bjo bohlokwa. (Luka 14:28) Ke moka ba ka se ke ba lebelela go godiša bana e le modiro o thata. Go e na le moo, ba tla go lebelela e le tokelo e šegofaditšwego.—Genesi 33:5; Psalme 127:3.
Ruta ka Lentšu le ka Mohlala
5. (a) Go ruta bana go rata Jehofa go thoma ka eng? (b) Batswadi ba newa keletšo efe go Doiteronomio 6:5-7?
5 Go ruta bana ba gago go rata Jehofa go thoma ka lerato la gago ka noši la go mo rata. Lerato la gago le matla la go rata Modimo le tla go tutueletša go latela ditaelo tša gagwe ka moka ka potego. Se se akaretša go godiša bana “go ya ka tayo le tlhahlo ya monagano ya Jehofa.” (Ba-Efeso 6:4, NW) Modimo o eletša batswadi gore ba beele bana ba bona mohlala, ba boledišane le bona le go ba ruta. Doiteronomio 6:5-7 e re: “Morêna Modimo wa xaxo O mo ratê ka pelo ya xaxo ka moka, le ka môya wa xaxo ka moka, le ka matla a xaxo ka moka. Mantšu a ke Xo laetšaxo lehono a a dulê a le pelong ya xaxo. O a tiišetšê bana ba xaxo; O bolêle ôna Ò dutše ngwakong wa xaxo, le xe O le tseleng, xe O y’o rôbala le xe Ò tsoxa.” Ka go nea keletšo ka mehla le go boa-boeletša taba, o ka mediša melao ya Modimo baneng ba gago. Ka gona, bana ba gago ba tla lemoga lerato le o nago le lona la go rata Jehofa, gomme le bona ba tla tutueletšega go hlagolela go ba kgaufsi le yena ka mo go swanago.—Diema 20:7.
6. Ke bjang batswadi ba ka dirišago ka mo go holago taba ya gore bana ba ithuta ka mohlala?
6 Bana ba fišegela go ithuta. Ke batheetši le babogedi ba bohlale e bile ba akgofela go ekiša mohlala wa gago. Ge ba bona gore ga o rate dilo tše di bonagalago, se se ba thuša gore ba ithute kamoo ba ka latelago keletšo ya Jesu ka gona. O ba ruta gore ba se ke ba fišegela dilo tše di bonagalago eupša ba ‘tsome Mmušo wa Modimo pele.’ (Mateo 6:25-33) Ka go ba le poledišano e agišago le e agago mabapi le therešo ya Beibele, phuthego ya Modimo le bagolo bao ba kgethilwego, o ruta bana ba gago go hlompha Jehofa le go tšeela godimo ditokišetšo tša gagwe tša moya. Ka ge bana ba lemoga kapejana ge dilo di sa sepedišane, thuto ya molomo e swanetše go thekgwa ke boitshwaro le boemo bja kgopolo bjo bo bontšhago tebogo ya gago ka noši e tseneletšego ya go leboga dilo tša moya. Ke tšhegofatšo e kgolo gakaakang ge batswadi ba bona gore mohlala wa bona o mobotse o tšweleditše lerato la pelo ka moka la go rata Jehofa baneng ba bona!—Diema 23:24, 25.
7, 8. Ke mohlala ofe wo o bontšhago mohola wa go tlwaetša bana e sa le ba banyenyane, gomme ke mang a swanetšwego ke tumišo bakeng sa katlego?
7 Mohola wa go tlwaetša bana go tloga bjaneng o ka bonwa ka mohlala wa kua Venezuela. (2 Timotheo 3:15) O mabapi le banyalani ba bafsa e lego Félix le Mayerlín. Ke badiredi ba babulamadibogo. Ge morwa wa bona Felito a be a belegwa, ba be ba fišegela go dira sohle se ba ka se kgonago go mo godišetša go ba morapedi wa therešo wa Jehofa. Mayerlín o ile a thoma go balela ka go hlaboša Felito Puku Ya-ka ya Ditaba tša Beibele yeo e gatišitšwego ke Dihlatse tša Jehofa. E sa le yo monyenyane, go ile gwa bonagala Felito a kgona go tseba Moše le batho ba bangwe bao ba swantšhitšwego ka pukung ye.
