E-bang Babuni ba Thabilego!

“Punô ké e ntši; ’me badiri xa ba nene. Ké xôna kxopêlang Mong wa punô a romêlê badiri punong ya xaxwe.”​—MATEO 9:​37, 38.

1. Ke eng seo se re thušago gore re tšwele pele re dira thato ya Modimo?

GE RE gopola letšatši la rena la ge re be re kolobetšwa re le ba bangwe ba bahlanka ba Jehofa, go sa šetšwe gore le bile nywageng e sego kae e fetilego goba e mentši, go ka bonagala eka le bile maabane. Go tumiša Jehofa e ba selo sa bohlokwa bophelong bja rena bja boineelo. Ge re be re reka nako e swanetšego bakeng sa go thuša ba bangwe go kwa mohlomongwe le gore ba amogele molaetša wa Mmušo, go nea Jehofa tirelo e thabišago e be e le selo seo re tshwenyegilego kudu ka sona. (Ba-Efeso 5:​15, 16) Go ba go fihla lehono, nako e bonagala e kitima ka lebelo kudu ge re swaregile, re na le “go gontši mo re swanetšego go go dira modirong wa Morena.” (1 Ba-Korinthe 15:​58, NW) Gaešita le ge re lebeletšana le mathata, lethabo la rena la go dira thato ya Jehofa le a re hlohleletša.​—Nehemia 8:10.

2. Ke eng seo se tlaleletšago lethabong leo re nago le lona modirong wa puno wa seswantšhetšo?

² Bjalo ka Bakriste, re swaregile modirong wa puno wa seswantšhetšo. Jesu Kriste o ile a swantšha go kgoboketšwa ga batho bakeng sa bophelo bjo bo sa felego le puno. (Johane 4:​35-38) Bjalo ka ge re swaregile modirong o bjalo wa puno, e tla ba mo go kgothatšago go hlahloba lethabo la Bakriste ba pele ba babuni. Re tla hlahloba mabaka a mararo ao a tlaleletšago lethabong leo re nago le lona modirong wa puno lehono. Ona ke (1) molaetša wa rena wa kholofelo, (2) katlego ya go tsoma ga rena le (3) boemo bja rena bja kgopolo bja go dira khutšo re le babuni.

Ba Romilwe Bjalo ka Babuni

3. Ke ka kwešišo efe balatedi ba pele ba Jesu ba bilego le lethabo?

³ Maphelo a babuni ba pele​—kudu-kudu a baapostola ba Jesu ba botegago ba 11​—a ile a fetoga gakaakang ka letšatši la 33 C.E. ge ba be ba e-ya thabeng ya Galilea go ya go gahlana le Kriste yo a tsošitšwego! (Mateo 28:​16) ‘Banababo rena ba ba fetago ba makgolo a mahlano’ ba ka be ba be ba le gona tiragalong yeo. (1 Ba-Korinthe 15:6) Ba ile ba dula ba gopola taelo yeo Jesu a ba neilego yona. O ile a ba botša gore: “Yang Le dirê dithšaba ka moka barutiwa ka xo ba kolobetša Leineng la Tate le la Morwa le la Môya o mokxêthwa, le ka xo ba ruta xo boloka tšohle tše ke Le laetšexo tšôna.” (Mateo 28:​19, 20) Go sa šetšwe tlaišo e šoro, ba ile ba thaba kudu modirong wa puno ge ba be ba bona diphuthego tša balatedi ba Kriste di hlongwa mafelong a mantši. Ge nako e dutše e tšwela pele, ‘ditaba tše dibotse di ile tša bolelwa go babopja ka moka ka tlase ga legodimo.’​—Ba-Kolose 1:​23, NW; Ditiro 1:8; 16:5.

