Tlhahlo ya Modimo Bakeng sa go Kgetha Molekane wa Lenyalo
Tlhahlo ya Modimo Bakeng sa go Kgetha Molekane wa Lenyalo
“Ke tlo Xo lemôša ka Xo ruta tsela ye O tl’o xo e swara, ka Xo eletša mahlô a-ka à Xo ukametše.”—PSALME 32:8.
1. Ke dilo dife tšeo di nyakegago bakeng sa lenyalo le le atlegilego?
BALETŠI ba meropa ba thoma go letša meropa ya bona. Seopedi se tsenelela ka bokgoni ka lentšu la sona le bosana. Seo se feleletša ka mmino o bose. Banna ba babedi ba fološa mapokisi a boima a merwalo loring e kgolo. Ba fošetša bathuši ba bona mapokisi, bathuši ba a kama gabonolo, ba a bea fase gomme ba letela le lengwe. Ditiro tše ka bobedi di bonagala di dirwa ka ntle le boiteko. Lega go le bjalo, ga go na motho yo a bego a ka ba a leka go di dira ka ntle le go itlwaetša, a se na mothuši yo a nago le bokgoni, le gona sa bohlokwa kudu a se a hwetša mohuta o nepagetšego wa tlhahlo. Ka mo go swanago, lenyalo le lebotse le ka bonagala e fo ba selo se se itiragalelago feela. Lega go le bjalo, le lona le ithekgile ka molekane yo a swanetšego, go swarišana boitekong bjo bo dirwago gomme kudu-kudu le ithekgile ka keletšo e bohlale. Ruri, go nyakega tlhahlo e nepagetšego.
2. (a) Ke mang yo a hlomilego thulaganyo ya lenyalo, gomme ka morero ofe? (b) Dithulaganyo tše dingwe tša manyalo di ile tša dirwa bjang?
2 Ke ga tlhago gore lesogana goba kgarebe yeo e sego ya nyalwa e nagane ka molekane wa lenyalo—molekane bophelong. Ga e sa le go tloga ge le be le hlongwa ke Jehofa Modimo, lenyalo la monna le mosadi e be e dutše e le tsela e tlwaelegilego ya bophelo. Eupša motho wa pele Adama, ga se a ikgethela mosadi wa gagwe. Ka lerato Jehofa o ile a mo nea yena. (Genesi 2:18-24) Banyalani ba mathomo ba be ba tla ikatiša e le gore mafelelong lefase le tle le tlale ka batho. Ka morago ga lenyalo leo la mathomo, dithulaganyo tša lenyalo ka mehla di be di dirwa ke batswadi ba monyadi le ba monyadiwa, ka dinako tše dingwe di dirwa ka morago ga go hwetša tumelelo ya bao ba akaretšwago. (Genesi 21:21; 24:2-4, 58; 38:6; Jošua 15:16, 17) Le ge manyalo a go kgethelwa molekane a sa dutše a tlwaelegile dinageng tše dingwe le ditšong tše dingwe, ba bantši lehono ba ikgethela molekane wa lenyalo.
3. Molekane wa lenyalo o swanetše go kgethwa bjang?
3 Go kgetha molekane wa lenyalo go swanetše go dirwa bjang? Ba bangwe ba tutuetšwa ke ponagalo—seo ba se hwetšago se kgahliša e bile se kganyogega ge se lebelelwa. Ba bangwe ba lebelela mehola ya dilo tše di bonagalago, ba lebelela motho yo a tlago go ba hlokomela gabotse gomme a ba nea dinyakwa tša bona le dilo tše ba di ratago. Eupša na mokgwa le ge e le ofe wa ye e mebedi o ka lebiša tswalanong e thabišago le e kgotsofatšago? Diema 31:30 e re: “Botsôrô bo a fora, le botse ké lefêla; mosadi xo rêtwa mo-šia-Morêna.” Gona moo ke mo go letšego taba e bohlokwa: Nagana ka Jehofa ge o kgetha molekane.
