O se ke wa Dumelela Dipelaelo di Senya Tumelo ya Gago

Lehono o ikwa eka o phetše gabotse mmeleng. Ka moso o ikwa o babja. Kapejana ga o sa na matla goba mafolofolo. Hlogo ya gago e a opa gomme mmele wa gago o kwa mahlaba. Go diregile’ng? Dibaki tša malwetši tše kotsi di hlasetše le go fokodiša tshepedišo ya gago ya mmele ya go lwantšha malwetši gomme tša hlasela ditho tša bohlokwa. Ge o sa alafše, diphedi tše tšeo di hlaselago di ka senyetša bophelo bja gago sa ruri​—di ka ba tša go bolaya.

EE, GE e ba o se boemong bjo bobotse bja tša maphelo ge bolwetši bo hlasela, o tla hlaselega gabonolo kudu. Mongwadi wa tša kalafo Peter Wingate o re, ka mohlala ge e ba mmele wa gago o fokodišwa ke phepo-mpe, twantšho ya gago “e fokola kudu moo bolwetši bjo bonyenyane bo ka bago kotsi.”

Ge go le bjalo, ke mang yo a ka kgethago go dula ka tlala? Ka mo go tlwaelegilego, o dira sohle se o ka se kgonago gore o je gabotse gomme o dule o phetše gabotse. Mohlomongwe o dira sohle se o ka se kgonago go phema malwetši a fetelago goba a paketheria. Lega go le bjalo, na o diriša temogo e swanago ge go tliwa tabeng ya go dula o ‘phetše tumelong.’ (Tito 2:2) Ka mohlala, na o phafogetše kotsi yeo e tšweletšwago ke dipelaelo tša bohwirihwiri? Tše di ka šwahlela monagano le pelo ya gago gabonolo gomme tša senya tumelo ya gago le tswalano ya gago le Jehofa. Batho ba bangwe go bonala ba sa hlokomele kotsi ye. Ba itira bahlaselwa ba bonolo ba dipelaelo ka go ipolaiša tlala moyeng. Na go a kgonega gore o ka ba o dira seo?

Pelaelo​—Na ka Mehla e Kotsi?

Go ba gona, ga se dipelaelo ka moka tšeo di lego kotsi. Ka dinako tše dingwe, o swanetše go dika-dika go dumela selo se itšego go fihlela o hwetša kgonthe ya taba. Dikgothatšo tša bodumedi tša gore o swanetše go fo dumela le gore ga se wa swanela gore o belaele selo di kotsi e bile di a fora. Ke therešo gore Beibele e re lerato “le dumêla tšohle.” (1 Ba-Korinthe 13:7) Mokriste yo lerato ka ntle le pelaelo o ikemišeditše go dumela bao ba ipontšhitšego ba botega nakong e fetilego. Eupša Lentšu la Modimo gape le lemoša malebana le go “dumêla ’taba tšohle.” (Diema 14:​15) Ka dinako tše dingwe ditiro tša motho tša nakong e fetilego di nea lebaka le le kwagalago la go belaela. Beibele e lemoša ka gore: “Se mo dumêlê [motho yo a bolelago dipolelo tša boradia] xe a kwatša botho.”​—Diema 26:​24, 25.

Moapostola Johane gape o ile a lemoša Bakriste malebana le tumelo e belaetšago. O ngwadile gore: “Le se kê la fo dumêla meôya ka moka.” Go e na le moo, “sa lena a e bê xo lekola meôya, xore Le bônê xe e tšwa xo Modimo.” (1 Johane  4:1) “Meôya,” thuto goba kakanyo, e ka bonala e e-tšwa go Modimo. Eupša na e-tšwa go yena e le ka kgonthe? Go ba le dipelaelo tše itšego goba go dika-dika go dumela, e ka ba tšhireletšo ya kgonthe ka gobane bjalo ka ge moapostola Johane a bolela, “lefaseng lé xo tsene baaroši.”​—2 Johane 7.

