E-ba le Karolo Lethabong la go Nea!

“Lethabo la go nea le feta la go newa.”​—DITIRO 20:​35, NW.

1. Jehofa o bonagatša bjang lethabo la go nea?

LETHABO la go tseba therešo le ditšhegofatšo tšeo di tlišwago ke go tseba therešo ke dimpho tše bohlokwa tše di tšwago go Modimo. Bao ba tsebago Jehofa ba na le mabaka a mantši a go thaba. Eupša le ge go e-na le lethabo la go amogela mpho, gape go na le lethabo la go nea mpho. Jehofa ke Monei wa “ ’neô tšohle tše botse, le ’mphô tšôhle di tletšexo,” e bile ke “Modimo yo a thabilego.” (Jakobo 1:​17; 1 Timotheo 1:​11, NW) O nea dithuto tše di phedilego go bohle bao ba theetšago gomme o thabišwa ke ge bao a ba rutago ba mo kwa, go fo etša ge batswadi ba thaba ge bana ba bona ba arabela thutong e lerato.​—Diema 27:11.

2. (a) Jesu o itše’ng mabapi le go nea? (b) Re hwetša lethabo lefe ge re ruta ba bangwe therešo ya Beibele?

² Ka mo go swanago, ge Jesu a be a le mo lefaseng o ile a thabišwa ke go bona batho ba arabela gabotse thutong ya gagwe. Moapostola Paulo o ile a tsopola Jesu a re: “Lethabo la go nea le feta la go newa.” (Ditiro 20:​35, NW) Lethabo leo re le hwetšago ge re ruta ba bangwe therešo ya Beibele ga se feela kgotsofalo ya gore motho yo mongwe o dumelelana le ditumelo tša rena tša bodumedi. Selo se se fetago seo kudu, re thabela go tseba gore re nea selo se itšego sa kgonthe le seo se nago le mohola wo o swarelelago. Ka go nea dilo tša moya, re ka thuša batho go ikhola gona bjale gotee le go iša ka mo go sa felego.​—1 Timotheo 4:8.

Go Nea go Tliša Lethabo

3. (a) Moapostola Paulo le moapostola Johane ba bontšhitše bjang lethabo la bona ka go thuša ba bangwe moyeng? (b) Ke ka baka la’ng go nea bana ba rena therešo ya Beibele e le pontšho ya lerato?

³ Ee, bjalo ka ge Jehofa le Jesu ba thabišwa ke go nea dimpho tša moya, le Bakriste ka mo go swanago ba thabela go dira bjalo. Moapostola Paulo o ile a thabišwa ke go tseba gore o thušitše ba bangwe go ithuta therešo ya Lentšu la Modimo. O ile a ngwalela phuthego ya Thesalonika gore: “Kholofêlô ya rena, le lethabô la rena, le mphapahlôxô wo re kaxo kxanthša  wôna, e ka ba mang xe e se lena? le lena Le ba re tl’o xo kxanthša bôná pele xa Morêna mohla a boaxo. Ké lena Le lexo letaxô la rena le lethabô la rena.” (1 Ba-Thesalonika 2:​19, 20) Ka mo go swanago, moapostola Johane ge a bolela ka bana ba gagwe ba moya o ngwadile gore: “Nna xa ke na lethabô le le fetaxo leo la xe ke kwa xore bana ba-ka ba swere tsela ya therešô.” (3 Johane 4) Nagana gape le ka lethabo leo re le hwetšago ka go thuša bana ba rena ka noši go ba bana ba rena ba moya! Go godiša bana ka “xo ba etetša ka xo ba ruta le xo ba eletša tša Morêna” ke tsela yeo ka yona batswadi ba bontšhago lerato. (Ba-Efeso 6:4) Ka go dira bjalo batswadi ba bontšha gore ba tshwenyegile ka bophelo bjo bobotse bja ka mo go sa felego bja bana ba bona. Ge bana ba arabela, batswadi ba hwetša lethabo le legolo le kgotsofalo.

