Thuto ya Beibele​—Na e a go Hola?

“GA SE ya swanelwa go balwa ge moruti a se gona.” Temošo ye e tšwelela ka mathomong a Dibeibele tše dingwe tša Makatholika. Kay Murdy wa Catholic Bible Institute kua Los Angeles o re: “Bjalo ka Makatholika ga se ra ka ra tlwaelana le Beibele, eupša boemo bjoo bo a fetoga.” O re, gatee-tee ge Makatholika a thoma go lemoga kamoo Mangwalo a Makgethwa a ka kgomago maphelo a ona ka gona, “a thoma go hlologela Beibele.”

Mabapi le phetogo ye, makasine wa U.S. Catholic o tsopola molaodi wa thuto ya bodumedi yo a boletšego gore Makatholika ao a tsenetšego diklase tša thuto ya Beibele a ile a ikwa gore “a be a tingwa se sengwe ge e be e le Makatholika, le gore go na le mahumo a mantši ka Beibeleng. A nyaka go fihlelela a mangwe a mahumo ao a bego a ikwa gore a ba lahlegetše.”

Boemong le ge e le bofe, ke “mahumo” afe ao a lego gona ao morutwana wa Beibele a ka a hwetšago? Ela hloko: Na o ka rata go tseba kamoo o ka lebeletšanago ka katlego le dipelaelo tša bophelong bja letšatši le lengwe le le lengwe? O ka boloka bjang khutšo ka lapeng? Ke ka baka la’ng go e-na le boitshwaro bjo bo atilego gakaakaa bja go hloka mekgwa le bja bonaba? Ke eng seo se bakago bošoro bjo bo lego gare ga bafsa lehono? Dikarabo tše di ka botwago dipotšišong tše le go tše dingwe tšeo di gakantšhago di ka hwetšwa ka Lentšung la Modimo Beibele, gomme e tla ba “mahumo” a kgonthe, e sego feela bakeng sa Makatholika goba Maprotestanta, eupša gape le go ma-Buddha, ma-Hindu, Mamoseleme, ma-Shinto gaešita le baila-Modimo le ma-agnostic. Bjalo ka ge mopsalme a hlalosa, ‘Lentšu la Modimo e be e le lebone dinaong tša gagwe le seetša tseleng ya gagwe.’ Le ka ba bjalo le go wena.​—Psalme 119:​105.