Go Dumelela ga Modimo Tlaišego go Kgaufsi le go Fela

KAE le kae mo o lebelelago gona, go na le tlaišego. Batho ba bangwe ba ipakela yona. Ba fetelwa ke malwetši a fetetšwago ka dikopano tša botona le botshadi goba ba lebeletšana le mafelelo a go diriša dihlare-tagi, bjala goba motšoko gampe. Goba mohlomongwe ba ka lebeletšana le mathata a tša maphelo ka baka la mekgwa ya go ja e sa lokago. Lega go le bjalo, tlaišego e kgolo e tlišwa ke mabaka goba ditiragalo tšeo motho feela a ka se kgonego go di laola: ntwa, bošoro magareng ga meloko, bosenyi, bodiidi, tlala le bolwetši. Selo se sengwe seo gabotse-botse batho ba ka se kgonego go se laola ke tlaišego e tswalanago le botšofadi le lehu.

Beibele e re kgonthišetša gore “Modimo ké Yêna leratô.” (1 Johane 4:⁠8) Ka gona, ke ka baka la’ng Modimo yo lerato a dumeletše tlaišego ye ka moka go tšwela pele ka nywaga-kgolo e mentši gakaakaa? O tla lokiša neng boemo? Bakeng sa go araba dipotšišo tše bjalo, re swanetše go hlahloba morero wa Modimo mabapi le batho. Se se tla re thuša go kwešiša gore ke ka baka la’ng Modimo a dumeletše tlaišego le seo a tlago go se dira ka yona. 

 Mpho ya Boikgethelo

Ge Modimo a be a bopa motho wa mathomo, o ile a tšweletša selo se se fetago feela mmele o nago le bjoko. Go feta moo, Modimo ga se a bopa Adama le Efa gore e be diroboto tše di se nago menagano. O ile a bjala boikgethelo ka go bona. Gomme yeo e be e le mpho e botse kudu, ka gobane “xe Modimo a lebêlêla tšohle tše a di dirilexo, [o ile] a bôna e le tše botse kudu.” (Genesi 1:​31) Ee, ke “yo tirô-phethexi.” (Doiteronomio 32:⁠4) Ka moka ga rena re thabela mpho ye ya boikgethelo ka gobane ga re nyake gore dikgopolo tša rena ka moka le ditiro di laolwe ka ntle le go ba le kgetho go selo le ge e le sefe.

Lega go le bjalo, na mpho e botse ya boikgethelo e be e swanetše go dirišwa ka ntle le mellwane? Ditaelong tšeo di neilwego Bakriste ba pele, Lentšu la Modimo le araba ka gore: “Le xe Le le bahunoloxi, bohunoloxi Le se kê la bo dira seapešô sa bobe; Le bônalê xore Le bahlanka ba Modimo.” (1 Petro 2:​16) Bakeng sa go dira botse go batho bohle, go swanetše go ba le mellwane. Ka gona, boikgethelo bo be bo swanetše go laolwa ke molao. Go sego bjalo go be go ka se be le taolo.

Molao wa Mang?

Ke molao wa mang o bego o swanetše go bea mellwane e swanetšego ya tokologo? Karabo ya potšišo ye e tswalana le lebaka la motheo leo ka lona Modimo a dumeletšego tlaišego. Ka ge Modimo a bopile batho, o tseba gakaone kudu gore ke melao efe ye ba swanetšego go e theetša bakeng sa gore ba holege le go hola ba bangwe. Beibele e bea taba ka mokgwa wo: “Nna Morêna Modimo wa xaxo ke Xo ruta tše di Xo holaxo; ke Xo sepediša mo tseleng ye O swanetšexo xo e swara.”​—⁠Jesaya 48:⁠17.

Ka mo go kwagalago, taba-taba še: Batho ba be ba sa bopelwa go phela ka ntle le Modimo. O ba dirile ka mokgwa wo e lego gore katlego ya bona le lethabo di ithekgile ka go kwa melao ya gagwe ya go loka. Moporofeta wa Modimo Jeremia o itše: “Morêna, ke a tseba; motho tsela y’axwe xa’ e buše; le monna mo a yaxo xa’ ikiše, le xe a xata a tiiša.”​—⁠Jeremia 10:⁠23.

Modimo o dirile batho gore ba arabele melaong ya gagwe ya tlhago, e bjalo ka molao wa matla-kgogedi. Ka mo go swanago, o dirile batho gore ba arabele melaong ya gagwe ya boitshwaro, yeo e hlametšwego go tšweletša setšhaba se se kwanago. Ka gona, Lentšu la Modimo le kgothatša ka lebaka le lebotse gore: “Bôʹta Modimo ka pelo ka moka; O se ké wa ithêkxa ka xo fo re: Ke n’e thlaloxanyô.”​—⁠Diema 3:⁠5.

