“Dintho tša Mogwera”

MOAPOSTOLA Paulo o ile a bona go swanetše gore a nee keletšo e phošollago go Bakriste ba lekgolong la pele la nywaga kua Galatia. Mohlomongwe e le go thibela sekgopi le ge e le sefe, o ile a botšiša gore: “A ke xo re byale ke Le fetoxetše lenaba ka xe ke Le boditše therešô?”​—Ba-Galatia 4:16.

Paulo o be a se a fetoga lenaba la bona ka go ‘ba botša therešo.’ Ge e le gabotse o be a dira ka go dumelelana le molao wa motheo wa Beibele o rego: “Dintho tša mogwera di a botega.” (Diema 27:​6, King James Version) O be a tsebile gore boitlhompho bja bafoši bo be bo ka gobatšwa. Lega go le bjalo o be a hlokometše gore go efoga go nea modiradibe phošollo yeo a e nyakago go ka ba le mafelelo a go tima motho yoo pontšho ya lerato la Jehofa Modimo. (Ba-Hebere 12:​5-7) Ka gona, bjalo ka mogwera yo a botegago yo a kganyogelago phuthego dilo tše dibotse tše di swarelelago, Paulo ga se a ka a dika-dika go nea keletšo e phošollago.

Lehono, Dihlatse tša Jehofa di phethagatša thomo ya tšona ya go “[dira] dithšaba ka moka barutiwa . . . le ka xo ba ruta xo boloka tšohle tše [Jesu Kriste a ba] laetšexo tšôna.” Ka go dira bjalo, Bakriste ba ba botegago ga ba kwanantšhe ditherešo tša Beibele tša go pepentšha le go iletša diphošo tša dithuto le mekgwa yeo e sego ya Bokriste. (Mateo 15:9; 23:9; 28:​19, 20; 1 Ba-Korinthe 6:​9, 10) Go e na le gore e be manaba ao a sa nyakwego, ba bontšha kgahlego ya bagwera ba kgonthe.

Ka temogo e buduletšwego ke Modimo, mopsalme o ngwadile gore: “Xe moloki a nkôtla, xôna ké leratô; xe a nkxalema, ké xo tlôla hlôxô makhura; hlôxô ya-ka xa e xane xe a boeletša.”​—Psalme 141:5.