4. Barutiwa ba Kriste ba ile ba rongwa ka tlase ga maemo afe?

⁴ Mathomong a bodiredi bja gagwe kua Galilea, Jesu o ile a bitša baapostola ba 12 gomme a ba roma ka mo go kgethegilego go yo tsebatša gore: “Mmušô wa maxodimo o batametše.”  (Mateo 10:​1-7) Yena ka noši o ile a “hlomaxanya metse ka moka le metsana [ya Galilea], a fêla a ruta diphuthêxong tša xôna, a xoêlêla Ebangedi ya mmušô wa maxodimo, a fodiša malwetši ka moka le mefôkôlô ka moka mo bathong.” Jesu o ile a kwela mašaba bohloko “ka xobane [a] be [a] lapile, [a] lahlexile wa dinku tše di se naxo modiši.” (Mateo 9:​35, 36) Ka ge a be a kgomegile maikwelong, o ile a botša barutiwa ba gagwe gore: “Punô ké e ntši; ’me badiri xa ba nene. Ké xôna kxopêlang Mong wa punô [Jehofa Modimo] a romêlê badiri punong ya xaxwe.” (Mateo 9:​37, 38) Tšhišinyo ya Jesu ya go nyakega ga babuni e bile e swanago kua Judea ge a be a šaletšwe ke dikgwedi tše tshela feela tša bodiredi bja gagwe bja lefaseng. (Luka 10:2) Mabakeng ka bobedi, o ile a roma balatedi ba gagwe bjalo ka babuni.​—Mateo 10:5; Luka 10:3.

Molaetša wa Rena wa Kholofelo

5. Re tsebatša molaetša wa mohuta mang?

⁵ Bjalo ka bahlanka ba Jehofa ba mehleng yeno, re arabela ka lethabo pitšong ya go ba babuni. Lebaka le lengwe leo le tlaleletšago kudu lethabong la rena ke gore re iša molaetša wa kholofelo go ba ba nyamilego le ba ba gateletšegilego. Go etša barutiwa ba Jesu ba lekgolong la pele la nywaga, re na le tokelo e kgolo gakaakang ya go tsebatša ditaba tše dibotse​—molaetša wa kgonthe wa kholofelo​—go bao ‘ba lapilego le ba ba lahlegilego bjalo ka dinku tše di se nago modiši’!

6. Baapostola ba ile ba ba le karolo modirong ofe lekgolong la pele la nywaga?

⁶ Bogareng bja lekgolo la pele la nywaga, moapostola Paulo o be a swaregilego ka go bolela ditaba tše dibotse. Le gona modiro wa gagwe wa puno o be o atlega e le ka kgonthe ka gobane ge a be a ngwalela Bakriste kua Korinthe mo e ka bago ka 55 C.E., o itše: “Bana bešo! Ke Le xopotša Ebangedi ye ke Le anexetšexo yôna, la e amoxêla ’me la êma ka yôna.” (1 Ba-Korinthe 15:1) Baapostola le Bakriste ba bangwe ba pele e be e le babuni ba mafolofolo. Gaešita le ge Beibele e sa re botše gore ke baapostola ba bakae bao ba phetšego go fihla nakong ya ditiragalo tše di felelago ka phedišo ya Jerusalema ka 70 C.E., re a tseba gore moapostola Johane o be a sa dutše a dira boboledi nywaga e 25 ka morago.​—Kutollo 1:9.

7, 8. Ke molaetša ofe wa kholofelo wo bahlanka ba Jehofa ba o tsebatšago ka go akgofa kudu mo nakong ye go feta le ge e le neng pele?

⁷ Ke moka go ile gwa tla mehla ya go buša ga baruti ba Bojakane, “motho wa bobe” wa bohlanogi. (2 Ba-Thesalonika 2:3) Lega go le bjalo, go ya mafelelong a lekgolo la bo-19 la nywaga, bao ba ilego ba tsoma go phela go ya ka Bokriste bja bogologolo ba ile ba tšea molaetša wa kholofelo, ba tsebatša Mmušo. Ge e le gabotse, ga e sa le go tloga ka tokollo ya wona ya mathomo (July 1879), sehlogo sa makasine wo se ile sa akaretša mantšu a rego “Herald of Christ’s Presence,” “Herald of Christ’s Kingdom” goba “O Tsebatša Mmušo wa Jehofa.”

