‘Ditšhegofatšo ke tša Moloki’

MOPSALME Dafida o ile a bolela botšofading bja gagwe gore: “Ke be ke le lesoxana, ka bá ka tšofala kè sešo ka bôna moloki à lahlilwe, le bana ba xaxwe bà diila.” (Psalme 37:​25) Jehofa Modimo o rata baloki e bile o ba hlokomela ka lerato. Ka Lentšung la gagwe, Beibele, o kgothaletša barapedi ba therešo go tsoma toko.​—Tsefanya 2:3.

Go loka ke boemo bja go ba boemong bjo bobotse le Modimo ka go dumelelana le ditekanyetšo tša gagwe tša se se lokilego le se se fošagetšego. Ge e re kgothaletša go dumelelana le thato ya Modimo, kgaolo ya bo-10 ya puku ya Beibele ya Diema e šupa go ditšhegofatšo tše di humilego tšeo di thabelwago ke bao ba dirago bjalo. Gare ga tše ke mokhora o mogolo wa dijo tša moya tše di nago le phepo, mošomo o putsago le o kgotsofatšago le tswalano e botse le Modimo le batho. Ka gona, anke re lebišeng tlhokomelo go Diema 10:​1-14.

Tlhohleletšo e Botse

Mantšu a go bula a kgaolo ye ga a rotoše pelaelo ya gore mongwadi wa karolo e latelago ya puku ya Diema ke mang. A balega ka gore: “Diêma tša Salomo.” Ge a nea tlhohleletšo e botse bakeng sa go latela tsela e lokilego, Kgoši Salomo wa Isiraele ya bogologolo o re: “Ngwana yo bohlale ó kxahla tat’axwe; ’me ngwana wa lešilo ó nyamiša mm’axwe.”​—Diema 10:1.

Batswadi ba nyama gakaakang ge yo mongwe wa bana ba bona a tlogela borapedi bja Modimo wa therešo le yo a phelago! Kgoši e bohlale e kgetha go bolela ka manyami a mma, mohlomongwe e le go bontšha gore o nyama ka mo go tseneletšego kudu. Seo ka kgonthe se ile sa itlhatsela e le sa therešo ka Doris. * O anega ka gore: “Ge morwa wa rena wa nywaga e 21 a be a tlogela therešo, nna le monna wa-ka Frank re be re nyamile. Bohloko bja maikwelo e bile bjo bo tseneletšego kudu go nna go feta go Frank. Go feta ga nywaga e 12 ga se gwa alafa ntho.”

Bana ba ka kgoma lethabo la tatago bona gomme ba ka bakela mmago bona bohloko bja pelo. Anke re bontšheng bohlale gomme re thabiše batswadi ba rena. A re thabišeng pelo ya Tatago rena wa legodimong Jehofa kamoo re ka kgonago ka gona.

‘Moya wa Moloki o a Kgotsofatšwa’

Kgoši e re: “Thuô-kxôpô xa e tswale; tokô e efoša lehu.” (Diema 10:2) Go Bakriste ba therešo bao ba phelago gare-gare ga lebaka la bofelo, mantšu a ke a bohlokwa e le ka kgonthe. (Daniele 12:4) Phedišo ya lefase le le sa boifego Modimo e kgaufsi. Ga go na tšhireletšo e dirilwego ke batho​—dilo tše di bonagalago, tšhelete goba mašole​—yeo e tla šireletšago “tlaišexong e kxolo” e tlago. (Kutollo 7:​9, 10, 13, 14) Ke feela “baloki ba tlogo dula mo lefaseng gomme ba ba se nago bosodi ba šala moo.” (Diema 2:​21, The New English Bible) Ka gona, anke re tšweleng pele re “tsomê mmušô wa Modimo le tokô ya [Modimo].”​—Mateo 6:33.

Ga go nyakege gore bahlanka ba Jehofa ba lete go fihla lefaseng le lefsa le le holofeditšwego e le gore e be gona ba ka hwetšago ditšhegofatšo tša Modimo. “Morêna x’a latše moloki le tlala; ó hlaswa bojatô bya babe.” (Diema 10:3) Jehofa o neile dijo tša moya ka bontši ka “molaki e a bôtêxaxo yo bohlale.” (Mateo 24:​45) Ka kgonthe moloki o na le mabaka a go “goeletša ka lethabo ka baka la boemo bjo bobotse bja pelo.” (Jesaya 65:​14, NW) Tsebo e thabiša moya wa gagwe. Go tsoma mahumo a moya go a mo thabiša. Yo mobe ga a tsebe maipshino a bjalo.