Dipelaelo tše di se Nago Motheo

Ee, tlhahlobo ya kgonthe le ya boikokobetšo ya ditherešo bakeng sa go hwetša therešo gantši e a nyakega. Lega go le bjalo, se ga se swane le go dumelela dipelaelo tše di se nago motheo le tše di senyago go gola ka monaganong le dipelong tša rena​—dipelaelo tše di ka wišago ditumelo le ditswalano tša rena tše di theilwego ka go tia. Pelaelo ye e hlaloswa e le “go se kgonthišege ka tumelo goba kakanyo moo gantši go šitišago go dira phetho.” Na o sa gopola kamoo Sathane a ilego a tsenya monaganong wa Efa dipelaelo ka Jehofa? O ile a botšiša gore: “Afá Modimo ó boletše a re: Dihlare tšohle tša thšemo yé Le se kê la di ja?” (Genesi 3:1) Go se kgonthišege mo go tsošitšwego ke potšišo yeo e kwagalago e se na molato go ile gwa šitiša go dira ga gagwe phetho. Wo ke mohuta wa mekgwa ya Sathane. Bjalo ka motho yo a ngwalago mangwalo a lesebo, o na le bokgoni bja go diriša dipolelo tša go se lebanye, ditherešo tše di sa felelago le maaka. Sathane o sentše ditswalano tše di sa balegego tše dibotse ka dipelaelo tša bohwirihwiri tše di bjalwago ka tsela yeo.​—Ba-Galatia 5:​7-9.

Morutiwa Jakobo o ile a kwešiša gabotse mafelelo a gobatšago a pelaelo ya mohuta wo. O ngwala mabapi le tokelo e botse yeo re nago le yona ya go batamela Modimo ka bolokologi bakeng sa thušo nakong ya teko. Eupša, Jakobo o lemoša gore ge o rapela Modimo, “[o] kxopêlê ka tumêlô, [o] se dikadikê.” Dipelaelo tswalanong ya rena le Modimo di re dira gore re swane le “lephoto la lewatlê, le le tsošwaxo ke phefô la akxa-akxwa ke yôna.” Re ba bjalo ka “monna wa pelo-pedi, ditseleng tša xaxwe xa a loke.” (Jakobo 1:​6, 8) Re ba le go se kgodišege ka tumelo mo go re dirago ba pelo-pedi. Ke moka, re ba bao ba lemaletšego mehuteng ka moka ya dithuto tša botemona le difilosofi bjalo ka ge go ile gwa direga go Efa.

Go Kgomarela Bophelo bjo Bobotse bja Moya

Ka gona, re ka itšhireletša bjang dipelaelong tše di senyago? Karabo e bonolo ka mo go makatšago: ka go gana dipolelo tša maaka tša Sathane ka go tia le go itira ba ba hwetšagalago ka mo go tletšego ditokišetšong tša Modimo bakeng sa go re dira bao ba ‘tiilego tumelong.’​—1 Petro 5:​8-10.

Selo sa bohlokwa e le ka kgonthe ke go iphepa gabotse moyeng. Mongwadi Wingate yo go boletšwego ka yena pejana o hlalosa gore: “Gaešita le ge mmele o khuditše, o nyaka go newa matla ka mo go tšwelago pele bakeng sa megato ya dikhemikhale le mošomo wa ditho tše dingwe tše bohlokwa; gomme didirišwa tša ditlhale-nama tše dintši di nyaka go tsošološwa ka mehla.” Go bjalo le ka bophelo bja rena bjo bobotse bja moya. Ka ntle le go iphepa moyeng ka mehla, tumelo ya rena e tla senyega ka mo go tšwelago pele go swana le mmele o tingwago dijo gomme mafelelong wa hwa. Jesu Kriste o ile a gatelela se ge a be a re: “Motho xa a phele ka boxôbê fêla; ó phela ka mantšu ohle a a tšwaxo molomong wa Modimo.”​—Mateo 4:4.

Nagana ka seo. Re ile ra aga bjang tumelo e tiilego mathomong? Moapostola Paulo o ngwala gore: “Tumêlô e tšwa xo kweng.” (Ba-Roma 10:​17) O bolela gore mathomong re ile ra aga tumelo ya rena le kholofelo go Jehofa, dikholofetšong tša gagwe le mokgatlong wa gagwe ka go iphepa ka Lentšu la Modimo. Ee, ga se ra fo dumela sohle seo re se kwelego. Re ile ra dira seo batho ba ba bego ba dula motseng wa Berea ba ilego ba se dira. Re ile ra ‘hlahloba Mangwalo ka kelohloko ka mehla bakeng sa go bona ge e ba dilo tše di le bjalo.’ (Ditiro 17:​11, NW) Re ‘lekile ka noši se botse le se amogelegago le se e lego thato ya Modimo’ gomme ra kgonthišega gore se re se kwelego e be e le therešo. (Ba-Roma 12:2; 1 Ba-Thesalonika 5:​21) Ga e sa le go tloga ka nako yeo, mohlomongwe re ile ra tiiša tumelo ya rena ka ge re ile ra bona ka mo go kwagalago gore Lentšu la Modimo le dikholofetšo tša gagwe ga di ke di palelwa.​—Jošua 23:​14; Jesaya 55:​10, 11.

