Retang Jehofa Bakeng sa Mediro ya Gagwe e Megolo!

“Pelo ya-ka e rêta Morêna, . . . ka xe Yo-matla a ntira tše kxolo.”​—LUKA 1:​46-⁠49.

1. Ke mediro efe e megolo yeo re retago Jehofa ka mo go swanetšego bakeng sa yona?

JEHOFA o swanelwa ke go retwa bakeng sa mediro ya gagwe e megolo. Ge moporofeta Moše a be a anega taba ya go lopollwa ga Isiraele Egipita, o itše: “Ba ba di bonexo ka mahlo, ditiro tše kxolo tšeo ka moka tše Morêna a di dirilexo, kê bô-lena.” (Doiteronomio 11:​1-⁠7) Ka mo go swanago, ge morongwa Gabariele a be a tsebatša go belegwa mo go bego go sa tla ga Jesu go Maria kgarebe, o itše: “Pelo ya-ka e rêta Morêna, . . . ka xe Yo-matla a ntira tše kxolo.” (Luka 1:​46-49) Bjalo ka Dihlatse tša Jehofa, re a mo tumiša bakeng sa mediro e bjalo e megolo e swanago le ya go lokolla Isiraele bokgobeng Egipita le go ingwa ka mohlolo ga Morwa wa gagwe yo a rategago.

2. (a) ‘Morero wa Modimo wa ka mo go sa felego’ o bolela’ng bakeng sa batho ba ba kwago? (b) Johane o bone eng sehlakahlakeng sa Patimo?

² Bontši bja mediro e megolo ya Jehofa e be e dutše e tswalanywa le ‘morero wa gagwe wa ka mo go sa felego’ wa go šegofatša batho bao ba kwago ka Mesia le ka pušo ya gagwe ya Mmušo. (Ba-Efeso 3:​8-13, bapiša le NW.) Morero woo o be o dutše o gola ka mo go tšwelago pele ge moapostola Johane yo a tšofetšego a be a dumelelwa go ukamela ka mojako wa ponong o butšwego legodimong. O ile a kwa lentšu le le swanago le modumo wa phalafala le re: “Rotoxêla fano ke Xo bonthše tše di tl’o xo dirêxa mehleng e tlaxo.” (Kutollo 4:⁠1) Ge a be a leleketšwe ke mmušo wa Roma sehlakahlakeng sa Patimo ka baka la go bolela ka “Lentšu la Modimo, è le xo hlatsêla Jesu Kriste,” Johane o ile a newa “kutollô ya Jesu Kriste.” Seo moapostola a se bonego le go se kwa se ile sa utolla mo gontši mabapi le morero wa Modimo wa ka mo go sa felego, ka go rialo sa nea tshedimošo ya moya le kgothatšo e lego nakong bakeng sa Bakriste ka moka ba therešo.​—⁠Kutollo 1:​1, 9, 10.

3. Bagolo ba 24 ba bonwego ke Johane ponong ba emela bomang?

³ Ka mojako wona woo o bego o bulegile legodimong, Johane o bone bagolo ba 24, ba bego ba beilwe didulong tša bogoši e bile ba rwele mefapahlogo bjalo ka dikgoši. Ba wela fase pele ga Modimo gomme ba re: “E a swanetšwexo ke letaxô le thêtô le matla ke Wene Morêna Modimo wa rena, xobane ke Wene O hlodilexo dilô tšé; xe di tšwêlêla di hlolexile, ké ka xobane O ratile fao.” (Kutollo 4:​11) Bagolo bao ba emela Bakriste ka moka ba tloditšwego ba ba tsošitšwego bao ba dutšego boemong bjo bo phagamego bjo Modimo a ba holofeditšego bjona. Ba tutueletšega go reta Jehofa ka baka la  mediro ya gagwe e megolo e lego mabapi le tlholo. Le rena ka mo go swanago re kgahlišwa ke go bonagatšwa ga “matla a neng le neng, le bomodimo” bja Jehofa. (Ba-Roma 1:​20) Gomme ge re dutše re ithuta kudu ka Jehofa, ke moo re bago le mabaka a oketšegilego a go mo reta bakeng sa mediro ya gagwe e megolo.