8 Ge a be a sa le yo monyenyane kudu, Felito o ile a thoma go nea bohlatse a nnoši. O ile a phethagatša kganyogo ya gagwe ya go ba mogoeledi wa Mmušo, gomme ka morago o ile a kolobetšwa. Ge nako e dutše e tšwela pele, Felito o ile a ba mmulamadibogo wa ka mehla. Batswadi ba gagwe ge ba hlalosa ba re: “Ge re dutše re bogetše morwa wa rena a tšwela pele, re lemoga gore ke ka baka la Jehofa le tlhahlo ya gagwe.”
Thuša Bana go Gola Moyeng
9. Ke ka baka la’ng re swanetše go leboga tlhahlo ya moya yeo re e newago ka sehlopha sa molaki yo a botegago le yo bohlale?
9 Go na le dimakasine tše dintši, dipuku tše makgolo le mekero ya Internet e dikete yeo e neago keletšo ya kamoo bana ba ka godišwago ka gona. Tokollo e kgethegilego e bolelago ka bana ya Newsweek e bolela gore gantši “tsebišo ga e dumelelane. Se se gakantšhago kudu ke ge tsebišo ye o naganago gore o ka e holofela o hwetša gore ke e fošagetšego ka mo go feletšego.” Re leboga gakaakang gore Jehofa o neile dilo tše dintši bakeng sa tlhahlo le kgolo ya moya ya malapa! Na o ikhola ka mo go tletšego ka ditokišetšo ka moka tšeo di tšweletšwago ka sehlopha sa molaki yo a botegago le yo bohlale?—Mateo 24:45-47.
10. Ke bjang thuto ya lapa ya Beibele e atlegago e holago batswadi gotee le bana?
10 Senyakwa se sengwe se bohlokwa kudu ke thuto ya lapa ya Beibele ya ka mehla yeo e swarelwago boemong bjoo yo mongwe le yo mongwe a phuthologago. Bakeng sa go dira gore e be e rutago, e thabišago le e kgothatšago, go nyakega go lokišetša gabotse. Ka go dira gore bana ba bolele maikwelo a bona, batswadi ba ka tseba seo se lego ka dipelong tša bona le ka menaganong. Tsela e nngwe ya go bona go atlega ga thuto ya lapa ke ka go hlokomela ge e ba ditho ka moka tša lapa di e fagahlela ka phišego.
11. (a) Ke dipakane dife tšeo batswadi ba ka thušago bana ba bona go ipeela tšona? (b) Go bile le mafelelo afe ge ngwanenyana yo mongwe wa Mojapane a be a phegelela pakane ya gagwe?
11 Dipakane tša moya ka mo go swanago di tlaleletša lapeng le le tiilego moyeng, gomme batswadi ba swanetše go thuša bana ba bona gore ba ipeele tšona. Dipakane tše di swanetšego di akaretša go bala Beibele letšatši le lengwe le le lengwe, go ba mogoeledi wa ka mehla wa ditaba tše dibotse le go gatela pele go fihla boineelong le kolobetšong. Dipakane tše dingwe di ka akaretša tirelo ya nako e tletšego o le mmulamadibogo, go šoma Bethele goba o le moromiwa. Ge a be a sa le sekolong sa mephato ya tlase, ngwanenyana wa Mojapane yo a bitšwago Ayumi o ile a ipeela pakane ya go nea bohlatse go yo mongwe le yo mongwe ka klaseng ya gagwe. Bakeng sa go tsoša kgahlego ya morutiši wa gagwe le bao a tsenago le bona ka klaseng, o ile a hwetša tumelelo ya go bea dipuku tše dintšinyana tša Beibele bokgoba-pukung. E le mafelelo a se, nakong ya nywaga e tshelelago ya ge a be a sa le sekolong sa mephato ya tlase, Ayumi o ile a swara dithuto tša Beibele tše 13. Yo mongwe wa barutwana bao ba Beibele le ba bangwe ka lapeng la gabo e bile Bakriste ba kolobeditšwego.