⁸ Mmušo wa Modimo wa legodimong o ile wa hlongwa matsogong a Jesu Kriste ka 1914, gomme ga bjale re tsebatša molaetša wa kholofelo ka go akgofa kudu go feta le ge e le neng pele. Ka baka la’ng? Ka gobane gare ga ditšhegofatšo tšeo pušo ya Mmušo e tlago go di tliša go na le bofelo bjo bo lego kgaufsi bja tshepedišo ye ya gona bjale ya dilo. (Daniele 2:​44) Ke molaetša ofe o kaone o ka bago gona? Le gona, ke lethabo lefe le legolo leo re ka bago le lona la go feta go ba le karolo go tsebatšeng Mmušo pele ‘masetla-pelo a magolo’ a phulega?​—Mateo 24:​21; Mareka 13:10.

Go Tsoma mo go Atlegago

9. Ke taelo efe yeo Jesu a ilego a e nea barutiwa ba gagwe, gomme batho ba ile ba arabela bjang molaetšeng wa Mmušo?

⁹ Lebaka le lengwe leo le tlaleletšago lethabong la rena bjalo ka babuni ke katlego ya go tsoma ga rena bao e bago barutiwa gomme ba re tlatša modirong wa puno. Morago kua ka 31-32 C.E., Jesu o ile a laela barutiwa ba gagwe gore: “Motseng goba motsaneng le ge e le ofe wo le tsenago go wona, le tsome yo go wona a swanelegago.” (Mateo 10:​11, NW) Ga se batho ka moka bao ba bego ba swanelega, bjalo ka ge go bontšhitšwe ke kamoo ba ilego ba arabela ka gona molaetšeng wa Mmušo. Lega go le bjalo, barutiwa ba Jesu ba ile ba bolela ditaba tše dibotse ka mafolofolo kae le kae moo batho ba bego ba hwetšagala gona.

10. Paulo o ile a tšwetša pele bjang go tsoma ga gagwe ba ba swanelegago?

 ¹⁰ Ka morago ga lehu la Jesu le tsogo ya gagwe, go tsoma ba ba swanelegago go ile gwa tšwela pele ka phišego. Paulo o ile a boledišana le ba-Juda sinagogeng ya bona le batho bao ba bego ba le gona mmarakeng kua Athene. Ge a be a nea bohlatse kua Areopagus motseng woo wa Gerika, “banna bao ba kwana naê ’ba dumela. E mongwê wa bôná e be [e] le Dionisio wa lekxotla la mošatê, le mosadi e mongwê leina la xaxwe e lexo Damarisa, bà na le ba bangwê ba bôná.” Kae le kae moo Paulo a bego a e-ya gona, e be e bile e le mohlala go boleleng “phuthexong le malapeng.”​—Ditiro 17:​17, 34; 20:20.

11. Ke mekgwa efe ya go phetha bodiredi yeo e bego e dirišwa nywageng e fetilego?

¹¹ Nywaga-someng ya mafelelo ya lekgolo la nywaga la bo-19, Bakriste ba tloditšwego ba ile ba tšea karolo ka sebete go tsomeng bao ba swanelegago. Sehlogong se se rego “Ba Tloleditšwe go Bolela,” Zion’s Watch Tower ya July/August 1881 e itše: “Go bolelwa ga ditaba tše dibotse . . . go tšwetšwa pele go ‘ba boleta’​—bao ba ratago e bile ba kgona go kwa, e le gore gare ga bona go agwe mmele wa Kriste, baja-bohwa-gotee le yena.” Babuni ba Modimo gantši ba be ba kopana le batho bao ba tšwago ditirelong tša kereke gomme ba be ba ba nea dipampišana tšeo di nago le melaetša ya Mangwalo yeo e rulaganyeditšwego go tutuetša karabelo e swanetšego go bao ba swanelegago. Ka morago ga go hlahlobišiša katlego ya mokgwa wo wa go nea bohlatse, Morokami (wa Seisemane) wa May 15, 1903, o ile wa kgothaletša babuni go aba dipampišana “ka ntlo le ntlo, ka Sontaga mesong.”