4. Ke phihlelo efe yeo e bontšhago lethabo la go nea dilo tša moya?

⁴ Dell ke modiredi wa mmulamadibogo wa nako e tletšego le mmago bana ba bahlano. O re: “Ke kgona go kwešiša gabotse maikwelo a moapostola Johane ka gobane ke leboga kudu gore ba bane ba bana ba-ka ba ‘swere tsela ya therešô.’ Ke a tseba gore se se tlišetša Jehofa kgodišo le letago ge malapa a kopane borapeding bja therešo, ka gona ke ikwa ke kgotsofetše ka mo go tseneletšego ka go bona tšhegofatšo ya gagwe maitekong ao ke a dirago a go tsenya therešo baneng ba-ka. Tebelelo e botse ya bophelo bjo bo sa felego Paradeiseng ke e-na le lapa la-ka e ntlatša ka kholofelo le go ntutuetša gore ke kgotlelele go sa šetšwe mathata le mapheko.” Ka manyami, yo mongwe wa barwedi ba Dell o ile a kgaolwa ka phuthegong ka baka la go sepela ka tsela ye e sego ya Bokriste. Lega go le bjalo, Dell o šoma ka thata go boloka boemo bjo bo nepagetšego bja kgopolo. O re: “Ke holofela gore ka letšatši le lengwe morwedi wa-ka o tla boela go Jehofa e le ka kgonthe le ka boikokobetšo. Eupša ke leboga Modimo gore bontši bja bana ba-ka ba tšwela pele go mo hlankela ka potego. Lethabo le ke nago le lona e bile mothopo wa kgonthe wa matla go nna.”​—Nehemia 8:10.

 Go Dira Bagwera ba ka mo go sa Felego

5. Ge re dutše re ikgafa modirong wa go dira barutiwa, re newa kgotsofalo ka go tseba eng?

⁵ Jesu o laetše balatedi ba gagwe go dira barutiwa ba Bakriste le go ba ruta ka Jehofa le dinyakwa tša gagwe. (Mateo 28:​19, 20) Bobedi Jehofa le Jesu ba thušitše batho ka tsela ya go hloka boithati gore ba ithute tsela ya therešo. Ka gona, ge re ikgafa modirong wa go dira barutiwa, re ba le kgotsofalo ya go tseba gore re ekiša mohlala wa Jehofa le wa Jesu, bjalo ka ge Bakriste ba pele ba dirile. (1 Ba-Korinthe 11:1) Ka gona ge re dirišana le Modimo Ra-matla-ohle le Morwa wa gagwe yo a rategago, maphelo a rena a ba le morero wa kgonthe. Ke lethabo le legolo gakaakang go balelwa gare ga “badirišani” ba Modimo! (1 Ba-Korinthe 3:9) Le gona na ga se mo go thabišago gore gaešita le barongwa ba na le karolo modirong wo wa go bolela ditaba tše dibotse?​—Kutollo 14:​6, 7.

6. Ge re e-ba le karolo go neeng dilo tša moya, ke bomang bao e bago bagwera ba rena?

⁶ Ge e le gabotse, ka go ba le karolo modirong wo wa go nea dilo tša moya, re ka ba seo se fetago go ba badirišani ba Modimo​—re ka ba le bogwera bja ka mo go sa felego le yena. Ka baka la tumelo ya gagwe, Aborahama o ile a bitšwa mogwera wa Jehofa. (Jakobo 2:​23, bapiša le PK.) Ge re katanela go dira thato ya Modimo, le rena re ka ba bagwera ba Modimo. Ge e ba re dira bjalo, le rena re ba bagwera ba Jesu. O boditše barutiwa ba gagwe gore: “Ke re Le baxwêra, ka xobane ke Le boditše tšohle tše ke di kwilexo xo Tate.” (Johane 15:​15) Ba bantši ba thabela go lebelelwa e le bagwera ba batho bao ba nago le tutuetšo goba bahlankedi ba phagamego, eupša re lebelelwa re le bagwera ba batho ba babedi ba bagolo kudu legohleng ka moka!

7. (a) Ke bjang mosadi yo mongwe a ilego a itirela mogwera wa kgonthe? (b) Na o bile le phihlelo e swanago?