Tlhahlo e Lerato e Tšwago go Modimo
4. Ke thušo efe yeo Modimo a e neago mabapi le go kgetha molekane wa lenyalo?
4 Tatago rena wa legodimong yo lerato, Jehofa, o neile Lentšu la gagwe le le ngwadilwego bakeng sa go re hlahla ditabeng ka moka. O re: “Nna Morêna Modimo wa xaxo ke Xo ruta tše di Xo holaxo; ke Xo sepediša mo tseleng ye O swanetšexo xo e swara.” (Jesaya 48:17) Ka gona, ga se mo go makatšago go hwetša tlhahlo e kgonthišeditšwego bakeng sa go kgetha molekane wa lenyalo ka Beibeleng. Jehofa o nyaka gore manyalo a rena e be a swarelelago le a thabilego. Ka gona, o re neile thušo bakeng sa go kwešiša le go diriša tlhahlo ye. Na ga se seo re bego re ka se letela go Mmopi wa rena yo lerato?—Psalme 19:8.
5. Ke eng seo se nyakegago bakeng sa lethabo leo le swarelelago lenyalong?
5 Ge Jehofa a be a hloma thulaganyo ya lenyalo, o be a rerile gore e be tlemo e swarelelago. (Mareka 10:6-12; 1 Ba-Korinthe 7:10, 11) Ke ka baka leo a ‘hloilego tlhalo,’ a e dumelelago feela ka lebaka la “bootswa.” (Maleaki 2:13-16; Mateo 19:9) Ka gona, go kgetha molekane wa lenyalo ke o mongwe wa megato e bohlokwa kudu yeo re ka e gatago gomme ga se gwa swanela go tšewa gabohwefo. Ga se diphetho tše dintši tšeo di ka tlišago lethabo goba manyami go swana le ye. Mola kgetho e botse e ka humiša bophelo bja motho le go bo dira bjo bo kgotsofatšago, kgetho e sego bohlale yona e ka tliša manyami a sa felego. (Diema 21:19; 26:21) Gore lethabo le tšwele pele le le gona, ke gabohlokwa go kgetha ka bohlale le go ikemišetša go dira kholofetšo e swarelelago, ka gobane Modimo o hlomile lenyalo e le kgwerano yeo e tlago go atlegišwa ke go dumelelana le go dirišana.—Mateo 19:6.
6. Ke ka baka la’ng masogana le dikgarebe ka mo go kgethegilego ba swanetše go ela hloko ge ba kgetha molekane, gomme ke bjang ba ka dirago phetho e bohlale kudu?
6 Masogana le dikgarebe ka mo go kgethegilego ba swanetše go ela hloko kudu gore go gogwa ke botse bja ka ntle le dikganyogo tše matla di se ke tša kgopamiša kahlolo ya bona ge ba kgetha molekane. Ka kgonthe, tswalano e theilwego feela mabakeng a bjalo e ka fela kapejana gomme ya feleletša ka lenyatšo goba gaešita le lehloyo. (2 Samuele 13:15) Ka lehlakoreng le lengwe, lerato leo le swarelelago le ka hlagolelwa ge re dutše re tsebana le balekane ba rena gotee le ge re dutše re ikwešiša gakaone. Gape re swanetše go lemoga gore seo se re loketšego e ka no se be seo dipelo tša rena di bego di se kganyoga mathomong. (Jeremia 17:9) Ke ka baka leo tlhahlo ya Modimo yeo e hwetšwago ka Beibeleng e lego bohlokwa kudu. E re thuša go lemoga kamoo re ka dirago diphetho tše bohlale kudu bophelong. Mopsalme o ile a emela Jehofa a re: “Ke tlo Xo lemôša ka Xo ruta tsela ye O tl’o xo e swara, ka Xo eletša mahlô a-ka à Xo ukametše.” (Psalme 32:8; Ba-Hebere 4:12) Le ge lenyalo le ka kgotsofatša senyakwa se re tswetšwego re e-na le sona sa go nyaka go ratwa le bogwera, gape le tliša ditlhohlo tšeo di nyakago kgolo e lekanego le temogo.
7. Ke ka baka la’ng ba bangwe ba sa amogele keletšo e theilwego Beibeleng mabapi le go kgetha molekane, gomme tsela ye e ka lebiša go eng?