12. Re okeditše bjang go atlega ga modiro wa rena wa boboledi? Bontšha.

¹² Nywageng ya morago bjale, re katološitše bodiredi bja rena ka go kopana le batho mafelong a mangwe go e na le magaeng a bona. Se se itlhatsetše e le seo se atlegago kudu dinageng tšeo go tšona maemo a tša boiphedišo le go phegelela boitapološo di dirago gore batho ba se be gona magaeng a bona ka dinako tšeo gantši re ba etelago ka tšona. Ge Hlatse kua Engelane le modirišani wa yona ba bona baeng ba tloga ka mehla ka pese ka morago ga go thabela go hlwa lebopong, ba ile ba rapa sebete sa go yo namela dipese gomme ba abela banamedi dikopi tša Morokami le Phafoga! Ka kgwedi e tee ba ile ba aba dikopi tše 229. Ba bega gore: “Ga re boife go nea bohlatse lebopong, mafelong a kgwebo goba tlhohlo le ge e le efe e nngwe yeo re ka lebanago le yona ka gobane re a tseba gore ka mehla Jehofa o na le rena.” Ba hlomile tsejana ya dimakasine, ba ile ba thoma thuto ya Beibele gomme bobedi bja bona ba bile le karolo tirelong ya bobulamadibogo bja go thuša.

13. Ke phetogo efe bodireding bja rena yeo ga bjale e nyakegago mafelong a mangwe?

¹³ Ka ge go tsongwa ga bao ba swanelegago go tšwela pele, go hlahlobišiša ka kelohloko bodiredi bja rena go ka nyakega mafelong a mangwe. Le ge Dihlatse tše dintši ka tlwaelo di e-ba le karolo boboleding bja ntlo le ntlo mesong ya Sontaga, dikarolong tše itšego di hwetša gore go etela magaeng a batho e sa le ka pela ga go na katlego e kgolo ka gobane batho ba ka be ba sa ikhuditše. Ka go fetola lenaneo la tšona, Dihlatse  tše dintši ga bjale di dira modiro wa go tsoma mosegare, mohlomongwe ka morago ga diboka tša Bokriste. Le gona modiro wo wa go tsoma o itlhatsetše e le o enywago dienywa e le ka kgonthe. Ngwagola palo ya bagoeledi ba Mmušo lefaseng ka bophara e oketšegile ka 2,3 lekgolong. Se se tumiša Mong wa puno gomme se thabiša dipelo tša rena.

Boloka Khutšo Modirong wa Puno

14. Re nea molaetša wa rena ka boemo bofe bja kgopolo, gomme ka baka la’ng?

¹⁴ Lebaka le lengwe la go thaba modirong wa rena le tswalana le boemo bja kgopolo bja go dira khutšo bjo re bo bontšhago modirong wa puno. Jesu o itše: “E re xe Le tsêna lapeng, Le dumedišê ba xôna. Xomme xe lapa leo le swanetše, xôna moláô wa lena o tlo le tlêla.” (Mateo 10:​12, 13) Tumedišo ya Sehebere le lentšu leo le sepedišanago le yona ka Segerika sa Beibele bobedi di fetišetša kgopolo ya gore ‘A tšohle di go sepelele gabotse.’ Boemo bjo bja kgopolo bo hlahla matseno a rena bathong ge re bolela ditaba tše dibotse. Kholofelo ya rena ke gore ba tla arabela ka mo go swanetšego molaetšeng wa Mmušo. Bakeng sa bao ba dirago bjalo, go na le tebelelo ya go boelana le Modimo ka ge ba itshola dibeng tša bona, ba sokologa gomme ba dira thato ya gagwe. Ke moka, go ba le khutšo le Modimo go lebiša bophelong bjo bo sa felego.​—Johane 17:3; Ditiro 3:​19; 13:​38, 48; 2 Ba-Korinthe 5:​18-20.

15. Re ka boloka bjang boemo bja kgopolo bja khutšo ge re gahlana le karabelo e sa amogelegego modirong wa rena wa boboledi?

