Tšwelang Pele Modirong wa Puno!
Tšwelang Pele Modirong wa Puno!
“Ba xo byala ka mexôkxô ba tlo buna ka mekxolokwane.”—PSALME 126:5.
1. Ke ka baka la’ng re ‘kgopela Mong wa puno gore a romele badiri punong’ lehono?
KA MORAGO ga leeto la boraro la boboledi la Jesu Kriste kua Galilea, o ile a botša barutiwa ba gagwe gore: “Punô ké e ntši; ’me badiri xa ba nene.” (Mateo 9:37) Boemo e be e le bjo bo swanago kua Judea. (Luka 10:2) Ka ge se e be e le sa therešo mo e ka bago nywaga e 2 000 e fetilego, boemo ke bofe lehono? Ngwageng wa tirelo o fetilego Dihlatse tša Jehofa tša ka godimo ga 6 000 000 di ile tša tšwela pele modirong wa puno wa seswantšhetšo gare ga batho ba lefase ba 6 000 000 000, bao bontši bja bona ‘ba lapilego e bile ba lahlegile wa dinku tše di se nago modiši.’ Ka gona keletšo ya Jesu ya go ‘kgopela Mong wa puno gore a romele badiri punong’ ke yeo e šomago mo nakong ye go swana le ge e be e šoma nywaga-kgolong e fetilego.—Mateo 9:36, 38.
2. Ke eng seo se dirago gore batho ba re šetše?
2 Jehofa Modimo e lego Mong wa puno o arabile kgopelo ya go romela badiri ba oketšegilego. Le gona ke mo go thabišago gakaakang go ba le karolo modirong wo wa puno wo o hlahlwago ke Modimo! Gaešita le ge re se nene ka palo ge go bapišwa le ditšhaba, go ba le karolo ga rena ka mafolofolo modirong wa go bolela ka Mmušo le wa go dira barutiwa go dira gore lefase le re šetše. Dinageng tše dintši go bolelwa ka rena gantši ditabeng. Ge motho a kokota mojako papading ya thelebišene, go ka dirwa gore go hlaloswe gore Dihlatse tša Jehofa ke tšona di etetšego. Ee, modiro wa rena wa Bokriste bjalo ka babuni ba seswantšhetšo o tsebja kudu lekgolong la nywaga la bo-21.
3. (a) Re tseba bjang gore modiro wa go bolela ka Mmušo o be o lemogwa lekgolong la pele la nywaga? (b) Ke ka baka la’ng re ka bolela gore barongwa ba thekga bodiredi bja rena?
3 Lefase gape le ile la lemoga mediro ya go bolela ka Mmušo ya lekgolong la pele la nywaga gomme la tlaiša bagoeledi ba ditaba tše dibotse. Ke ka lebaka leo moapostola Paulo a ngwadilego gore: “Rena baapostola, ke bôna e ke Modimo ó re beile ba moraxo-raxo, e ke re ba xo hwa; re seboxêlô sa lefase le sa Barongwa le sa batho.” (1 Ba-Korinthe 4:9) Ka mo go swanago, kgotlelelo ya rena re le bagoeledi ba Mmušo go sa šetšwe tlaišo e dira gore lefase le re šetše gomme ke ya bohlokwa go barongwa. Kutollo 14:6 e re: “Ka [moapostola Johane] bôna Morongwa e mongwê à fofa xare xa lexodimo à swere Ebangedi ya neng le neng ya xo tsebišwa ba ba axilexo lefaseng, dithšaba tšohle le meloko yohle, le maleme ohle le merafô yohle.” Ee, re thekgwa ke barongwa bodireding bja rena—modirong wa rena wa puno!—Ba-Hebere 1:13, 14.
“Ba ba Hloilwexo”
4, 5. (a) Ke temošo efe yeo Jesu a ilego a e nea barutiwa ba gagwe? (b) Ke ka baka la’ng bahlanka ba Modimo ba mehleng yeno e le “ba ba hloilwexo”?
