Matlafatša go Bota ga Gago Jehofa

Leano la polao le gare le a logwa. Bahlankedi ka moka ba ba phagamego ba naga ba bile le therišano gomme ba tšweletša tšhišinyo ya gore go be le molao o mofsa. Ba nyaka gore yo mongwe le yo mongwe yo a lego borapeding bjo bo sa dumelelwego ke Mmušo a ahlolelwe lehu.

NA SE se kwagala e le se se tlwaelegilego? Histori e tletše mehlala ya batho bao ba ilego ba retologela go go hlama bobe ka molao. Tiragalo e lego ka mo godimo e diragetše Mmušong wa Peresia mehleng ya moporofeta Daniele. Molao woo Kgoši Dario a ilego a o hloma o be o re: “Mang le mang e a kaxo kxopêla selô xo modimo ofe le ofe, le xe e le xo motho e mongwê ka matšatši á a masome a mararo, xe e se xo . . . kxoši, a lahlêlwê lexaxeng la ditau.”​—Daniele 6:​7-9.

Daniele o be a tla dira’ng ka tlase ga tšhošetšo ya lehu? Na o be a tla tšwela pele a botile Modimo wa gagwe Jehofa, goba na o be a tla kwanantšha gomme a dira go ya kamoo kgoši e laetšego ka gona? Pego e re botša gore: “Daniele xe a e-kwa xore molaô woo o ngwadilwe, a ya ngwakong wa xaxwe, wo o bexo o na le ngwakwana wa xodimo wa mašoba a lebilexo Jerusalêma, mó a bexo a e-ya ka mehla xararo, a khunama a rapêla Modimo wa xaxwe, a mo leboxa. Le byalo a dira ka mokxwa woo wa ka mehla.” (Daniele 6:​11) Taba ka moka e tsebega kudu. Daniele o ile a lahlelwa ka moleteng wa ditau ka baka la tumelo ya gagwe, eupša Jehofa o ile a “thiba melomo ya ditau” gomme a phološa mohlanka wa gagwe yo a botegago ka go se kwanantšhe.​—Ba-Hebere 11:​33; Daniele 6:​17-23.

 Nako ya go Itlhahloba

Lehono, bahlanka ba Jehofa ba dula lefaseng la bonaba, ba lebeletšane le dilo tše dintši tšeo di beago bophelo bja bona bjo bobotse bja mmele le bja moya kotsing. Ka mohlala, nakong ya go phulega o šoro ga lehloyo la morafo dinageng tše itšego, Dihlatse tše dintši di ile tša bolawa. Mafelong a mangwe, bahlanka ba Jehofa ba lebeletšane le go hlaelela ga dijo, mathata a tša boiphedišo, dikotsi tša tlhago, bolwetši bjo šoro le maemo a mangwe ao a beago bophelo kotsing. Go tlaleletša moo, ba ile ba swanelwa ke go kgotlelela tlaišo, dikgateletšo tša mošomong le diteko tše di fapa-fapanego tša go ba leka gore ba dire se se fošagetšego, e lego dilo tšeo ka moka di bego di ka bea boemo bja bona bja moya kotsing. Ka kgonthe, Lenaba le legolo Sathane, le ikemišeditše go fediša bahlanka ba Jehofa ka selo le ge e le sefe seo se ka bonalago se šoma.​—1 Petro 5:8.