⁷ Go oketša moo, ge re thuša batho go tseba Modimo, le bona e ba bagwera ba rena, e lego seo se re tlišetšago lethabo le le kgethegilego. Joan yo a dulago United States, o ile a thoma go ithuta Beibele le mosadi yo a bitšwago Thelma. Gaešita le ge Thelma a ile a lebeletšana le kganetšo ya lapa thutong ya gagwe, o ile a kgotlelela gomme a kolobetšwa ka morago ga ngwaga. Joan o ngwadile gore: “Tswalano ya rena ga se ya ka ya felela fao; go e na le moo, e ile ya gola ya fetoga segwera seo se šetšego se e-na le nywaga e ka bago 35 ga bjale. Re be re fela re e-ya bodireding le dikopanong gotee. Mafelelong, ke ile ka hudugela legaeng le lefsa le le lego bokgole bja dikhilomithara tše 800. Eupša Thelma o tšwela pele go nthomela mangwalo a lerato kudu le ao a thabišago pelo, a mpotša gore o nagana ka nna ka lerato le go nteboga bakeng sa go ba mogwera wa gagwe le mohlala le bakeng sa go mo ruta therešo ya Beibele. Go ba le mogwera yo bjalo wa kgaufsi le yo a rategago ke moputso o mobotse bakeng sa boiteko bjo ke bo dirilego bja go mo thuša go ithuta ka Jehofa.”

8. Ke boemo bofe bja kgopolo bjo bo nepagetšego bjo bo tlago go re thuša bodireding?

⁸ Tebelelo ya go hwetša motho yo mongwe yo a nyakago go ithuta therešo e ka re thuša gore re kgotlelele gaešita le ge bontši bja batho bao re gahlanago le bona ba bontšha kgahlego e nyenyane goba ba sa bontšhe kgahlego Lentšung la Jehofa. Go se šetše mo go bjalo go ka tšweletša tlhohlo tumelong le kgotlelelong ya rena. Lega go le bjalo, boemo bjo bo nepagetšego bja kgopolo bo tla re thuša. Fausto yo a tšwago Guatemala o itše: “Ge ke nea bohlatse go ba bangwe, ke nagana kamoo e bego e tla ba mo gobotse ka gona ge e ba motho yo ke boledišanago le yena a be a ka ba ngwanešo wa moya goba kgaetšedi ya-ka ya moya. Ke ipotša gore bonyenyane motho o tee yo ke tla gahlanago le yena mafelelong o tla amogela therešo ya Lentšu la Modimo. Kgopolo yeo e nthuša gore ke tšwele pele ke nea bohlatse gomme e ntlišetša lethabo la kgonthe.”

Go Boloka Mahumo Legodimong

9. Jesu o ile a re’ng mabapi le mahumo legodimong, gomme re ka ithuta’ng go se?

⁹ Go dira barutiwa ga se ka mehla go lego bonolo, go sa šetšwe gore se se dirwa go bana ba rena goba batho ba bangwe. Go ka nyaka nako, go se fele pelo le kgotlelelo. Lega go le bjalo, gopola gore ba bantši ba ikemišeditše go šoma ka thata bakeng sa go boloka dilo tše dintši tše di bonagalago, dilo tšeo gantši di sa ba tlišetšego lethabo le tšeo e sego tša ka mo go sa felego. Jesu o ile a botša batheetši ba gagwe gore go kaone  go šomela dilo tša moya. O itše: “Le se kê la ikxobêlêla mahumô lefaseng, mo xo senyaxo thswêlê le diji, mo xo phulaxo mahodu a utswa. Mahumô ikxobeleng lexodimong, mo xo sa senyexo thswêlê le diji, mo xo sa phulexo mahodu a utswa.” (Mateo 6:​19, 20) Ka go phegelela dipakane tša moya​—tše di akaretšago go ba le karolo modirong o bohlokwa wa go dira barutiwa​—re ka ba le kgotsofalo ya go tseba gore re dira thato ya Modimo le gore o tla re putsa. Moapostola Paulo o ngwadile gore: “Modimo xa a bebe motho, xa a lebale medirô ya lena, le leratô le Le itapišitšexo ka lôna ’ineng la xaxwe.”​—Ba-Hebere 6:10.