Tsebatša Mediro ya Jehofa e Tumišegago!

4, 5. Nea mehlala ya kamoo Dafida a ilego a reta Jehofa ka gona.

⁴ Mopsalme Dafida o ile a tumiša Modimo bakeng sa mediro ya Gagwe e megolo. Ka mohlala, Dafida o opetše ka gore: “Opêlêlang Morêna Mo-dula-Tsione, Le kwatšê ’tirô tš’axwe dithšabeng. Morêna, nna O nkxauxetše; O bone kè hlakišwa ke bahloi, wa nkxomiša dikxorong tša lehu. Xore ke hlabê dirêtô tša xaxo dikxorong tša ngwanenyana wa Tsione.” (Psalme 9:​11, 13, 14) Ka morago ga go nea morwa wa gagwe Salomo polane ya tempele, Dafida o ile a leboga le go reta Modimo ka gore: “Morêna, boxolo ké bya xaxo, le matla, le letaxô, le dithêtô, le borêna . . . O mmuši, O hlôxô ye e iphaxamišitšexo xodimo xa tšohle . . . Modimo, byale rena re a Xo leboxa, re rêta Leina la xaxo le le taxilexo.”​—⁠1 Koronika 29:​10-⁠13.

⁵ Mangwalo a re laletša leboelela​—⁠ee, a re kgothaletša​—⁠gore re rete Modimo go etša ge Dafida a dirile. Puku ya Psalme e na le dipolelo tše dintši tša go reta Modimo, gomme mo e ka bago seripa-gare sa dikopelo tše di hlamilwe ke Dafida. O ile a reta le go leboga Jehofa a sa kgaotše. (Psalme 69:​30) Go feta moo, ga e sa le go tloga mehleng ya bogologolo, dikopelo tše di buduletšwego ke Modimo tša Dafida le ba bangwe di be di dutše di dirišetšwa go reta Jehofa.

6. Dipsalme tše di buduletšwego di ipontšha bjang e le tše di holago go rena?

⁶ Dipsalme ke tše di holago gakaakang go barapedi ba Jehofa! Ge re nyaka go leboga Modimo bakeng sa mediro ya gagwe ka moka e megolo ye a re diretšego yona, menagano ya rena e ka retologela mantšung a mabotse a hwetšwago go Dipsalme. Ka mohlala, ge re tsoga mesong re ka tutueletšega go diriša dipolelo tše swanago le tše: “Xo leboxa Morêna ké mo xo botse, le xo hlaba sefela sa ’ina la xaxo, Wene Yo-xodimo-dimo, Le xo tumiša botho bya xaxo è sa le bosasa, le xo bolêla pôtêxô ya xaxo è sa le bošexo, . . . xobane Wene Morêna O nthabišitše ka ditirô tš’axo; ke hlalalêla tše diatla tš’axo di di dirilexo.” (Psalme 92:​1-⁠4) Ge e ba re fenya lepheko leo le šitišago tšwelopele ya rena ya moya, re ka sekamela go bontšheng lethabo le tebogo thapelong, bjalo ka ge mopsalme a dirile ge a be a opela ka gore: “Tlang Le xobeleng Morêna moxobô, re hlalalêlê Lentswê la xo re phološa. A re lebaneng le Yêna ka xo mo leboxa, re mo xolokê ka difela.”​—⁠Psalme 95:​1, 2.

7. (a) Ke eng seo se lemogegago ka dikopelo tše dintši tšeo di opelwago ke Bakriste? (b) Lebaka le lengwe la go fihla e sa le ka pela dibokeng le go dula go fihla di fela ke lefe?

⁷ Gantši re opelela godimo dikopelo tša go tumiša Jehofa dibokeng tša phuthego, dikopanong tše dinyenyane le dikopanong tše dikgolo. Ke mo go lemogegago gore bontši bja dikopelo tše di theilwe dikgopolong tše di buduletšwego tše di tšwago pukung ya Dipsalme. Re thaba gakaakang go ba le dikopelo tša mehleng yeno tše di thabišago pelo tša go reta Jehofa! Go opelela Modimo ditumišo ke lebaka le lengwe le lebotse kudu la go fihla e sa le ka pela dibokeng tša rena le go ba gona go fihla mafelelong, ka go rialo re kopanela le barapedi-gotee le rena go reteng Jehofa ka kopelo le ka thapelo.

