Go Gatela Pele go ya Phenyong ya Mafelelo!

“Ka lebelêla ka bôna pitsi e thšweu; e a e nametšexô à swere borá, a fiwa mphapahlôxo, [a fenya le go phetha phenyo ya gagwe, NW].”​—KUTOLLO 6:2.

1. Ke ditiragalo dife tša nakong e tlago tšeo Johane a di bonego ponong?

KA TLASE ga pudulelo ya Modimo moapostola Johane o ile a kgona go bona tša nywageng e 1 800 e sa lego ka pele gomme a hlalosa go bewa sedulong ga Kriste e le Kgoši. Johane o be a nyaka tumelo ya go dumela seo a se bonego ponong. Rena lehono re na le bohlatse bjo bo bonagalago gabotse bja gore go bewa sedulong sa bogoši mo go boletšwego e sa le pele go diragetše ka 1914. Ka mahlo a tumelo, re bona Jesu Kriste “a fenya le go phetha phenyo ya gagwe.”

2. Diabolo o ile a arabela bjang go tswalweng ga Mmušo, gomme se ke bohlatse bja eng?

² Ka morago ga go tswalwa ga Mmušo, Sathane o ile a rakwa legodimong, seo sa mo dira gore a lwe ka matla le ka kgalefo e kgolo eupša le gatee a sa kaonefatše dibaka tša gagwe tša go atlega. (Kutollo 12:​7-12) Kgalefo ya gagwe e dirile gore maemo a lefase e be a hlobaetšago kudu. Lekoko la batho le bonagala le arogana. Go Dihlatse tša Jehofa se ke bohlatse bjo bo bonagalago gabotse bja gore Kgoši ya tšona e gatela pele ‘go phetha phenyo ya yona.’

 Lekoko la Lefase le Lefsa le a Hlongwa

3, 4. (a) Ke diphetogo dife tša thulaganyo tšeo di dirilwego ka phuthegong ya Bokriste ga e sa le go tloga ge Mmušo o tswalwa, gomme ke ka baka la’ng di be di le bohlokwa? (b) Bjalo ka ge Jesaya a boletše e sa le pele, diphetogo tše di bile le mohola ofe?

³ Ge Mmušo o be o šetše o hlomilwe, e be e le nako ya go dira gore phuthego ya Bokriste e tsošološitšwego​—yeo mo nakong ye e nago le boikarabelo bjo bo oketšegilego bja Mmušo—​e dumelelane kudu le mohlala wa phuthego ya Bokriste ya lekgolong la pele la nywaga. Ka gona, Morokami (wa Seisemane) ditokollong tša wona tša June 1 le 15, 1938, o ile wa hlahloba kamoo mokgatlo wa Bokriste o swanetšego go šoma ka gona. Ka morago, tokollo ya June 1, 1972 , e ile ya nea tlhaloso e oketšegilego ka Sehlopha se Bušago sa mehleng yeno ka sehlogong se se rego, “Sehlopha se Bušago ke se se Fapanego le Mokgatlo wa Molao.” Ka 1972, dihlopha tša bagolo di ile tša kgethwa bakeng sa go nea thušo le tlhahlo diphuthegong tša tikologong.

⁴ Go tsošološwa ga bolebeledi bjo bo nepagetšego go ile gwa matlafatša phuthego ya Bokriste kudu. Se sengwe gape seo se bego se tlaleletša go se e bile dithulaganyo tše di dirilwego ke Sehlopha se Bušago bakeng sa go hlahla bagolo medirong ya bona, go akaretša go ba tlwaetša ditabeng tša boahlodi. Dikaonefatšo tše di  dirilwego ganyenyane-ganyenyane tšeo di akaretšago thulaganyo ya mokgatlo wa Modimo wa lefaseng le mafelelo a tšona a mabotse di ile tša bolelwa e sa le pele go Jesaya 60:​17, (PK): “Ke tlo tliša digauta bakeng sa koporo, gomme bakeng sa tshipi ke tlo tliša disilifera, gomme bakeng sa dikota ke tlo tliša koporo, bakeng sa mafsika ke tlo tliša tshipi; gomme ke tlo dira khutšo e be magoši a gago, le go loka e be mmuši wa gago.” Diphetogo tše tše di holago di bonagaditše tšhegofatšo ya Modimo le go hlatsela go amogela ga gagwe bao ba ilego ba thekga Mmušo wa gagwe phatlalatša le ka mafolofolo.

