Na o yo a Kgotlelelago e le ka Kgonthe?

NA O kile wa ikwa o galefile ka mo go feteletšego ka lebaka la boitshwaro bjo bo sa swanelago bja motho yo mongwe? Na o yo a kitimelago go gata megato ge ditutuetšo tše di senyago di šwahlela gare ga bagwera ba gago ba kgaufsi?

Mogato wa ka pela le o tiilego ke wo o nyakegago ka dinako tše dingwe bakeng sa go thibela go keka ga sebe se segolo. Ka mohlala, ge bobe bjo bo hlabišago dihlong bo be bo tšweletša kotsi ya go šilafatša ba-Isiraele lekgolong la bo-15 la nywaga B.C.E., setlogolo sa Arone e lego Finease o ile a gata mogato o swanetšego bakeng sa go tloša seo e lego se sebe. Jehofa Modimo a kgahlilwe ke seo Finease a se dirilego, o ile a bolela gore: “Pinease . . . ó xomišitše boxale bya-ka byo bo bexo bo tuketše Ba-Isiraele ka xe a xalefa à le mo xare xa bôná.”​—Numeri 25:​1-11.

Finease o gatile mogato o swanetšego go thibela go keka ga go se hlweke. Eupša go thwe’ng ka kgalefo e sa lokago ya go galefela diphošo feela tša batho ba bangwe? Ge e ba re be re tla gata mogato ka lebelo goba ka ntle le lebaka leo le kwalago, re be re ka se be bašireletši ba toko eupša go e na le moo re be re tla ba baemedi ba go se kgotlelele​—batho bao ba sa amogelego go se phethagale ga ba bangwe. Ke eng seo se ka re thušago go phema moreo wo?

‘Jehofa o go Lebalela Makgopo a Gago ka Moka’

Jehofa ke “Modimo wa lehufa (phišego); Modimo yo a sa kgotlelelego borabele.” (Ekisodo 20:5, mongwalo wa ka tlase wa NW) Ka ge e le Mmopi, o na le tshwanelo ya go nyaka boineelo bja rena bjo bo feletšego. (Kutollo 4:​11) Lega go le bjalo, Jehofa ke yo a kgotlelelago mafokodi a batho. Ke ka baka leo mopsalme Dafida a opetšego ka yena ka gore: “Jehofa ke yo lešoko, yo mabobo, wa go se fele pelo, le wa kgaugelo e kgolo. A ka se ke a lwa [“swaya diphošo,” NW] ka mehla . . . Ga a re dire ka dibe tša rena; gomme ga a re bušološetše makgopo a rena.” Ee, ge e ba re itshola, Modimo ‘o re lebalela makgopo a rena ka moka.’​​—Psalme 103:​3, 8-10, PK.

Ka ge a kwešiša go ba ga batho le sebe go tloga mathomong, Jehofa ga a ‘swaye diphošo ka mehla’ malebana le badiradibe ba itsholago. (Psalme 51:5; Ba-Roma 5:​12) Ge e le gabotse, ke morero wa gagwe go tloša sebe le go se phethagale. Go fihlela ge seo se phethwa ka botlalo, go e na le go re ‘bušološetša makgopo a rena,’ Modimo o nea tebalelo ka kgaugelo motheong wa sehlabelo sa Jesu Kriste sa topollo. Ga go le o tee wa rena yo a bego a tla bolelwa e le yo a swanelwago ke phološo ge nkabe Jehofa a se a ka a bontšha kgaugelo ka mo go swanetšego. (Psalme 130:3) Re ka leboga gakaakang gore Tate wa rena wa legodimong, ke Modimo yo a gaugelago yoo ka mo go swanetšego a nyakago boineelo bjo bo feletšego!

Go Nyakega Teka-tekano

Ka ge Morena yo a Phagamego wa legohle a bontšha kgotlelelo ge a dirišana le batho ba sa phethagalago, na le rena ga se ra swanela go dira se se swanago? Kgotlelelo e ka hlaloswa e le tshekamelo ya go se felele dikgopolo le ditiro tša ba bangwe pelo. Na rena ka noši re na le tshekamelo e bjalo​​—tshekamelo ya go bontšha go se fele pelo le go itshwara ge ba bangwe ba bolela goba ba dira dilo tšeo e sego tše mpe ka mo go lego molaleng eupša mohlomongwe e le tše sa swanelago ka polelo goba ka tiro?

Go ba gona, re swanetše go phema go ba bao ba kgotlelelago ka mo go feteletšego. Ka mohlala, tshenyo e šoro e a dirwa ge balaodi ba bodumedi ba kgotlelela baruti ba gobogilego bao ba gobošago bašemane le basetsana ka go se kgaotše. Mmegi yo mongwe wa ditaba kua Ireland o hlalositše gore: “Ba lebelela seo se diragaletšego  bana ba e le feela tiragalo e sa tshwenyego ya sebe, balaodi ba kereke ba fo hudušetša moruti yo a senyago [lefelong le lengwe].”