 “Retang Jah!”

8. Ke eng seo se akaretšwago lentšung “Haleluya,” gomme ka tlwaelo le bolela go re’ng?

⁸ Go reta Jehofa go akaretšwa lentšung “Haleluya,” e lego phetolelo ya mmiletšo ya polelwana ya Sehebere yeo e bolelago gore “Retang Jah!” Ka mohlala, go Psalme 135:​1-⁠3, re hwetša taletšo ye e borutho le e matla e rego: “[Retang Jah!, NW] Rêtang leina la Morêna! Rêtang lena bahlanka ba Morêna. Lena Le emexo mo Ngwakong wa Morêna, le mo malapeng a Ngwakô wa Modimo wa rena. Rêtang Morêna xobane ké yo boló; hlabang sefela sa ’ina la xaxwe, xobane le a ratêxa.”

9. Ke eng seo se re tutueletšago go reta Jehofa?

⁹ Ge re dutše re naganišiša ka mediro e kgahlišago ya Modimo ya tlholo le ditiro tša gagwe ka moka tšeo a re diretšego tšona, tebogo e tšwago pelong e re tutueletša gore re mo rete. Ge re dutše re naganišiša ka dilo tše di makatšago tšeo Jehofa a di diretšego batho ba gagwe dinakong tše di fetilego, dipelo tša rena di re tutueletša go mo tumiša. Le gona ge re naganišiša ka dikholofetšo tša dilo tše dikgolo tšeo Jehofa a sa tlago go di dira, re tsoma ditsela tšeo ka tšona re ka bontšhago theto le tebogo.

10, 11. Ke bjang go ba gona ga rena go re neago lebaka la go reta Modimo?

¹⁰ Go ba gona ga rena go re nea lebaka le le kwagalago la go reta Jah. Dafida o opetše ka gore: “Ke a Xo leboxa [Jehofa] x’O mpopile wa matete-tete; medirô y’axo ké mehlôlô; le môya wa-ka o hlatha tše kxolo.” (Psalme 139:​14) Ee, re ‘bopilwe wa matete-tete’ gomme re na le dimpho tše bohlokwa tše bjalo ka go bona, go kwa le bokgoni bja go nagana. Ka baka leo, na ga se ra swanela go diriša bophelo bja rena ka tsela yeo e tlago go reta Modiri wa rena? Paulo o boletše se se swanago ge a be a ngwala gore: “Ké xôna xe Le e-⁠ja, xe Le e-⁠nwa, tšohle tše Le di diraxo Le di dirê xore Modimo a retwê ka tšôna.”​—⁠1 Ba-Korinthe 10:⁠31.

¹¹ Re tla dira dilo ka moka bakeng sa go reta Jehofa ge e ba re mo rata e le ka kgonthe. Jesu o itše molao wa pele o re: “Morêna Modimo wa xaxo O mo ratê ka pelo ya xaxo ka moka, le ka môya wa xaxo ka moka, le ka thlaoloxanyô ya xaxo ka moka, le ka matla a xaxo ka moka.” (Mareka 12:​30; Doiteronomio 6:⁠5) Re tloga re swanetše go rata Jehofa le go mo tumiša bjalo ka Mmopi wa rena le Monei wa “ ’neô tšohle tše botse, le ’mphô tšôhle di tletšexo.” (Jakobo 1:​17; Jesaya 51:​13; Ditiro 17:​28) Ke mo go kwagalago gore re dire bjalo ka gobane bokgoni bja rena bja go nagana, bokgoni bja rena bja go kwešiša dilo tša moya le matla a rena a mmele​—⁠dika tša rena ka moka le bokgoni​—⁠di tšwa go Jehofa. Bjalo ka Mmopi wa rena, o swanelwa ke gore re mo rate le go mo reta.