5. (a) Sathane o ile a arabela bjang tšhegofatšong ya Jehofa go batho ba Gagwe? (b) Ka go dumelelana le Ba-Filipi 1:7, batho ba Jehofa ba ile ba arabela bjang kgalefong ya Sathane?

⁵ Tlhokomelo e lerato gotee le tlhahlo tšeo Modimo a di neilego batho ba gagwe ka morago ga go tswalwa ga Mmušo di ile tša lemogwa ke Sathane. Ka mohlala, ka 1931 sehlopha se se senyenyane sa Bakriste se ile sa tsebatša phatlalatša gore ga e fo ba Barutwana ba Beibele feela. Ka go dumelelana le Jesaya 43:​10, e be e le Dihlatse tša Jehofa! E le ka go fo welana ga ditiragalo goba go se bjalo, Diabolo o ile a tšweletša lephoto la tlaišo e sa lekanywego lefaseng ka bophara. Gaešita le dinageng tšeo di tsebjago di e-na le tokologo ya bodumedi, tše bjalo ka United States, Canada le Jeremane, Dihlatse di be di gapeletšega leboelela go lwa dintwa tša molao bakeng sa go lwela go boloka tokologo ya tšona ya borapedi. Ka 1988, Kgoro-kgolo ya Tsheko ya United States e ile ya hlahloba melato e 71 yeo e akaretšago Dihlatse tša Jehofa, yeo pedi-tharong ya yona di ilego tša e fenya. Lehono, lefaseng ka bophara, dintwa tša molao di tšwela pele e le gore bjalo ka lekgolong la pele la nywaga go ka ba le go ‘šireletšwa le go hlongwa ka molao ga ditaba tše dibotse.’​—Ba-Filipi 1:7, NW.

6. Na dithibelo di ile tša thibela batho ba Jehofa go gatela pele? Bontšha.

⁶ Nywageng ya bo-1930, mehleng yeo e lebišitšego Ntweng ya II ya Lefase, mebušo ya puša-noši e be e thibela goba e bea dikiletšo modirong wa Dihlatse tša Jehofa kua Jeremane, Sepania le Japane, ge re bala tše tharo feela. Eupša ka ngwaga wa 2000, dinaga tše tše tharo di nnoši di be di e-na le bagoeledi ba Mmušo wa Modimo ba mafolofolo ba nyakilego go ba ba 500 000. Yeo e be e nyakile e le palo ya Dihlatse ge e balwa ka makga a lesome lefaseng ka bophara ka 1936! Go molaleng gore dithibelo di ka se ke tša thibela batho ba Jehofa go gatela pele ka tlase ga Moetapele wa bona wa mofenyi, Jesu Kriste.

7. Ke tiragalo efe e kgahlišago yeo e diragetšego ka 1958, gomme ke phetogo efe e kgolo yeo e diragetšego ga e sa le go tloga ka nako yeo?

⁷ E bile ponagatšo e kgolo gakaakang ya kgatelopele ye ge ka 1958 go be go swarwa kopano e kgolo yeo Dihlatse tša Jehofa di kilego tša e swara New York City, Kopano ya Ditšhaba-tšhaba ya Thato ya Modimo, moo tlhora ya ba bilego gona e bilego 253 922. Ka 1970 modiro wa tšona o be o butšwe dinageng tše tharo tšeo go boletšwego ka tšona ka mo godimo, ka ntle le yeo ka nako yeo e bego e tsebja e le Jeremane Bohlabela. Eupša Dihlatse di be di sa dutše di thibetšwe kua Soviet Union e kgolo le ditšhabeng tšeo e gweranego le tšona tša Kgweranong ya Warsaw. Lehono, ditšhabeng tše tšeo e bego e le tša Bokomanisi, go na le Dihlatse tše mafolofolo tša ka godimo ga seripa-gare sa milione.

