O ‘Kgotleletše go Fihla Bofelong’

BIDIONG ya 1993 yeo e bontšhwago ditho tše difsa tša bašomi ba ntlong-kgolo ya Dihlatse tša Jehofa, Lyman Alexander Swingle o ile a bontšha maikwelo a gagwe ka go hlankela Jehofa ka gore: “Lešole le hwela ntweng!” *

Ngwanabo rena Swingle wa nywaga e 90 o ile a dira e le ka kgonthe seo a ilego a kgothaletša ba bangwe go se dira. O ile a ‘kgotlelela go fihla bofelong.’ (Mateo 24:​13, NW) Gaešita le ge a be a fokola mmeleng, ka Laboraro March 7 o ile a ba gona sebokeng sa Sehlopha se Bušago sa Dihlatse tša Jehofa seo e bego e le setho sa sona. Labobedi le le latelago boemo bja gagwe bo ile bja befela pele, gomme ka 4:​26 a.m, ka March 14 ngaka ya gagwe e ile ya tsebiša gore o hwile.

Lyman Swingle o ile a thoma tirelo ya gagwe ntlong-kgolo ya Dihlatse tša Jehofa kua Brooklyn, New York ka April 5, 1930. O ile a hlankela moo lebaka la mo e ka bago nywaga e 71. La mathomo Lyman o ile a abelwa go šoma go tlema dipuku, ke moka a ya lefelong la kgatišo gomme a ba a thuša gape le ka go dira enke. Ge e le gabotse, Ngwanabo rena Swingle o feditše mo e ka bago nywaga e 25 lefapheng la go tšweletša enke. O ile a hlankela gape nywaga e 20 e le setho sa lefapha la bongwadi la ntlong-kgolo. Nywageng e 17 ya mafelelo ya bophelo bja gagwe, o ile a šoma Treasurer’s Office.

Lyman e be e le mogoeledi wa sebete wa Mmušo wa Modimo. Nywageng ya gagwe ya pejana kua Brooklyn, yena gotee le yo a bego a dula le yena ka phapošing e lego Arthur Worsley, ba be ba tlwaetše go sesa ka se sengwe sa diketswana sa Dihlatse go rotoga Noka ya Hudson. Ba diriša motšhene wa go godiša modumo, ba be ba fetša mafelo-beke a mantši ba gaša molaetša wa Mmušo ditšhabeng tša lebopong.

Ngwanabo rena Swingle o belegwe ka November 6, 1910, kua Lincoln, Nebraska, eupša kapejana ka morago ga moo lapa le ile la hudugela Salt Lake City, Utah. Gona moo ka 1913, batswadi ba gagwe e ile ya ba Barutwana ba Beibele, bjalo ka ge Dihlatse tša Jehofa di be di bitšwa bjalo ka nako yeo. Go theoša le nywaga, lapa la ga Swingle le ile la amogela diboledi tše dintši tša baeng go tšwa ntlong-kgolo ya Dihlatse Brooklyn, gomme banna ba ba bile le tutuetšo e botse go Lyman. Ka 1923, ge a be a e-na le nywaga e 12 o ile a kolobetšwa e le leswao la boineelo bja gagwe go Modimo.

Ka morago ga go hlankela ka nywaga e fetago 26 Brooklyn a se a nyala, bophelo bja Lyman bo ile bja humišwa ka mo go sa lekanywego ge a be a nyala Crystal Zircher ka June 8, 1956. Ba be ba sa arogane, ba e-ba le karolo bodireding gotee go fihla lehung la Crystal ka 1998. Mo e ka bago nywaga e meraro pejana, Crystal o ile a hwa lehlakore mo go ilego gwa mo golofatša kudu. Go mo hlokomela ga Lyman letšatši le lengwe le le lengwe e be e le mohlala wa boineelo wo o bego o tutuetša go bohle, kudu-kudu go bao ba ilego ba bona Lyman ka lerato a kgorometša koloyana ya digole ditseleng tša maoto tikologong ge Crystal a dutše a bontšha Morokami le Phafoga! go batho bao ba fetago.

Ngwanabo rena Swingle e be e le monna wa lethabo, wa pelo e borutho yo a ilego a itira gore a ratwe ke bao ba ilego ba mo tseba. Bjalo ka mmagwe le tatagwe, o be a e-na le kholofelo yeo e theilwego Beibeleng ya go phela le Jesu Kriste Mmušong wa legodimong, kholofelo yeo re kgodišegilego gore ga bjale e phethagaditšwe.​—1 Ba-Thesalonika 4:​15-18; Kutollo 14:13.

[Mengwalo ya ka tlase]

[Seswantšho go letlakala 31]

Ngwanabo rena Swingle o hlanketše nywaga e ka bago 25 a šoma lefapheng la go tšweletša enke

[Seswantšho go letlakala 31]

Lyman le Crystal ba be ba sa arogane