4 Ge baapostola ba Jesu ba be ba rongwa e le babuni, ba ile ba kwa taelo ya gagwe ya gore ba ‘hlalefe wa dinoga gomme ba ile bomenetša bjalo ka maeba.’ Jesu o okeditše ka gore: “Le phafoxêlê batho, xobane ba tlo Le sekiša dikxorong, ’me ba tlo Le ôtla mo diphuthexong tša bôná. Ba tlo Le bexa xo babuši le dikxoši ka ’baka la-ka, ya tlo ba bohlatse xo bôná le xo ba dithšaba. . . . Le tlo ba ba ba hloilwexo ke bohle ka ’baka la leina la-ka. Xomme e a tl’o xo kxôtlêlêla xo iša bofelong, ké yêna a tl’o xo phološwa.”—Mateo 10:16-22.
5 Lehono re “ba ba hloilwexo” ka gobane “lefase ka moka le rapaletše matleng a yo mobe,” Sathane Diabolo, yo e lego lenaba le legolo la Modimo le batho ba Gagwe. (1 Johane 5:19, NW) Manaba a rena a lemoga katlego ya rena ya moya eupša a gana go e tswalanya le Jehofa. Baganetši ba bona difahlego tša rena tše di thabilego le tše di myemyelago ge re e-ba le karolo ka lethabo modirong wa puno. Ba makatšwa ke botee bja rena! Ge e le gabotse, ba ka dumela ka go se rate ge ba e-ya nageng e nngwe gomme ba hwetša gore Dihlatse tša Jehofa tša moo di dira modiro o swanago tlwaa le woo o dirwago nageng ya gabo bona. Go ba gona re a tseba gore ka nako e swanetšego Jehofa, mothekgi wa rena le mothopo wa botee bja rena, o tla tsebja le ke manaba a rena.—Hesekiele 38:10-12, 23.
6. Re na le kgonthišego efe ge re dutše re tšea karolo punong, eupša go rotoga potšišo efe?
6 Mong wa puno o neile Morwa wa gagwe, Jesu Kriste “matla ka moka lexodimong le lefaseng.” (Mateo 28:18) Ka gona Jehofa o diriša Jesu go hlahla modiro wa puno ka barongwa ba legodimong le ka “molaki e a bôtêxaxo yo bohlale” yo a tloditšwego mo lefaseng. (Mateo 24:45-47; Kutollo 14:6, 7) Eupša re ka lebeletšana bjang le kganetšo ya lenaba gomme ra tšwela pele re boloka lethabo la rena ge re dutše re tšwela pele modirong wa puno?
7. Ke tshekamelo efe yeo re swanetšego go katanela go ba le yona ge re ganetšwa goba re tlaišwa?
7 Ge re lebane le kganetšo goba le yona tlaišo e feteletšego, anke re tsomeng thušo ya Modimo e le gore re ka boloka tshekamelo e bjalo ka ya Paulo. O ngwadile gore: “Xe re roxwa, re a šexofatša; xe re hlômarêlwa, re a kxôtlêlêla. Xe re pharwa, re a [rapela, PK].” (1 Ba-Korinthe 4:12, 13) Moya wo ge o sepedišana le bodiredi bja rena bja phatlalatša bjo bo dirwago ka bohlale, ka dinako tše dingwe o fetoša boemo bja kgopolo bja baganetši ba rena.
8. O hwetša kgonthišetšo efe mantšung a Jesu a ngwadilwego go Mateo 10:28?
8 Gaešita le tšhošetšo ya lehu ga e fediše phišego ya rena bjalo ka babuni. Re tsebatša molaetša wa Mmušo ka go se boife ka bolokologi ka mo go ka kgonegago. Gomme re hwetša kgonthišetšo e kgothatšago mantšung a Jesu a rego: “Le se boifê ba ba bolayaxo mmele, bà sa kxone xo bolaya môya; xaxolo Le boifê Eo a kxônaxo xo senya mmele le môya moleteng wa mollô.” (Mateo 10:28) Re a tseba gore Tatago rena wa legodimong ke Monei wa bophelo. O putsa bao ba bolokago potego go yena gomme ba tšwela pele ka mafolofolo modirong wa puno.