Phema Tlala ya Moya

Bjale tlhohlo ke go boloka tumelo ya rena le go phema go se kgonthišege le ge e le gofe ka  tumelo mo go ka fokodišago kholofelo ya rena go Jehofa le mokgatlong wa gagwe. Gore re dire se re swanetše go tšwela pele re hlahloba Mangwalo ka mehla. Moapostola Paulo o lemoša gore, “mehleng e tl’o xo tla ba bangwê [bao mathomong ba ka bonagalago ba e-na le tumelo e tiilego] ba tlo hlanoxêla tumêlô, ba ya le meôya ya xo fora batho, ba ya le dithutô tša meôya e mebe.” (1 Timotheo 4:1) Dipolelo tše di arošago le dithuto di aga dipelaelo ka menaganong ya ba bangwe gomme tša ba aroganya le Modimo. Tšhireletšo ya rena ke eng? Ke go tšwela pele re e-ja “dijô tša xaxwe e lexo Mantšu a tumêlô ye e swanetšwexo ruri ke xo amoxêlwa.”​—1 Timotheo 4:6.

Lega go le bjalo, ka manyami ba bangwe lehono ba kgetha go se ‘fepše ke mantšu a tumelo’​—gaešita le ge phepo e bjalo e hwetšagala ka ntle le tefo. Bjalo ka ge yo mongwe wa bangwadi ba puku ya Diema a bontšha, go a kgonega go dikologwa ke dijo tše dibotse tša moya, monyanya wa moya gomme o se ke wa ja le go šila dijo.​—Diema 19:​24; 26:15.

Se se kotsi. Mongwadi Wingate o re: “Kapejana ge mmele o thoma go ja diprotheine tša wona boemo bja wona bja maphelo bo thoma go fokola.” Ge e ba o bolawa ke tlala, mmele wa gago o thoma go diriša makhura a bolokilwego mmeleng ka moka. Ge methopo ye e lapile, mmele o thoma go ja protheine ye e lego bohlokwa bakeng sa kgolo e tšwelago pele le go tsošološwa ga ditlhale-nama. Ditho tše bohlokwa di thoma go senyega. Kapejana bophelo bja gago bjo bobotse bo thoma go senyega.

Se ke seo se ilego sa direga ka tsela ya moya go ba bangwe phuthegong ya pele ya Bokriste. Ba ile ba leka go phela ka makhura a bona a bolokilwego a moya. Mohlomongwe, ba ile ba hlokomologa thuto ya bona ya motho ka noši gomme ba thoma go fokola moyeng. (Ba-Hebere 5:​12) Moapostola Paulo o ile a hlalosa kotsi ya go dira se ge a be a ngwalela Bakriste ba ba-Hebere gore: “Go [nyakega] gore re ele hloko ka go fetiša kamoo go tlwaetšwego dilong tšeo re di kwelego, e le gore le ka mohla re se ke ra aroga.” (NW) O be a tseba gore go be go tla ba bonolo gakaakang go arogela mekgweng e mebe ge e ba re “nyatša phološô e kxolo yé.”​—Ba-Hebere 2:​1, 3.

Ka mo go kgahlišago, motho yo a bolawago ke tlala ga se ka mehla a bonagalago a babja goba e le yo mosesane. Ka mo go swanago, go ka no se be molaleng kapejana gore motho yo a itšego o swerwe ke tlala ya moya. O ka ba le ponagalo ya go phela gabotse moyeng gaešita le ge o sa fepša gabotse​—eupša ka lebakanyana feela! Ka mo go sa phemegego o tla fokola moyeng, wa kgongwa gabonolo ke dipelaelo tše di se nago motheo gomme wa palelwa ke go lwa ntwa e thata ya tumelo. (Juda 3) O tseba​—gaešita le ge go se na motho yo mongwe yo a tsebago​—bogolo bja kgonthe bja go iphepa ga gago moyeng.