7 Ke gabohlale go theetša seo Mohlami wa lenyalo a se bolelago tabeng ya go kgetha molekane. Lega go le bjalo, re ka ithiba ditsebe go kwa ge keletšo e theilwego Beibeleng e newa ke batswadi goba ke bagolo ba Bakriste. Re ka ikwa eka ga ba re kwešiše ka mo go feletšego, gomme dikganyogo tše matla tša maikwelo di ka re hlohleletša go latela tshekamelo ya pelo. Lega go le bjalo, ka morago ge re šetše re lebeletšane le ditherešo tša bophelo, re ka itsholela gore ga se ra theetša keletšo e bohlale yeo e bego e newa bakeng sa go re hola. (Diema 23:19; 28:26) Re ka ikhwetša re le lenyalong leo le se nago lerato, re e-na le bana bao re palelwago ke go ba hlokomela gomme mohlomongwe e bile re e-na le molekane yo a sa dumelego. E tla ba mo go nyamišago gakaakang ge e ba thulaganyo yeo e ka bego e re tlišeditše lethabo le legolo e e-ba mothopo wa kgateletšego e kgolo!
Boineelo go Modimo—Ntlha ya Bohlokwa
8. Ke bjang boineelo go Modimo bo thušago lenyalo go ba le le swarelelago le leo le tlišago lethabo?
8 Ka mo go amogelegago, maikwelo a go kgahlegelana a thuša go tiiša lenyalo. Eupša ditekanyetšo tšeo ka bobedi le nago le tšona ke tše bohlokwa kudu bakeng sa go dira gore tlemo ya lenyalo e be e swarelelago gotee le go tšweletša lethabo. Ge bobedi bja lena le ineetše go Jehofa Modimo, se se bopa tlemo e swarelelago le go godiša botee ka tsela yeo go se nago selo se sengwe seo se ka dirago bjalo. (Mmoledi 4:12) Ge banyalani ba Bakriste ba thea maphelo a bona borapeding bja therešo bja Jehofa, e ba batee moyeng, monaganong le boitshwarong. Ba ithuta Lentšu la Modimo gotee. Ba rapela gotee, gomme seo se kopanya dipelo tša bona. Ba sepela gotee go ya dibokeng tša Bokriste le go šoma gotee bodireding bja tšhemo. Se ka moka se thuša go tšweletša tlemo ya moya yeo e dirago gore ba batamelane. Selo sa bohlokwa kudu ke gore se se feleletša ka ditšhegofatšo tša Jehofa.
9. Aborahama o ile a dira eng tabeng ya go hweletša Isaka mosadi, gomme ka mafelelo afe?
9 Ka baka la boineelo bja gagwe go Modimo, mopatriareka yo a botegago Aborahama o ile a tsoma go thabiša Modimo ge nako ya go kgethela morwa wa gagwe Isaka mosadi e be e fihlile. Aborahama o ile a bolela le mohlanka wa ntlo ya gagwe yo a botwago a re: “Xore ke Xo enišê ka Morêna Modimo wa lexodimo le lefase, xore morwa wa-ka O ka se mo tšeišê mosadi mo xo basetsana ba Ba-Kanana ba ke axilexo le bôná. O ênê xore O tlo ya naxeng ya xešo le metswalong ya-ka, wa nyakêla Isaka morwa wa-ka mosadi xôna-kua. . . . [Jehofa] ó tlo roma Morongwa wa xaxwe a Xo hlahla, xore mosadi wa morwa wa-ka O mo tšeê xôna-kua.” Rebeka o ile a ipontšha e le mosadi wa makgonthe, yo Isaka a ilego a mo rata kudu.—Genesi 24:3, 4, 7, 14-21, 67.