12. Bana ba ka holega kudu bjang dibokeng tša Bokriste?
12 Selo se sengwe seo se nyakegago bakeng sa boemo bjo bobotse bja moya bjo bo tiilego ke go ba gona ka mehla dibokeng. Moapostola Paulo o eleditše badumedi-gotee le yena gore ‘ba se tlogele go bokana ga bona gotee, bjalo ka ge e le mokgwa wa ba bangwe.’ Anke seo e se ke ya ba mokgwa wa rena, ka gobane ba banyenyane le ba bagolo ba holwa kudu ka mo go swanago ke go ba gona ka mehla dibokeng tša Bokriste. (Ba-Hebere 10:24, 25, bapiša le NW; Doiteronomio 31:12.) Bana ba swanetše go rutwa go theetša ka kelohloko. Go lokišeletša diboka le gona go bohlokwa, ka gobane go holega mo gogolo go tlišwa ke go ba le karolo ka go nea ditlhaloso. Le ge ngwana yo monyenyane a ka thoma ka go bolela mantšu a sego kae goba ka go bala karolo e nyenyane ya serapa, e tla ba mo go holago kudu ge e ba bana ba tlwaetšwa go tsoma dikarabo ke moka ba di bea ka mantšu a bona. Na lena batswadi le bea mohlala ka go nea ditlhaloso tše di kwagalago ka mehla? Gape ke mo go botse gore setho se sengwe le se sengwe sa lapa se be le Beibele, puku ya dikopelo le kopi ya puku yeo e dirišwago bakeng sa poledišano ya Mangwalo.
13, 14. (a) Ke ka baka la’ng batswadi ba swanetše go šoma le bana ba bona bodireding? (b) Ke eng seo se tlago go thuša go dira gore bodiredi bja tšhemo e be bjo bo holago le bjo bo thabišago bakeng sa bana?
13 Batswadi ba bohlale ba tla lebiša matla a bofsa a bana ba bona go hlankeleng Jehofa, ba ba thuša go dira gore boboledi e be karolo ya bohlokwa ya maphelo a bona. (Ba-Hebere 13:15) Batswadi ba ka kgonthišega gore bana ba bona ba banyenyane ba tla hwetša tlhahlo e swanetšego ge feela ba šoma le bona bodireding gore e tle e be badiredi ‘ba ba se nago bosodi, ba ba tsebago go ratha lentšu la therešo ba sa kgopamiše.’ (2 Timotheo 2:15) Ka gona, go thwe’ng ka wena? Ge e ba o le motswadi, na o thuša bana ba gago go lokišeletša bakeng sa tirelo ya tšhemo? Go dira bjalo go tla thuša go dira gore bodiredi e be bjo bo thabišago, bjo bo nago le morero le bjo bo nago le dienywa bakeng sa bona.
14 Ke ka baka la’ng e le mo go holago gore batswadi le bana ba bona ba šome gotee bodireding? Ka go dira bjalo, bana ba ka lemoga le go ekiša mohlala o mobotse wa batswadi ba bona. Ka nako e swanago, batswadi ba ka lemoga boemo bja kgopolo, boitshwaro le bokgoni bja bana ba bona. Kgonthišetša gore o sepela le bana ba gago dikarolong tše di fapa-fapanego tša bodiredi. Ge e ba go kgonega, dira gore ngwana yo mongwe le yo mongwe a be le mokotla wa gagwe ka noši wa go ya tšhemong gomme o mo rute go o boloka o phuthilwe gabotse e bile o lebelelega. Ka go nea tlwaetšo e dumelelanago le kgothatšo, go thabela ka kgonthe bodiredi go tla re aga, gomme bana ba tla lebelela modiro wa boboledi e le mokgwa wa go bontšha lerato la go rata Modimo le moagišani.—Mateo 22:37-39; 28:19, 20.
Boloka Boemo bjo Bobotse bja Moya
15. Ka ge go boloka boemo bjo bobotse bja moya bja lapa go le bohlokwa gakaakaa, ditsela tše dingwe tša go dira se ke dife?
15 Go boloka boemo bjo bobotse bja moya bja lapa ke ga bohlokwa. (Psalme 119:93) Mokgwa o mongwe woo se se ka dirwago ka wona ke ka go ahla-ahla dilo tša moya le ba lapa la gago ka sebaka se sengwe le se sengwe. Na o ahla-ahla temana ya letšatši ya Beibele le bona? Na ke mokgwa wa gago go abelana diphihlelo tša tirelong ya tšhemo goba dintlha tše di tšwago dimakasineng tša morago-rago tša Morokami le Phafoga! “xe o le tseleng”? Na o gopola go leboga Jehofa ka thapelo bakeng sa letšatši le lengwe le le lengwe la bophelo le bakeng sa ditokišetšo tša gagwe tše dintši “xe O y’o rôbala le xe O tsoxa”? (Doiteronomio 6:6-9) Ge bana ba gago ba bona lerato la go rata Modimo le bonagatšwa selong se sengwe le se sengwe se o se dirago, se se tla ba thuša go phelela therešo.