8. Mafelelo a tšhegofatšo ya Jehofa e bile afe bathong ba gagwe, gomme ke eng seo Morokami ka 1950 o ilego wa se bolela mabapi le se?

⁸ Dihlatse tša Jehofa di ile tša šegofatšwa ka koketšego ka gobane di tšwetše pele di “tsoma mmušo pele le go loka ga [Modimo].” (Mateo 6:​33, NW) Ka tsela ya kgonthe, boporofeta bja Jesaya bo šetše bo phethagaditšwe, bjo bo rego: “E monyenyane ó tlo tšwa ba sekete; ’me mmôtlana ó tlo tšwa ’thšaba se matla. Ké Nna Morêna e ke tl’o xo dira tšeo ka pelá lebakeng la xôna.” (Jesaya 60:​22) Le gona kgolo e sa tšwela pele. Nywageng e lesome feela e fetilego, palo ya baboleledi ba pušo ya Mmušo e oketšegile ka batho ba ka godimo ga 1 750 000. Ba ka go ithatela e bile karolo ya sehlopha seo Morokami (wa Seisemane) wa 1950 o boletšego ka sona gore: “Modimo ga bjale o rulaganya lekoko la lefase le lefsa. . . . Sehlopha se se tla phologa Haramagedone, . . . e tla ba sona sa pele sa go tšwelela ‘lefaseng le lefsa‘ . . . , se rulagantšwe go ya ka  tsela ya pušo ya Modimo, ka ge se tseba ditshepedišo tša mokgatlo.” Sehlogo se se phethile ka gore: “Ka gona, ka moka ga rena a re tšweleng pele ka go se kgaotše re kopane re le lekoko la lefase le lefsa!”

9. Ke bjang dilo tšeo Dihlatse tša Jehofa di ithutilego tšona go theoša le nywaga di itlhatsetšego di e-na le mohola?

⁹ Go sa dutše go le bjalo, lekoko le la lefase le lefsa le le golago ka go se kgaotše le fihleletše bokgoni bjo bo ipontšhitšego e le bja bohlokwa-hlokwa lehono gomme mohlomongwe e le bjo bo tla dulago bo le bjalo gaešita le modirong wa tsošološo wa ka morago ga Haramagedone. Ka mohlala, Dihlatse di ithutile go rulaganya dikopano tše dikgolo, go nea tlhakodišo ya kapejana le go aga meago ka lebelo. Modiro wo o dirile gore ba bantši ba kgahlišwe ke Dihlatse tša Jehofa le go di hlompha.

Go Phošolla Maikwelo a Fošagetšego

10, 11. Bontšha kamoo maikwelo a fošagetšego ka Dihlatse tša Jehofa a ilego a phošollwa ka gona.

¹⁰ Lega go le bjalo, go na le batho bao ba latofatšago Dihlatse tša Jehofa ka gore ga di dumelelane le lekoko la batho. Se se bjalo kudu ka baka la boemo bja Dihlatse bjo bo theilwego Beibeleng mabapi le ditaba tše di swanago le ditšhelo tša madi, boema-gare, go kgoga le boitshwaro. Eupša batho ka kakaretšo ba thoma go dumela ka bontši gore dipono tša Dihlatse di swanetšwe ke go elwa hloko. Ka mohlala, ngaka ya kua Poland e ile ya leletša ofisi ya bolaodi ya Dihlatse tša Jehofa mogala gomme ya bolela gore yona gotee le bašomi-gotee le yona ba sepetlele ba ile ba ngangišana ka taba ya ditšhelo tša madi ka lebaka la diiri tše dintši. Poledišano e be e tsošitšwe ke sehlogo seo se tšweletšego letšatšing leo ka go Dziennik Zachodni ya Sepoliši ya letšatši le letšatši. Ngaka e dumetše ka gore: “Nna ka noši ke kwešwa bohloko ke gore madi a dirišwa ka mo go feteletšego lefapheng la tša kalafo. Se se swanetše go fetošwa, gomme ke thabile kudu gore go na le motho yo a phutšego taba ye. Ke tla rata go hwetša tsebišo e oketšegilego.”