Molaetša o Phološago Bophelo
9. Ba bangwe ba ile ba arabela bjang mantšung a Hesekiele, gomme selo se se swanago se direga bjang lehono?
9 Ge moporofeta Hesekiele a be a tsebatša ka sebete melaetša ya Jehofa go ‘ditšhaba tša bahlanogi’—mebušo ya Isiraele le Juda—batho ba bangwe ba ile ba thabela go kwa seo a bego a se bolela. (Hesekiele 2:3) Jehofa o itše: “Bona, go bona o koša e rategago, o bjalo ka e a nago le lentšu le lebotse.” (Hesekiele 33:32, PK) Gaešita le ge ba be ba rata mantšu a Hesekiele, ba ile ba palelwa ke go gata mogato ka go dumelelana le wona. Go direga’ng lehono? Ge mašaledi a tloditšwego le bagwera ba ona ba tsebatša melaetša ya Jehofa ka sebete, ba bangwe ba rata go kwa ka ditšhegofatšo tša Mmušo, eupša ga ba arabele ka tebogo, ya ba barutiwa gomme ba tsenela modiro wa puno.
10, 11. Go ile gwa dirwa eng seripa-gareng sa mathomo sa lekgolo la bo-20 la nywaga bakeng sa go phatlalatša molaetša wa rena wo o phološago bophelo, gomme ka mafelelo afe?
10 Ka lehlakoreng le lengwe, ba bantši ba arabetše gabotse modirong wa puno gomme ba bile le karolo go tsebatšeng melaetša ya Modimo. Ka mohlala, nakong ya lelokelelo la dikopano tša Bokriste go tloga ka 1922 go fihla ka 1928, melaetša ya kahlolo tshepedišong e kgopo ya Sathane e ile ya tsebatšwa ka tsela e kwagalago. Diteišene tša radio di ile tša gaša dikahlolo tše di ilego tša newa dikopanong tšeo. Ka morago ga moo, batho ba Modimo ba ile ba aba dikopi tše di gatišitšwego tša dikahlolo tše ka dimilione.
11 Mafelelong a bo-1930, mohuta o mongwe wa go nea bohlatse o ile wa bulega—megwanto ya tsebišo. Mathomong, batho ba Jehofa ba be ba atha dipampiri tšeo di bego di tsebiša dipolelo tša phatlalatša. Ka morago ba ile ba atha dipampiri tšeo di nago le mantšu a bjalo ka “Bodumedi ke moreo le kgwebo ya bofora” le “Hlankela Modimo le Kriste Kgoši.” Ge ba be ba gwanta ditarateng, ba ile ba goga kgahlego ya bao ba fetago ka tsela. Ngwanabo rena yo a bego a e-ba le karolo ka mehla modirong wo ditarateng tša leema-ema tša London, Engelane, o hlalositše gore, ‘se se dirile mo gontši go dira gore Dihlatse tša Jehofa di tsebje le go di dira gore di be le sebete.’
12. Go tlaleletša melaetšeng ya Modimo ya kahlolo, re ile ra tšweletša eng bodireding bja rena gomme ke bomang bao ga bjale ba lego boteeng go boleleng ditaba tše dibotse?
12 Ge re dutše re tsebatša melaetša ya kahlolo ya Modimo, re bile re bontšha dibopego tše di kgahlišago tša molaetša wa Mmušo. Go nea bohlatse ga rena ka sebete lefaseng go re thuša go tsoma bao ba swanelegago. (Mateo 10:11) Bontši bja ditho tša mafelelo tša sehlopha se tloditšwego di arabetše kgoeletšong ye e matla ya puno ka bo-1920 le bo-1930. Ke moka kopanong ka 1935, go ile gwa tla ditaba tše dibotse tša bokamoso bjo bo šegofaditšwego bakeng sa “lešaba le lexolo” la “dinku tše dingwê” lefaseng la paradeise. (Kutollo 7:9; Johane 10:16) Lešaba le etše hloko melaetša ya Modimo ya kahlolo gomme la ba gotee le batlotšwa go boleleng ditaba tše dibotse tše di phološago bophelo.
13, 14. (a) Re ka hwetša khomotšo efe go Psalme 126:5, 6? (b) Go tla direga’ng ge e ba re tšwela pele re bjala le go nošetša?