¹⁵ Re ka boloka bjang khutšo ge e ba karabelo ye re e hwetšago e sa amogelege? Jesu o laetše gore: “Xe [lapa] le s’a swanêla, xôna moláô wa lena o tlo boêla xo lena.” (Mateo 10:​13) Pego ya Luka mabapi le go roma barutiwa ba 70 e akaretša polelo ya Jesu e rego: “Xe xôna-moo xo ka ba le ngwana wa moláô [“mogwera wa khutšo,” NW] xôna moláô wa lena ó tlo dula xo yêna; xe a se xôna, moláô wa lena o tlo boêla xo lena.” (Luka 10:6) Ge re boledišana le batho ka ditaba tše dibotse, re dira bjalo ka mo go swanetšego ka tshekamelo ya lethabo le ka mokgwa wa khutšo. Karabelo ya go se thabele, pelaelo goba polelo e sego botho ya mong wa ntlo e dira feela gore molaetša wa rena wa khutšo o ‘boele go rena.’ Eupša ga go le se tee sa tše seo se re amogago khutšo, seenywa sa moya o mokgethwa wa Jehofa.​—Ba-Galatia 5:​22, 23.

Pakane e Botse Bakeng sa Babuni

16, 17. (a) Pakane ya rena ke efe ge re dira maeto a go boela? (b) Re ka thuša bjang bao ba nago le dipotšišo tša Beibele?

¹⁶ Bjalo ka babuni re thabela go ba le karolo go kgoboketšeng batho bakeng sa bophelo bjo  bo sa felego. Le gona re thaba gakaakang ge motho yo re bolelago le yena a arabela ka go thabela, a nyaka go ithuta ka mo go oketšegilego gomme a itlhatsela e le “mogwera wa khutšo”! Mohlomongwe motho o na le dipotšišo tše dintši tša Beibele gomme re hwetša gore ga go kgonege gore re di arabe ka moka ketelong e tee. Ka ge go dula lebaka le letelele ketelong ya mathomo e ka ba mo go sa swanelago, ke eng seo se ka dirwago? Re ka ba le pakane e bjalo ka yeo e ilego ya kgothaletšwa nywageng e 60 e fetilego.

¹⁷ “Dihlatse tša Jehofa ka moka di swanetše go itokišetša go swara dithuto tša mohlala tša Beibele.” Polelo yeo e tšweletše karolong ya boraro ya lelokelelo la dipukwana tša tlhahlo tša Model Study tšeo di gatišitšwego go tloga ka 1937 go fihla ka 1941. E tšwetše pele gore: “Bagoeledi [ba Mmušo] ka moka ba swanetše go ela hloko go thuša ka ditsela ka moka ka mo go kgonegago batho bao ba kgahlišago bao ba thabelago molaetša wa Mmušo. Batho ba ba swanetše go direlwa maeto a go boela, o arabe dipotšišo tše di fapa-fapanego . . . , ke moka o thome thuto ya mohlala . . . kapejana kamoo o ka kgonago ka gona.” Ee, pakane ya rena maetong a go boela ke go thoma thuto ya legae ya Beibele le go e swara ka mehla. * Boemo bja kgopolo bja lerato le go tshwenyega ka lerato bakeng sa batho bao ba nago le kgahlego go re tutueletša go lokišeletša gabotse le go swara thuto ka mo go atlegago.

18. Re ka thuša bjang bao ba sa tšwago go kopanela go ba barutiwa ba Jesu Kriste?

¹⁸ Ka thušo ya puku ya Tsebo e Išago Bophelong bjo bo sa Felego le diporoutšha tše bjalo ka ya Ke Eng Seo Modimo a se Nyakago go Rena?, re ka swara dithuto tša magae tša Beibele tšeo di atlegago gomme re ka ba le karolo go thušeng bao ba sa tšwago go thabela go ba barutiwa. Ka ge re tsoma go ekiša Morutiši yo Mogolo, Jesu Kriste, mohlomongwe barutwana ba bjalo ba Beibele le bona ba tla ithuta mokgweng wa rena wa khutšo le lethabo, go botega ga rena le go hlompha ga rena ditekanyetšo tša Jehofa le tlhahlo ya gagwe. Ge re thuša bao ba sa tšwago go kopanela ka dikarabo dipotšišong tša bona, anke gape re direng seo re ka se kgonago go ba ruta kamoo ba ka arabago bao ba ba botšišago dipotšišo. (2 Timotheo 2:​1, 2; 1 Petro 2:​21) Bjalo ka babuni ba seswantšhetšo, ka ntle le pelaelo re ka thabela gore kakaretšo ya dithuto tša magae tša Beibele tše 4 766 631 di ile tša swarwa lefaseng ka bophara ngwageng o fetilego wa tirelo. Re thaba ka mo go kgethegilego ge e ba rena ka noši re le gare ga babuni bao ba nago le karolo modirong wa go swara thuto ya legae ya Beibele.