Na go fo hudušwa ga motho yoo ke mohlala wa kgotlelelo e swanetšego? Le gatee! A re re mohlomongwe lekgotla la tša kalafo le dumelela ngaka ya go bua yeo e sa elego dilo hloko e tšwela pele ka go bua, le mo hudušetša go tloga sepetleleng se sengwe go ya go se sengwe, gaešita le ge a bolaya goba go golofatša balwetši ba gagwe. Go bontšha maikwelo a fošagetšego mabapi le potego ya ditsebi tša tša kalafo go ka tšweletša seo go thwego ke “kgotlelelo.” Eupša go thwe’ng ka bahlaselwa bao maphelo a bona a ilego a lobja goba a ilego a kgongwa gampe ka lebaka la ditiro tša go se šetše goba gaešita le tša bosenyi?

Go sa dutše go e-na le kotsi ya go bontšha kgotlelelo e nyenyane kudu. Ge Jesu a be a le mo lefaseng, ba-Juda bao ba bego ba tsebja e le ma-Zealot ba be ba tsoma ka mo go fošagetšego go diriša mohlala wa Finease boitekong bja go lokafatša ditiro tša bona. E nngwe ya ditiro tše feteletšego tša ma-Zealot a mangwe e be e le “go itswakanya le mašaba ao a bego a le Jerusalema nakong ya menyanya le ditiragalong tše swanago le tšeo gomme ba hlabe manaba a bona ka dithipa tše dikgolo ba sa letela seo.”

Bjalo ka Bakriste, re ka se tsoge re ile bokgoleng bja go dira seo se dirilwego ke ma-Zealot ka go hlasela mmeleng bao ba sa re kgahlišego. Eupša na tekanyo e itšego ya go se kgotlelele e ka re lebiša go hlaseleng ka ditsela tše itšego bao re sa ba ratego​—mohlomongwe ka go ba bolela gampe? Ge e ba ruri re kgotlelela, re ka se ke ra retologela go dirišeng polelo e bjalo e bohloko.

Bafarisei ba lekgolong la pele la nywaga e be e le sehlopha se sengwe seo se bego se se na kgotlelelo. Ba be ba fela ba sola ba bangwe gomme ba se na taba ka go se phethagale ga batho. Bafarisei bao ba bego ba ikgantšha ba be ba tšeela batho feela fase, ba ba bitša ka lenyatšo gore ke “dihlôbôxwa.” (Johane 7:​49) Ka lebaka leo le kwalago, Jesu o kgalemetše banna bao ba go itira baloki, ge a re: “Le ba madi-mabe lena ba-mangwalô le bafarisei, lena baikaketši, xobane Le nthša sa-lesome xo leróto le xo lenônya le xo lehlóko, Lè sa šetše tše di kxolo Molaong, e lexo tokô kahlolong le kxauxêlô le pôtêxô. Xo swanetše xe xo dirwa tšeno, ’me le tšela di se leswê.”​—Mateo 23:23.

Ka go bolela mantšu a, Jesu o be a sa nyenyefatše bohlokwa bja go boloka Molao wa Moše. O be a bontšha feela gore dibopego “tše di kxolo,” goba tše di lego bohlokwa kudu tša Molao di be di nyaka go dirišwa ga wona ka teka-tekano le kgaugelo. Jesu le barutiwa ba gagwe e be e le ba fapanego gakaakang le Bafarisei le ma-Zealot a go hloka kgotlelelo!

Ga go le o tee magareng ga Jehofa Modimo le Jesu Kriste yo a hlokomologago bobe. Go se go ye kae, ‘ba ba sa tsebego Modimo, le ba ba sa kwego Ebangedi, ba tlo lefetšwa.’ (2 Ba-Thesalonika 1:​6-​10) Lega go le bjalo, go fišegeleng ga gagwe toko, Jesu ga se a ka a palelwa ke go bonagatša go se fele pelo gotee le kgaugelo tša Tatagwe wa legodimong le go kgongwa ka tsela e lerato ke bohle bao ba nyakago go dira se se lokilego. (Jesaya 42:​1-3; Mateo 11:​28-​30; 12:​18-​21) A mohlala o mobotse gakaakang wo Jesu a re beetšego wona!

Rwalanang le sa Felelane Pelo

Gaešita le ge re ka ba le phišego e kgolo ya go fišegela seo se nepagetšego, anke re dirišeng keletšo ya moapostola Paulo e rego: “Le fêlê Lè rwalana; Le lebalêlanê xe xo na le e a naxo le taba le e mongwê; bo-ka [Jehofa, NW] xe a Le lebaletše, le lena Le dirê ka mokxwa woo.” (Ba-Kolose 3:​13; Mateo 6:​14, 15) Kgotlelelo e nyaka gore re rwalelane mafokodi le diphošo lefaseng le leo le sa phethagalago. Re swanetše go ba bao ba leka-lekanego go seo re se letetšego go ba bangwe.​​—Ba-Filipi 4:5.