10. Ke boikarabelo bofe bja Mangwalo bjo bo beetšwego banna le basadi?
10 Ge e ba re le Bakriste ba sego lenyalong, boineelo go Modimo bo tla re thuša go tšweletša dika tšeo di tla dirago gore re kgone go fihlelela dilo tšeo di nyakegago go ya ka Mangwalo lenyalong. Gare ga boikarabelo bja banna le basadi go na le bjo bo tsopotšwego ke moapostola Paulo ge a re: “Lena Basadi, Le bê ba ba kwaxo banna ba lena, byalo ka xe Le e-kwa Morêna. . . . Lena Banna, ratang basadi ba lena, byalo ka xe Kriste a ratile phuthêxô, a ikxafa ka ’baka la yôna . . . Banna a ba tsebê xe xo ba swanetše xe ba rata basadi ba bôná, ka mokxwa wo ba rataxo mebele ya bôná ka wôna . . . Mang le mang a ratê mosadi wa xaxwe ka mokxwa wo a ithataxo ka wôna; xore mosadi yêna a boifê monna.” (Ba-Efeso 5:22-33) Ka ge re ka bona, mantšu a Paulo a buduletšwego a gatelela go nyakega ga lerato le tlhompho. Go dumelelana le keletšo ye go akaretša poifo ya borapedi ya go boifa Jehofa. Go nyaka boineelo bja pelo ka moka dinakong tše botse gotee le tše mpe. Bakriste bao ba akanyetšago go tsena lenyalong ba swanetše go kgona go rwala boikarabelo bjo.
Go Dira Phetho ya Gore o tla Tsena Lenyalong Neng
11. (a) Ke keletšo efe mabapi le gore motho a ka tsena neng lenyalong yeo e newago ka Mangwalong? (b) Ke mohlala ofe o bontšhago bohlale bja go latela keletšo ya Beibele e ngwadilwego go 1 Ba-Korinthe 7:36?
11 Go tseba nako yeo re loketšego go tsena lenyalong ka yona ke ga bohlokwa. Ka ge se se fapana go ya ka batho, Mangwalo ga a šupe bogolo bja nywaga. Lega go le bjalo, a bontšha gore go kaone go leta go fihla ge re ‘fetile lebakeng la bofsa,’ e lego nakong yeo ka yona dikganyogo tše matla tša botona le botshadi di ka kgopamišago kahlolo e botse. (1 Ba-Korinthe 7:36, NW) Michelle o re: “Ge ke be ke bona bagwera ba-ka ba beana mabaka e bile ba tsena lenyalong, ba bantši ba le nywageng ya bona ya bofsa, ka dinako tše dingwe go be go e-ba thata go diriša keletšo ye. Eupša ke ile ka lemoga gore keletšo e tšwa go Jehofa, gomme o re botša feela seo se tlago go re hola. Ge ke be ke sa letetše go tsena lenyalong, ke ile ka kgona go lebiša tlhokomelo tswalanong ya-ka le Jehofa le go hwetša phihlelo e itšego bophelong, yeo o ka se kgonego go ba le yona nywageng ya gago ya bofsa. Nywageng ya ka morago, ke be ke itokišitše gakaone go ka swaragana le boikarabelo gotee le mathata ao a rotogago lenyalong.”
12. Ke ka baka la’ng e se gabohlale go kitimela go tsena lenyalong o sa le yo monyenyane?
12 Bao ba kitimelago go tsena lenyalong mola e sa le ba banyenyane kudu gantši ba hwetša gore dinyakwa le dikganyogo tša bona di a fetoga ge ba dutše ba gola. Ke moka ke gona ba lemogago gore dilo tšeo mathomong ba bego ba bona di kgahliša ga di sa le bohlokwa gakaalo. Mokriste yo mongwe yo mofsa o be a ikemišeditše go nyalwa ge a be a e-na le nywaga e 16. Makgolo wa gagwe le mmagwe ba nyetšwe ba le nywageng yeo. Ge lesogana leo a bego a le rata le be le gana go mo nyala ka nako yeo, o ile a kgetha motho yo mongwe yo a bego a se na bothata ka seo. Lega go le bjalo, ka moragonyana bophelong o ile a lla kudu ka baka la phetho yeo a ilego a e dira ka lebelo.
