Ke ka Baka La’ng re Ithuta Beibele?

BILL e be e le ramabelo yo mofsa, yo a rutegilego e bile a eme gabotse ka tša ditšhelete. Lega go le bjalo, o be a sa kgotsofala. Bophelo bja gagwe bo be bo se na morero gomme seo se be se mo tshwenya ka mo go tseneletšego. A leka go hwetša morero bophelong, o ile a hlahloba madumedi a fapa-fapanego, eupša ga se a ka a hwetša seo a bego a se nyaka. Ka 1991 o ile a kopana le yo mongwe wa Dihlatse tša Jehofa yoo a ilego a mo tlogelela puku yeo e bego e hlalosa seo Beibele e se bolelago ka morero wa bophelo. Thuto ya Beibele e ile ya rulaganywa e le gore Bill a ka lebiša tlhokomelo tabeng ye gotee le tše dingwe.

Bill o gopola gore: “Re ile ra swara thuto ya rena ya mathomo, gomme ka gobane re ile ra bala Beibele gantši kudu ke ile ka tseba gore se ke seo ke bego ke dutše ke se nyaka. Dikarabo tšeo di lego ka Beibeleng e be e le tše kgahlišago kudu. Ka morago ga thuto yeo, ke ile ka ya dithabeng gomme ka tšwa ka loring ya-ka ka llela godimo ka baka la go thaba e le ka kgonthe. Ke be ke thabišitšwe ke gore mafelelong ke be ke hwetša dikarabo dipotšišong tša-ka.”

 Ke therešo gore ga se yo mongwe le yo mongwe yo a llago e le ka kgonthe ka lethabo ge a hwetša therešo ya Beibele. Lega go le bjalo, go hwetša dikarabo dipotšišong tše bohlokwa tša bophelo ke phihlelo e thabišago go ba bantši. Ba ikwa bjalo ka monna wa seswantšhong sa Jesu yo a ilego a bona lehumo le le utilwego tšhemong. Jesu o itše: “ ’Me ka xo le thabêla a ya a rekiša thoto ya xaxwe ka moka, a rêka thšemo yeo.”​—Mateo 13:44.

Senotlelo se se Lebišago Bophelong bjo bo Nago le Morero

Bill o ile a naganišiša potšišo ya motheo e rego, Morero wa bophelong ke ofe? Bo-radifilosofi, bo-rathutatumelo le bo-rathutamahlale ba ile ba katana le potšišo ye ka nywaga-kete. Batho ba ile ba ngwala dibolumo tše di sa balegego bakeng sa go leka go araba potšišo ye. Maiteko a bona e bile a lefeela, gomme ba bantši ba ile ba phetha ka gore potšišo ye e ka se ke ya arabja. Lega go le bjalo, karabo e gona. Gaešita le ge e le e tseneletšego, eupša ga se e raraganego. E hlaloswa ka Beibeleng. Senotlelo se se lebišago bophelong bjo bo thabišago le bjo bo nago le morero ke se: Re swanetše go ba le tswalano e swanetšego le Jehofa, Mmopi wa rena le Tatago rena wa legodimong. Re fihlelela seo bjang?

Go na le dibopego tše pedi tšeo go bonagalago di ganetšana tša go batamela kgaufsi le Modimo. Bao ba batamelago kgaufsi le yena ba a mmoifa le go mo rata. Anke re ele hloko mangwalo a mabedi ao a thekgago taba yeo. Nakong e telele e fetilego, Kgoši Salomo yo bohlale o ile a ithuta ka kelohloko ka batho gomme a bega dikutollo tša gagwe ka pukung ya Beibele ya Mmoledi. Ge a be a akaretša dikutollo tša gagwe, o ngwadile gore: “A re kweng phêthêxô ya ditaba tšohle: Boifa Modimo, O lôtê taêlô tša xaxwe. Ké se se swanetšexo batho bohle.” (Mmoledi 12:​13, mongwalo o sekamego ke wa rena.) Nywaga-kgolo ka morago, ge Jesu a be a botšišwa gore molao o mogolo Molaong o neilwego Moše ke ofe, o arabile ka gore: “Morêna Modimo wa xaxo O mo ratê ka pelo ya xaxo ka moka, le ka môya wa xaxo ka moka, le ka thlaoloxanyô ya xaxo ka moka.” (Mateo 22:​37, mongwalo o sekamego ke wa rena.) Na go bonagala e le mo go sa tlwaelegago go wena gore re swanetše go boifa Modimo le go mo rata ka nako e swanago? Anke re hlahlobeng bohlokwa bja poifo le lerato le gore ke bjang di šomago gotee bakeng sa go tšweletša tswalano e kgotsofatšago le Modimo.

Seo go Boifa Modimo go se Bolelago

Poifo ya tlhompho e bohlokwa ge e ba re tla rapela Modimo ka mo go amogelegago. Beibele e re: “Xo boifa Morêna ké mathômô a bohlale.” (Psalme 111:​10) Moapostola Paulo o ngwadile gore: “Xomme a re leboxeng ka xo dirêla Modimo ka mo xo mo kxahlaxo, ka xo Mo xodiša le xo mmoifa.” (Ba-Hebere 12:​28) Ka mo go swanago, morongwa yo a fofago bogareng bja legodimo yo moapostola Johane a mmonego ponong o ile a thoma go tsebatša ga gagwe ditaba tše dibotse ka mantšu a rego: “Boifang Modimo Le rêtê Yêna.”​—Kutollo 14:​6, 7.

