Na o na le Moya o sa Hwego?

MOAPOSTOLA Paulo o ngwadile gore: “Xobane Mangwalô ka moka ké ma-hebetšwa-ke-Modimo, le xôna a hola batho ka xo ruta, le ka xo kxodiša le xo sokolla, le ka xo iša tokong.” (2 Timotheo 3:​16) Ee, Beibele ke puku ya therešo ye e tšwago go Modimo wa therešo, Jehofa.​—Psalme 68:4.

Ka ge Jehofa e le Mmopi wa dilo ka moka go akaretša le batho, o tseba gabotse seo se diregago go rena ge re e-hwa. (Ba-Hebere 3:4; Kutollo 4:​11) Gomme ka Lentšung la gagwe le le buduletšwego, Beibele, o neile dikarabo tša kgonthe le tše di kgotsofatšago mabapi le bophelo ka morago ga lehu.

Moya ke Eng?

Ka Beibeleng, mantšu a fetoletšwego e le “moya” ge e le gabotse a bolela “mohemo.” Eupša se se šupa mo gontši kudu go feta tiro ya go hema. Ka mohlala, mongwadi wa Beibele Jakobo o re: ‘Mmele o hwile ge o se na moya.’ (Jakobo 2:​26) Ka gona, moya ke selo seo se phedišago mmele.

Matla a a phedišago e ka se ke ya fo ba mohemo goba moya wo o sepelago ka maswafong. Ke ka baka la’ng go se bjalo? Go ya ka The World Book Encyclopedia, ke ka gobane ka morago ga ge go hema go kgaoditše, bophelo bo tšwela pele ka diseleng tša mmele ka lebakanyana​—“ka metsotso e mmalwa.” Ka lebaka le, maiteko a go tsošološa motho ka go budulelwa ga moya a ka atlega. Eupša gatee feela ge tlhase ya bophelo e tima diseleng tša mmele, maiteko ka moka a go tsošološa bophelo ke a lefeela. Ga go na tekanyo ya mohemo goba moya yeo e ka tsošago gaešita le sele e tee. Ka gona, moya (spirit) ke matla a bophelo a sa bonagalego​—tlhase ya bophelo yeo e phedišago motho le disele. Matla a a bophelo a thekgwa ke go hema.​—Jobo 34:​14, 15.

Na moya woo o šoma feela bathong? Beibele e re thuša go fihlelela phetho e nepagetšego tabeng ye. Kgoši e bohlale Salomo o ile a dumela gore go batho le diphoofolo “xo buša môya xo a swana,” gomme a botšiša gore: “Ké mang a tsebaxo xe môya wa bana ba batho ò rotoxêla kwa xodimo, xe môya wa phôôfôlô ò foloxêla tlase lefaseng?” (Mmoledi 3:​19-21) Ka gona, diphoofolo gotee le batho go bolelwa gore di na le moya (spirit). Seo se ka ba bjalo bjang?

 Moya goba matla a bophelo, o ka swantšhwa le matla a mohlagase ao a šomago motšheneng goba sedirišweng. Mohlagase wo o sa bonagalego o ka dirišetšwa go dira mediro e fapa-fapanego, go ithekgilwe ka mohuta wa sedirišwa seo o se neago matla. Ka mohlala, setofo sa mohlagase se ka direlwa go tšweletša phišo, computer ya direlwa go tšweletša tsebišo gomme thelebišene bakeng sa go tšweletša diswantšho le modumo. Lega go le bjalo, matla a mohlagase le ka mohla ga a tšee dibopego tša sedirišwa seo o se neago matla. A fo dula e le matla. Ka mo go swanago, matla a bophelo ga a tšee le ge e le sefe sa dika tša dibopiwa tšeo a di neago matla. Ga a na semelo le bokgoni bja go nagana. Bobedi batho le diphoofolo ba na le ‘moya o swanago.’ (Mmoledi 3:​19) Ka gona, ge motho a e-hwa moya wa gagwe ga o tšwele pele o phela lefelong le lengwe e le sebopiwa sa moya.

Ka gona, boemo bja bahu ke bofe? Le gona go direga’ng ka moya ge motho a e-hwa?