10. (a) Ke ka baka la’ng Jesu a be a e-na le mahumo a moya? (b) Jesu o ile a ikgafa bjang, gomme ka mohola ofe o mogolo go ba bangwe?

¹⁰ Ge e ba re šoma ka mafolofolo bakeng sa go dira barutiwa, re ipolokela ‘mahumo legodimong,’ ka go dumelelana le seo Jesu a se boletšego. Se se re tlišetša lethabo la go amogela. Ge e ba re nea ka go hloka boithati, re feleletša re humišitšwe rena ka noši. Jesu ka boyena o ile a hlankela Jehofa ka potego ka nywaga e dimilione tše dikete tše sa balegego. Nagana ka mahumo ao a a kgobokeditšego legodimong! Lega go le bjalo, Jesu ga se a ka a itsomela dikgahlego tša gagwe ka noši. Moapostola Paulo o ngwadile gore: “[Jesu yo] a ikxafilexo ka ’baka la dibe tša rena xore a re phološê lebakeng le lebe lé la byale, ka xo rata xa Modimo Tata wešo.” (Ba-Galatia 1:4, mongwalo o sekamego ke wa rena.) Ga se feela gore Jesu o ile a ikgafa ka tsela ya go hloka boithati bodireding bja gagwe eupša o ile a ba a gafa bophelo bja gagwe e le topollo e le gore ba bangwe ba ka ba le sebaka sa go ipolokela mahumo legodimong.

11. Ke ka baka la’ng dimpho tša dilo tša moya di phala tša dilo tše di bonagalago?

¹¹ Ka go ruta batho ka Modimo, re ba thuša go bona kamoo le bona ba ka ipolokelago mahumo a moya a sa senyegego. Ke mpho efe e kgolo go feta ye yeo o ka e neago? Ge e ba o nea mogwera sešupa-nako, koloi, goba gaešita le legae tšeo di bitšago kudu, mogwera yoo mohlomongwe o tla leboga le go thaba gomme wena o tla ba le lethabo la go nea. Eupša boemo bja mpho yeo e tla ba e le bofe ka morago ga nywaga e 20? Ka morago ga nywaga e 200? Ka morago ga nywaga e 2 000? Ka lehlakoreng le lengwe, ge e ba o ikgafela go thuša motho gore a hlankele Jehofa, motho yoo a ka holwa ke mpho yeo ka mo go sa felego.

Go Tsoma Bao ba Nyakago Therešo

12. Ba bantši ba ile ba ikgafa bjang bakeng sa go thuša ba bangwe moyeng?

¹² Batho ba Jehofa ba fihlile dikhutlong tša lefase e le gore ba be le karolo lethabong la go nea dilo tša moya. Ba dikete ba tlogetše magae le ba leloko bakeng sa go tsenela tirelo ya boromiwa dinageng tšeo go tšona ba ilego ba swanelwa ke gore ba itlwaelanye le maleme a mafsa le ditšo. Ba bangwe ba hudugetše ditikologong tša dinageng tša gabo bona moo go nyakegago thušo e kgolo bakeng sa bagoeledi ba Mmušo. Ba bangwe gape ba ithutile leleme le lefsa, ba bula dibaka tše difsa tša boboledi ditikologong tša gabo bona go baagi ba bafaladi. Ka mohlala, banyalani ba bangwe kua New Jersey, U.S.A., ka morago ga go godiša bana ba babedi bao ga bjale ba hlankelago ntlong-kgolo ya lefase ya Dihlatse tša Jehofa, ba ile ba thoma go bula madibogo gomme ba ithuta se-China. Lebakeng la ka godimo ga nywaga e meraro, ba ile ba swara dithuto tša Beibele le batho bao ba bolelago se-China ba 74 bao ba bego ba tsena kholetšheng e lego kgaufsi. Na o ka kgona go katološa bodiredi bja gago ka tsela e itšego bakeng sa go hwetša lethabo le le oketšegilego modirong wa go dira barutiwa?