Re ka dira’ng ge re lebeletšane le maemo a bjalo? Gaešita le ge e le ga tlhago go boifa ge bophelo bja motho bo le kotsing, re ka dula re nagana ka mantšu a moapostola Paulo ao a beago pelo a rego: “[Jehofa] ó boletše a re: Nka se kê ka Xo lahla; nka se kê ka Xo tloxêla. Bo-ka le rena re bolêlaxo rè holofetše ra re: Morêna ké Molwedi wa-ka: xa ke boife selô; batho ba ka ntira’ng?” (Ba-Hebere 13:​5, 6) Re ka kgodišega gore Jehofa o ikwa ka mo go swanago ka bahlanka ba gagwe lehono. Lega go le bjalo, go tseba Jehofa ke selo se se fapanego kudu le go kgodišega gore o tla gata mogato bakeng sa go re thuša. Ka gona ke gabohlokwa kudu gore re hlahlobe motheo woo go bota Jehofa go agilwego go wona le gore re dire sohle seo re ka se kgonago go matlafatša le go kgomarela go mmota mo go bjalo. Ge e ba re dira bjalo, “khutšô ya Modimo, ye e fetaxo thlaoloxanyô yohle, [e tla boloka] dipelo tša [rena] le ’kxopolô tša [rena] xo Kriste Jesu.” (Ba-Filipi 4:7) Ka gona ge diteko di tšwelela, re tla kgona go nagana gabotse le go lebeletšana le tšona ka bohlale.

Motheo wa go Bota Jehofa

Ruri re na le mabaka a mantši a go ka bota Mmopi wa rena, Jehofa. La mathomo gare ga ona ke taba ya gore Jehofa ke Modimo yo lerato yo a hlokomelago bahlanka ba gagwe e le ka kgonthe. Go na le mehlala e mentši kudu yeo e begilwego ka Beibeleng ye e re botšago ka tlhokomelo e lerato ya Jehofa ka bahlanka ba gagwe. Ge a hlalosa ditirišano tša Jehofa le batho ba gagwe ba a ba kgethilego e lego Isiraele, Moše o ngwadile gore: “A na a mo hwetša nageng ya lešoka mo lehanateng la meroro ya ditau, mo go befilego, a mo dikanetša, a mo hlokomela, a mo hlakodiša bjalo ka thaka ya leihlo la gagwe.” (Doiteronomio 32:​10, PK) Mehleng yeno Jehofa o tšwela pele go hlokomela bahlanka ba gagwe gabotse, bobedi e le sehlopha le ge e le motho ka o tee ka o tee. Ka mohlala, ge Dihlatse tše dingwe di be di lebeletšane le go hlokega ga dijo mo gogolo nakong ya ntwa ya selegae kua Bosnia, Jehofa o ile a kgonthišetša gore di amogela dikabo tše di bego di nyakega kudu ka boiteko bjo sebete bja banababo tšona ba Croatia le Austria, bao ba ilego ba bea maphelo a bona kotsing ka go ya tikologong e lego kotsi kudu ba išetša banababo bona dilo tša tlhakodišo. *

Ka ge Jehofa Modimo e le Ra-matla-ohle, o tloga a kgona go šireletša bahlanka ba gagwe ka tlase ga maemo le ge e le afe. (Jesaya 33:​22; Kutollo 4:8) Eupša gaešita le ge Jehofa a dumelela ba bangwe ba bahlanka ba gagwe gore ba ipontšhe ba botega go fihla lehung, o sa dutše a ba thekga le go ba thuša go boloka potego ya bona, a ba dira gore ba kgone go dula ba tiile, ba thabile e bile e le bao ba nago le khutšo ya monagano go ba go fihla bofelong. Ka gona re ka ba le kgodišego e swanago le ya mopsalme ya gore: “Modimo ké sebô sa rena le matla a rena; ké Mohlakodiši, re mo lemoxile dikotsing tše ntši. Re sa tlo boifa’ng? le xe lefase lè phekxoxa, le xe dithaba di têkêma di wêla mawatleng.”​—Psalme 46:​1, 2.

Beibele gape e utolla gore Jehofa ke Modimo wa therešo. Se se bolela gore ka mehla o phethagatša dikholofetšo tša gagwe. Ge e le gabotse, Beibele e mo hlalosa e le Modimo “yo a ka se kego a aketša.” (Tito 1:2, NW) Ka ge Jehofa a bolela leboelela ka go ikemišetša ga gagwe go šireletša le go phološa bahlanka ba gagwe, re ka kgonthišega e le ka kgonthe gore ga se gore o fo ba a kgona eupša o bile o ikemišeditše go phethagatša dikholofetšo tša gagwe.​—Jobo 42:2.