13. Bao ba tsenago lenyalong pele ga nako gantši ba hlaelelwa tabeng efe?
13 Ge o akanyetša go tsena lenyalong, ke gabohlokwa gore o be le kwešišo e feletšego ka sohle seo se akaretšwago. Lenyalo la pele ga nako le ka tliša mathata a mantši ao banyalani ba bafsa ba sego ba itokišeletša gabotse go ka swaragana le ona. Ba ka be ba hloka phihlelo le kgolo tšeo di nyakegago bakeng sa go lebeletšana le dikgateletšego tša lenyalo le go godiša bana. Motho o swanetše go tsena lenyalong ge feela a loketše mmeleng, monaganong le moyeng go ka tsenela kgwerano e swarelelago.
14. Ke eng seo se nyakegago bakeng sa go swaragana le maemo a gateletšago lenyalong?
14 Paulo o ngwadile gore bao ba tsenago lenyalong ‘ba tlo tlaišega nameng.’ (1 Ba-Korinthe 7:28, PK) Mathata a tla rotoga ka gobane go na le dimelo tše pedi tše di fapanego, gomme dikgopolo di tla fapana. Ka baka la go se phethagale ga batho, mohlomongwe go ka ba thata go phethagatša karolo ya rena ya Mangwalo thulaganyong ya lenyalo. (1 Ba-Korinthe 11:3; Ba-Kolose 3:18, 19; Tito 2:4, 5; 1 Petro 3:1, 2, 7) Go nyakega go gola le go tsepama moyeng bakeng sa go tsoma le go latela tlhahlo ya Modimo e le gore motho a ka lokiša ka lerato maemo a gateletšago.
15. Ke tema efe yeo batswadi ba ka e kgathago go lokišeletša bana ba bona go tsena lenyalong? Bontšha.
15 Batswadi ba ka lokišeletša bana ba bona go tsena lenyalong ka go ba thuša go kwešiša bohlokwa bja go latela tlhahlo ya Modimo. Ka go diriša Mangwalo le dipuku tša Bokriste ka bokgoni, batswadi ba ka thuša bana ba bona go bona ge e ba bona goba bao e tlago go ba balekane ba bona ba loketše go ka tsenela tlemo ya lenyalo. * Blossom wa nywaga e 18 o be a nagana gore yena le lesogana la phuthegong ya gabo ba a ratana. Lesogana e be e le modiredi wa mmulamadibogo wa nako e tletšego, gomme ba be ba nyaka go nyalana. Eupša batswadi ba gagwe ba ile ba mo kgopela gore a lete ngwaga o tee, ba nagana gore e sa le yo monyenyane kudu. Ka morago Blossom o ngwadile gore: “Ke leboga kudu gore ke ile ka theetša keletšo yeo e bohlale. Pele ga ge ngwaga o ka fela, ke ile ka gola ka mo go oketšegilego gomme ka thoma go bona gore lesogana le le be le se na dika tšeo di bego di tla mo dira molekane wa lenyalo yo a swanetšego. Mafelelong le ile la tlogela mokgatlo, gomme ke phologile seo nkabego e bile masetla-pelo bophelong bja-ka. Ke mo go kgahlišago gakaakang go ba le batswadi ba bohlale bao kahlolo ya bona e lego yeo go ka ithekgwago ka yona!”
‘Nyala Feela Moreneng’
16. (a) Ke bjang Bakriste ba ka lekegago mabapi le ‘go nyala Moreneng’? (b) Bakriste ba swanetše go nagana ka eng ge e ba ba lekega go nyalana le motho yo e sego modumedi?
16 Tlhahlo ya Jehofa go Bakriste ke e kwagalago kudu: ‘Nyala feela Moreneng.’ (1 Ba-Korinthe 7:39) Batswadi ba Bakriste le bana ba bona ba ka lekega mo tabeng ye. Bjang? Bafsa ba ka rata go tsena lenyalong, eupša go ka ba go se na balekane ka phuthegong. Ge e le gabotse go bonagala go le bjalo. Lefelong le lengwe basadi ba ka ba ba feta banna ka palo, goba go ka ba go se na yo a swanelegago lefelong la geno. Lesogana leo e sego setho se se ineetšego sa phuthego le ka bontšha kgahlego go kgarebe ya Mokriste (goba lesogana la Mokriste le ka kganyoga kgarebe yeo e sego Mokriste), gomme kgarebe e ka ikwa e gateletšega go kwanantšha ditekanyetšo tšeo Jehofa a di beilego. Ka tlase ga maemo a bjalo, e tla ba mo go botse go nagana ka mohlala wa Aborahama. Tsela e nngwe yeo ka yona a ilego a boloka tswalano ya gagwe e botse le Modimo e bile ka go kgonthišetša gore morwa wa gagwe Isaka o nyala morapedi wa therešo wa Jehofa. Isaka o dirile ka mo go swanago tabeng ya morwa wa gagwe Jakobo. Se se ile sa nyaka gore bohle bao ba akaretšwago ba dire boitapišo, eupša se ile sa thabiša Modimo gomme sa feleletša ka ditšhegofatšo tša gagwe.—Genesi 28:1-4.
