Thušo Bakeng sa go Kwešiša Beibele

BEIBELE ke puku ya moswana-noši. Bangwadi ba yona ba bolela gore ba buduletšwe ke Modimo, gomme dikagare tša yona di nea bohlatse bja kgonthe bja gore seo ba se bolelago ke therešo. (2 Timotheo 3:​16) Gare ga dilo tše dingwe, Beibele e bontšha gore re tšwa kae, ke ka baka la’ng re le mo le gore re ya kae. Ka kgonthe ke puku yeo e swanetšwego ke gore re e hlahlobe!

Mohlomongwe o ile wa leka go bala Beibele eupša wa hwetša go le thata go e kwešiša. Mohlomongwe ga o tsebe gore o lebelele kae bakeng sa go hwetša dikarabo tša dipotšišo tša gago. Ge e ba go le bjalo, ga o noši. Boemo bja gago bo swana le bja monna yo a phetšego lekgolong la pele la nywaga. O be a sepela ka koloi a e-tšwa Jerusalema a e-ya nageng ya gabo, Ethiopia. Mohlankedi yo wa mo-Ethiopia o be a balela godimo puku ya Beibele ya boporofeta ya Jesaya, yeo e ngwadilwego nywaga e fetago e makgolo a šupago pejana.

Kapejana, o ile a dumedišwa ke monna yo a bego a kitima kgaufsi le koloi. Monna yo e be e le Filipi, morutiwa wa Jesu gomme o ile a botšiša mo-Ethiopia gore: “Afa tše O di balaxo O a di kwa?” Mo-Ethiopia o ile a araba ka gore: “Xomme nka kxôna bya’ng xe ke se na wa xo nthlahla tseleng?” Ke moka o ile a laletša Filipi gore a tsene ka koloing. Filipi o ile a hlalosa seo se bolelwago ke temana yeo monna a bego a e bala gomme a tšwela pele a mo anegela “Ebangedi ya Jesu.”​—Ditiro 8:​30-35.

 Bjalo ka ge e le kgale Filipi a thušitše mo-Ethiopia yoo go kwešiša Lentšu la Modimo, lehono Dihlatse tša Jehofa di thuša batho go kwešiša Beibele. Le wena di tla thabela go go thuša. Gantši, go kaone go ithuta Beibele ka lenaneo, go thoma ka dithuto tša motheo tša Mangwalo. (Ba-Hebere 6:1) Ge o dutše o tšwela pele, o tla kgona go ja dijo tšeo moapostola Paulo a di bitšago “dijô tše di tiilexo”​—e lego ditherešo tšeo di tseneletšego. (Ba-Hebere 5:​14) Gaešita le ge o ithuta Beibele, dipuku tše dingwe​—dipuku tša go ithuta Beibele​—di ka go thuša go hwetša le go kwešiša ditemana tša Beibele ka dithuto tše di fapa-fapanego.

Gantši thuto e ka rulaganywa go swarwa ka nako le lefelong tšeo o bonago di swanela. Ba bangwe ba bile ba ithuta mogaleng. Thuto ga e swarwe ka mokgwa wa ka klaseng; ke tokišetšo ya motho ka noši yeo e dirwago go ya ka maemo a motho ka noši, go akaretša setlogo sa gago le thuto. Ga go nyakege gore o lefe bakeng sa thuto e bjalo ya Beibele. (Mateo 10:8) Ga go na ditlhahlobo, gomme o ka se dirwe gore o ikwe o sa lokologa. Dipotšišo tša gago di tla arabja gomme o tla ithuta kamoo o ka batamelago kgaufsi le Modimo ka gona. Lega go le bjalo, ke ka baka la’ng o swanetše go ithuta Beibele? Ela hloko mabaka a mangwe ao ka ona go ithuta Beibele go ka tlaleletšago lethabo bophelong bja gago.