 Ditsela tša go Matlafatša go Bota ga Rena Jehofa

Gaešita le ge re e-na le mabaka ka moka a go bota Jehofa, ga se ra swanela go tšea taba ye gabohwefo. Se ke ka gobane lefase ka kakaretšo le se na tumelo go Modimo, gomme boemo bjo bjalo bja kgopolo bo ka fokodiša gabonolo go bota ga rena Jehofa. Ka baka leo, re swanetše go dira boiteko bjo matla bja go matlafatša le go kgomarela go mmota ga rena. Jehofa o tseba boemo bjo gabotse, gomme o dirile tokišetšo yeo ka yona re ka dirago bjalo.

Sa mathomo, o neile Lentšu la gagwe le le ngwadilwego e lego Beibele, yeo e begago ditiro tše dintši tše matla tšeo a di diretšego bahlanka ba gagwe. Anke o nagane, o ka holofela motho gakaakang ge e ba o fo tseba leina la gagwe feela? Mohlomongwe o ka mo holofela ganyenyane kudu ge e ba o be o tla dira bjalo. O swanetše go tseba ditsela tša gagwe le ditiro tša gagwe bakeng sa gore o mmote, na ga go bjalo? Ge re dutše re bala le go naganišiša ka dipego tše bjalo tša Beibele, tsebo ya rena ka Jehofa le ditiro tša gagwe e a nwelela, gomme re thoma go lemoga ka mo go oketšegilego kamoo a botegago ka gona. Ka go rialo go mmota ga rena go a matlafatšwa. Mopsalme o ile a bea mohlala o mobotse kudu ge a be a bolela le Modimo ka thapelo e tšwago pelong a re: “Ke xopola ’tirô tša Morêna. Ruri, ke xopola mehlôlô y’axo ya boxolo-xolo. Ke êlêlwa ditirô tša xaxo ka moka; ke akanya tše Wêna O di dirilexo.”​—Psalme 77:​11, 12.

Go okeletša go Beibele, gape re na le mothopo o humilego wa dijo tša moya ka dipukung tša Beibele tšeo di tšweletšwago ke mokgatlo wa Jehofa. Gare ga dilo tše dingwe, dipuku tše gantši di na le diphihlelo tše di kgomago tša bahlanka ba Modimo ba mehleng yeno, bao ba bontšhago kamoo Jehofa a ilego a kgona go ba thuša le go ba hlakodiša ge ba be ba lebeletšane le maemo a tlalelo. Ka mohlala, Martin Poetzinger, yoo ka morago a bilego setho sa Sehlopha se Bušago sa Dihlatse tša Jehofa, o ile a babja o šoro ge a be a hlankela e le mmulamadibogo ditikologong tša Yuropa kgole le naga ya gabo. O be a se na tšhelete, e bile go be go se na ngaka yeo e bego e ikemišeditše go mo hlokomela. Eupša Jehofa ga se a ka a mo tlogela. Mafelelong, go ile gwa ikopanywa le mohlokomedi yo mogolo wa sepetlele sa moo. Ka ge e be e le yo a dumelago Beibeleng ka go tia, monna yo yo a lokilego o ile a hlokomela Ngwanabo rena Poetzinger bjalo ka ge a be a tla hlokomela morwa wa gagwe, a dira bjalo ka ntle le tefo. Go bala diphihlelo tše bjalo tša motho ka noši go ka matlafatša go bota ga rena Tatago rena wa legodimong e le ka kgonthe.