13. Ke eng seo o ka se dirago ge e ba o tla rata go ba le bodiredi bjo bo enywago kudu?

 ¹³ Mohlomongwe o kganyoga go swara thuto ya Beibele eupša ga se wa ka wa kgona go dira bjalo. Dinageng tše dingwe go thata go hwetša batho bao ba thabelago. Mohlomongwe batho bao o gahlanago le bona ga ba bontšhe kgahlego Beibeleng. Ge e ba go le bjalo, mohlomongwe o ka bolela kganyogo ya gago gantši kudu ka thapelo, o tseba gore bobedi Jehofa le Jesu Kriste ba na le kgahlego e tseneletšego ka modiro wo gomme ba ka go hlahla gomme ba go iša mothong yo a swanago le nku. Tsoma ditšhišinyo go bao ba lego ka phuthegong ya geno bao ba nago le phihlelo e kgolwanyane goba bao bodiredi bja bona bo enywago kudu. Diriša ka mo go holago tlhahlo le ditšhišinyo tšeo di newago dibokeng tša Bokriste. Holwa ke keletšo ya balebeledi ba basepedi le basadi ba bona. Ka godimo ga tšohle, le ka mohla o se ke wa lapa. Monna yo bohlale o ngwadile gore: “Byala peu ya xaxo e sa le bosasa, le ka mantšibua ’atla s’axo se se khutšê; xa O tsebe ye e tl’o xo mela.” (Mmoledi 11:6) Go sa dutše go le bjalo, gopola banna ba botegago ba bjalo ka Noage le Jeremia. Gaešita le ge e le ba sego kae feela bao ba ilego ba arabela gabotse boboleding bja bona, ba bangwe ba ile ba dira bjalo gomme bodiredi bja bona bo ile bja atlega. Go feta tšohle, bo ile bja thabiša Jehofa.

Go Dira Sohle Seo o ka se Kgonago

14. Jehofa o lebelela bjang batšofadi tirelong ya gagwe?

¹⁴ Mohlomongwe maemo a gago ga a go dumelele go dira sohle seo o bego o ka rata go se dira bodireding. Ka mohlala, botšofadi bo ka lekanyetša seo o ka se dirago tirelong ya Jehofa. Lega go le bjalo, gopola seo monna yo bohlale a se ngwadilego: “Hlôxô-pududu ké ’ala sa bothšephi; se hwetšwa tseleng ya xo loka.” (Diema 16:​31) Go Jehofa, bophelo bjo bo dirišwago tirelong ya gagwe bo a thabiša. Go oketša moo, Mangwalo a re: “Le tlo ba la tšofala kè sa fêla kè [Jehofa] le Yêna-é, kè Le kuka Lè le ’hlôxô tše pududu. Ké Nna ke di dirilexo. Ké Nna ke tl’o xo kuka; ké Nna kè tl’o xo rwala ka phološa.” (Jesaya 46:4) Tatago rena yo lerato wa legodimong o holofetša go fepa le go thekga batho bao ba mmotegelago ka go se kwanantšhe.

15. Na o a dumela gore Jehofa o kwešiša maemo a gago? Ka baka la’ng?

¹⁵ Mohlomongwe o swanela ke go kgotlelela bolwetši, kganetšo e tšwago go molekane yo a sa dumelego, boikarabelo bjo boima bja lapa goba bothata bjo bongwe bjo boima. Jehofa o lemoga mafokodi a rena gotee le maemo, gomme o a re rata ka baka la maiteko a rena a kgonthe a go mo hlankela. Se ke sa therešo gaešita le ge seo re se dirago se ka ba se fetwa ke seo ba bangwe ba se dirago. (Ba-Galatia 6:4) Jehofa o a tseba gore ga se ra phethagala, gomme o bontšha teka-tekano go seo a se letetšego go rena. (Psalme 147:​11) Ge e ba re dira sohle seo re ka se kgonago, re ka kgonthišega gore re bohlokwa mahlong a Modimo  le gore a ka se lebale ditiro tša rena tša tumelo.​—Luka 21:​1-4.

