Hlokomelang Dišuana le Bahlologadi Ditlaišegong tša Bona

Ga go thata go lemoga gore re phela lefaseng leo le se nago lerato. Moapostola Paulo ge a be a bolela ka mohuta wa batho bao ba tla bago gona “mehleng ya bofelo” o ngwadile gore: “Go tla tla dinako tše hlobaetšago tšeo go lego thata go lebeletšana le tšona. Batho e tla ba baithati, . . . bao ba se nago maikwelo a borutho a tlhago.” (2 Timotheo 3:​1-3, NW) Mantšu ao ke a therešo gakaakang!

MAEMO a boitshwaro a mehla ya rena a tlaleleditše go hlokegeng ga kwelobohloko ka dipelong tša ba bantši. Batho ke bao ba napago e e-ba bao ba sa kgahlegelego katlego ya ba bangwe ka mo go oketšegago, mabakeng a mangwe e ba go se kgahlegele le yona katlego ya ditho tša malapa a bona ka noši.

Bothata bjo bo kgoma ba bantši gampe, bao ka baka la maemo a fapa-fapanego ba fetogago badiidi. Palo ya bahlologadi le dišuana e gola ka go se kgaotše ka baka la dintwa, dikotsi tša tlhago le go šuthišwa ga batho bao ba tsomago tlhakodišo mafelong a bona. (Mmoledi 3:​19) Pego e tšwago go United Nations Children’s Fund e re: “[Bana] ba ka godimo ga milione ke dišuana goba ba kgaogantšwe le malapa a gabo bona ka baka la ntwa.” Gape o a tseba ka palo e kgolo ya bo-mma bao ba se nago balekane, bao ba tlogetšwego goba bao ba hladilwego ba ba lebeletšanego le mošomo o thata wa go fepa le go godiša malapa a bona ba nnoši. Boemo bo befišwa ke taba ya gore dinaga tše dingwe di lebeletšane le boemo bjo šoro bja mathata a tša boiphedišo, ao a dirago gore badudi ba bantši ba tšona ba phele bodiiding bjo bošoro.

Mabapi le se, na go na le kholofelo le ge e le efe ka bao ba lebeletšanego le tlaišego? Go tlaišega ga bahlologadi le dišuana go ka fokotšwa bjang? Na bothata bjo bo tla ka bja fela?

Tlhokomelo e Lerato Mehleng ya Beibele

Go hlokomela dinyakwa tša nama le tša moya tša bahlologadi le dišuana e be e dutše e le karolo ya bohlokwa ya go rapela Modimo. Ge ba be ba buna mabele goba dienywa tša bona, ba-Isiraele ba be ba sa swanela go kgobokanya tše di šetšego ka mašemong a bona, ba budutša mo ba fetilego gona. Mabudutša a be a swanetše go šadišetšwa “moeng, xoba sešuana, xoba mosadi wa mohlôlôxadi.” (Doiteronomio 24:​19-21) Molao wa Moše o boletše ka go lebanya gore: “O se kê wa hlakiša mohloloxadi le sešuana.” (Ekisodo  22:​21, 22) Bahlologadi le dišuana bao go bolelwago ka bona ka Beibeleng ka mo go swanetšego ba be ba emela batho ba diilago kudu, ka ge ka morago ga lehu la monna yo e lego tate goba la batswadi ka bobedi, ditho tša lapa tše di šetšego di ka šala di nnoši e bile di diila. Mopatriareka Jobo o itše: “Ke be ke lokolla mosenyexi xe a lla, le sešuana xe se hlôka monamodi.”​—Jobo 29:12.

Mehleng ya pele ya phuthego ya Bokriste, go hlokomela bao ba lego bothateng le bao ba hlokago e le ka kgonthe ka baka la go lahlegelwa ke batswadi goba go lahlegelwa ke monna e be e le karolo e hlaolago ya borapedi bja therešo. Ka go bontšha kgahlego e kgolo bakeng sa katlego ya ba ba bjalo, morutiwa Jakobo o ngwadile gore: “Borapedi byo Modimo Tata-wešo a bônaxo bò se na thšila le senyalô, ké xo hlôla dišuana le bahlôlôxadi mahlokong a bôná, le xo itôta xore lefase le se Xo thšilafatšê.”​—Jakobo 1:27.

