Dikgopolo Tše di sa Lebalegego

NGWAGA o mongwe le o mongwe Dihlatse tša Jehofa di bokana gotee dinageng tša gabo tšona tše di fapa-fapanego dikopanong tša Bokriste tše dikgolo le tše dinyenyane. Di dira se bakeng sa go thabela tlhahlo e agago moyeng le bogwera. Eupša dikarolo tše dingwe tša dipokano tša tšona di ka tlogela dikgopolo tše di sa lebalegego go baeng.

Ka mohlala, ka July 1999, Dihlatse tša Jehofa tše dikete kua Mozambique di ile tša bokana ka matšatši a mararo a humišago Kopanong ya Selete ya “Lentšu la Modimo la Boporofeta.” Bontši bja bao ba bego ba le gona ba be ba thoma go ba gona kopanong ka lekga la mathomo. Ba be ba kgahlilwe e sego feela ke mantšu ao ba a kwelego go tšwa sethaleng eupša gape le seo ba se bonego go ba dikologa.

Tlhaloso e nngwe yeo e neilwego Holong ya Kopano ya Maputo e bile e rego: “Ga se ka ka ka bona lefelo le lebotse le le swanago le le bophelong bja-ka! Dintlwana tša boithomelo di be di na le disepe le diipone e bile di nkga bose. Tikologo e be e le ya khutšo yeo e se nago lešata la bana bao ba lwago. E bile go be go se na go kgorometšana! Ke ile ka bona bafsa bao ba thabilego ba swere dipoledišano tše di agago. Gape ke ile ka kgahlwa ke tsela yeo yo mongwe le yo mongwe a bego a apere gabotse ka gona. Nakong e tlago, ke tla tla le bana ba-ka gomme ke kgodiše monna wa-ka gore re swanetše go ba gona kopanong ye.”

Ee, go bolela therešo, potego le bohlweki bja mmele tša Dihlatse tša Jehofa di a lemogwa. Ke ka baka la’ng Dihlatse e le tše fapanego? Ka gobane di leka e le ka kgonthe go diriša seo di ithutago sona go tšwa Beibeleng. Ke ka baka la’ng o sa bokane le tšona lenyaga dikopanong tša tšona tša ditšhaba goba dibokeng tša tšona tša beke le beke Holong ya Mmušo ya lefelong la geno gomme o iponele ka noši?

[Seswantšho go letlakala 32]

ZAMBIA

[Seswantšho go letlakala 32]

KENYA

[Seswantšho go letlakala 32]

MOZAMBIQUE