Poifo ye ya go boifa Modimo, yeo e lego bohlokwa kudu bophelong bjo bo nago le morero ga e swane le go boifa bobe mo go sa swanelago. Re ka ikwa re boifa ge e ba re tlaišwa ke sesenyi se sehlogo le se se lego kotsi. Eupša poifo ya go boifa Modimo​—ke tlhompho ya go hlompha Mmopi. Gape go akaretša poifo e swanetšego ya go boifa go se kgahliše Modimo ka gobane ke Moahlodi yo a Phagamego le Ra-matla-ohle yo a nago le bobedi matla le taolo ya go otla bao ba sa mo kwego.

Poifo le Lerato di Šoma Gotee

Lega go le bjalo, Jehofa ga a nyake gore batho ba mo hlankele feela ka baka la gore ba mmoifa. Jehofa ke Modimo wa lerato ka mo go bonagalago. Moapostola Johane o ile a tutueletšega go ngwala gore: “Modimo ké Yêna leratô.” (1 Johane 4:8) Jehofa Modimo o ile a dirišana le batho ka lerato kudu, gomme o nyaka gore batho ba arabele ka go mo rata. Lega go le bjalo, lerato le  le bjalo le dumelelana bjang le poifo ya go boifa Modimo? Tše tše pedi ge e le gabotse di a tswalana. Mopsalme o ngwadile gore: “Morêna ó kwana le ba ba mmoifaxo.”​—Psalme 25:14.

Nagana feela ka maikwelo a tlhompho le poifo ao ngwana a nago le ona bakeng sa tate yo bohlale le yo a tiilego mmeleng. Ka nako e swanago ngwana yo bjalo o tla arabela leratong la tate. Ngwana o tla bota tate gomme a lebelela tlhahlo go yena, a kgodišegile gore tlhahlo ye e tla tliša mehola. Ka mo go swanago, ge e ba re rata Jehofa le go mmoifa re tla latela tlhahlo ya gagwe gomme se se tla re hola. Ela hloko seo Jehofa a se boletšego mabapi le ba-Isiraele gore: “A dipelo tša bôná e ka bê e le tše byalo ka mehla, ba mpoifa, ba hlôkômêla ditaêlô tša-ka ka moka; ké mo ba ka bexo ba dula bà thabile, bôná le bana ba bôná neng le neng!”​—Doiteronomio 5:29.

Ee, poifo ya go boifa Modimo ga e lebiše bokgobeng eupša e lebiša tokologong, e sego manyaming eupša lethabong. Jesaya o porofetile ka Jesu gore: “Xo šia Morêna xo tlo mo kxahla.” (Jesaya 11:3) Le gona mopsalme o ngwadile gore: “Monna wa lehlôxônôlô ké e a boifaxo Morêna, a kxahlwa xaxolo ke ’tayô tša xaxwe.”​—Psalme 112:1.

Ka mo go lego molaleng, re ka se boife Modimo goba go mo rata ge e ba re sa mo tsebe. Ke ka baka leo thuto ya Beibele e lego bohlokwa gakaakaa. Thuto e bjalo e re thuša go kwešiša semelo sa Modimo le go lemoga ka tebogo bohlale bja go latela tlhahlo ya gagwe. Ge re dutše re batamela kgaufsi kudu le Modimo, re nyaka go dira thato ya gagwe gomme re tutueletšega go boloka melao ya gagwe, re tseba gore e tla re hola.​—1 Johane 5:3.

Go a thabiša go tseba gore motho o tseleng e lokilego bophelong. Se ke sa therešo ka Bill yo go boletšwego ka yena mathomong. Moragonyana o rile: “Nywageng e senyane e fetilego ga e sa le go tloga ka thuto ya-ka ya pele ya Beibele, tswalano ya-ka le Jehofa e godile. Go phophoma ka lethabo ga mathomong mo ke ilego ka go kwa go ile gwa gola go ba tsela e thabišago e le ka kgonthe ya bophelo. Ka mehla ke na le pono e nepagetšego ka bophelo. Matšatši a-ka a tletše ka modiro o nago le morero, e sego ka go tsoma maipshino mo go se nago morero. Jehofa o fetogile motho wa kgonthe go nna, gomme ke a tseba gore o kgahlegela kudu bophelo bja-ka bjo bobotse.”

Sehlogong se se latelago, re tla ela hloko ka mo go tšwelago pele kamoo tsebo ya go tseba Jehofa e tlišago lethabo le mehola go bao ba e dirišago maphelong a bona.

[Ntlhakgolo go letlakala]

Go batamela kgaufsi le Modimo go bolela gore bobedi re mo rate le go mmoifa

[Seswantšho go letlakala 6]

Jesu o ile a thabela go boifa Jehofa