Go ba bao ba kgotlelelago le ka mohla ga go bolele go amogela go se loke goba go ba bao ba iphoufaletšago diphošo. Sebopego se sengwe sa kgopolo goba boitshwaro bja modumedi-gotee le rena se ka ba se sa dumelelane le ditekanyetšo tša Jehofa ka tsela e itšego. Gaešita le ge go aroga go ka ba go se gwa hlwa go e-ba mo gogolo mo go ka lebišago go se amogelweng ke Modimo, go ka nea leswao la temošo leo le bontšhago gore go nyakega tokišo e itšego. (Genesi  4:​6, 7) Ke ga lerato gakaakang ge bao ba nago le ditshwanelego tša moya ba leka go bušetša mofoši tseleng ka moya o bonolo! (Ba-Galatia 6:1) Ka gona, gore boiteko bjo bo atlege go nyakega gore bo dirwe ka go kgomega go e na le go dirwa ka moya wa go swaya diphošo.

“Ka Boleta le ka Tlhompho e Tseneletšego”

Go thwe’ng ka go bontšha go se fele pelo bathong bao dipono tša bona tša bodumedi di fapanago le tša rena? “Thuto ya Kakaretšo” yeo e ilego ya phatlalatšwa Dikolong ka moka tša Setšhaba yeo e hlomilwego kua Ireland ka 1831 e balega ka gore: “Jesu Kriste ga se a ka a rera gore bodumedi bja gagwe bo gapeletšwe batho ka tsela e šoro. . . . Go ngangišana le baagišani ba rena le go ba swara gampe ga se tsela ya go ba kgodiša gore re ka lehlakoreng le le nepagetšego gomme bona ba ka go le le fošagetšego. Go bonala go swana kudu le go ba kgodiša gore ga re na moya wa Bokriste.”

Jesu o rutile le go dira dilo ka tsela yeo e bego e gogela batho Lentšung la Modimo, ka gona go swanetše go ba bjalo le ka rena. (Mareka 6:​34; Luka 4:​22, 32; 1 Petro 2:​21) Ka ge e le motho yo a phethagetšego yo a nago le temogo e kgethegilego yeo a e filwego ke Modimo, o be a kgona go tseba seo se lego ka dipelong. Ka gona, ge go be go nyakega, Jesu o be a kgona go sola manaba a Jehofa ka tsholo e bogale. (Mateo 23:​13-​33) E be e se gore ga a kgotlelele ge a be a dira seo.

Ka go se swane le Jesu, ga re na bokgoni bja go tseba se se lego ka dipelong. Ka gona, re swanetše go latela keletšo ya moapostola Petro e rego: “Kgethagatšang Kriste e le Morena dipelong tša lena, ka mehla le itokišeditše go iphemela pele ga mang le mang yo a le botšišago lebaka la kholofelo ya lena, eupša le dira bjalo ka boleta le ka tlhompho e tseneletšego.” (1 Petro 3:​15, NW) Ka ge re le bahlanka ba Jehofa, re swanetše go emela seo re se dumelago ka gobane ke seo se theilwego ka go tia Lentšung la Modimo. Eupša re swanetše go dira se ka tsela yeo e bontšhago go hlompha ba bangwe le ditumelo tša bona tšeo ba di kgomaretšego ka potego. Paulo o ngwadile gore: “Polêlô ya lena a e bê ya botho ka mehla, e bê e nokilwexo letswai; Le tsebê xo fetola mang le mang ka mo xo Le swanetšexo.”​—Ba-Kolose 4:6.

Thutong ya gagwe e tumilego ya Thabeng, Jesu o itše: “Tšohle tše Le rataxo xore batho ba Le dirêlê tšôna, le lena Le ba dirêlê tšôna-tšeo.” (Mateo 7:​12) Ka gona-ge, a re rwalaneng re sa felelane pelo gomme re bontšhe tlhompho go bao re ba botšago ditaba tše dibotse. Ka go leka-lekanya phišego ya rena ya go fišegela toko ka kgotlelelo e theilwego ka Beibeleng, re tla thabiša Jehofa e bile re tla ba bao ba kgotlelelago e le ka kgonthe.

[Seswantšho go letlakala 23]

Phema boemo bja kgopolo bja go hloka kgotlelelo bja Bafarisei

[Seswantšho go letlakala 23]

Jesu o bonagaditše moya wa kgotlelelo wa Tatagwe. Na le wena o a o bonagatša?