¹¹ Sebokeng seo se bego se swerwe ngwagola, balaodi ba tša kalafo ba Canada, Isiraele, United  States le Yuropa ba ile ba ahla-ahla taba yeo e bego e reretšwe go thuša dingaka gore di alafe balwetši ka ntle le go diriša madi. Sebokeng se seo se bego se swaretšwe kua Switzerland, go ile gwa bontšhwa gore ka go fapana le kgopolo e tlwaelegilego, palo ya mahu a balwetši bao ba amogetšego ditšhelo tša madi ge e le gabotse ke e phagamego go feta ya balwetši bao ba sa amogelago ditšhelo tša madi. Ka kakaretšo balwetši ba Dihlatse ba be ba kgona go tšwa sepetlele kapejana go feta bao ba alafšago ka madi, e lego seo gantši se feleletšago ka go fokotša ditefo tša kalafo.

12. Nea mohlala wa kamoo batho ba tumilego ba tumišitšego boemo bjo bo tšerwego ke Dihlatse tša Jehofa mabapi le boema-gare bja dipolitiki.

¹² Go ile gwa newa ditlhaloso tše dintši tše di kgahlišago mabapi le boema-gare bja Dihlatse tša Jehofa pele le nakong ya Ntwa ya II ya Lefase ge di be di kgotlelela tlhaselo ya Nazi. Bidio ya Jehovah’s Witnesses Stand Firm Against Nazi Assault, yeo e tšweleditšwego ke Dihlatse tša Jehofa le yeo ka tshwanelo e bontšhitšwego la mathomo kampeng ya tshwenyo ya Ravensbrück kua Jeremane ka November 6, 1996, e tsošitše ditlhaloso tše dintši tše dibotse. Mathomong a pontšho e swanago kampeng ya tshwenyo e tumilego kudu ka bobe kua Bergen-Belsen ka April 18, 1998, molaodi wa Lefelo la Thuto ya tša Dipolitiki kua Lower Saxony, Dr. Wolfgang Scheel o dumetše ka gore: “E nngwe ya ditherešo tše di lešago dihlong tša histori ke gore Dihlatse tša Jehofa di ganne Bosošalise bja Botšhaba ka boikemišetšo bjo bogolo kudu go feta kamoo dikereke tša Bokriste di dirilego ka gona. . . . Go sa šetšwe kamoo re ka bago re ikwa ka gona ka dithuto le phišego ya bodumedi tša Dihlatse tša Jehofa, go ema ga tšona ka go tia nakong ya mmušo wa Nazi go swanelwa ke tlhompho.”

13, 14. (a) Ke polelo efe e bohlale yeo e ilego ya bolelwa legatong la Bakriste ba pele yeo e tšwilego mothopong o sa letelwago? (b) Nea mehlala ya ditlhaloso tše di kgahlišago tšeo di boletšwego legatong la batho ba Modimo lehono.