16. Go kgothaletša bana kamoo ba ka itirelago nyakišišo go na le mohola ofe?
16 Ka dinako tše dingwe, bana ba tla nyaka tlhahlo ya go swaragana ka katlego le mathata goba maemo a tšwelelago. Go e na le gore ka mehla o ba botše seo ba swanetšego go se dira, ke ka baka la’ng o sa ba laetše kamoo ba ka hwetšago pono ya Modimo ka ditaba ka go ba kgothaletša go itirela nyakišišo? Go ruta bana go diriša gabotse didirišwa ka moka le dipuku tšeo di newago ka ‘molaki yo a botegago’ go tla ba thuša go hlagolela tswalano ya kgaufsi le Jehofa. (1 Samuele 2:21b) Le gona ge ba abelana mehola ya nyakišišo ya bona ya Beibele le ditho tše dingwe tša lapa, boemo bjo bobotse bja moya bja lapa bo tšwela pele bo gola.
Ithekge ka Jehofa ka mo go Feletšego
17. Ke ka baka la’ng batswadi bao ba se nago balekane ba se ba swanela go lahlegelwa ke kholofelo ge go tliwa tabeng ya go godiša bana ba bona e le Bakriste?
17 Go thwe’ng ka malapa a motswadi o tee? Malapa a a lebeletšana le ditlhohlo tše di oketšegilego ge go tliwa tabeng ya go godiša bana. Eupša batswadi bao ba se nago balekane, le se ke la nyama! Katlego e a kgonega, bjalo ka ge e bontšhwa ke batswadi ba bantši bao ba se nago balekane bao ba botilego Modimo, bao ka potego ba dirišitšego keletšo ya gagwe gomme ba godiša bana ba babotse bao ba tiilego moyeng. (Diema 22:6) Ee, Bakriste bao e lego batswadi bao ba se nago balekane ba swanetše go ithekga ka mo go feletšego ka Jehofa. Ba swanetše go ba le tumelo ya gore o tla ba nea thušo.—Psalme 121:1-3.
18. Batswadi ba swanetše go nea tlhokomelo dinyakweng dife tša monagano le tša mmele, eupša ke eng seo se swanetšego go tla pele?
18 Batswadi ba bohlale ba lemoga gore ‘go sega go na le mohla wa gona le go bina go na le mohla wa gona.’ (Mmoledi 3:1, 4) Sa bohlokwa bakeng sa go aga ngwana monaganong le mmeleng ke nako ya boiketlo le boitapološo bjo bo agago le bjo bo leka-lekanego. Mmino o agago gape kudu-kudu le go opelela Modimo dikopelo tša theto go tla thuša ngwana go hlagolela boemo bja kgopolo bjo bobotse bjo bo ka kgathago tema ya bohlokwa go matlafatšeng tswalano ya gagwe le Jehofa. (Ba-Kolose 3:16) Bofsa gape ke nako ya go itokišeletša go ba motho yo a godilego yo a boifago Modimo, e le gore go thabela bophelo go ka tšwela pele ka mo go sa felego lefaseng la paradeise.—Ba-Galatia 6:8.
19. Ke ka baka la’ng batswadi ba ka kgodišega gore Jehofa o tla šegofatša maiteko ao ba a dirago go godiša bana?
19 Jehofa o nyaka gore malapa ka moka a Bakriste a atlege e le a tiilego moyeng e bile e le a kopanego. Ge e ba re rata Modimo e le ka kgonthe gomme re dira se re ka se kgonago go kwa Lentšu la gagwe, o tla šegofatša maiteko a rena gomme o tla re nea matla ao re a nyakago bakeng sa go latela tlhahlo ya gagwe e buduletšwego. (Jesaya 48:17; Ba-Filipi 4:13) Gopola gore sebaka seo o nago le sona gona bjale sa go ruta le go tlwaetša bana ba gago se lekanyeditšwe gomme se ka se sa ba gona gape. Dira sohle seo o ka se kgonago go diriša keletšo ya Lentšu la Modimo, gomme Jehofa o tla šegofatša maiteko a gago a go aga lapa le le tiilego moyeng.
Re Ithutile Eng?
• Ke ka baka la’ng go reka nako go le bohlokwa gakaakaa ge o tlwaetša bana?
• Ke ka baka la’ng mohlala o mobotse wa batswadi o le bohlokwa?
• Ditsela tše dingwe tša bohlokwa tša go thuša bana go gola moyeng ke dife?
• Boemo bjo bobotse bja moya bja lapa bo ka bolokwa bjang?
[Dipotšišo tša Thuto]
[Diswantšho go letlakala 24, 25]
Malapa a tiilego moyeng ka mehla a ithuta Lentšu la Modimo, a ba gona dibokeng tša Bokriste gomme a kopanela go ba le karolo bodireding