 ‘Boroto bo a Humiša’

Moloki o šegofatšwa gape ka tsela e nngwe. “Xo diila moitšimeletši; lehumô ké la ’tsôxô la serôtô. Ngwan’a maanô mo-kxoba-dijô-lehlabula; serôkô-rôkô sa punong se leša dihlong.”​—Diema 10:​4, 5.

Mantšu a kgoši go bašomi nakong ya puno ke a nago le morero ka mo go kgethegilego. Nako ya puno ga se ya go iketla. Ke nako ya go ba mafolofolo le ya go šoma diiri tše telele. Ka kgonthe, ke nako ya go akgofa.

A nagana ka puno ya batho e sego ya mabele, Jesu o boditše barutiwa ba gagwe gore: “Punô ké e ntši; ’me badiri xa ba nene. Ké xôna kxopêlang Mong wa punô [Jehofa Modimo] a romêlê badiri punong ya xaxwe.” (Mateo 9:​35-38) Ngwageng wa 2000, batho ba ka godimo ga dimilione tše 14 ba bile gona Segopotšong sa lehu la Jesu​—palo e fetago gabedi ya Dihlatse tša Jehofa. Ka gona, ke mang a ka ganago gore ‘mašemo a šweufaletše go bunwa’? (Johane 4:​35) Barapedi ba therešo ba kgopela Mong bakeng sa badiri ba oketšegilego, mola ba katana ka matla modirong wa go dira barutiwa ka go dumelelana le dithapelo tša bona. (Mateo 28:​19, 20) Gomme Jehofa o šegofaditše maiteko a bona ka mo go humilego gakaakang! Ngwageng wa tirelo wa 2000, batho ba ka godimo ga 280 000 ba bafsa ba ile ba kolobetšwa. Ba le bona ba katanela go ba barutiši ba Lentšu la Modimo. Anke re beng le lethabo le kgotsofalo sehleng se sa puno ka go ba le karolo e tletšego modirong wa go dira barutiwa.

‘Ditšhegofatšo ke tša Hlogo ya Gagwe’

Salomo o tšwela pele gore: “Dithšexofatšô ké tša hlôxô ya moloki; melomo ya babe e uta bošoro.”​—Diema 10:6.

Motho yo a nago le pelo e sekilego le e lokilego o nea bohlatse bja kgonthe bja go loka ga gagwe. Polelo ya gagwe ke e botho le e agago, ditiro tša gagwe ke tše agago le tša botho. Ba bangwe ba mo amogela ka botho. Motho yo bjalo o thopa tebogo ya bona​—ditšhegofatšo tša bona​—ka gore ba bolela gabotse ka yena.

Ka lehlakoreng le lengwe, motho yo mobe o na le lehloyo goba bohwirihwiri gomme ge e le gabotse o ikemišeditše go gobatša ba bangwe. Polelo ya gagwe e ka ba e bose gomme e ka ‘khupetša bošoro’ bjo bo utegilego ka pelong ya gagwe, eupša mafelelong o ineela go hlasela mmeleng goba go hlaseleng ka mantšu. (Mateo 12:​34, 35) Goba ka dinako tše dingwe, “melomo ya babe e uta [goba e tswalela] bošoro.” (Diema 10:6, mongwalo wa tlase wa NW) Se se bontšha gore motho yo mobe gantši o amogela go ba bangwe seo a se bontšhago, e lego lehloyo. Go bjalo ka ge eka se se khupetša goba se tswalela molomo wa gagwe le go mo homotša. Ke ditšhegofatšo dife tšeo motho yo bjalo a ka di letelago go ba bangwe?