Ka ntle le go bolela ka dišuana le bahlologadi, Jakobo gape o ile a bontšha go tshwenyega mo go tseneletšego ka ba bangwe bao ba bego ba diila le bao ba bego ba hloka kudu. (Jakobo 2:​5, 6, 15, 16) Moapostola Paulo o ile a bontšha kgopolo e swanago. Ge yena le Baranaba ba be ba newa kabelo ya bona ya boboledi, ‘go gopola badiidi’ go be go le gare ga ditaelo tšeo ba ilego ba di amogela. Paulo o be a ka bolela ka letswalo le le hlwekilego gore: “Xomme modirô woo ke o dirile ka mafolofolo.” (Ba-Galatia 2:​9, 10) Pego ya mediro ya phuthego ya Bokriste kapejana ka morago ga go hlongwa ga yona e itše: “Mo xo bôná xo be xo se mohloki . . . Ba tla ba e bea fase pele xa baapostola, xomme motho a abêlwa ka mo a bexo a hlôka.” (Ditiro 4:​34, 35) Ee, tokišetšo yeo e hlomilwego Isiraeleng ya bogologolo ya go hlokomela dišuana, bahlologadi le bahloki e ile ya fetišetšwa le ka phuthegong ya Bokriste.

Go ba gona, thušo yeo e bego e newa e be e lekanyeditšwe gomme e dumelelana le matlotlo a  diphuthego ka e tee ka e tee. Tšhelete e be e sa senywe, gomme bao ba bego ba thušwa e be e le bao ba hlokago e le ka kgonthe. Ga go Mokriste yo a bego a swanetše go diriša tokišetšo ye ka mo go sa swanelago, gomme ga go na morwalo o sa swanelago wo o bego o swanetše go rwešwa phuthego. Se se ile sa bonagala gabotse taelong ya Paulo e lego go 1 Timotheo 5:​3-16. Moo re bona gore ge e ba ba leloko la bahloki ba be ba ka kgona go ba thuša, ba be ba swanetše go rwala boikarabelo bjoo. Bahlologadi ba bahloki ba be ba swanetše go fihlelela dinyakwa tše itšego e le gore ba ka swanelegela go thušwa. Tše ka moka di bontšha tokišetšo e bohlale yeo Jehofa a e dirišago go thuša bao ba hlokago. Gape e bontšha gore go swanetše go bontšhwe teka-tekano e le gore go se ke gwa ba le yo a dirišago ka mo go sa swanelago botho bjo bo bontšhwago.​—2 Ba-Thesalonika 3:​10-12.

Go Hlokomela Dišuana le Bahlologadi Lehono

Melao ya motheo yeo e bego e latelwa ke bahlanka ba Modimo nakong e fetilego e sa dutše e šoma ka diphuthegong tša Dihlatse tša Jehofa mabapi le go bontšha go tshwenyega ka bao ba tlaišegago le go ba thuša. Lerato la borwarre ke seka seo se hlaolago, bjalo ka ge Jesu a itše: “Seo bohle ba tl’o xo tseba ka sôna xe Le le barutiwa ba-ka, ké xe Le na le leratanô.” (Johane 13:​35) Ge e ba ba bangwe ba tlaišwa ke bohloki goba ba fetogile bahlaselwa ba kotsi goba ditla-morago tša ntwa goba thulano ya selegae, mokgatlo ka moka wa borwarre wa lefaseng ka bophara o fišegela go hwetša ditsela tša go thuša moyeng le ka dilo tše di bonagalago. Anke re ele hloko tše dingwe tša diphihlelo tša mehleng yeno tšeo di bontšhago seo se dirwago tabeng ye.