Ka gona, lapa la motho le ka mohla le ka se ke la atlega ge le itaola ka noši ka ntle le go bušwa ke Modimo. Ka go leka go phela ka ntle le yena, batho ba hloma ditshepedišo tša leago, boiphedišo, dipolitiki le tša bodumedi tšeo di lwantšhanago gomme ‘motho a buša motho gore a mo senye.’​—⁠Mmoledi 8:⁠9.

Go Senyegile Kae?

Modimo o be a neile batswadi ba rena ba mathomo Adama le Efa mathomo a phethagetšego. Ba be ba na le mebele le menagano e phethagetšego le tšhemo ya  paradeise bakeng sa go ba legae la bona. Ge nkabe ba ile ba ikokobeletša pušo ya Modimo, ba ka be ba ile ba dula ba phethagetše e bile ba thabile. Ge nako e dutše e tšwela pele, e be e tla ba batswadi ba lapa ka moka le le phethagetšego le le le thabilego la batho le le dulago paradeiseng mo lefaseng. Woo e be e le morero wa Modimo ka moloko wa batho.​—⁠Genesi 1:​27-29; 2:⁠15.

Lega go le bjalo, bo-rakgolokhukhu ba rena ba mathomo ba ile ba diriša boikgethelo bja bona gampe. Ba ile ba nagana ka mo go fošagetšego gore ba ka atlega ka go phela ka ntle le Modimo. Ba ile ba tshela mellwane ya melao ya gagwe, ka go ikgethela ga bona ka noši. (Genesi, kgaolo 3) Ka gobane ba ganne pušo ya gagwe, o be a se sa hlwa a gapeletšega go ba tlogela ba phethagetše. ‘Ba dirile ka tsela e kotsi; ga se ba tšwela pele e le bana ba gagwe, phošo ke ya bona ka noši.’​—⁠Doiteronomio 32:​5, PK.

Go tloga nakong yeo ba ilego ba se kwe Modimo ka yona, Adama le Efa ba ile ba thoma go fetoga mmeleng le monaganong. Mothopo wa bophelo o go Jehofa. (Psalme 36:⁠9) Ka gona, ka baka la go ikgaoganya le Jehofa, batho ba babedi ba mathomo ba ile ba se sa hlwa ba phethagetše gomme mafelelong ba hwa. (Genesi 3:​19) Ka go dumelelana le melao ya leabela, bana ba bona ba be ba tla amogela feela seo batswadi ba bona ba bilego le sona. Gomme seo e be e le eng? E be e le go se phethagale le lehu. Ka gona moapostola Paulo o ngwadile gore: “Ké xôna, byalo ka xe sebe sè tsene lefaseng ka motho o tee [Adama], ’me lehu la tsêna ka sebe, lehu le aparetše batho bohle ka xe ba dirile dibe bohle.”​—⁠Ba-Roma 5:⁠12.

Kgang e Kgolo​—⁠Bogoši

Ge Adama le Efa ba be ba rabela malebana le Modimo, ba ile ba hlohla bogoši bja gagwe, e lego tokelo ya gagwe ya go buša. Jehofa a ka be a ile a ba fediša gomme a thoma fase ka batho ba bangwe ba babedi, eupša seo se be se ka se ke sa rarolla kgang ya gore ke pušo ya mang ye e lokilego le ye e lego kaone bakeng sa batho. E le ge ba neilwe nako ya go emiša ditšhaba tša bona go ya ka dikgopolo tša bona, batho ba be ba tla bontšha ka ntle le pelaelo le ge e le efe ge e ba pušo ya go ipuša ka ntle le Modimo e be e tla ka ya atlega.

Histori ya batho ya nywaga e dikete e re utollela eng? Ka nywaga-kgolo yeo ka moka batho ba lekile mehuta e mentši ya ditshepedišo tša leago, boiphedišo, bopolitiki le tša bodumedi. Lega go le bjalo, bokgopo le tlaišego di tšwetše pele. Ge e le gabotse, ‘batho ba babe bobe bja bona bo fedile bo gola bo e-⁠ya,’ kudu-kudu mehleng ya rena.​—⁠2 Timotheo 3:⁠13.

Lekgolong la nywaga la bo-20 go fihleletšwe tlhoreng ya tša thutamahlale le tša mešomo. Eupša gape go bile le go tlaišega mo gogolo historing ka moka ya moloko wa batho. Gomme go sa šetšwe ditšwelopele tša tša kalafo, molao wa Modimo e sa dutše e le wa therešo: Batho bao ba aroganego le Modimo​—⁠mothopo wa bophelo​—⁠ba a babja, ba a tšofala le go hwa. Go hlatsetšwe ka mo go kwagalago gakaakang gore batho ‘le mo ba yago ga ba ikiše’!