Thušo e nngwe e bohlokwa yeo Jehofa a e neago bakeng sa go matlafatša go mmota ga rena ke tokelo e bohlokwa ya thapelo. Ka lerato moapostola Paulo o re botša gore: “Le se ke la belaela selo, eupša dilong ka moka tše le di nyakago, le di tsebiše Modimo ka kgopelo le thapelo e nago le tebogo.” (Ba-Filipi 4:​6, PK) ‘Dilo ka moka’ di ka akaretša maikwelo a rena, dinyakwa, dipoifo le dipelaelo tša rena. Ge e ba re rapela gantši ka go tšwa pelong, ke moo go bota ga rena Jehofa go tla bago matla kudu.

Ge Jesu Kriste a be a le mo lefaseng, ka dinako tše dingwe o be a e-ya lefelong le le se nago batho bakeng sa go yo rapela a sa šitišwe. (Mateo 14:​23; Mareka 1:​35) Pele ga ge a ka dira diphetho tše dikgolo, o ile a ba a fetša bošego ka moka a rapela Tatagwe. (Luka 6:​12, 13) Ga se mo go makatšago gore go bota ga Jesu Jehofa go be go le matla kudu moo e lego gore o ile a kgona go kgotlelela teko e šoro kudu yeo e kilego ya wela motho le ge e le mang. Mantšu a gagwe a mafelelo koteng ya tlhokofatšo e be e le a rego: “Tata! Môya wa-ka ke o xafêla diatleng tša xaxo!” Polelo yeo ya kholofelo e bontšhitše gore go bota ga gagwe Tatagwe ga se gwa ka gwa fela go ba go fihla mafelelong, gaešita le ge Jehofa a se a ka a tsena ditaba gare ka go mo phološa.​—Luka 23:46.

Thušo e nngwe gape ya go aga go bota ga rena Jehofa ke go kopanela ka mehla le bao ba mmotago ka pelo ka moka. Jehofa o laetše batho ba  gagwe gore ba bokane ka mehla bakeng sa go ithuta mo gontši ka yena gotee le go kgothatšana. (Doiteronomio 31:​12; Ba-Hebere 10:​24, 25) Go kopana mo go bjalo go matlafaditše go bota ga bona Jehofa, gwa dira gore ba kgone go kgotlelela diteko tše dikgolo kudu tša tumelo. Nageng ya Afrika moo modiro wa boboledi o bego o thibetšwe, Dihlatse tša Jehofa di ile tša ganetšwa tšhireletšo ya maphodisa, mangwalo a bosepedi, mangwalo a bohlatse a manyalo, kalafo ya sepetlele le mešomo. Ge ntwa ya selegae e be e phulega tikologong e nngwe, ditho tše 39 tša phuthego e lego kgaufsi go akaretša le bana, di ile tša dula dikgwedi tše ka bago tše nne ka tlase ga leporogo la tlasana leganateng e le gore di phonyokge go thuthupišwa toropong ya gabo tšona. Ka tlase ga maemo a bjalo a thata kudu, go ahla-ahla ga tšona temana ya Beibele letšatši le letšatši le diboka tše dingwe go ile gwa di nea matla a magolo. Ka baka leo di ile tša kgona go kgotlelela teko le go boloka boemo bja tšona bja moya bo šireletšegile. Phihlelo ye e bontšha gabotse mohola wa go bokana ka mehla le batho ba Jehofa.

Sa mafelelo, e le gore re matlafatše go bota ga rena Jehofa, re swanetše go dula re le mafolofolo modirong wa go bolela ka Mmušo, ka mehla re ikemišeditše go abelana ditaba tše dibotse le ba bangwe. Se se ile sa bontšhwa ke phihlelo e kgomago maikwelo ya mogoeledi yo mofsa yo mafolofolo kua Canada yo a ilego a babja o šoro a swerwe ke leukemia. Go sa šetšwe go babja ga gagwe o šoro, o be a nyaka go ba mmulamadibogo wa ka mehla, e lego modiredi wa nako e tletšego. Nakong ya go okobala go se nene ga bolwetši bja gagwe, o be a phetše gabotse ka mo go lekanego go ka fetša kgwedi a le bodireding e le mmulamadibogo wa go thuša. Ke moka boemo bja gagwe bo ile bja befa kudu gomme a hwa lebakeng la dikgwedi tše sego kae ka morago ga moo. Lega go le bjalo, o be a ile a dula a tiile moyeng go fihla mafelelong, go bota ga gagwe Jehofa go sa ka gwa šišinyega le ka motsotswana. Mmagwe o gopola gore: “O be a kgomegile ka ba bangwe go feta go kgomega ka yena ka noši go fihla mafelelong. O be a fela a ba kgothaletša go ithuta Beibele, a ba botša gore, ‘Re tla ba gotee Paradeiseng.’”