Kgoši ya Isiraele e ngwala gore: “ ’Ina la moloki e šala e le la dithšexofatšô; la e mobe le a bôla.” (Diema 10:7) Moloki o gopolwa ke ba bangwe ka mo go swanetšego, kudu-kudu ke  Jehofa Modimo. Ka go botega ga gagwe go fihla lehung, Jesu o ile a “tšea bohwa bya Leina le le fetaxo” la barongwa. (Ba-Hebere 1:​3, 4) Banna le basadi ba pele ga Bakriste ba gopolwa lehono ke Bakriste ba therešo e le mehlala e swanelwago ke go ekišwa. (Ba-Hebere 12:​1, 2) Se se fapana gakaakang le leina la ba babe, leo e bago selo seo se sa kgahlišego le se se šilafetšego! Ee, “tumô e phala lehumô; xo ratwa xo phala thêkô ya dithsipi tše bohlôkwa.” (Diema 22:1) Anke re itireleng leina le lebotse le Jehofa le magagabo rena.

‘Yo a Botegago o tla Šireletšega’

Salomo ge a swantšha motho yo bohlale le lešilo o re: “Wa pelo e bohlale ó dumêla tayô; wa melomo ya bošilo ó tlo ušwa.” (Diema 10:8) Motho yo bohlale o tseba gabotse gore “motho tsela y’axwe xa’ e buše.” (Jeremia 10:​23) O lemoga go nyakega ga go tsoma tlhahlo go Jehofa le go amogela melao ya Modimo. Ka lehlakoreng le lengwe, yo e lego lešilo ka molomo wa gagwe o palelwa ke go kwešiša ntlha ye ya motheo. Go bolela ga gagwe ka go hloka tlhaologanyo go mo iša tshenyegong.

Moloki gape o thabela mohuta wa tšhireletšego yeo ba babe ba sa e hwetšego. “Wa tsela-thwii ó swere ya xo iketla; wa tsela-kxôpô ba tlo mo hwetša. Wa xo kobonya ka mahlô ó a nyamiša; wa melomo ya bošilo ó tlo ušwa.”​—Diema 10:​9, 10.

Mmotegi o a botega ditirišanong tša gagwe. O hwetša tlhompho le go botwa ke ba bangwe. Motho yo a botegago ke mošomi yo bohlokwa gomme gantši o newa boikarabelo bjo bogolo kudu. Go tsebja ga gagwe ka potego go ka dira gore a tšwele pele a e-na le mošomo gaešita le ge mešomo e sa hwetšagale. Go feta moo, potego ya gagwe e tlaleletša tikologong ya lethabo le ya khutšo ka gae. (Psalme 34:​13, 14) O ikwa a šireletšegile tswalanong ya gagwe le ditho tša lapa la gagwe. Ka kgonthe tšhireletšego ke seenywa sa potego.

Boemo ke bjo bo fapanego ka motho yo a ineelago tabeng ya go se botege ka go nyaka go holega ka boithati. Mofori a ka leka go šira go se be le therešo ga gagwe ka polelo ya bokgopo goba ka boitšhišinyo bja mmele. (Diema 6:​12-14) Go ponya mahlo a gagwe ka maikemišetšo a bohwirihwiri goba a bofora go ka dira gore bahlaselwa ba gagwe ba tlalelwe kudu monaganong. Eupša kapejana, bokgopo bja motho yo bjalo bo a tsebja. Moapostola Paulo o ngwadile gore: “Dibe tša ba bangwê di a bônala, di ba êta-pele kahlolong; tša ba bangwê di ba latêla moraxo. Le medirô e botse ya ba bangwê e a bônala; xe xo e mongwê è sa bônale, e ka se dule è fihlilwe.” (1 Timotheo 5:​24, 25) Go sa šetšwe gore ke mang a akaretšwago​—e ka ba motswadi, mogwera, molekane wa lenyalo goba motho yo o mo tlwaetšego​—go se botege mafelelong go a utollwa. Ke mang a ka botago motho yo a tumilego ka go se botege?

‘Molomo wa Gagwe ke Mothopo wa Bophelo’

Salomo o re: “Molomo wa moloki ké mothôpô wa bophelô; melomo ya babe e uta bošoro.” (Diema 10:​11) Mantšu a tšwago molomong a ka fodiša goba a gobatša. A ka lapološa le go phediša motho goba a ka mo nyamiša.