16. Ke ka tsela efe phuthego ka moka ga yona e bago le karolo go direng barutiwa?

¹⁶ Gopola gape gore modiro wa go dira barutiwa ke modiro wa sehlopha. Ga go na motho o tee yo a dirago morutiwa go fo etša ge lerothi le tee la pula le ka se fepe semela. Ke therešo gore Hlatse e tee e ka hwetša motho yo a thabelago gomme ya mo swarela thuto ya Beibele. Eupša ge motho yoo yo mofsa a e-tla Holong ya Mmušo, phuthego ka moka e mo thuša go lemoga therešo. Borutho bja borwarre bo bontšha tutuetšo ya moya wa Modimo. (1 Ba-Korinthe 14:​24, 25) Bana le bafsa ba nea dikarabo tše di tutuetšago, e lego seo se bontšhago motho yo a sa tšwago go thoma go kopanela gore bafsa ba rena ba fapane le bafsa ba lefase. Balwetši, batho bao ba fokolago mmeleng le batšofadi ka phuthegong ba ruta batho bao ba sa tšwago go thoma go kopanela seo kgotlelelo e se akaretšago. Go sa šetšwe bogolo bja rena nywageng goba mafokodi, ka moka ga rena re kgatha tema e bohlokwa go thušeng ba ba sa tšwago go thoma go kopanela ge lerato la bona la therešo ya Beibele le dutše le gola gomme ba gatela pele ba lebile kolobetšong. Iri e nngwe le e nngwe yeo re e fetšago re le bodireding, leeto le lengwe le le lengwe la go boela le poledišano e nngwe le e nngwe yeo re e swarago le motho yo a thabelago re le Holong ya Mmušo, di ka bonagala e le tše di sego bohlokwa, eupša ke karolo ya modiro o mogolo woo Jehofa a o phethago.

17, 18. (a) Go oketša tabeng ya go ba le karolo modirong wa go dira barutiwa, re ka ba le karolo bjang lethabong la go nea? (b) Re ekiša mang ka go ba le karolo lethabong la go nea?

¹⁷ Ee, ka ntle le go ba le karolo modirong wa bohlokwa wa go dira barutiwa, rena bjalo ka Bakriste re ba le karolo gape lethabong la go nea ka ditsela tše dingwe. Re ka beela ditšhelete ka thoko bakeng sa go neela e le go thekga borapedi bjo bo sekilego le go thuša bahloki. (Luka 16:9; 1 Ba-Korinthe 16:​1, 2) Re ka tsoma dibaka tša go bontšha ba bangwe moya wa go amogela baeng. (Ba-Roma 12:​13) Re ka katanela ‘go dira botse, re bo direla bohle, gagolo re bo direla batho ba gabo rena ba tumelo.’ (Ba-Galatia 6:​10) Le gona re ka nea ba bangwe, ka ditsela tše bonolo e bile e le tše bohlokwa​—lengwalo, go ba leletša mogala, mpho, go ba thuša le ka mantšu a kgothatšo.

¹⁸ Ka go nea, re bontšha gore re ekiša Tatago rena wa legodimong. Gape re bontšha lerato la rena la borwarre, e lego leswao le le hlaolago la Bakriste ba therešo. (Johane 13:​35) Go gopola dilo tše go ka re thuša go ba le karolo lethabong la go nea.

Na o ka Hlalosa?

• Jehofa le Jesu ba beile bjang mohlala tabeng ya go nea dilo tša moya?

• Re ka dira bjang bagwera ba ka mo go sa felego?

• Ke megato efe yeo re ka e gatago bakeng sa go dira bodiredi bja rena gore e be bjo bo atlegago kudu?

• Ke bjang bohle ka phuthegong ba ka bago le karolo lethabong la go nea?

[Dipotšišo tša Thuto]

[Diswantšho go letlakala 13]

Ge bana ba arabela tlwaetšong, batswadi ba thaba kudu le go kgotsofala

[Seswantšho go letlakala 15]

Ka go dira barutiwa, re ka dira bagwera ba kgonthe

[Seswantšho go letlakala 16]

Jehofa o a re thekga botšofading

[Diswantšho go letlakala 17]

Ka ditsela tše bonolo e bile e le tše bohlokwa, re hwetša lethabo ka go nea