13 Mantšu ao e lego a homotšago kudu go babuni modirong wa Modimo, kudu-kudu bao ba tlaišwago, ke ao a hwetšwago go Psalme 126:5, 6, a rego: “Ba xo byala ka mexôkxô ba tlo buna ka mekxolokwane. Xo ya ba ya bà lla, ba swere peu ba byala; xo boa ba tlo boa ka mekxolokwane, bà rwele dingata tša bôná.” Mantšu a mopsalme ao a lego mabapi le go bjala le go buna a bontšha tlhokomelo le tšhegofatšo tša Jehofa go mašaledi ao a ilego a tšwa bokgobeng Babele ya bogologolo. Ba be ba thabile kudu ge ba be ba lokollwa, eupša ba ka ba ba be ba lla ge ba be ba bjala peu mmung wa lekwala woo o sa kago wa lengwa nakong ya nywaga e 70 ge ba le bothopša. Lega go le bjalo, bao ba ilego ba tšwela pele ka go bjala ga bona le mediro ya go aga ba ile ba thabela dienywa le kgotsofalo mošomong wa bona.
14 Re ka rothiša megokgo ge re lekwa goba ge e ba rena goba badumedi-gotee le rena ba tlaišwa ka baka la toko. (1 Petro 3:14) Modirong wa rena wa puno re ka ba re bile le mathata mathomong ka gobane go be go bonagala re se na selo seo re ka se šupago bakeng sa maiteko a rena bodireding. Eupša ge re tšwela pele re bjala le go nošetša, Modimo o tla mediša dilo gomme gantši e be go feta kamoo re letetšego ka gona. (1 Ba-Korinthe 3:6) Se se bontšhwa gabotse ke mafelelo a go aba ga rena Dibeibele le dikgatišo tša Mangwalo.
15. Nea mohlala wa mohola wa dipuku tša Bokriste modirong wa puno.
15 Ela hloko mohlala wa monna yo a bitšwago Jim. Ge mmagwe a be a e-hwa, gare ga dilo tša gagwe o ile a hwetša kopi ya puku ya Life—How Did It Get Here? By Evolution or by Creation? * O ile a e bala ka kgahlego. Poledišanong ya gagwe le Hlatse yeo e ilego ya kopana le yena setarateng, Jim o ile a dumela gore go dirwe leeto la go boela gomme se se ile sa lebiša thutong ya Beibele. Jim o ile a dira tšwelopele ya moya kapejana, a ineela go Jehofa gomme a kolobetšwa. O ile a botša ditho tše dingwe tša lapa la gabo ka seo a ithutilego sona. Ka baka la se, kgaetšedi ya gagwe le ngwanabo e ile ya ba Dihlatse tša Jehofa gomme ka morago Jim o ile a thabela tokelo ya go hlankela e le moithapi wa nako e tletšego Bethele ya London.
Ba a Tlaišwa Eupša ba Thabile
16. (a) Ke ka baka la’ng go bile le katlego modirong wa puno? (b) Jesu o neile temošo efe mabapi le mafelelo a ditaba tše dibotse, eupša re boledišana le batho ka boemo bofe bja kgopolo?
16 Ke ka baka la’ng go bile le katlego e kgolo gakaalo modirong wa puno? Ka gobane Bakriste ba tloditšwego le bagwera ba bona ba ile ba ela hloko ditaelo tša Jesu tšeo di rego: “Se ke Le botšaxo sôna lefsifsing, se boleleng seetšeng; se Le se kwaxo Lè sêbêlwa tsebeng Le se xoêlêlê Lè le seokamong.” (Mateo 10:27) Lega go le bjalo, re ka letela mathata ka gobane Jesu o lemošitše gore: “Ngwana-bô-motho ó tlo bolaiša ngwan’abô, ’me tata-xo-motho ó tlo bolaiša ngwana wa xaxwe; ’me bana ba tlo tsoxêla batswadi matla ba ba bolaiša.” Jesu o ile a tšwela pele ka gore: “Le se kê la re ke tlile xo byala khutšô lefaseng; xa k’a tla xo byala khutšô, ke tliša lerumô.” (Mateo 10:21, 34) Jesu ga se a fo rera ka boomo go aroganya malapa. Eupša ditaba tše dibotse ka dinako tše dingwe di bile le mafelelo ao. Se se swanago ke sa therešo ka bahlanka ba Modimo lehono. Ge re etela malapa, boikemišetšo bja rena ga se go aroganya lapa. Kganyogo ya rena ke gore yo mongwe le yo mongwe a thabele ditaba tše dibotse. Ka gona, re leka go boledišana le ditho ka moka tša lapa ka tsela e botho le ya kwelobohloko yeo e dirago molaetša wa rena gore e be o kgahlišago go bao “ba hlaoletšwexo bophelô byo bo sa felexo.”—Ditiro 13:48.