 Ge a bontšha morero wa mantšu a bolelwago, kgoši ya Isiraele e re: “Lehlôyô le tsoša phapang. Lerato le bipa dikaroxô tšohle.” (Diema 10:​12) Lehloyo le tšweletša diphapano bathong gomme le hlohleletša dipolayano. Barati ba Jehofa ba swanetše go fediša lehloyo maphelong a bona. Bjang? Ka gore le tšeelwe sebaka ke lerato. “Leratô le bipa dikaroxô tšohle.” (1 Petro 4:8) Lerato le ‘kgotlelela tšohle,’ e lego gore ‘le bipa tšohle.’ (1 Ba-Korinthe 13:7) Lerato la Modimo ga le letele phethego bathong ba sa phethagalago. Go e na le go phatlalatša diphošo tša ba bangwe, lerato le bjalo le re thuša go tshediša diphošo tša bona mahlo ka ntle le ge sebe se segolo se akaretšwa. Lerato gape le kgotlelela go se swarwe gabotse bodireding bja tšhemo, lefelong la rena la mošomo goba sekolong.

Kgoši e bohlale o tšwela pele ka gore: “Molomo wa mohlaloxanyi o hwetšwa ò n’e bohlale; mokôkôtlô wa setlatla, o tlo hwetšwa ò n’e kxati ya wôna.” (Diema 10:​13) Bohlale bja motho yo a kwešišago bo hlahla megato ya gagwe. Mantšu a agago molomong wa gagwe a thuša ba bangwe go sepela tseleng ya go loka. Ga go nyakege gore yena goba bao ba mo theetšago ba išwe lehlakoreng le le nepagetšego ka kgapeletšo​—e lego ka kgati ya kotlo.

‘Lota Tsebo’

Ke eng seo se thušago mantšu a rena go ba ‘mothopo o elago bohlale’ go e na le go ba moela o bola-bolago dilo tše di se nago mohola? (Diema 18:4) Salomo o araba ka gore: “Ba bohlale ké ba-huma-tsebô; molomo wa lešilo, thšexo e kxaufsi.”​—Diema 10:14.

Senyakwa sa mathomo ke gore monagano wa rena o swanetše go tlatšwa ka tsebo e agago ya Modimo. Go na le mothopo o tee feela wa tsebo yeo. Moapostola Paulo o ngwadile gore: “Xobane Mangwalô ka moka ké ma-hebetšwa-ke-Modimo, le xôna a hola batho ka xo ruta, le ka xo kxodiša le xo sokolla, le ka xo iša tokong, xore motho wa Modimo e bê yo boló-ka-tlalô, a kxonišwê xo dira medirô e botse ka moka.” (2 Timotheo 3:​16, 17) Re swanetše go lota tsebo gomme re epe ka Lentšung la Modimo bjalo ka ge eka re tsoma lehumo le le fihlilwego. Go tsoma mo ke mo go putsago le mo go kgahlišago gakaakang!

E le gore bohlale bo hwetšwe melomong ya rena, tsebo ya Mangwalo e swanetše go fihlelela dipelong tša rena. Jesu o boditše batheetši ba gagwe gore: “Motho yo botse ó tšweletša tše botse dì e-tšwa lehumong le le botse la pelo; ’me motho yo mobe ó tšweletša tše mpe dì e-tšwa mo xo befilexo; xobane molomo wa xaxwe o bolêla tše pelo e di falatšaxo.” (Luka 6:​45) Ka gona, re swanetše go tlwaela go naganišiša ka seo re ithutago sona. Ke therešo gore go ithuta le go naganišiša go nyaka boiteko, eupša thuto e bjalo ke e humišago gakaakang moyeng! Ga go na lebaka la gore motho le ge e le mang a latele tsela e senyago ya mmolabodi wa mantšu a se nago tlhaologanyo.

Ee, motho yo bohlale o dira se se lokilego mahlong a Modimo gomme o na le tutuetšo e botse go ba bangwe. O thabela kabo e tletšego ya dijo tša moya gomme o na le mo gontši mo a ka go dirago modirong o putsago wa Morena. (1 Ba-Korinthe 15:​58) Ka go ba mmotegi, o sepela ka tšhireletšego gomme o amogelwa ke Modimo. Ka kgonthe, ditšhegofatšo tše dintši ke tša moloki. Anke re tsomeng go loka ka go dumelelanya maphelo a rena le ditekanyetšo tša Modimo tša se se lokilego le se sebe.

[Mengwalo ya ka tlase]

[Seswantšho go letlakala 25]

Potego e tlaleletša bophelong bja lapa bjo bo thabišago

[Seswantšho go letlakala 26]

‘Ba bohlale ba lota tsebo’