Tšwelang Pele le Thabile Punong

19. Ke ka baka la’ng go be go e-na le mabaka a mabotse a go thaba punong nakong ya bodiredi bja Jesu le kapejana ka morago ga moo?

¹⁹ Go be go e-na le mabaka a mabotse a go thaba punong nakong ya bodiredi bja Jesu le kapejana ka morago ga moo. Ka nako yeo ba bantši ba ile ba arabela gabotse ditabeng tše dibotse. Lethabo e be e le le legolo ka mo go kgethegilego ka Pentekoste ya 33 C.E., ka ge ba 3 000 ka nako yeo ba ile ba amogela tlhahlo ya Petro, ba amogela moya o mokgethwa wa Jehofa gomme ya ba karolo ya setšhaba sa Modimo sa Isiraele ya moya. Ka kgonthe, dipalo tša bona di ile tša tšwela pele di oketšega le lethabo le tlala ge “Morêna ka mehla a eketša ba ba phološwaxo.”​—Ditiro 2:​37-41, 46, 47; Ba-Galatia 6:​16; 1 Petro 2:9.

20. Ke eng seo se re tlišetšago lethabo le legolo modirong wa rena wa puno?

²⁰ Ka nako yeo, boporofeta bja Jesaya bo be bo itlhatsela e le bja therešo: “Sethšaba O se atišitše;  lethabô la sôna O le xodišitše; ba thaba pele xa xaxo byalo ka xe xo thabya punong, byalo ka xe xo hlalalwa xe xo abaxanywa dithebola.” (Jesaya 9:2) Gaešita le ge ga bjale re bona gore ‘setšhaba se se atilego’ sa batlotšwa se se nyakilego se feletše, lethabo la rena ke le legolo ge re bona palo ya babuni e gola ngwaga le ngwaga.​—Psalme 4:7; Sakaria 8:​23; Johane 10:16.

21. Ke eng seo re tlago go se ahla-ahla sehlogong se se latelago?

²¹ Re tloga re e-na le mabaka a kwagalago a go tšwela pele re thabile modirong wa puno. Molaetša wa rena wa kholofelo, go tsoma ga rena bao ba swanelegago le boemo bja rena bja kgopolo bja go dira khutšo​—mabaka a ka moka a re tlišetša lethabo bjalo ka babuni. Lega go le bjalo, a hlohleletša karabelo e fapanego go ba bantši. Moapostola Johane o ile a lebeletšana le se. O ile a golegwa sehlakahlakeng sa Patimo “molato è le Lentšu la Modimo, è le xo hlatsêla Jesu Kriste.” (Kutollo 1:9) Ka gona, ke bjang re ka bolokago lethabo la rena ge re lebeletšane le tlaišo le kganetšo? Ke eng seo se tla re thušago go lebeletšana le boemo bja kgopolo bjo thata bja ba bantši bao ga bjale re bolelago le bona? Sehlogo sa rena se se latelago se nea thušo ya Mangwalo bakeng sa go araba dipotšišo tše.

[Mengwalo ya ka tlase]

O tla Araba Bjang?

• Modiro wa seswantšhetšo wa go buna ke ofe?

• Re tsebatša molaetša wa mohuta mang?

• Ke ka baka la’ng go tsoma ga rena barutiwa go atlega?

• Re boloka bjang khutšo modirong wa puno?

• Ke ka baka la’ng re tšwela pele re thabile punong?

[Dipotšišo tša Thuto]

[Diswantšho go letlakala 12]

Go bolela lekgolong la pele le la bo-20 la nywaga

[Diswantšho go letlakala 13]

Ka go swana le Paulo, babuni ba mehleng yeno ba leka go fihlelela batho kae le kae

[Seswantšho go letlakala 13]

Tsebatša ditaba tše dibotse ka tshekamelo ya lethabo