‘O tla Boela Leroleng’

Ge motho wa mathomo, Adama a be a sa kwe taelo ya Modimo ka boomo, O itše go yena: “Boxôbê O tlo bo ja ka dikudumêla tša sefahloxô sa xaxo; wa bá wa boêla mmung; ka xobane O nthšitšwe mmung; O lerole; ’me sa xaxo ké xo boêla leroleng.” (Genesi 3:​19) Adama o be a le kae pele ga ge Jehofa a mmopa ka lerole? Ga go mo a bego a le gona! O be a tloga a se gona. Ka gona ge Jehofa Modimo a be a re Adama o tla “boêla mmung,” o be a bolela gore Adama o be a tla hwa gomme a boela mmung. Adama o be a ka se ke a fetela lefelong la moya. Ge a e-hwa, Adama o be a tla fetoga gape yo a sego gona. Kotlo ya gagwe e be e le lehu​—go se be gona ga bophelo​—e sego go fetišetšwa lefelong le lengwe.​—Ba-Roma 6:23.

Go thwe’ng ka ba bangwe bao ba hwilego? Boemo bja bahu bo hlalositšwe gabotse go Mmoledi 9:​5, 10, moo re balago gore: “Bahu ga ba tsebe selo . . . Ka lebitleng ga go na modiro, ga go na leano, ga go na tsebo goba bohlale.” (Moffatt) Ka gona, lehu ke boemo bja go se be gona. Mopsalme o ngwadile gore ge motho a e-hwa, “môya [spirit] wa [gagwe] o a tloxa, ’me yêna ó boêla mmung wa xaxwe; mohla woo ké mo xo fêlaxo maanô a motho.”​—Psalme 146:4.

Ka mo go kwagalago, bahu ga ba phele. Ba ka se tsebe selo. Ba ka se go bone, ba ka se go kwe goba go bolela le wena. Ba ka se go thuše goba go go gobatša. Ruri ga se wa swanela go boifa bahu. Eupša ke bjang go thwego moya ‘o tloga’ mothong nakong ya ge a e-hwa?

Moya “o Boêla xo Modimo”

Beibele e bolela gore ge motho a e-hwa “môya o boêla xo Modimo E a o neilexo motho.” (Mmoledi 12:7) Na se se bolela gore go na le selo se se phelago sa moya seo se sepelago e le ka kgonthe go phatša sebaka-bakeng go ya mo  Modimo a lego gona? Le gatee-tee! Tsela yeo Beibele e dirišago lentšu “boêla” ka yona ga e nyake gore go be le mosepelo wa kgonthe wa go tloga lefelong le lengwe go ya go le lengwe. Ka mohlala, ba-Isiraele ba sa botegego ba be ba boditšwe gore: “Boêlang xo Nna, ke tseb’o boela xo lena!​—O r’yalo Morêna wa mašaba.” (Maleaki 3:7) Go ‘boela’ ga Isiraele go Jehofa go be go bolela go furalela tsela e fošagetšego gomme ba dumelelane gape le tsela ya Modimo ya go loka. Le gona go “boêla” ga Jehofa go Isiraele go be go bolela go lebiša tlhokomelo ya gagwe e kgahlišago bathong ba gagwe gape. Mabakeng ka bobedi go ‘boela’ go akaretša boemo bja kgopolo, e sego mosepelo wa kgonthe wa go tloga lefelong le lengwe go ya go le lengwe.

Ka mo go swanago, lehung ga go na mosepelo wa kgonthe wa go tloga lefaseng go ya legodimong wo o diregago ge moya o “boêla” go Modimo. Gatee-tee ge matla a bophelo a tšwile mothong, ke Modimo feela yo a nago le bokgoni bja go a bušetša go yena. Ka gona moya “o boêla xo Modimo” ka kgopolo ya gore kholofelo le ge e le efe ya bophelo bja nakong e tlago bakeng sa motho yoo bjale e ithekgile ka mo go feletšego ka Modimo.

Ka mohlala, ela hloko seo Mangwalo a se bolelago ka lehu la Jesu Kriste. Mongwadi wa Ebangedi Luka o re: “Jesu a hlaboša lentšu a re: Tata! Môya wa-ka ke o xafêla diatleng tša xaxo! Xe a itš’alo a fêla môya.” (Luka 23:​46) Ge moya wa Jesu o be o e-tšwa go yena, o be a se tseleng ya gagwe ya kgonthe ya go ya legodimong. Jesu ga se a tsošwa bahung go fihlela ka letšatši la boraro, gomme o ile a rotogela legodimong ka morago ga matšatši a 40. (Ditiro 1:​3, 9) Lega go le bjalo, nakong ya lehu la gagwe, Jesu ka kgodišego o ile a gafela moya wa gagwe diatleng tša Tatagwe, a holofela ka mo go feletšego bokgoning bja Jehofa bja go mmušetša bophelong.