¹³ Ge batho ba tumilego ba thekga Dihlatse tša Jehofa goba diphetho tša kgoro ya tsheko di di thekga ditabeng tšeo go ngangišanwago ka tšona, se se ka fokotša go beba sefahlego gomme sa dira gore Dihlatse di lebelelwe ka go ratwa kudu. Se gantši se di bulela tsela ya gore di bolele le batho bao pele ba bego ba sa ikemišetša go theetša. Ka gona, ditiro tše bjalo di a amogelwa gomme Dihlatse tša Jehofa di di thabela e le ka kgonthe. Se se re gopotša ka seo se diragetšego lekgolong la pele la nywaga kua Jerusalema. Ge Sanhedrine, lekgotla le le phagamego la ba-Juda le be le nyaka go bolaya Bakriste ka baka la go bolela ga bona ka phišego, Gamaliele, “moruti wa mangwalô, e a bexo a ratwa ke sethšaba ka moka” o ile a lemoša ka gore: “Banna ba Isiraele! Iphakxameleng tabeng yé ka se Le tl’o xo se dira batho bá. . . . Tloxêlang batho bá. Ba leseng ba sepelê, xobane xe morêrô wó è le o tšwaxo bathong, ó tlo senyêxa. Xe o e-tšwa xo Modimo, xôna Le ka se kê la kxôna xo o senya. Ba leseng, xore Le se tlo hwetšwa Lè le ba ba lwaxo le Modimo.”​—Ditiro 5:​33-39.

¹⁴ Ka go swana le Gamaliele, batho ba tumilego morago bjale ba boletše ka go thekga tokologo ya bodumedi bakeng sa Dihlatse tša Jehofa. Ka mohlala, yo e kilego ya ba modula-setulo wa International Academy for Freedom of Religion and Belief o bontšhitše gore: “Ditshwanelo tša bodumedi tša bodumedi bjo itšego ga se tša swanela go ganwa feela ka gobane ditumelo tša bjona di lebelelwa ke setšhaba e le tše sa amogelegego.” Le gona moprofesara wa thuto ya thutamahlale ya bodumedi yunibesithing ya Leipzig o rotošitše potšišo e swanetšego mabapi le lekgotla la mmušo wa Jeremane leo le hlomilwego bakeng sa go nyakišiša ka dihlotswana tše di ipitšago tša bodumedi, o botšišitše gore: “Ke ka baka la’ng madumedi a manyenyane a swanetše go seka-sekwa eupša go sa seka-sekwe dikereke tše pedi tše dikgolo [e lego Kereke ya Roma Katholika le Kereke ya Lutere]?” Re ka hwetša karabo gabonolo mantšung a yo e bego e le mohlankedi wa Jeremane yo a ngwadilego gore: “Ga go na pelaelo gore ka mošireleng, bafišegela-thoko ba kereke ba ile ba laela tsela ya bopolitiki yeo lekgotla la mmušo le e tšerego.”

 Re Lebelela go Mang Bakeng sa Tlhakodišo?

15, 16. (a) Ke ka baka la’ng go atlega ga mogato wo Gamaliele a o tšerego e be e le mo go lekanyeditšwego? (b) Ke bjang batho ba bangwe ba bararo bao ba bego ba e-na le tutuetšo ba bego ba lekanyeditšwe ka seo ba bego ba ka se direla Jesu?

¹⁵ Seo Gamaliele a se boletšego se gatelela feela taba ya gore modiro wo o thekgwago ke Modimo o ka se ke wa palelwa le gatee. Ka ntle le pelaelo Bakriste ba pele ba ile ba holwa ke mantšu a gagwe ao a a boditšego Sanhedrine, eupša ga se ba ka ba lebala gore mantšu a Jesu mabapi le gore balatedi ba gagwe ba tla tlaišwa le ona e be e le a therešo. Mogato wo Gamaliele a o tšerego o ile wa thibela maano a baetapele ba bodumedi a go nyaka go ba bolaya, eupša seo ga se sa ka sa fediša tlaišo ka mo go feletšego, ka gobane re bala gore: “Ba lekxotla ba mo dumela. Ba bitša baapostola, ba ba ôtla ka dikxati, ba ba iletša xo ruta ka Leina la Jesu; ba kxôna bà ba lesa ba tloxa.”​—Ditiro 5:40.