Bogoši bja Modimo bo Hlomilwe ka go Tia

Boitekelo bjo bjo bo kwešago bohloko bja go ipuša ka ntle le Modimo bo bontšheditše sa ruri gore pušo ya batho ka ntle le yena e ka se tsoge e atlegile. Ke pušo ya Modimo feela yeo e ka tlišago lethabo, botee, bophelo bjo bobotse bja mmele le bophelo. Go feta moo, Lentšu la Jehofa Modimo le le sa fošego, Beibele e Kgethwa le bontšha gore re phela “mehleng ya bofêlô” ya pušo ya batho bao ba ipušago ka ntle le Modimo. (2 Timotheo 3:​1-⁠5) Go kgotlelela ga Jehofa se le bokgopo le tlaišego go kgaufsi le go fela.

Kgaufsinyana Modimo o tla tsena gare ditabeng tša batho. Mangwalo a re botša gore: “Mehleng ya dikxoši tšeo [mebušo ya batho yeo e lego gona ga bjale], ké mo Modimo a tl’o xo tsoša mmušô [legodimong] wo o ka se kexo wa šwalalanywa neng le neng, wo o ka se kexo wa selêla xo sethšaba se sengwê [batho le ka mohla ba ka se sa hlwa ba buša lefase gape]. O tlo phšatla mebušô e mengwê ka moka [mebušo ya gona bjale] wa e fediša; xe e le wôna, o tlo êma xo ya xo ile.”​—⁠Daniele 2:⁠44.

Go lwelwa ga bogoši bja Jehofa Modimo ka  Mmušo wa legodimong ke sehlogo sa Beibele. Jesu o dirile se thuto ya gagwe e kgolo. O itše: “Xomme Ebangedi yé ya mmušô wa maxodimong e tlo xoêlêlwa lefaseng ka moka xore e bê bohlatse mo xo dithšaba tšohle; ya tlo ba xôna bofêlô bo fihlaxo.”​—⁠Mateo 24:⁠14.

Ge pušo ya Modimo e tšeela pušo ya motho sebaka, go tla phologa mang gomme ke mang yo a ka se phologego? Go Diema 2:​21, 22 re kgonthišetšwa gore: “Xobane ba ba tl’o xo dula mo naxeng, ké baloki [bao ba thekgago pušo ya Modimo]; ba ba tl’o xo šala bà le xôna, ké bôná ba-ila-bokxôpô. Ba babe [bao ba sa thekgego pušo ya Modimo] ba tlo fedišwa naxeng.” Mopsalme yo a buduletšwego ke Modimo o opetše ka gore: “Xo se xokae e mobe ó tlo ba a ile . . . Ba bolêta e tlo ba bôná beng ba naxa ba tlo thaba ka botlalô bya moláô. Baloki e ba beng ba naxa, ba dula mo xo yôna ka mehla le ka mehla.”​—⁠Psalme 37:​10, 11, 29.

Lefase le Lefsa le le Kgahlišago

Ka tlase ga pušo ya Mmušo wa Modimo, baphologi ba bofelo bja tshepedišo ye ya dilo ba tla tsenywa lefaseng le le se nago bokgopo le tlaišego. Tlhahlo e neilwego ke Modimo e tla newa bakeng sa batho, gomme ge nako e dutše e e-⁠ya “xo tseba Morêna xo tlo tlala ’fase lohle bo-ka meetse xe a nabile lewatleng.” (Jesaya 11:⁠9) Thuto ye yeo e agago le e nepagetšego e tla feletša ka setšhaba sa batho seo se nago le khutšo e le ka kgonthe le seo se kwanago. Ka gona, go ka se sa ba le ntwa, dipolao, bošoro, go kata, bohodu goba bosenyi le ge e le bofe bjo bongwe.

Mehola e kgahlišago ya kgonthe e tla hwetšagala bathong ba ba kwago bao ba phelago lefaseng le lefsa la Modimo. Mafelelo ka moka a mabe a borabele malebana le pušo ya Modimo a tla tlošwa. Go se phethagale, bolwetši, botšofadi le lehu e tla ba dilo tša nakong e fetilego. Beibele e re kgonthišetša gore: “Mo xo ba ba axilexo fá xo ka se bê le e a rexo: Ke a babya!” Go feta moo, Mangwalo a holofetša gore: “Ké mo xo tl’o xo budollwa mahlô a difofu, xwa thibollwa ’tsêbê tša difoa. Ke mo dixôlê di tl’o xo taboxa bo-ka thsêpê, xwa tlo hlalala ’leme la semuma.” (Jesaya 33:​24; 35:​5, 6) E tla ba lethabo le legolo gakaakang go thabela bophelo bjo bobotse letšatši le lengwe le le lengwe​—⁠ka mo go sa felego!

