Dihlare Tšeo di Kgotlelelago Nako e Telele

Legaga le ka bonagala e se lefelo le lebotse la go aga legae la gago go lona kudu-kudu ge e ba le le godimo ga dithaba. lega go le bjalo, go sa šetšwe dikotsi tše di lego molaleng, dihlare tše dingwe tša alpine di kgomarela ka magageng a bjalo, tša swarelela maregeng a tonyago kudu le go kgotlelela dikomelelo tša selemo.

GANTŠI, dihlare tše di tiilego ga se tše dikgolo kudu bjalo ka dihlare tše di tswalanago le tšona. Dikutu tša tšona di ka ba di e-na le mahuto di bile di tatagane gomme di bonagala di se sa gola. Di bopša le go thenelwa ke boemo bja legodimo bjo šoro le mobu o monyenyane wo di golelago ka go ona.

Ka ge di kgotlelela go e nngwe ya ditikologo tša seka-leganata lefaseng, o ka nagana gore dihlare tše bjalo di tla ba le nako e kopana ya bophelo. Eupša se se fapanego ke sa therešo. Ba bangwe ba bolela gore sehlare sa Methusela, mophaene wa khoune ya boditsi wo o golago ka botelele bja dimithara tše 3 000 Dithabeng tša White tša California o na le nywaga e 4 700. The Guinness Book of Records 1997 e tsopola sehlare se e le mohlala wa sehlare se se nago le nako e telele kudu mo polaneteng. Edmund Schulman yo a ithutilego ka dihlare tše tša bogologolo o hlalositše gore: “Mophaene wa khoune ya boditsi . . . o bonagala o swarelela ka baka la mathata. Dihlare tše dingwe tše dikgolo ka moka [dihlare tša mephaene] kua Dithabeng tša White di hwetšwa lešokeng la mafsika leo le omeletšego mo e ka bago go iša ga dimithara tše 3 000.” Schulman gape o ile a lemoga gore mehlala ya kgale ya mephaene e mengwe ka mo go swanago e gola maemong a thata.

Gaešita le ge di swanetše go fenya mathata, mehlala ye ya kgotlelelo e diriša ka mo go swanetšego mehola e mebedi ye e nago le yona. Tikologo ya tšona ya bodutu, moo dibjalo di sego kae e e šireletša malebana le mello ya hlaga e lego e nngwe ya poifo e kgolo go dihlare tše di godilego. Gape medu ya tšona e e tsenya ka go tia mafsikeng ao a ka šuthišwago feela ke tšhišinyego ya lefase.

 Ka Beibeleng bahlanka ba botegago ba Modimo ba swantšhwa le dihlare. (Psalme 1:​1-3; Jeremia 17:​7, 8) Le bona ka mo go swanago ba ka lebeletšana le mathata ka baka la maemo ao ba lego go ona. Tlaišo, bophelo bjo bo fokolago goba bodiidi bjo bo gatelelago di ka leka tumelo ya bona o šoro, kudu-kudu ge diteko di tšwela pele ngwaga le ngwaga. Lega go le bjalo, Mmopi wa bona yo a dirilego dihlare gore di kgotlelele mathata gabotse gakaakaa, o kgonthišetša barapedi ba gagwe gore o tla ba thekga. Beibele e holofetša bao ba dulago ba tiile gore: “Ó tlo Le tiiša, Le se hlwê Le šišinyêxa.”​—1 Petro 5:​9, 10.

‘Go ikemela ka noši, go dula re tiile goba go kgotlelela’ ke kgopolo yeo e lego lediring la Segerika leo gantši le fetolelwago e le ‘kgotlelela’ ka Beibeleng. Bjalo ka dihlare tša alpine tshepedišo e botse ya medu ke senotlelo sa kgotlelelo. Tabeng ya Bakriste, ba swanetše go tsema medu go Jesu Kriste e le gore ba eme ka go tia. Paulo o ngwadile gore: “Xe Le amoxetše Kriste Jesu Morêna, swarang tsela Lè le ba xaxwe, Le bê ba ba tsemilexo medu, ba ba axilwexo xodimo xa xaxwe, ba ba tiilexo tumelong ka mo Le rutilwexo ka xôna, Le bê ba xo mo leboxa ka botlalô.”​—Ba-Kolose 2:​6, 7.

Paulo o ile a kwešiša gore go nyakega medu e tiilego ya moya. Yena ka noši o ile a tlaišwa ke “phatša nameng” gomme a kgotlelela tlaišo e šoro bodireding bja gagwe ka moka. (2 Ba-Korinthe 11:​23-27; 12:7) Eupša o ile a lemoga gore ka matla a Modimo a ka tšwela pele. O itše: “Ke kxôna tšohle ka Eo a mphaxo matla, Yêna Kriste.”​—Ba-Filipi 4:13.

Bjalo ka ge mohlala wa Paulo o bontšha, go kgotlelela ga Mokriste ka katlego ga se gwa ithekga ka maemo a mabotse. Bjalo ka dihlare tša alpine tšeo di kgotlelelago madimo ka katlego ka nywaga-kgolo, re ka dula re tiile tumelong ge e ba re tsemile medu go Kriste gomme re ithekgile ka matla ao Modimo a a neago. Ka mo go oketšegilego, ge e ba re kgotlelela go fihla bofelong re na le kholofelo ya go bona go phethagala ga kholofetšo e nngwe ya Modimo e rego: “Matšatši a batho ba-ka a tlo lekana le matšatši a sehlare.”​—Jesaya 65:​22; Mateo 24:​13.