Pedro ga a gopole mo gontši ka mmagwe yo a hwilego ge a be a e-na le ngwaga le seripa feela. Ge Pedro a e-na le nywaga e mehlano, tatagwe le yena o ile a hwa. Ka gona Pedro o ile a tlogelwa le banababo. Dihlatse tša Jehofa di be di šetše di etela tatago bona, ka gona Pedro le bo-mogolwagwe ka moka ba ile ba thoma go amogela thuto ya legae ya Beibele.

Pedro o anega ka gore: “Re ile ra thoma gatee-tee bekeng e latelago go ba gona dibokeng. Ge re dutše re kopanela le banababo rena, re be re e-kwa lerato leo ba bego ba re bontšha lona. Phuthego e be e le setšhabelo sa-ka ka gobane banababo rena le dikgaetšedi ba ile ba mpontšha lerato le go kgomega, bjalo ka ge eka e be e le batswadi ba-ka.” Pedro o gopola gore yo mongwe wa bagolo ba Bakriste o be a mo laletša legaeng la gagwe. Moo Pedro o be a e-ba le karolo dipoledišanong tša lapa le boitapološong. Pedro yo a thomilego go bolela ka tumelo ya gagwe ge a e-na le nywaga e 11 gomme a kolobetšwa a e-na le nywaga e 15 o re: “Tše ke dilo tše ke di gopolago tšeo ke di ratago.” Ba thušwa ke ditho tša phuthego, bo-mogolwagwe le bona ka mo go swanago ba ile ba dira tšwelopele e kgolo ka tsela ya moya.

Gape go na le mohlala wa David. Yena gotee le kgaetšedi ya gagwe yo e lego mafahla le yena ba ile ba lahlwa ge batswadi ba bona ba be ba arogana. Makgolo le rakgolo ba bona gotee le mmane wa bona ba ile ba ba godiša. “Ge re le gare re gola gomme re lemoga boemo bjo re bego re le go bjona, re be re fenywa ke maikwelo a go se šireletšege le manyami. Re be re hloka selo seo re ka ithekgago ka sona. Mmane o ile a ba yo mongwe wa Dihlatse tša Jehofa, gomme ka baka la se, re ile ra rutwa therešo ya Beibele. Banababo rena ba ile ba re bontšha maikwelo a bona a borutho le bogwera. Ba be ba re rata kudu gomme ba ile ba re kgothaletša go fihlelela dipakane le go tšwela pele re šomela Jehofa. Ge ke be ke e-na le nywaga e ka bago lesome, mohlanka wa bodiredi o be a e-tla go ntšea gomme a sepela le nna bodireding bja tšhemo. Ngwanabo rena yo mongwe o be a ntefelela ditshenyagalelo tša ge ke e-ya dikopanong. Yo mongwe gape o ile a nthekga ka tša ditšhelete e le gore nka dira meneelo Holong ya Mmušo.”

 David o ile a kolobetšwa ge a e-na le nywaga e 17, gomme ka morago o ile a thoma go hlankela ofising ya lekala ya Dihlatse tša Jehofa kua Mexico. Gaešita le gona bjale o dumela ka gore: “Go na le bagolo ba bantši bao ba kgathago tema e bohlokwa thutong ya-ka le go nnea keletšo e thušago. Ka tsela ye ke fenya maikwelo a go se šireletšege le go lewa ke bodutu.”

Abel yo e lego mogolo ka phuthegong kua Mexico moo go nago le bahlologadi ba bantši bao ba hlokago thušo, o anega ka gore: “Ke kgodišegile gore senyakwa seo se nyakago šedi e kgolo seo bahlologadi ba nago le sona ke thekgo ya maikwelo. Ka dinako tše dingwe ba ba le dinako tša go gateletšega; ba ikwa ba lewa ke bodutu. Ka gona, ke gabohlokwa kudu go ba bao ba ba neago thekgo le go ba theetša. Re [bagolo ba phuthego] ba etela leboelela. Ke gabohlokwa go tšea nako bakeng sa go ela hloko mathata a bona. Se se tlaleletša go ikweng ga bona ba homotšegile moyeng.” Lega go le bjalo, thušo ya dilo tše di bonagalago le yona ka dinako tše dingwe e a nyakega. Abel o ile a laodiša nakong e fetilego gore: “Ga bjale re agela kgaetšedi yo e lego mohlologadi ntlo. Re fetša Mekibelo e mengwe le mathapama a mangwe gare ga beke re šoma legaeng la gagwe.”

