“Na Modimo Ruri o Ahlola Batho Gore ba fišwe Diheleng?”

“Na le ithutela thutatumelo?”

Potšišo ye e ile ya makatša Joel le Carl. Masogana a a mabedi​—e lego baithapi bao ba šomago ntlong-kgolo ya Dihlatse tša Jehofa kua Brooklyn, New York​—a be a gaša mahlo dipukung ka lebenkeleng la kgaufsi la go rekiša dipuku. Ge Joel a be a hlahloba di-concordance tša Beibele, Carl o ile a mo anegela ka poledišano yeo a e thabetšego bodireding. Ka ge a ile a utswa ka tsebe dikarolo tša poledišano ye, monna yo a bego a eme kgaufsi o ile a hlohleletšega go ba batamela.

Lega go le bjalo, monna yo o be a tshwenyegile kudu ka taba ya motho ka noši go e na le taba ya ge e ba masogana a a mabedi a be a ithutela thutatumelo. O hlalositše gore: “Ke mo-Juda, gomme ba bangwe ba bagwera ba-ka ba Bakriste ba mpoditše gore ke tlo fišetšwa diheleng ka gobane ba-Juda ba ganne Jesu. Se se ntshwenya kudu. Kotlo e bjalo e tšwago go Modimo yo lerato ga e bonale e lokile. Na Modimo ruri o ahlola batho gore ba fišwe diheleng?”

Joel le Carl ba boditše monna yo yo a botegago gore ke barutwana ba mafolofolo ba Beibele. Ba ile ba mmontšha go tšwa ka Mangwalong gore bahu ga ba kwe selo gomme ba no ba ba robetše lehung ba letetše tsogo. Ka gona, ga ba hlokofatšwe goba go ba mollong wa dihele o bohloko. (Psalme 146:​3, 4; Mmoledi 9:​5, 10; Daniele 12:​13; Johane 11:​11-14, 23-26) Mafelelong a poledišano ya bona ya metsotso e 45, monna o ile a fa Joel le Carl aterese ya gagwe gomme a kgopela tsebišo e oketšegilego ka taba yeo.

Ge e ba dihele e be e le lefelo la tlhokofatšo ya mollo, na go na le motho le ge e le ofe yo a bego a ka kgopela go romelwa moo? Eupša mopatriareka Jobo ge a be a duma go tšwa tlalelong ya gagwe, o dirile kgopelo ye: “Ke mang yo a tlago go mpha se, gore o tle o ntšhireletše diheleng, gomme o nkute go fihlela bogale bja gago bo feta?” (Jobo 14:​13, Douay Version) Go molaleng gore Jobo ga se a ka a dumela gore dihele ke lefelo la tlhokofatšo. Go e na le moo, o ile a nyaka tšhireletšo moo. Lehu ke boemo bja go se phele, gomme dihele ka Beibeleng ke lebitla le le tlwaelegilego la batho.

Ge e ba o tla rata tsebišo e oketšegilego mabapi le seo se diregago go rena ge re e-hwa le ka kholofelo yeo e ka bago e le gona ka morago ga moo, o laletšwa ka borutho go arabela taletšong e latelago.