17. Ke bjang bao ba thekgago bogoši bja Modimo ba arogilego gomme mohlala o tee wa se ke ofe?
17 Molaetša wa Mmušo o hlaotše bao ba thekgago bogoši bja Modimo. Ka mohlala, ela hloko kamoo barapedi-gotee le rena ba ilego ba itlhaola e le bao ba fapanego ka gobane ba ile ‘ba ntšhetša Kesara tše e lego tša Kesara eupša ba ntšhetša Modimo tše e lego tša Modimo’ mehleng ya Bosošalise bja Setšhaba kua Jeremane. (Luka 20:25) Ka go fapana le baetapele ba bodumedi le bao ba ipitšago Bakriste ka leina bao ba kopanelago le dikereke tša Bojakane, bahlanka ba Jehofa ba ile ba ema ka go tia, ba gana go roba melao ya motheo ya Beibele. (Jesaya 2:4; Mateo 4:10; Johane 17:16) Moprofesara Christine King, mongwadi wa puku ya The Nazi State and the New Religions, o itše: “Mmušo wa [Nazi] ga se wa ka wa atlega feela malebana le Dihlatse, ka gobane gaešita le ge go ile gwa bolawa tše dikete, modiro o ile wa tšwela pele gomme ka May 1945 mokgatlo wa Dihlatse tša Jehofa o be o sa dutše o le gona mola Bosošalise bja Setšhaba bo be bo se gona.”
18. Ke boemo bofe bja kgopolo bjo batho ba Jehofa ba nago le bjona go sa šetšwe tlaišo?
18 Sa bohlokwa kudu ke boemo bja kgopolo bjo bo bontšhwago ke batho ba Jehofa ge ba lebeletšane le tlaišo. Gaešita le ge babuši ba ka kgahlišwa ke tumelo ya rena, ba makatšwa ke go se be le bonaba goba lehloyo le le tseneletšego ga rena. Ka mohlala, Dihlatse tša baphologi ba Polao e Sehlogo gantši di bolela ka lethabo le kgotsofalo ge di naganišiša ka diphihlelo tša tšona. Di a tseba gore Jehofa o ile a di nea “matla a maxolo.” (2 Ba-Korinthe 4:7) Batlotšwa gare ga rena ba kgonthišeditšwe gore ‘maina a bona a ngwadilwe kua magodimong.’ (Luka 10:20) Kgotlelelo ya bona e tšweletša kholofelo ye e sa lebišego manyaming, gomme babuni ba botegago bao ba nago le ditebelelo tša lefaseng ba na le kgodišego e swanago.—Ba-Roma 5:4, 5.