12. O ikwa bjang ka mediro e megolo ya Jehofa le ka mantšu a Psalme 40:⁠5?

¹² Mediro e megolo ya Jehofa e re nea mabaka a sa balegego a go mo rata le go mo reta! Dafida o opetše ka gore: “Tše Wêna Morêna Modimo wa rena O re diretšexo tšôna ké tše ntši, ké mehlôlô, ké xo re setša. Mo-ka-Wêna xa’yô. Xe nka re ke a di bolêla, ka di anêxêla batho, di mpalêla xo di bala.” (Psalme 40:⁠5) Dafida ga se a ka a kgona go anega mediro ka moka e makatšago ya Jehofa e bile le rena re ka se kgone. Eupša anke ka mehla re reteng Modimo ge re hlokomedišwa modiro le ge e le ofe wa mediro ya gagwe e megolo.

Mediro e Tswalanago le Morero wa Modimo wa ka mo go sa Felego

13. Kholofelo ya rena e kgokagane bjang le mediro e megolo ya Modimo?

¹³ Kholofelo ya rena ka bokamoso e kgokagane le mediro e megolo le e tumišegago e tswalanago le morero wa Modimo wa ka mo go sa felego. Ka morago ga borabele kua Edene, Jehofa o neile boporofeta bja mathomo bjo bo tletšego kholofelo. Ge a be a ahlolela noga, Modimo o itše: “Ke bea lehlôyô xare xa xaxo le mosadi, le xare xa peu ya xaxo le peu ya xaxwe. Yôna e tlo Xo phšatla hlôxô; ’me wêna O tlo e loma serêthê.” (Genesi 3:​15) Kholofelo ya Peu e holofeditšwego ya mosadi e ile ya dula e le gona ka dipelong tša batho ba botegago ka morago ga ge Jehofa a dirile modiro o mogolo ka go phološa Noage le lapa la gagwe Meetse-fuleng a lefaseng ka moka ao a ilego a fediša lefase le kgopo. (2 Petro 2:⁠5) Dikholofetšo  tša boporofeta tšeo di neilwego banna ba tumelo ba bjalo ka Aborahama le Dafida di neile temogo e oketšegilego ka seo Jehofa a bego a tla se phethagatša ka Peu yeo.​—⁠Genesi 22:​15-18; 2 Samuele 7:⁠12.

14. Mohlala o mogolo wa mediro ya Jehofa e megolo yeo a e direlago batho ke ofe?

¹⁴ Go iponagatša ga Jehofa ka tsela e phagamego e le yena yo a dirago mediro e megolo bakeng sa batho go diregile ge a be a nea Morwa wa gagwe yo a tswetšwego a nnoši​—⁠Peu e holofeditšwego, Jesu Kriste​—⁠e le sehlabelo sa topollo. (Johane 3:​16; Ditiro 2:​29-36) Sehlabelo se neile metheo bakeng sa go boelana le Modimo. (Mateo 20:​28; Ba-Roma 5:​11) Jehofa o ile a phutha ba mathomo bao ba boelantšwego le yena ka phuthegong ya Bokriste yeo e hlomilwego ka Pentekoste ya 33 C.E. Ka thušo ya moya o mokgethwa, ba ile ba bolela ditaba tše dibotse kgole le kgaufsi, ba bontšha kamoo lehu la Jesu gotee le tsogo ya gagwe di bulelago batho bao ba kwago tsela ka gona bakeng sa go hwetša ditšhegofatšo tša ka mo go sa felego ka tlase ga pušo ya Mmušo wa Modimo wa legodimong.

