Dipotšišo tše Tšwago go Babadi
Dipotšišo tše Tšwago go Babadi
Go 1 Petro 4:3, (NW) re bala gore Bakriste ba bangwe ba be ba kile ba ba le karolo go “borapedi bja medimo ya diswantšho bjo e sego bja molao.” Na borapedi bja medimo ya diswantšho ka moka bjo e sego bja molao ga se bjo bo iletšwago goba bjo bo ganetšwago ke Modimo?
Ee, go ya ka pono ya Modimo, borapedi bja medimo ya diswantšho ka moka ga bo dumelelwe ke molao. Bao ba nyakago go amogelwa ke yena ba ka se rapele medimo ya diswantšho.—1 Ba-Korinthe 5:11; Kutollo 21:8.
Lega go le bjalo, go bonagala moapostola Petro a be a šupa go borapedi bja medimo ya diswantšho ka tsela e nngwe. Lebaka le lengwe ke gore, gare ga ditšhaba tše dintši tša bogologolo, borapedi bja medimo ya diswantšho bo be bo tlwaelegile e bile bo se na thibelo ya molao e tšwago go balaodi. Ke gore, molao wa naga o be o sa thibele borapedi bjo bjalo bja medimo ya diswantšho. Borapedi bjo bongwe bja medimo ya diswantšho e be e bile e le karolo ya molao wa setšhaba goba wa mmušo. Ka kwešišo yeo, ba bangwe ba tšere karolo ‘borapeding bja medimo ya diswantšho ka ntle le go ganetšwa ke molao’ pele e e-ba Bakriste. (New World Translation, kgatišo ya 1950) Ka mohlala, re ka gopola gore Kgoši Nebukadinetsara wa Babele o ile a hloma modimo wa seswantšho wa gauta, eupša bahlanka ba Jehofa e lego Sadirake, Mesake le Abedinego ba ile ba gana go o rapela.—Daniele 3:1-12.
Ka lehlakoreng le lengwe, ditirelo tše dintši tša go rapela medimo ya diswantšho di be di akaretša ditiro tšeo di ganetšanago o šoro le molao le ge e le ofe wa tlhago goba boitshwaro bjo bo tšwago letswalong leo batho ba le abetšwego. (Ba-Roma 2:14, 15) Moapostola Paulo o ngwadile ka mekgwa e gobogilego yeo e bego e ‘le yeo ba sa e bopelwago’ le “tša dihlong” gomme tše gantši di be di bjalwa ditirelong tša bodumedi. (Ba-Roma 1:26, 27) Banna le basadi bao ba bego ba tšea karolo borapeding bja medimo ya diswantšho bjo bo ganetšwago ke molao ba be ba sa kwe molao o ba thibelago wa tlhago ya batho. E be e tloga e le mo go swanetšego gore bao ba bego ba e-ba Bakriste ba tlogele mekgwa yeo e gobogilego.
Godimo ga tše ka moka, borapedi bjo bo bjalo bja medimo ya diswantšho bjo bo bego bo tlwaelegile gare ga bao e sego ba-Juda bo be bo ileditšwe ke Jehofa Modimo. Ka gona e be e se bja molao. *—Ba-Kolose 3:5-7.
[Mengwalo ya ka tlase]
^ ser. 6 Temana ya Segerika go 1 Petro 4:3 (NW) go ya ka phetolelo ya lentšu ka lentšu e bolela gore “borapedi bja medimo ya diswantšho bjo e sego bja molao.” Lefokwana le le fetoletšwe ka mo go fapa-fapanego Dibeibeleng tša Seisemane ka mantšu a bjalo ka “borapedi bjo bo gobogilego bja medimo ya diswantšho,” “borapedi bjo bo ileditšwego bja medimo ya diswantšho” le “borapedi bja medimo ya diswantšho bjo e sego bja molao.”