Lega go le bjalo, tšwela pele ka thuto ya gago ya motho ka noši. Lwantšha dipelaelo ka matla. Go hlokomologa seo se bonagalago e le bolwetši bjo bo sa rego selo, go se dire selo ka dipelaelo tše di phegelelago go ka ba le mafelelo a kotsi. (2 Ba-Korinthe 11:3) ‘Na re phela mehleng ya bofelo e le ka kgonthe? Na o ka dumela selo se sengwe le se sengwe seo Beibele e se bolelago? Na wo ke mokgatlo wa Jehofa e le ka kgonthe?’ Sathane a ka rata go bjala dipelaelo tše bjalo ka tše monaganong wa gago. O se ke wa dumelela boemo bja kgopolo bja go se šetše go iphepa moyeng bo go dira mohlaselwa yo bonolo dithutong tša gagwe tša maaka. (Ba-Kolose 2:4-7) Latela keletšo e neilwego Timotheo. E-ba morutwana yo mobotse wa “Mangwalô a makxêthwa” e le gore o “tiêlê mo xo tše O di rutilwexo wa di dumêla.”​—2 Timotheo 3:​13-15.

 O ka nyaka thušo bakeng sa go dira se. Mongwadi yo a tsopotšwego pejana o tšwela pele ka gore: “Ka go bolawa ke tlala o šoro, ditho tša go šila di ka gobatšwa kudu ke go hloka dibithamine le dinyakwa tše dingwe tše bohlokwa tšeo di ka se amogelego dijo tše di tlwaelegilego ge e ba di newa. Batho ba ba lego boemong bjo ba ka nyaka dijo tše di nyakago go šilega ganyenyane ka lebakanyana.” Go nyakega tlhokomelo e kgethegilego bakeng sa go alafa mafelelo a tlala mmeleng. Ka mo go swanago, motho yo mongwe yo a hlokomologilego ka mo go feletšego thuto ya Beibele ya motho ka noši a ka nyaka thušo e kgolo le kgothatšo bakeng sa go ba le kganyogo ya dijo gape. Ge e ba o le boemong bjo bo bjalo, tsoma thušo gomme ka lethabo o amogele thušo le ge e le efe yeo e newago bakeng sa go aga gape boemo bja gago bja maphelo bja moya le matla.​—Jakobo 5:​14, 15.

O se ke wa “Belaêla ka xo se Dumêle”

Ka go ela hloko maemo a mopatriareka Aborahama, ba bangwe ba ka nagana gore o be a na le mabaka a kwagalago a go belaela. Go ka bonagala e le mo go kwagalago kudu go phetha ka gore o be a ‘feletšwe ke kholofelo ya go ba tatago ditšhaba tše dintši’​—go sa šetšwe kholofetšo ya Modimo. Ka baka la’ng? Ge e le gabotse, go ya ka kgopolo ya motho e feletšego, dilo di be di bonagala di sa holofetše. Pego ya Beibele e re: ‘O ile a nagana ka mmele wa gagwe wo ga bjale o hwilego le ka go hwa ga popelo ya Sara.’ Lega go le bjalo, o ile a dira phetho e tiilego ya go gana go dumelela dipelaelo ka Modimo le dikholofelo tše tiilego di mela ka monaganong le pelong ya gagwe. Moapostola Paulo o ngwala gore: “Xa a ka a fôkôla tumelong” goba “xa a ka a e belaêla ka xo se dumêle.” Aborahama o ile a dula “à kxodilwe ruri xore Modimo ó na le matla a xo dira se a mo holofedišitšexo sôna.” (Ba-Roma 4:​18-21) O be a agile tswalano e matla, ya motho ka noši le e nago le kholofelo le Jehofa ka nywaga e mentši. O ile a gana dipelaelo le ge e le dife tše di ka bego di ile tša fokodiša tswalano yeo.

O ka dira se se swanago ge e ba o ‘tšea ka mohlala wa mantšu a se nago senyalo’​—ge e ba o iphepa gabotse moyeng. (2 Timotheo 1:​13) Tšeela kotsi ya dipelaelo godimo. Sathane o lwa ka go diriša dipaketheria tše kotsi tša moya. Ge e ba o hlokomologa go ja dijo tša moya ka thuto ya motho ka noši ya Beibele le ka go ba gona dibokeng tša Bokriste, o ipea nyanyeng bakeng sa ditlhaselo tše bjalo. Diriša ka mo go swanetšego kabo e lerato le e lego nakong ya dijo tša moya tše di newago ke “molaki e a bôtêxaxo yo bohlale.” (Mateo 24:​45) Tšwela pele o ‘dumelelana le mantšu a phedišago gabotse’ gomme o dule o ‘phetše tumelong.’ (1 Timotheo 6:3, bapiša le NW; Tito 2:2.) O se ke wa dumelela dipelaelo di senya tumelo ya gago.

[Diswantšho go letlakala 21]

O iphepa gabotse gakaaka’ng moyeng?