Kgotlelela Modirong wa Puno
19. Ke mekgwa efe yeo e atlegago yeo e dirišitšwego bodireding bja Bokriste?
19 Ga go tsebege gore Jehofa o tla re dumelela go tšwela pele ka lebaka le lekaakang go ba le karolo modirong wa puno wa seswantšhetšo. Go sa dutše go le bjalo, re swanetše go dula re gopola gore babuni ba na le mekgwa ya go lebanya bakeng sa go dira modiro wa bona. Ka mo go swanago, re ka kgodišega gore go botega ga rena ka go diriša ditsela tše di lekilwego tša boboledi go tla itlhatsela e le mo go atlegago. Paulo o boditše Bakriste-gotee le yena gore: “Ke a Le rapêla, ke re Le bê baetši ba-ka.” (1 Ba-Korinthe 4:16) Ge Paulo a be a kopana le bagolo ba ba-Efeso kua Melito, o ile a ba gopotša gore ga se a gogela morago go ba ruta “phuthexong le malapeng.” (Ditiro 20:20, 21) Mogwera wa Paulo e lego Timotheo o ile a ithuta mekgwa ya moapostola gomme ka go rialo o be a ka kgona go tlwaelanya ba-Korinthe le yona. (1 Ba-Korinthe 4:17) Modimo o ile a šegofatša mekgwa ya Paulo ya go ruta, bjalo ka ge a tla šegofatša kgotlelelo ya rena go ruteng ditaba tše dibotse phatlalatša ka ntlo le ntlo, ka maeto a go boela, ka dithuto tša magae tša Beibele le ge e le kae moo batho ba ka hwetšwago gona.—Ditiro 17:17.
20. Jesu o ile a bontšha bjang gore puno e kgolo ya moya e be e sa tla, gomme se se itlhatsetše bjang go ba sa therešo nywageng ya morago bjale?
20 Ka morago ga go nea bohlatse go mosadi wa Mosamaria kgaufsi le Sikara ka 30 C.E., Jesu o ile a bolela ka puno ya moya. O ile a botša barutiwa ba gagwe gore: “Lebêlêlang Le bônê mašemo, xobane a šetše a šweufaletše xo bunwa. Mmuni ó šetše a tšea moputsô, ’me ó kxobêlêla bophelô byo bo sa felexo dienywa, xore mobyadi le mmuni ba thabê xa-mmôxô.” (Johane 4:34-36) Mohlomongwe Jesu o be a šetše a bone mafelelo a go gahlana ga gagwe le mosadi wa Mosamaria, ka gobane ba bantši ba be ba bontšha tumelo go yena ka baka la bohlatse bja gagwe. (Johane 4:39) Nywageng ya morago bjale, dinaga tše di fapa-fapanego di ile tša tloša dithibelo go Dihlatse tša Jehofa goba di di neile tumelelo ya molao, ka gona tša bula mašemo a mafsa bakeng sa puno. Mafelelo a se ke gore puno e kgolo ya moya e tšwela pele. Ge e le gabotse, lefaseng ka bophara ditšhegofatšo tše di humilego di bonwa ge re tšwela pele ka lethabo go ba le karolo punong ya moya.
21. Ke ka baka la’ng re na le lebaka la go tšwela pele re le badiri ba thabilego?
21 Ge mabele a butšwitše gomme a loketše go bunwa, bašomi ba swanetše go šoma ka go akgofa. Ba swanetše go šoma ka ntle le go senya nako. Lehono, re swanetše go šoma ka mafolofolo gomme ka kgopolo ya go akgofa ka gobane re phela ‘lebakeng la bofelo.’ (Daniele 12:4) Ee, re lebeletšana le diteko, eupša go na le puno e kgolo kudu ya barapedi ba Jehofa ye e sa kago ya ba gona pele. Ka gona le ke letšatši la go thaba. (Jesaya 9:3) Ka gona, bjalo ka bašomi ba thabilego anke re tšweleng pele modirong wa puno!
[Mengwalo ya ka tlase]
^ ser. 15 E gatišitšwe le go abja ke Dihlatse tša Jehofa.
O tla Araba Bjang?
• Mong wa puno o arabile bjang kgopelo ya go kgopela badiri ba oketšegilego?
• Gaešita le ge re le “ba ba hloilwexo,” re boloka tshekamelo efe?
• Ke ka baka la’ng re thaba gaešita le ge re tlaišwa?
• Ke ka baka la’ng re swanetše go kgotlelela modirong wa puno ka kgopolo ya go akgofa ga mehla?
[Dipotšišo tša Thuto]
[Diswantšho go letlakala 17]
Bao ba tšeago karolo punong ya moya ba thekgwa ke barongwa
[Seswantšho go letlakala 18]
Megwanto ya tsebišo e ile ya lebiša tlhokomelo molaetšeng wa Mmušo go ba bantši
[Seswantšho go letlakala 18]
Re a bjala le go nošetša, eupša Modimo o a mediša