¹⁶ Ge Jesu a be a sekišwa, Pontio Pilato yo a bego a sa mmone molato o ile a leka go lokolla Jesu. Eupša ga se a ka a atlega. (Johane 18:​38, 39; 19:​4, 6, 12-16) Gaešita le ditho tše pedi tša Sanhedrine, e lego Nikodemo le Josefa wa Arimathea bao ba bego ba rata Jesu, go be go se na seo ba ka se dirago bakeng sa go thibela kgoro go gata mogato malebana le Jesu. (Luka 23:​50-52; Johane 7:​45-52; 19:​38-40) Kimollo yeo batho ba e fihlelelago ge ba phemela batho ba Jehofa​—ka lebaka le ge e le lefe​—ke e lekanyeditšwego. Lefase le tla tšwela pele go hloya balatedi ba therešo ba Kriste, bjalo ka ge le be le mo hloile. Kimollo e feletšego e ka tšwa go Jehofa feela.​—Ditiro 2:24.

17. Ke pono efe ya kgonthe yeo Dihlatse tša Jehofa di nago le yona, eupša ke ka baka la’ng di sa fokodišwe boikemišetšong bja tšona bja go tšwela pele di bolela ditaba tše dibotse?

¹⁷ Ge e le gabotse, Dihlatse tša Jehofa di lebeletše gore tlaišo e tšwele pele. Kganetšo e tla kgaotša feela ge tshepedišo ya Sathane e fentšwe mafelelong. Lega go le bjalo, tlaišo ye gaešita le ge e sa thabiše, ga e dire gore Dihlatse di kgaotše go phethagatša thomo ya tšona ya go bolela ka Mmušo. Ke ka baka la’ng e swanetše go di dira gore di kgaotše, mola di thekgwa ke Modimo? Di lebelela go Moetapele wa tšona yo sebete Jesu Kriste, e le mohlala o nepagetšego.​—Ditiro 5:​17-21, 27-32.

18. Ke bothata bofe bjo bo sa dutšego bo letše ka pele ga batho ba Jehofa, eupša ke mafelelo afe ao ba kgonthišegilego ka ona?

¹⁸ Ga e sa le go tloga mathomong a bjona, bodumedi bja therešo bo ile bja lebeletšana le kganetšo e matla. Go se go ye kae, bo tla hlaselwa ke tlhaselo e kgolo ya Gogo, Sathane a le boemong bja gagwe bjo bo gobogilego bja ga e sa le a rakwa legodimong. Eupša bodumedi bja therešo bo tla phologa. (Hesekiele 38:​14-16) “Dikxoši tša lefase ka moka” ka tlase ga tlhahlo ya Sathane, “di tlo hlabana le Kwana; fêla, Kwana e tlo di fenya, xobane ké Yôna Morêna wa marêna, le Kxoši ya maxoši.” (Kutollo 16:​14; 17:​14) Ee, Kgoši ya rena e gatela pele go ya phenyong ya mafelelo gomme kgaufsinyane e tlo ‘phetha phenyo ya yona.’ Ke tokelo e kgolo gakaakang go sepedišana le yena, re tseba gore kgaufsinyane go ka se sa hlwa go e-ba le motho yo a ganetšanago le barapedi ba Jehofa ge ba re: ‘Modimo o na le rena’!​—Ba-Roma 8:​31; Ba-Filipi 1:​27, 28.

Na o ka Hlalosa?

• Ke eng seo Jehofa a se dirilego bakeng sa go matlafatša phuthego ya Bokriste ga e sa le go tloga ge Mmušo o tswalwa?

• Ke eng seo Sathane a se dirilego go leka go thibela Kriste go phetha phenyo ya gagwe, gomme ka mafelelo afe?

• Ke pono efe e leka-lekanego yeo re swanetšego go ba le yona ka kgato e swanetšego yeo e tšewago ke bao e sego Dihlatse?

• Sathane o tla dira’ng kgaufsinyane, gomme ka mafelelo afe?

[Dipotšišo tša Thuto]

[Seswantšho go letlakala 18]

Dikopano ke pontšho ya go gatela pele ga batho ba Jehofa

[Diswantšho go letlakala 20]

Boema-gare bja Dihlatse nakong ya Ntwa ya II ya Lefase bo sa dutše bo tlišetša Jehofa theto