Ee, Modimo a ka bušetša motho bophelong. (Psalme 104:​30) Se se bula ditebelelo tše dikgolo gakaakang!

Kholofelo e Kgonthišeditšwego

Beibele e re: “Xo tla lebaka leo bohle ba lexo mabitleng [“a kgopotšo,” NW] ba tl’o xo kwa Lentšu la [Jesu] ka lôna. Xomme ba tlo tšwa.” (Johane 5:​28, 29) Ee, Jesu Kriste o holofeditše gore bohle bao ba lego ka kgopolong ya Jehofa ba tla tsošwa goba ba bušetšwa bophelong. Ka kgonthe gare ga bona go tla ba le bao ba ilego ba phegelela tsela ya go loka e le bahlanka ba Jehofa. Eupša batho ba bangwe ba dimilione ba hwile ka ntle le go bontšha ge e ba ba tla dumelelana le ditekanyetšo tša Modimo tša go loka. E ka ba e le gore ga se ba ka ba tseba ka ditekanyetšo tša Jehofa goba ga se ba ba le nako e lekanego bakeng sa go dira diphetogo tšeo di nyakegago. Batho ba bjalo le bona ba ka kgopolong ya Modimo gomme ba tla tsošwa, ka gobane Beibele e re: “Bahu ba tlo tsoxa, bohle, baloki le ba s’a lokaxo.”​—Ditiro 24:15.

Lehono, lefase le tletše ka lehloyo le ditshele, bošoro le go tšhollwa ga madi, tšhilafalo le malwetši. Ge e ba bahu ba be ba tla tsošetšwa bophelong bjo bo bjalo, ka ntle le pelaelo lethabo le ge e le lefe e be e tla ba la lebakanyana. Eupša Mmopi o holofeditše gore kgaufsinyana o tla fediša lekoko la gona bjale la lefase leo le laolwago ke Sathane Diabolo. (Diema 2:​21, 22; Daniele 2:​44; 1 Johane 5:​19) Lekoko la batho la go loka​—“lefase le lefsa”​—ka nako yeo le tla ba selo sa kgonthe se se kgahlišago.​—2 Petro 3:13.

Ka nako yeo “mo xo ba ba axilexo fá xo ka se bê le e a rexo: Ke a babya.” (Jesaya 33:​24) Gaešita le tlalelo ya lehu e tla fedišwa, ka gobane Modimo “ó tla phomola mexôkxô ka moka mahlong a bôná; le lehu le ka se hlwê le e-ba xôna; le xe e le manyami le dillô le bohloko, di ka se hlwê di e-ba xôna; xobane tša pele di fetile.” (Kutollo 21:4) Ye ke tebelelo e kgolo gakaakang bakeng sa bao ba lego ‘mabitleng a kgopotšo’!

Ge Jehofa a fediša bokgopo lefaseng, a ka se fediše baloki gotee le ba sa lokago. (Psalme 37:​10, 11; 145:​20) Ge e le gabotse “lešaba le lexolo” la batho “ba dithšaba ka moka, le meloko  ka moka, le merafô ka moka, le maleme ka moka” le tla phologa “tlaišexong e kxolo,” yeo e tlago go fediša lefase la gona bjale le kgopo. (Kutollo 7:​9-14) Ka gona, lešaba le legolo le tla be le letetše go amogela bahu ba tsošitšwego.

Na o hlologetše go bona baratiwa ba gago gape? Na o nyaka go phela ka mo go sa felego lefaseng la Paradeise? Gona o swanetše go hwetša tsebo e nepagetšego ka thato le merero ya Modimo. (Johane 17:3) Ke thato ya Jehofa gore “batho bohle ba phološwê ba fihlêlê tsebô ya therešô.”​—1 Timotheo 2:​3, 4.

[Seswantšho go letlakala 4]

“O lerole; ’me sa xaxo ké xo boêla leroleng”

[Seswantšho go letlakala 5]

Moya o ka bapišwa le mohlagase

[Seswantšho go letlakala 7]

Tsogo e tla tliša lethabo la ka mo go sa felego