15. Jehofa o ile a gata bjang mogato ka tsela e kgahlišago mehleng ya rena?

¹⁵ Mehleng ya rena, Jehofa o gatile mogato ka mokgwa o kgahlišago bakeng sa go kgoboketša Bakriste ba mafelelo ba tloditšwego. Diphefo tša phedišo di ile tša swarwa e le gore mašaledi a ba 144 000 bao ba tlago go buša le Kriste legodimong a swawe. (Kutollo 7:​1-⁠4; 20:⁠6) Modimo o ile a kgonthišetša gore Bakriste ba tloditšwego ba lokollwa bokgobeng bja moya bja “Babele o moxolo,” mmušo wa lefase wa bodumedi bja maaka. (Kutollo 17:​1-⁠5) Go lokollwa moo ka 1919 le tšhireletšo ya Modimo yeo ba bilego le yona ga e sa le go tloga ka nako yeo go dumeletše mašaledi a batlotšwa go dira’ng? Gore a bonege ge a nea bohlatse bja mafelelo pele ga ge Jehofa a ka fediša tshepedišo e kgopo ya dilo ya Sathane ‘masetla-pelong a magolo’ ao a batamelago ka lebelo.​—⁠Mateo 24:​21; Daniele 12:⁠3; Kutollo 7:⁠14.

16. Ke eng seo se diregago e le mafelelo a modiro wa mehleng yeno wa go bolela ka Mmušo lefaseng ka bophara?

¹⁶ Dihlatse tša Jehofa tše di tloditšwego di eteletše pele ka phišego modirong wa lefase ka bophara wa go bolela ka Mmušo. E le mafelelo a se, palo e oketšegago ya “dinku tše dingwê” ga bjale e ba barapedi ba Jehofa. (Johane 10:​16) Re thabela gore sebaka se sa dutše se bulegetše ba ikokobeditšego ba lefase go ka re tlatša go reteng Jehofa. Bao ba arabelago taletšong ya go re “tlaa” ba boemong bja go ka phološwa masetla-pelong a magolo, ba e-⁠na le tebelelo ya go reta Jehofa ka mo go sa felego.​—⁠Kutollo 22:⁠17.

Ba Dikete ba Kgeregela Borapeding bja Therešo

17. (a) Jehofa o dira bjang mediro e megolo mabapi le modiro wa rena wa boboledi? (b) Sakaria 8:​23 e phethagatšwa bjang?

¹⁷ Jehofa ga bjale o dira mediro e megolo le e tumišegago mabapi le modiro wa rena wa boboledi. (Mareka 13:​10) Nywageng ya morago bjale, o ‘butše mejako e megolo yeo e išago modirong.’ (1 Ba-Korinthe 16:⁠9, NW) Se se dirile gore go kgonege gore ditaba tše dibotse di tsebatšwe mašemong ka moka a magolo moo manaba a therešo nakong e fetilego a bego a di eme tseleng. Ba bantši bao ba kilego ba phela lefsifsing la moya ga bjale ba arabela taletšong ya go rapela Jehofa. Ba phethagatša mantšu a a boporofeta: “Morena wa mašaba ó re: Mehleng yeo banna ba lesome ba mebolêlô ya mehuta-huta ba tlo swara monna wa Mo-Juda ka kobô, ba re: A nkê re yê le lena, ka xobane re kwile xore Modimo ó na le lena.” (Sakaria 8:​23) Batho ba bao  “banna ba lesome” ba bolelago le bona ke ba-Juda ba moya, mašaledi a mehleng yeno a Bakriste ba tloditšwego. Ka ge palo ya lesome e ka emela go phethagala ga dilo tša lefaseng, “banna ba lesome” ba emela “lešaba le lexolo” leo le kopantšwego le “ba-Isiraele ba Modimo,” bao ge ba kopane ba bopago “mohlape o tee.” (Kutollo 7:​9, 10; Ba-Galatia 6:​16) Ke mo go thabišago gakaakang go bona ba bantši gakaakaa ga bjale ba nea tirelo e kgethwa gotee e le barapedi ba Jehofa Modimo!

18, 19. Ke bohlatse bofe bjo bo lego gona bja gore Jehofa o šegofatša modiro wa boboledi?

¹⁸ Re thabišwa ke gore ba dikete tše masome​—⁠ge e le gabotse ba dikete tše makgolo​—⁠ba amogela borapedi bja therešo dinageng tšeo pele di bego di bušwa ke bodumedi bja maaka mo e lego gore go be go bonagala eka batho ba ka se tsoge ba bile ba amogetše ditaba tše dibotse. Lebelela Yearbook of Jehovah’s Witnesses ya lenyaga, gomme o ele hloko dinaga tšeo ga bjale di begago bagoeledi ba Mmušo ba tlogago go ba 100 000 go fihla go ba e nyakilego go ba ba 1 000 000. Bjo ke bohlatse bjo matla bja gore modiro wa go bolela ka Mmušo o šegofatšwa ke Jehofa.​—⁠Diema 10:⁠22.