17. Ke ka baka la’ng go nyalana le motho yo a sa dumelego gantši go le kotsi, gomme lebaka la bohlokwa-hlokwa la ‘go nyala feela Moreneng’ ke lefe?
17 Maemong a sego kae, motho yo a sa dumelego o ile a feleletša a fetogile Mokriste. Lega go le bjalo, go nyalana le motho yo a sa dumelego gantši go ipontšhitše go le kotsi. Bao ba tsenago jokong e sa leka-lekanego ga ba na tumelo, ditekanyetšo le dipakane tše di swanago. (2 Ba-Korinthe 6:14, NW) Se se ka ba le mafelelo a senyago poledišanong le lethabong la lenyalo. Ka mohlala, mosadi yo mongwe wa Mokriste o ile a lla kudu ka taba ya gore ka morago ga diboka tše agago, o be a ka se kgone gore ge a fihla gae a boledišane ka dilo tša moya le molekane wa gagwe yo a sa dumelego. Go ba gona, sa bohlokwa kudu ke gore ‘go nyala Moreneng’ ke taba ya go botegela Jehofa ka go se kwanantšhe. Ge re itshwara ka go dumelelana le Lentšu la Modimo, dipelo tša rena ga di re ganetše, ka gobane re dira “se se Mo kxahlaxo.”—1 Johane 3:21, 22.
18. Ge o akanyetša go tsena lenyalong, ke ditaba dife tše bohlokwa tšeo go swanetšwego go lebiša tlhokomelo go tšona, gomme ka baka la’ng?
18 Ge o nagana go tsena lenyalong, bokwala le boemo bja moya bja yo e tlago go ba molekane wa gago e swanetše go ba dilo tša pele tše o tshwenyegago ka tšona. Semelo sa Mokriste, gotee le lerato la go rata Modimo le go ineela ka pelo ka moka go yena, ke tša bohlokwa kudu go feta botse bja ka ntle. Go amogelwa ke Modimo go thabelwa ke bao ba thabelago le bao ba phethagatšago tlamo ya bona ya go ba balekane ba lenyalo ba tiilego moyeng. Le gona matla a magolo ao banyalani ba ka bago le ona a tlišwa ke go ineela ka tsela e swanago go Mmopi le go amogela ka mo go tletšego tlhahlo ya gagwe. Ka tsela ye Jehofa o a godišwa gomme lenyalo le thoma motheong o tiilego wa moya woo o tla tlaleletšago tlemong e swarelelago.
[Mengwalo ya ka tlase]
^ ser. 15 Bona Morokami wa February 15, 1999, matlakala 4-8.
O tla Araba Bjang?
• Ke ka baka la’ng tlhahlo ya Modimo e nyakega bakeng sa go kgetha molekane yo a swanetšego wa lenyalo?
• Ke bjang boineelo go Modimo bo ka thušago go matlafatša tlemo ya lenyalo?
• Batswadi ba lokišeletša bjang bana ba bona bakeng sa go tsena lenyalong?
• Ke ka baka la’ng go le bohlokwa ‘go nyala feela Moreneng’?
[Dipotšišo tša Thuto]
[Diswantšho go letlakala 17]
Go diriša keletšo ya Modimo go kgetheng molekane go ka feleletša ka lethabo le legolo
[Diswantšho go letlakala 18]
Ditšhegofatšo tše humilego di tlišwa ke ‘go nyala feela Moreneng’