Go Bontšha go Bota ga Rena Jehofa

“Bo-ka mmele xe e le o hwilexo xe o se n’e môya, le yôna tumêlô e hwile xe e se n’e medirô.” (Jakobo 2:​26) Seo Jakobo a se boletšego mabapi le go ba le tumelo go Modimo se ka bolelwa gape le ka go Mmota ga rena. Go sa šetšwe gore re bolela gakaakang gore re bota Modimo, seo ga se bolele selo ka ntle le ge re ka bontšha go mmota mo go bjalo ka ditiro tša rena. Aborahama o ile a bota Jehofa ka mo go feletšego gomme a bontšha go mmota moo ka go latela ditaelo tša gagwe ka ntle le go dika-dika, gaešita le go fihla bokgoleng bja go ikemišetša go dira sehlabelo ka morwa wa gagwe, Isaka. Ka baka la go mmota ka tsela e bjalo e kgolo le go mo kwa, Aborahama o ile a tsebja e le mogwera wa Jehofa.​—Ba-Hebere 11:​8-10, 17-19; Jakobo 2:​23, PK.

Ga go nyakege gore re letele go welwa ke teko e šoro pele ga ge re ka bontšha go bota ga rena Jehofa. Jesu o boditše barutiwa ba gagwe gore: “Mmotexi-dinyaneng, le ka tše kxolo ó a bôtêxa. Mo-se-loke-dinyaneng, le ka tše kxolo xa a loke.” (Luka 16:​10) Re swanetše go ithuta go bota Jehofa ditirong ka moka tša rena tša letšatši le letšatši, re mo kwe gaešita le ditabeng tšeo di ka bonagalago di sa re selo. Ge re lemoga mehola yeo e tlišwago ke go kwa mo go bjalo, go bota ga rena Tatago rena wa legodimong go a matlafatšwa, gwa re dira gore re kgone go lebeletšana le diteko tše dikgolwanyana goba tše dikgolo kudu.

Ge lefase le dutše le batamela bofelo bja lona bjo kotsi, batho ba Jehofa ba tla lebeletšana le diteko tše oketšegilego gotee le dikotsi. (Ditiro 14:​22; 2 Timotheo 3:​12) Ka go hlagolela go bota Jehofa mo go tiilego le go mmota ka mo go feletšego gona bjale, re ka lebelela pele go tlo phološetšwa lefaseng la gagwe le lefsa leo a le holofeditšego​—e ka ba ka go phela go phuleletša masetla-pelong a magolo goba ka go tlo tsošwa. (2 Petro 3:​13) Anke le ka mohla re se ke ra dumelela go hlaelelwa ke kholofelo le ge e le gofe moo re ka bago le gona go senya tswalano ya rena e bohlokwa le Jehofa. Ka gona, seo se boletšwego ka Daniele ka morago ga ge a phološitšwe legageng la ditau se ka bolelwa le ka rena gore: “Xwa hwetšwa à se na mo a xobetšexo, ka xobane à botile Modimo wa xaxwe.”​—Daniele 6:24.

[Mengwalo ya ka tlase]

[Seswantšho go letlakala 9]

Go bala diphihlelo tša bahlanka ba botegago ba Jehofa, ba bjalo ka Martin Poetzinger, ke mo go matlafatšago tumelo