¹⁹ Ka ge re le batho ba Jehofa, re reta le go leboga Tatago rena wa legodimong ka ge a re neile morero wa kgonthe bophelong, modiro o putsago tirelong ya gagwe le tebelelo e kgahlišago ka bokamoso. Re phela ka tetelo-kgolo re letetše go bona go phethagala ga dikholofetšo ka moka tša Modimo gomme re ikemišeditše go ‘ipoloka leratong la Modimo re lebeletše bophelo bjo bo sa felego.’ (Juda 20, 21, bapiša le NW.) Re thabile gakaakang go bona gore lešaba le legolo leo le retago Modimo ga bjale le balelwa go 6 000 000! Ka tšhegofatšo ya Jehofa e bonagalago, mašaledi a batlotšwa gotee le bagwera ba ona ba dinku tše dingwe ba rulagantšwe ka diphuthego tše ka bago 91 000 dinageng tše 235. Ka moka ga rena re fepša gabotse moyeng ka maiteko a go se lape a “molaki e a bôtêxaxo yo bohlale.” (Mateo 24:​45) Mokgatlo wa pušo ya Modimo o tšwelago pele ka taolo e lerato o hlokometše modiro wa Mmušo ka diofisi tše 110 tša makala tša Dihlatse tša Jehofa. Re leboga gore Jehofa o tutueditše dipelo tša batho ba gagwe go ‘mo godiša ka dilo tša bona tše bohlokwa.’ (Diema 3:​9, 10, bapiša le NW.) Ka baka leo, modiro wa rena wa boboledi wa lefaseng ka bophara o tšwela pele, ka ditlabakelo tša go gatiša, magae a Bethele le a baromiwa, Diholo tša Mmušo le Diholo tša Kopano tše di agwago ge di nyakega.

20. Go naganišiša ka mediro ya Jehofa e megolo le e tumišegago go swanetše go re kgoma bjang?

²⁰ Ga go kgonege gore re ka bolela mediro ka moka e megolo le e tumišegago ya Tatago rena wa legodimong. Eupša, na motho le ge e le mang wa pelo e lokilego a ka tlogela go tlatša lešaba la barapedi ba Jehofa? Ga go bjalo le gatee! Ka gona, anke barati ka moka ba Modimo ba goeletše ka lethabo gore: “[Retang Jah, lena batho!, NW] Rêtang Morêna Lè le kwa maxodimong! Mo reteng Lè le kwa maphaxamong! Mo reteng, lena Batseta b’axwe bohle! . . . Lena masoxana le lena basetsana, ba baxolo le ba bafsa, bohle a ba rêtê ’ina la Morêna, xobane ’ina la xaxwe ké lôna ’ina-lephaxami lè le nnoši; letaxô la xaxwe le ukametše ’fase lé le maxodimo.” (Psalme 148:​1, 2, 12, 13) Ee, gona bjale le go iša ka mo go sa felego, anke re reteng Jehofa bakeng sa mediro ya gagwe e megolo!

O tla Araba Bjang?

• E mengwe ya mediro ya Jehofa e tumišegago ke efe?

• Ke ka baka la’ng o ikwa o tutueletšega go reta Jehofa?

• Kholofelo ya rena e tswalana bjang le mediro e megolo ya Modimo?

• Jehofa o dira bjang mediro e tumišegago mabapi le modiro wa go bolela ka Mmušo?

[Dipotšišo tša Thuto]

[Seswantšho go letlakala 10]

Na o kopanela ka pelo ka moka go opeleleng Jehofa ditumišo?

[Diswantšho go letlakala 13]

Re thabela gore sebaka se sa dutše se bulegetše ba ikokobeditšego go ka re tlatša go reteng Jehofa