Mogolo yo mongwe wa phuthego o bolela mabapi le phihlelo ya gagwe ka noši ya go thuša dišuana le bahlologadi gore: “Ke dumela gore dišuana di nyaka kudu lerato la Bokriste go feta bahlologadi. Ke lemogile gore di sekametše kudu go ikweng di lahlilwe go feta bana le bafsa bao ba lego mahlalagading bao ba nago le batswadi ka bobedi. Di nyaka dipolelo tše dintši tša go bontšha maikwelo a borutho a borwarre. Ke mo go botse go di nyaka ka morago ga diboka bakeng sa go kwa gore di phela bjang. Go na le ngwanabo rena yo a nyetšego yo a ilego a ba sešuana ge e be e sa le mošemane yo monyenyane. Ka mehla ke mo dumediša ka borutho dibokeng, gomme o a nkgokarela ge a mpona. Se se matlafatša ditlemo tša lerato la kgonthe la borwarre.”

Jehofa “ó tlo Hlakodiša Modiitšana”

Go bota Jehofa go bohlokwa bakeng sa go lebeletšana ka katlego le boemo bja bahlologadi le dišuana. Go bolelwa ka yena gore: “Morêna mo-hlêka-bafaladi, mmabaledi wa thšuana le mosadi wa mohlôlôxadi.” (Psalme 146:9) Tharollo e feletšego ya mathata a mohuta wo e tla tla feela ka Mmušo wa Modimo ka tlase ga pušo ya Jesu Kriste. Mopsalme ge a hlalosa pušo yeo ya Mesia ka mokgwa wa boporofeta o ngwadile gore: “Xobane ó tlo hlakodiša modiitšana xe a lla, le mohlaki xe a hlôka monamodi. O tlo xauxêla mosenyi le mohloki; meôya ya bahumanexi ó tlo e phološa.”​—Psalme 72:​12, 13.

Ka ge bofelo bja tshepedišo ye ya dilo bo dutše bo batamela kudu, dikgateletšo tšeo Bakriste ka kakaretšo ba lebanago le tšona ka ntle le pelaelo di a oketšega. (Mateo 24:​9-13) Go bohlokwa gore ka mehla Bakriste ba bontšhe go kgomega ka mo go oketšegilego ka ba bangwe le go ba le “leratanô le tletšexo.” (1 Petro 4:​7-10) Banna ba Bakriste, kudu-kudu bagolo, ba swanetše go bontšha go kgomega le kwelobohloko bakeng sa bao e lego dišuana. Gomme basadi bao ba godilego ka phuthegong ba ka nea thekgo e kgolo go bahlologadi gomme ya ba mothopo wa khomotšo. (Tito 2:​3-5) Ge e le gabotse, yo mongwe le yo mongwe a ka ba le karolo ka go bontšha ka mafolofolo go tshwenyega ka ba bangwe bao ba tlaišegago.

Bakriste ba therešo ga ba ‘tswalele mojako wa kwelobohloko ya bona e lerato’ ge ba ‘bona ngwanabo bona e le mohloki.’ Ba hlokometše ka mo go tseneletšego go kwa keletšo ya moapostola Johane e rego: “Bana ba-ka! A re se kê ra ratana ka polêlô le ka leleme; a re rataneng ka tirô le ka therešô.” (1 Johane 3:​17, 18) Ka gona, anke re ‘hlokomeleng dišuana le bahlologadi ditlaišegong tša bona.’​—Jakobo 1:​27, NW.

[Tlhaloso ya seswantšho go letlakala 11]

“A re se kê ra ratana ka polêlô le ka leleme; a re rataneng ka tirô le ka therešô.”​—1 Johane 3:18

[Diswantšho go letlakala 10]

Bakriste ba therešo ba hlokomela dišuana le bahlologadi ka dilo tše di bonagalago, moyeng le maikwelong