Ka tlase ga tlhahlo e lerato ya Modimo, badudi ba lefaseng leo le lefsa ba tla diriša matla a bona le bokgoni go dira lefase ka moka paradeise. Bodiidi, tlala le go hloka magae go tla be go etše ruri, ka gobane boporofeta bja Jesaya bo re: “Nywakô ye ba e axaxo ba tlo dula mo xo yôna; dirapa tša merara ba tlo lema ba ja kenyô tša tšôna. Ba ka se kê ba axa, xwa dula o šele; ba ka se kê ba lema xwa ja o šele.” (Jesaya 65:​21, 22) Ka kgonthe, “motho ó tlo dula meriting ya morara w’axwe, le mo moriting wa moxó wa xaxwe, xò se e a ba thšošaxo.”​—⁠Mika 4:⁠4.

Lefase le tla arabela gabotse tlhokomelong e lerato ya Modimo le bathong ba ba kwago. Re na le kgonthišetšo ye ya Mangwalo: “A xo thabe lešoka le naxa ye e omilexo; le lehanata a le hlalalê, le taxê byalo ka letšoba. . . . Lešokeng xo thulêxa ’diba tša meetse, mo  lehaneteng xo tlo êla dinokana.” (Jesaya 35:​1, 6) “Xo tlo ba le mohora wa mabêlêʹ mo naxeng; ’phoxong tša thaba meré ya dienywa e tlo xwaša.”​—⁠Psalme 72:⁠16.

Go thwe’ng ka batho ba dimilione tše dikete bao ba hwilego? Bao ba lego ka kgopolong ya Modimo ba tla bušetšwa bophelong, ka gore “bahu ba tlo tsoxa, bohle, baloki le ba s’a lokaxo.” (Ditiro 24:​15) Ee, bahu ba tla bušetšwa bophelong. Ba tla rutwa ditherešo tše di kgahlišago mabapi le pušo ya Modimo gomme ba newe sebaka sa go phela ka mo go sa felego Paradeiseng.​—⁠Johane 5:​28, 29.

Ka tokišetšo ye, Jehofa Modimo o tla dirolla ka mo go feletšego boemo bjo bo boifišago bja go tlaišega, bolwetši le lehu bjo bo bego bo golegile batho ka nywaga e dikete. Ga go sa tla ba le bolwetši! Ga go sa tla ba le bogole! Ga go sa tla ba le lehu! Modimo “ó tlo phomola mexôkxô ka moka mahlong a bôná; le lehu le ka se hlwê le e-⁠ba xôna; le xe e le manyami le dillô le bohloko, di ka se hlwê di e-⁠ba xôna; xobane tša pele di [tla be di] fetile.”​—⁠Kutollo 21:​3, 4.

Ke kamoo Modimo a tlago go fediša tlaišego. O tla fediša lefase le le le gobogilego gomme a tliša tshepedišo e mpsha ka mo go feletšego ya dilo yeo go yona ‘go tlogo aga toko.’ (2 Petro 3:​13) Tše ke ditaba tše dibotse e le ka kgonthe! Re tloga re nyaka lefase leo le lefsa. Gomme re ka se lete go iša kae pele re le bona. Go tšwa phethagalong ya diporofeto tša Beibele, re tseba gore lefase le lefsa le kgaufsi-ufsi, gomme go dumelela ga Modimo tlaišego go kgaufsi le go fela.​—⁠Mateo 24:​3-⁠14.

[Lepokisi go letlakala 8]

Go Palelwa ga Pušo ya Motho

Yo e bego e le Hlogo-tona ya Jeremane Helmut Schmidt o boletše mabapi le pušo ya motho gore: “Rena batho . . . ka mehla re bušitše karolwana feela ya lefase, gomme gantši gampe kudu. . . . Le ka mohla ga se ra ka ra le buša ka khutšo e feletšego.” Human Development Report 1999 e itše: “Dinaga ka moka di bega ka go hwelela ga sebopego sa leago, ka dikgaruru tša ditšhaba, bosenyi bjo bo oketšegilego, bošoro bjo bo oketšegilego ka gae. . . . Ditšhošetšo tša lefaseng ka bophara di a oketšega, bokgoni bja ditšhaba bjo bo oketšegago bja go swaragana le tšona le dikarabelo tše di oketšegago ka lebelo tša ditšhaba-tšhaba.”

[Diswantšho go letlakala 8]

“Ba tlo ithabela khutšong ye kgolo.”​—Psalme 37:​11, PK

[Mothopo wa Seswantšho go letlakala 5]

Third from top, mother and child: FAO photo/B. Imevbore; bottom, explosion: U.S. National Archives photo