Dipotšišo tše Tšwago go Babadi

Ka baka la ge Jehofa e le yo a ikemišeditšego go lebalela dibe ka mohola wa sehlabelo sa topollo, ke ka baka la’ng go nyakega gore Bakriste ba ipobole go banna ba bagolo ka phuthegong?

Bjalo ka ge go ka bonwa tabeng ya Dafida le Batseba, Jehofa o ile a lebalela sebe sa Dafida gaešita le ge e be e le se segolo ka baka la go itshola e le ka kgonthe ga Dafida. Ge moporofeta Nathane a be a boledišana le yena, Dafida o ile a ipobola ka bolokologi gore: “Ke senyeditše Jehofa.”​—2 Samuele 12:​13, NW.

Lega go le bjalo, Jehofa ga a amogele feela boipobolo bja kgonthe bja modiradibe gotee le go mo lebalela eupša gape o dira ditokišetšo tše lerato bakeng sa go thuša mofoši gore a dire tšwelopele ya go boela sekeng moyeng. Tabeng ya Dafida, thušo e ile ya tla ka moporofeta Nathane. Lehono, ka phuthegong ya Bokriste go na le banna ba bagolo ba ba godilego moyeng goba bagolo. Morutiwa Jakobo o hlalosa gore: “Xe e mongwê wa lena a babya [moyeng], a bitšê baxolo ba phuthêxô, ba tlê ba mo rapêlêlê bà mo tlodišê makhura Leineng la Morêna. ’Me thapêlô ya tumêlô e tlo phološa molwetši. Morêna ó tlo mo tsoša; xe a dirile dibe ó tlo lebalêlwa.”​—Jakobo 5:​14, 15.

Bagolo bao ba nago le phihlelo ba ka dira mo gontši go fodiša bohloko bja pelo bjo bo kwewago ke modiradibe yo a itsholago. Ba katanela go ekiša Jehofa ge ba dirišana le yena. Le ka mohla ga ba  nyake go ba bogale, gaešita le ge tayo e tiilego e ka ba e swanetšego. Go e na le moo, ka kwelobohloko ba ela hloko dinyakwa tše di lebanyago tša motho yoo. Ka go se fele pelo ba katanela go lokiša tsela ya go nagana ya mofoši ka go diriša Lentšu la Modimo. (Ba-Galatia 6:1) Gaešita le ge motho a sa ipobole sebe sa gagwe ka go tšwa go yena, o sa dutše a ka tutueletšega go itshola ge bagolo ba boledišana le yena, bjalo ka ge Dafida a ile a dira bjalo ge Nathane a be a boledišana le yena. Ka gona thekgo yeo e newago ke bagolo e thuša mofoši go phema kotsi ya go bušeletša sebe le mafelelo a kotsi a go ba molemaledi wa sebe.​—Ba-Hebere 10:​26-31.

Go tloga go se bonolo go ipobola go ba bangwe ka ditiro tše lešago dihlong le go tsoma tebalelo. Go nyakega matla a ka gare. Lega go le bjalo, nagana go se nene ka kgetho e nngwe e ka bago gona. Monna yo mongwe yo a ilego a palelwa ke go utolla sebe sa gagwe se segolo go bagolo ka phuthegong o itše: “Ke ile ka kwa bohloko bjo bo sa tlogego pelong ya-ka. Ke ile ka itapiša ka mo go oketšegilego modirong wa boboledi, eupša maikwelo a go itshola a ile a dula a le gona.” O be a nagana gore go ipobola go Modimo ka thapelo go be go lekane, eupša go a bonagala gore go be go se bjalo, ka gobane o ile a ba le maikwelo a swanago le a Kgoši Dafida. (Psalme 51:​8, 11) Go kaone gakaakang go amogela thušo e lerato yeo Jehofa a e neago ka bagolo!