Dipotšišo tše Tšwago go Babadi

Ke ka baka la’ng Beibele go 2 Petro 3:​13 e bolela ka “maxodimo [bontši] a mafsa le lefase le lefsa,” mola Kutollo 21:1 e bolela e sa le pele ka “lexodimo [botee] le lefsa le lefase le lefsa”?

Se ge e le gabotse ke sebopego sa popopolelo yeo e akaretšago maleme a mathomong. Ge e le mabapi le tlhaloso, go fihla ga bjale ga go bonagale go e-na le selo se sengwe se se kgethegilego seo e se bolelago.

Ela hloko pele Mangwalo a Sehebere. Mongwalong wa leleme la mathomo, lentšu la Sehebere sha·maʹyim, leo le fetoletšwego e le “(ma)legodimo,” le dula le le ka bontši. Go ba ga lona ka bontši go bonagala go bonagatša e sego sebopego sa bontši bja kgodišo, eupša go bonagatša kgopolo ya sebopego sa bontši “bja bogolo bja lefelo,” goba kgopolo ya “selo se se feletšego seo se nago le dikarolo tše di sa balegego tše di aroganego goba dintlha.” Se ke seo se kwešišegago ka gore magodimo ao a kgonthe a kgole kudu le lefase ka mahlakoreng ka moka gomme a akaretša dinaledi tše dimilione tše dikete. Ge lentšu sha·maʹyim le etilwe pele ke lebopi-kgetho, Beibele ya New World Translation mo e nyakilego go ba ka mehla e le fetolela e le “magodimo,” go swana le go Jesaya 66:​22. Ge lentšu sha·maʹyim le tšwelela ka ntle le lebopi-kgetho, le ka fetolelwa ka botee (“lexodimo,” go swana le go Genesi 1:8; 14:​19, 22; Psalme 69:​34, NW) goba ka bontši (“maxodimo,” go swana le go Genesi 49:​25, NW; Baahlodi 5:4, NW; Jobo 9:8, NW; Jesaya 65:​17).

Bobedi go Jesaya 65:​17 le 66:​22 (NW), lentšu la Sehebere bakeng sa magodimo le ka sebopego sa bontši, gomme go fetolelwa ga lona mo go swanago mo go kgethilwego ke “maxodimo a mafsa le lefase le lefsa.”

Lentšu la Segerika ou·ra·nosʹ le bolela “legodimo,” gomme ka bontši lentšu ou·ra·noiʹ le bolela “magodimo.” Ka mo go kgahlišago, bafetoledi ba Septuagint ya Segerika ba dirišitše sebopego sa botee bobedi go Jesaya 65:​17 le 66:22.

Bjale go thwe’ng ka makga a mabedi ao lentšu “lexodimo [goba maxodimo] le lefsa le lefase le lefsa” le tšwelelago go wona ka Mangwalong a Bakriste a Segerika?

Go 2 Petro 3:​13, moapostola o diriša lentšu la Segerika ka sebopego sa bontši. Pejana ga moo (ditemana 7, 10, 12), o boletše ka “maxodimo” a lego gona a kgopo, a diriša sebopego sa bontši. Ka gona o be a diriša ka mo go nepagetšego sebopego sa bontši go temana 13. Go feta moo, go bonagala a ile a tsopola go Jesaya 65:​17 ya mathomong, moo Sehebere se lego ka sebopego sa bontši, go fo etša go 2 Petro 2:​22 moo a tsopotšego temaneng ya Sehebere ya Diema 26:​11. Ka gona Petro o boletše gore “se re se letetšexo ka xo kwa dikholofedišô tša xaxwe ké maxodimo [bontši] a mafsa le lefase le lefsa.”

Ka mo go fapanego ganyenyane, go bonagala go Kutollo 21:1 moapostola Johane a dirišitše phetolelo ya Jesaya 65:​17 ka go Septuagint yeo e nago le lentšu la Segerika bakeng sa “legodimo” ka sebopego sa botee, bjalo ka ge go bontšhitšwe. Ka baka leo seo Johane a se ngwadilego ke gore: “Ka bôna lexodimo [botee] le lefsa, le lefase le lefsa. Xobane lexodimo la pele le be le tloxile, le lôna lefase la pele.”

Tše ke dibopego tša popopolelo tšeo di sepedišanago le go fetolela. Go bohlokwa go bušeletša gore moo ga go bonagale go e-na le phapano le ge e le efe go seo se bolelwago go sa šetšwe gore motho o a bala goba o bolela ka “maxodimo a mafsa” goba “lexodimo le lefsa.” Tlhaloso ya tirišo ya mantšu a a mabedi e a swana.

[Mothopo wa Seswantšho go letlakala 31]

Stars: Frank Zullo